Ñee cayúniluʼ stipa pur gápaluʼ xiixa dxiiñaʼ ndaaniʼ neza binni ridagulisaa la?
1. Dede padxí maʼ zanda guni ti hombre ni naca xpinni Cristu ni na ca diidxaʼ zeeda lu 1 Timoteo 3:1.
1 Lu 1 Timoteo 3:1 cayeeteʼ: «Pa nuu tuuxa cá ique gaca xaíque sti ca xpinni Cristu la? jneza ni cá ique guni». Ca diidxaʼ ca caguu cani gana ca hombre ni naca xpinni Cristu para gúnicaʼ stipa pur guicaacaʼ xiixa dxiiñaʼ ndaaniʼ neza binni ridagulisaa. Ñee caquiiñeʼ cuézaluʼ guiniisiluʼ la? Coʼ. Pa ganda guzululuʼ dede nahuiiniluʼ la? jmaruʼ si galán. Dede yanna maʼ zanda guiziidiluʼ gúniluʼ dxiiñaʼ ndaaniʼ xquidxi Dios ne gánnaluʼ xi caquiiñeʼ gúniluʼ para ganda gácaluʼ siervu ministerial (1 Tim. 3:10). Pa maʼ guyuunísaluʼ la? Guidúʼyanu xi zanda gúniluʼ para gacaneluʼ ndaaniʼ neza binni risagulisaa.
2. Xi caquiiñeʼ gúniluʼ para chuuláʼdxiluʼ gacaneluʼ, ne gunáʼ nga caadxi cosa ni zanda gúniluʼ para gacaneluʼ xcaadxi xpinni Cristu.
2 Biyubi modo gacaneluʼ. Cadi guicá íqueluʼ gácaluʼ tuuxa lade ca binni ridagulisaa para gusisácacabe lii, ni jma galán guʼnuʼ nga gucaa íqueluʼ gúniluʼ xhiiñaluʼ jneza, gúniluʼ dxiiñaʼ ni ganda gacané xcaadxi binni. Ne para ganda guʼnuʼ nga caquiiñeʼ gusihuínniluʼ riuuláʼdxiluʼ gacaneluʼ ca xpinni Cristu. Ne sti cosa ni zanda gacané lii nga guiníʼ íqueluʼ ejemplu ni bisaana Jesús (Mat. 20:28; Juan 4:6, 7; 13:4, 5). Pa raca nagana para gusihuínniluʼ rizaaláʼdxiluʼ binni la? gunabaʼ Jiobá gacané lii guʼnuʼ ni (1 Cor. 10:24). Zanda gacaneluʼ ca xpinni Cristu ni huará o cani maʼ nagola. Laaca zanda gacaneluʼ ora raca chaahuiʼ Yoo stiʼ Reinu, casi ugaluʼ ca guixi gaʼ nuu raqué ne gusialuʼ. Laaca galán guiniʼluʼ zanda gutiidiluʼ xiixa libana lu Scuela stiʼ cani Rucheeche Diidxaʼ, pa chuʼ tu guiaadxaʼ. Pa gúniluʼ zacá, zudiiluʼ cuenta riuu binni nayecheʼ ora gacané xcaadxi (Hech. 20:35).
3. Xi jma naquiiñeʼ gúniluʼ para gacaneluʼ ca binni ridagulisaa, ne ximodo zanda gúniluʼ ni.
3 Biʼniʼ stipa pur guiníʼ íqueluʼ casi riníʼ ique Jiobá ne Jesús. Cadi caquiiñeʼ si ganna binni xiixa dxiiñaʼ para ganda gacané ndaaniʼ neza binni ridagulisaa, sínuque napa xidé gácabe ti binni ni riníʼ ique casi riníʼ ique Jiobá ne Jesús (1 Cor. 2:15, 16). Ne rusihuínnibe ca guenda ni rudii espíritu stiʼ Dios lu xquendanabánibe (Gál. 5:22, 23). Rúnibe xhiiñaʼ Reinu primeru ne rucheechebe diidxaʼ né stale gana (Mat. 6:33). Para ganda guiníʼ íqueluʼ casi riníʼ ique Jiobá ne Jesús, napa xidé quíxheluʼ ximodo guʼnuʼ ca ndiʼ: gúʼndaluʼ Biblia guiráʼ dxi, gúʼndaluʼ guiráʼ ca tema ni riree lu revista Torre stiʼ ni rapa ne ¡Despertad! ne gúʼndaluʼ cani chitiidiʼ lu ca guendaridagulisaa ca dede ante ne cadi guiaadxaluʼ cani (Sal. 1:1, 2; Heb. 10:24, 25). Dxi gudxi Pablu Timoteu xhamigu guni stipa pur gaca ti binni ni riníʼ ique casi riníʼ ique Jiobá ne Jesús, gúdxibe laa: «Biiya usiidi lu ni jneza» (1 Tim. 4:15, 16). Nga runi, ora chigutiidiluʼ ti libana lu Scuela stiʼ cani Rucheeche Diidxaʼ la? galán guʼndaʼ chaahuiluʼ ni ne ngaca nga naquiiñeʼ guʼnuʼ ante chigucheecheluʼ diidxaʼ. Biʼniʼ stipa pur guiaaluʼ gucheecheluʼ diidxaʼ cásica maʼ biaaluʼ gúniluʼ xcaadxi cosa. Bicaa ique gúniluʼ jma lu xhiiñaʼ Dios —casi gácaluʼ precursor, guʼnuʼ dxiiñaʼ Betel o cheluʼ Scuela ra rié ca hombre ni caʼruʼ guichaganáʼ para guiziidicaʼ de Biblia— ne biʼniʼ stipa pur ugaandaluʼ cani quixheʼ íqueluʼ ca. Pa guiníʼ íqueluʼ casi riníʼ ique Jiobá ne Jesús la? zacanécani lii guixéleluʼ de cani «cadi jneza riguba yu cani nahuiini ruʼ» (2 Tim. 2:22).
