Tu laa ziuulaʼdxiʼ guʼndaʼ tema riʼ
1. Ora guidúʼndanu ca revista stinu, xi naquiiñeʼ guiníʼ íquenu ne xiñee.
1 Ca revista Torre stiʼ ni rapa ne ¡Despertad! ricá cani para guiráʼ binni guidxilayú. Nga runi redané cani stale tema. Ora guidúʼndanu cani, galán guiníʼ íquenu tu laa ziuulaʼdxiʼ guʼndaʼ cada tema stícani ne gúninu stipa pur gusaananenu cani binni.
2. Xi tema zeeda lu ca revista stinu ñuulaʼdxiʼ xcaadxi binni ñuundaʼ.
2 Ñee cusiene revista Torre stiʼ ni rapa xiixa tema zeeda lu Biblia ni guninenu tuuxa ni runinenu dxiiñaʼ la? Ñee maʼ bíʼyanu xiixa tema ni caníʼ de familia ni zanda gacané tuuxa binnilídxinu la? Ñee nánnanu de tuuxa ni cá ique cheʼ xiixa lugar ni maca bisiene revista ¡Despertad! la? Ñee nuu xiixa revista ni zanda gusaananenu binni ra nuu xiixa negocio o ndaaniʼ xiixa oficina stiʼ gobiernu neza ra rucheechenu diidxaʼ la? Casi ca lugar ra rápacabe ca binnigola zanda gusaananu ti revista ni caníʼ de ca guendanagana ridxaagalú ca binni ni maʼ nagola. Ne pa caníʼ ti revista de guendaquéiquiiñeʼ, ñee cadi jma galán gusaananu ni ca lugar ra nuu ca tribunal o ra nuu ca puliciá la?
3. Bizeeteʼ ni bizaaca ti guendaxheelaʼ ni rusihuinni pabiáʼ risaca gusaananenu binni ca revista stinu ni caníʼ de xiixa tema ni ziuulaʼdxiʼ binni.
3 Ni zabeendunu. Biindaʼ si ti guendaxheelaʼ de Sudáfrica tema ni láʼ «Cómo criar hijos responsables» ni biree lu ¡Despertad! stiʼ octubre 2011 gulídxicabe pur teléfono 25 scuela ni nuu neza ra rucheechecabe diidxaʼ. Pur ni bíʼnicabe que 22 scuela que gucuaa revista que ne gudiizicaʼ ni lu ca baʼduʼ scuela que. Zacaca biʼniʼ stiʼ guendaxheelaʼ de guidxi ca, laaca bisaanacaʼ ca revista ca ndaaniʼ ca scuela ni nuu neza ra rucheechecaʼ diidxaʼ. Ndaaniʼ tobi de ca scuela ca dede biquiiñeʼ ca maestru ca revista riʼ lu ca programa sticaʼ guiráʼ semana para gusiidicaʼ ca baʼduʼ scuela ni zeeda luni ne laaca bidiicabe ni laacaʼ para gúʼndacaʼ. Guyuiʼné guendaxheelaʼ riʼ binnigola ni riganna ca neza binni ridagulisaa ni bizaacacaʼ, ne laa guluu gana xcaadxi xpinni Cristu gúnicaʼ cásica bíʼnicabe que. Qué nindaa, stale binni gunabaʼ revista que Betel ni runi tender guidxi que, ngue runi gupa xidé biʼniʼ imprimírcabe revista que sti biaje.
4. Xiñee racaláʼdxinu guiaanané guiráʼ binni ca revista stinu.
4 Ca revista stinu rusiene cani xiñee cayaca stale cosa lu Guidxilayú riʼ ne rucaa cani binni guʼndaʼ Biblia ne ganna de Reinu stiʼ Dios. Ne ca revista riʼ si nga racané binni guilá (Is. 52:7). Nga runi, pa ñanda si guiráʼ binni ñuundaʼ cani. Ne para ganda gaca nga la? galán guinabadiidxanu laca laanu: «Tu laa ziuulaʼdxiʼ guʼndaʼ tema riʼ».