Naca Jesús ti Sumo Sacerdote ni riá binni

1, 2. a) ¿Xi para biseendaʼ Jehová Xiiñiʼ lu guidxilayú riʼ? b) ¿Xi zadúʼyanu lu artículo riʼ? (Hebreos 5:7-9).

RACA biaʼ chupa mil iza, biseendaʼ Jehová Xiiñiʼ ni jma nadxii lu guidxilayú riʼ. ¿Xi para yaʼ? Para gulabe binni de lu náʼ pecadu ne guendaguti ne para cueebe guiráʼ ra maʼ bininá Binidxabaʼ (Juan 3:16; 1 Juan 3:8). Laaca nanna Jehová ra gueeda Jesús lu guidxilayú riʼ zacaneni laa chuʼ listu para gaca ti Sumo Sacerdote ni riá binni, ni caninu nga chuʼbe lugar sticaʼ. Bizulú biʼniʼ Jesús dxiiñaʼ casi Sumo Sacerdote lu iza 29, despué de guyuunisa.a

² Lu artículo riʼ zadúʼyanu pur guiráʼ ni biʼyaʼ ne ni bizaaca Jesús dxi bibani lu guidxilayú riʼ gucaneni laa chuʼ listu para gaca ti Sumo Sacerdote ni riá binni. Risaca guiene chaahuinu ni bizéʼtenu riʼ purtiʼ zacaneni laanu guidxíñanu jma gaxha de Jehová ne guni orarnu laa, dede né ora riuʼnu triste pur ca pecadu ni maʼ bíninu o pur ca cosa ni cadi jneza ni ruquiinde laanu gúninu (biindaʼ Hebreos 5:7-9).

BEEDA XIIÑIʼ DIOS NI JMA NADXII LU GUIDXILAYÚ

3, 4. ¿Ximodo bichaa xquendanabani Jesús dxi beeda lu guidxilayú riʼ?

³ Stale de laanu ruchaa modo nabáninu, nuu tu laa napa xidé chindézacaʼ sti ladu ne chuʼcaʼ zitu de ca xhamígucaʼ ne de familia sticaʼ. Nagana ora rizaaca nga; peru qué zanda guchaaganu guiráʼ ni rizaacanu né guiráʼ ni bizaaca Jesús. Lade guiráʼ ca Xiiñiʼ Dios ni nuu guibáʼ, laabe nga baʼduʼ primé ne ni jma risaca. Ne ante gueedabe lu guidxilayú guizáʼ gunnaxhii Jehová laabe ne guizáʼ bisiéchebe laa purtiʼ juntu bíʼnicabe dxiiñaʼ (Sal. 16:11; Prov. 8:30). Peru lu Filipenses 2:7 riete «bisaanabe guiráʼ ni nápabe» para guibánibe lade binni ruché.

⁴ Laaca galán guiníʼ íquenu ximodo bibani Jesús lu guidxilayú riʼ, gúlebe ndaaniʼ ti familia pobre, ne rihuinni zacá ni pur sacrificiu bidii bixhózebe ne jñaabe Jehová despué de gúlebe (Lev. 12:8; Luc. 2:24). Ne casi peʼ gunna ti rey malu láʼ Herodes maʼ gule Jesús gucalaʼdxiʼ ñuuti laabe. Ne para cadi guizaaca nga la? gupa xidé bixooñelúcabe ne yendézacabe ndaaniʼ guidxi Egipto ti tiempu (Mat. 2:13, 15). ¡Guizáʼ bichaa xquendanabánibe, ¿njaʼ?!

5. ¿Xi biʼyaʼ Jesús dxi guyuu lu guidxilayú riʼ ne ximodo gucané nga laabe chuʼbe listu para gácabe Sumo Sacerdote? (Laaca zanda gúʼyaluʼ imagen ca).

⁵ Dxi guyuu Jesús lu guidxilayú riʼ, biiyabe pabiáʼ cayacaná binni. Biʼniʼ sentirbe pabiáʼ naná nga guniti tuuxa ti binni ni nadxii, ne zándaca biiyabe ra gutiʼ José, bixhózebe ni bisiniisi laabe. Tiempu cayúnibe xhiiñaʼ Dios lu guidxilayú riʼ laaca biiyabe binni ni napa lepra, ni qué ruuyaʼ, ni qué rizá, ni cayuubaʼ ladxidóʼ purtiʼ guti ti xiiñiʼ ne guizáʼ biabe laacaʼ (Mat. 9:2, 6; 15:30; 20:34; Mar. 1:40, 41; Luc. 7:13). Maca dede dxi nuu Jesús guibáʼ biiyabe modo racaná binni peru dxi maʼ nuube lu guidxilayú lade binni ruchee, biene chaahuibe ximodo runi sentir binni (Is. 53:4). Pur guiráʼ ni bíʼyabe ne ni bizaacabe bicaani laabe guiene chaahuibe ni runi sentir binni, ni ruchiiñaʼ laacaʼ ne ni runiná ladxidoʼcaʼ. Cásica guiráʼ binni, laabe laaca guyuube xizaa, bidxágabe ne guyuube triste.

RIENE JESÚS NI CAZAACA BINNI

6. ¿Xi rizíʼdinu de ca ejemplu ni biquiiñeʼ profeta Isaías? (Isaías 42:3).

