Gucáʼ íquenu gacanenu binni gaca xpinni Cristu

1. Ximodo zanda guilá binni.

¹ Biaʼ dxiiñaʼ guca lu iza 2014 rusihuinni ni cucheeche xquidxi Dios ca diidxaʼ nacubi ne galán stiʼ Reinu né stale gana ne guiráʼ stipa stiʼ (Mat. 24:14). Yanna nga jma cayanna binni ni rusiidiʼ Biblia purtiʼ careeche diidxaʼ de yoo pur yoo, cayaca campaña para guiaaziʼ guiʼchiʼ o invitación ne careeche diidxaʼ ra ridiʼdiʼ stale binni. Peru para ganda guilá ca binni riʼ la? naquiiñeʼ gacanenu laacaʼ gácacaʼ discípulo stiʼ Jesús ra gusíʼdinu laacaʼ cani dxandíʼ zeeda lu Biblia (1 Tim. 2:4).

2. Xi naquiiñeʼ guinabadiidxanu ti cadi guiaandaʼ laanu gábinu binni pa zadúʼndanenu laa Biblia.

² Cadi guiaandaʼ laanu gábinu binni pa zadúʼndanenu laa Biblia. Pa chuulaʼdxiʼ ti binni guiziidiʼ, ñee ruyúbinu modo guinábanu datu stiʼ ne rúninu stipa guinínenu laa nagueendaca para gúʼyanu pa zaná gúʼndanenu laa Biblia la? Padxí nga últimu biaje biluinu tuuxa ximodo ridúʼndanenu binni Biblia primé biaje yegánnanu laa. Padxí nga últimu biaje gúdxinu ti binni ni risaananu revista ra nuu pa zadúʼndanenu laa Biblia. Ñee hualuinu cani runinenu dxiiñaʼ o cani rinenu scuela, ca xpesínunu, binnilídxinu ne xcaadxi binni runibiaʼnu videu Xiñee naquiiñeʼ gúʼndaluʼ Biblia ne Ximodo ridúʼndanedu binni Biblia la? Ora riquiiñenu exhibidor para gucheechenu diidxaʼ, ñee rábinu guiráʼ cani ricaa xiixa publicación ni rudíʼnenu estudiu laaca zanda guidúʼndanenu laacaʼ Biblia sin quíxecaʼ la?

3. Xi caquiiñenu para gusiidiʼ chaahuinu binni ni dxandíʼ.

³ Caquiiñenu gacané Jiobá ne Jesús laanu. Dxi biseendaʼ Jesús ca xpinni chigusiidicaʼ guiráʼ xixé binni, biquiiñeʼ diidxaʼ «laché». Sicaríʼ nga bisihuínnibe naquiiñeʼ gaca dxiiñaʼ riʼ né stale gana ne guiale de ndaaniʼ ladxidoʼno gúninu ni. Peru qué nusaanabe laanu stúbinu, sínuque bidii stiidxabe qué zaxélebe de laanu (Mat. 28:19, 20). Jiobá laaca racané laanu. Ximodo yaʼ. Rudiibe laanu espíritu santu stibe. Ne cadi nga si, laaca rudiibe laanu ni caquiiñenu para gúninu xhiiñabe ne ruluiʼbe laanu ximodo gusíʼdinu xcaadxi binni ni dxandíʼ (Zac. 4:6; 2 Cor. 4:7). Zanda guinábanu Dios gacané laanu chuuláʼdxinu gúninu dxiiñaʼ nabé risaca riʼ ne gudii stipa laanu gúninu ni (Filip. 2:13).

4. Xiñee naquiiñeʼ gucáʼ íquenu gacanenu binni gaca xpinni Cristu.

⁴ Guizáʼ nayecheʼ riuʼnu ora rucheechenu ca diidxaʼ nacubi ne galán. Peru jma nayecheʼ ziuʼnu pa gacanenu tuuxa binni guiziidiʼ ni dxandíʼ rusiidiʼ Biblia ne gacanenu laa sané laanu lu neza ra zacaanu «enda nabani» (Mat. 7:14; 1 Tes. 2:19, 20). Ne pa gucáʼ íquenu gacanenu binni gaca xpinni Cristu la? zusiéchenu Jiobá, purtiʼ laa «qué racalaʼdxi [...] initilú nin tobi», sínuque cabeza gaca arrepentir guiráʼ binni (2 Ped. 3:9).