4. Xiñee risaca guʼnuʼ dxiiñaʼ gudiicabe lii.
4 Biʼniʼ dxiiñaʼ ni gudiicabe lii. Lu primé siglu que guca ti gubiña ni bininá ca binni ridagulisaa. Pur ngue gupa xidé gulí ca apóstol que caadxi «hombre [...] ni nanna binni runi jneza», para quíʼzicaʼ ni gó ca xpinni Cristu. Cumu nanna ca apóstol que zuni ca hombre que xhiiñacaʼ jneza la? bisaanacabe dxiiñaʼ que lu nacaʼ para gunda bíʼnicabe xcaadxi cosa jma risaca (Hech. 6:1-4). Xi rusiidiʼ ndiʼ lii yaʼ. Rusiidini lii gúniluʼ ca dxiiñaʼ gudiicabe lii jneza. Yenanda ejemplu stiʼ Noé, purtiʼ laa biʼniʼ guiráʼ ni gudxi Jiobá laa ora bizáʼ arca que (Gén. 6:22). Galán nga guni binni xhiiñaʼ jneza purtiʼ nabé rusisaca Jiobá ni ne rusihuínnini maʼ caniisi binni lu stiidxaʼ Dios (1 Cor. 4:2; biindaʼ cuadru ra na «Nabé risaca gucaa ique binni guiziidiʼ»).
5. Xiñee naquiiñeʼ guni ca hombrehuiiniʼ stipa pur gacanecaʼ ca binni ridagulisaa.
5 Casi maca guníʼ Jiobá que, yanna nga jma cadxela binni ni riuulaʼdxiʼ guiziidiʼ de Dios (Is. 60:22). Guiráʼ iza riuunisa biaʼ 250,000 binni. Cumu cadale binni ndaaniʼ xquidxi Jiobá la? caquiiñeʼ hombre ni riníʼ ique casi riníʼ ique Jiobá ne Jesús ne ni ganda gacané lade ca binni ridagulisaa. Qué huayuu dxi gaca stale dxiiñaʼ ndaaniʼ xquidxi Jiobá casi cayácani yanna riʼ (1 Cor. 15:58). Nga runi, ca hombrehuiiniʼ ni racalaʼdxiʼ gacané ca binni ridagulisaa, galán nga ni cá íquecaʼ.
[Ca diidxa’ ni zeeda lu yaza 2]
Cumu cadale binni ndaaniʼ xquidxi Jiobá la? caquiiñeʼ hombre ni riníʼ ique casi riníʼ ique Jiobá ne Jesús ne ni ganda gacané lade ca binni ridagulisaa.
[Cuadru ni zeeda lu yaza 3]
Nabé risaca gucaa ique binni guiziidiʼ
Nabé racané ca binnigola ca hombrehuiiniʼ ora gudiicabe laacaʼ gúnicaʼ xiixa dxiiñaʼ ne gusiidicabe laacaʼ gúnicaʼ ni. Ti binnigola ni riganna ca neza binni ridagulisaa guníʼ: «Ti dxi, gurieniáʼ ti ni rucheeche diidxaʼ lu plataforma biluxe si guendaridagulisaa, canieniáʼ laa para cuaaʼ gana laa. Málasi biiyaʼ zuhuaa ti hombre huiiniʼ gaxha de ra zúbadu que, zacaxaʼ nuube guinieniáʼ laabe. Tihuaʼ cabézabe gúnibe dxiiñaʼ bidiicabe laabe: guni aspirarbe lu plataforma ora guiluxe guendaridagulisaa. Bixhózebe ne jñaabe maʼ cabézacaʼ laabe para chibiʼcaʼ, peru laabe qué nabe chebe purtiʼ rápabe gana gúnibe xhiiñabe. Ora gunnaʼ ngue nuube gúnibe, guizáʼ biecheʼ ne biétedu raqué». Despué guniʼbe: «Ca binnigola ni nuu ndaaniʼ neza binni ridagulisaa ca nuucaʼ listu para gacanecaʼ ca hombrehuiiniʼ nuu racá, ne rihuinni zacá ni purtiʼ rudiicabe laacaʼ gúnicaʼ xiixa dxiiñaʼ ndaaniʼ neza binni ridagulisaa. Nga runi, cada biaje chigannaʼ neza binni ridagulisaa que riguucabe xquiʼchiʼ tuuxa hombrehuiiniʼ para guihuinni pa zanda gácacaʼ siervu ministerial».