Chuʼnu listu para guzulú gúʼndanenu binni Biblia
1. Xi naquiiñeʼ gúninu pur ni na Mateo 28:19, 20.
1 Ndiʼ nga ni biʼniʼ mandar Jesús laanu: «Lachiusiidi irá xixé binni sa nanda naa» (Mat. 28:19, 20). Nga runi rápanu gana chuʼnu listu para guzulú guidúʼndanenu binni de Biblia ora tiica, cadi ca dxi si ni nexheʼ para gúninu ni. Ca conseju zeeda raríʼ zanda gacanécani lii.
2. Tuu nga cani zanda gábinu laacaʼ pa zadúʼndanenu laacaʼ de Biblia.
2 Gudxi binni pa zuundaneluʼ laa. Pa gatigá gábinu binni pa zadúʼndanenu laacaʼ de Biblia la? jma nagueenda zadxélanu tuuxa ni guidúʼndanenu (Ecl. 11:6). Ñee maʼ huayuundaneluʼ tuuxa de Biblia primeca biaje guiníʼneluʼ laa la? Ti neza binni ridagulisaa de Estados Unidos gudíxhecaʼ gúnicaʼ zacá guidubi ti beeu. Xi guleendúcabe yaʼ. ¡Bidxélacabe 42 binni guʼndanécabe Biblia! Ne laaca nuu ca binni ni rigannuʼ ni riuulaʼdxiʼ gucaadiaga; cadi guiníʼ íqueluʼ maʼ nánnacabe ridúʼndanenu binni de Biblia. Ñee zanda gaʼbuʼ laacabe pa zuundaneluʼ laacabe de Biblia sti biaje cheluʼ ra nuucabe la? Qué zunítiluʼ gastiʼ pa qué nácabe, peru cadi gusaana de gacaneluʼ laacabe chuuláʼdxicabe guiziidicabe jma. Sti cosa ni zanda guʼnuʼ nga guinabadiidxaluʼ ca vecinu stiluʼ, ca binnilídxiluʼ, cani runineluʼ dxiiñaʼ ne cani rineluʼ scuela pa ñuuláʼdxicaʼ nusiidiluʼ laacaʼ jma de lu Biblia. Ñee napa ca binni ruundaneluʼ Biblia ti xhamígucaʼ o ti binnilídxicaʼ ni ñuulaʼdxiʼ ñuundaneluʼ laacaʼ la?
3. Xi zanda gacané laanu para guzulú guidúʼndanenu binni de Biblia, ne pora zanda iquiiñenu ni.
3 Zanda gacané tratadu riʼ lii. Tratadu ni láʼ Ñuuláʼdxiluʼ ñánnaluʼ xi riníʼ Biblia de cani huanabadiidxaluʼ la? zanda iquiiñeluʼ ni para guzulú gúʼndaneluʼ binni de Biblia. Zanda gusaananeluʼ ni binni neca qué nicaacaʼ ti libru o ti revista. Zanda iquiiñeni ora gucheecheluʼ diidxaʼ ra nuu stale negocio, lu calle, pur carta, ora chigannuʼ binni sti biaje ne ora qué guidxélaluʼ binni ralidxi. Galán pa chineluʼ ni ora maʼ zeluʼ ndaaniʼ carru de pasaje, ora chisiluʼ ne ora cheluʼ dxiiñaʼ. Lu últimu yaza stini cusiene ximodo ridúʼndanenu binni de Biblia ne laaca cá libru Xipeʼ ndiʼ cusiidiʼ Biblia lu yaza ca.
4. Ximodo zanda iquiiñenu tratadu Ñuuláʼdxiluʼ ñánnaluʼ xi riníʼ Biblia para guzulú gúʼndanenu binni Biblia.
4 Ximodo zanda iquiiñeluʼ ni. Despué de gudiiluʼ ti tratadu binni ca, biluíʼ laabe ca guendarinabadiidxaʼ ni zeeda lu primé yaza stini ne guníʼ: «Gunáʼ de cani zeeda raríʼ ñuuláʼdxiluʼ ñánnaluʼ jma». De racá biindané laabe ni cacabi tratadu riʼ de ni racaláʼdxibe gánnabe ne laaca biindané laabe ni cá lu últimu yaza stini, ra cá ximodo ridúʼndanenu binni Biblia. Despué biluíʼ xi capítulo stiʼ libru Xipeʼ ndiʼ cusiidiʼ Biblia cusiene jma de laani ne biaananeca laabe padxí guibiguétaluʼ sti biaje para guiniʼtu jma de tema ca.
5. Xiñee naquiiñeʼ chuʼnu listu para guzulú gúʼndanenu binni Biblia.
5 Neza ra rucheechenu diidxaʼ nuuruʼ stale binni ni riuulaʼdxiʼ guiziidiʼ xipeʼ nga cusiidiʼ Biblia. Riéchenu stale nga gacanenu binni chuʼ lu neza ra zacaa guendanabani, ne pa nuunu listu para guzulú gúʼndanenu binni Biblia la? jmaruʼ si ziuʼnu nayecheʼ (Mat. 7:13, 14).