⁶ Tiempu biʼniʼ Jesús xhiiñaʼ Dios lu guidxilayú riʼ, guizáʼ bisihuínnibe riuube lugar stiʼ ca binni ni qué gapa stipa ne ca ni feu modo runi tratárcabe laacaʼ. Zacá biʼniʼ cumplirbe ti profecía ni bicaa Isaías pur espíritu santu. Lu Stiidxaʼ Dios ni gucuá lu Hebreu ruchaaga ca binni ni napa stipa ne ni nabani galán casi ti jardín ni napa stale guieʼ ne casi yaga naroʼbaʼ ne sicarú (Sal. 92:12; Is. 61:3; Jer. 31:12). Peru ruchaagani ca binni pobre ne zaqueca ca binni ni ruquiichinácabe laacaʼ casi ti ubaguí ni maʼ caluuza ne casi ti mecha ni mayaca guizuíʼ, guiropa cosa bizéʼtenu riʼ huaxiéʼ riquiiñeʼ binni cani (biindaʼ Isaías 42:3). Né ca ejemplu riʼ guníʼ Isaías guizáʼ zannaxhii Jesús ca binni ni rúnicabe menu laacaʼ ne ziabe laacaʼ.

7, 8. ¿Ximodo biʼniʼ cumplir Jesús profecía ni bizeeteʼ Isaías?

⁷ Bisihuinni Mateo biʼniʼ Jesús ni bizeeteʼ profeta Isaías, sicaríʼ bicaabe: «Qué zagúzabe ti ubaguí ni maʼ caluuza, ne qué zusuiʼbe ti mecha ni mayaca guizuíʼ» (Mat. 12:20). Stale de ca milagru ni biʼniʼ Jesús gucanécani ca binni ni feu modo runi tratárcabe laacaʼ o ca ni qué gápacaʼ esperanza pur modo nabánicaʼ. Guiníʼ íquenu ejemplu stiʼ xa hombre ni napa lepra que. ¿Ñee guníʼ íquebe maʼ qué ziuu dxi guiándabe, ne guibiguetaʼ chúʼnebe familia stibe ne ca xhamígube juntu la? (Luc. 5:12, 13). O guiníʼ íquenu xa hombre ni qué runadiaga ne ni qué riníʼ chaʼhuiʼ que. ¿Ximodo biʼniʼ sentirbe ora bíʼyabe cayuíʼ binni diidxaʼ ne laabe qué zanda gúnibe ni? (Mar. 7:32, 33). Peru nuuruʼ xcaadxi cosa ni bizaaca.

⁸ Ca dxi bibani Jesús lu guidxilayú riʼ, stale judíu guníʼ íquecaʼ naca ca guendahuará ne ca discapacidad ca ti castigu stiʼ Dios pur ca pecadu sti bixhoze, stiʼ jñaa o stiʼ binni huará ca, peru cadi jneza ni riníʼ íquecabe ca (Juan 9:2). Ngue runi biʼniʼ sentir ca binni huará o ca ni napa xiixa discapacidad nuucaʼ stúbicaʼ. Peru Jesús bisianda laacabe ne gucané laacabe gápacabe esperanza Dios, zaqué guca cumplir profecía ni bizeeteʼ Isaías. ¿Xi rusiidiʼ ndiʼ laanu yaʼ?

9. ¿Ximodo rusihuinni Hebreos 4:15, 16 naca Jesús ti Sumo Sacerdote ni riá binni?

⁹ (Biindaʼ Hebreos 4:15, 16). Zanda chuʼnu seguru riá Jesús laanu. Diidxaʼ griegu ni guca traducir «zanda guiá» riniʼni zanda guni sentir tuuxa ora stiʼ binni nuu triste ne nuu naná casi ñaca laa peʼ cayuni sentir ni. Ridúʼyanu laaca biquiiñeʼ Pablo diidxaʼ riʼ lu Hebreos 10:34 ora guníʼ naquiiñeʼ guianu ca ni deguyoo. Rusihuinni ca milagru ni biʼniʼ Jesús guizáʼ gucaná ladxidóʼ ora biʼyaʼ cayacaná binni. Qué nusianda diʼ Jesús ca binni riʼ purtiʼ naquiiñeʼ gúnibe ni, sínuque bíʼnibe ni purtiʼ dxandíʼ peʼ rizaaláʼdxibe laacaʼ ne racaláʼdxibe gacanebe laacaʼ. Guzéʼtenu ti ejemplu, ñanda nusiándabe xa hombre ni napa lepra que de zitu. Peru lugar de nga la? guyebe ra nuu ne gudáʼnabe laa. Zándaca ndiʼ nga primé biaje guidxiña tuuxa hombre que ne cánacabe laa. Laaca gúcabe nachaʼhuiʼ ne xa hombre ni qué runadiaga que, guleebe laa lade guiráʼ binni que ne yenebe laa ti lugar ra gastiʼ ruidu ne raqué bisiándabe laa. Ne ora biʼniʼ juzgar ti fariseu ndaaniʼ ladxidóʼ ti gunaa ni guca arrepentir ni gudiibiʼ ñee Jesús ne bicuiidxiʼ ñeebe ne guicha ique, biʼniʼ defender Jesús laabe ne guluu jneza fariseu que (Mat. 8:3; Mar. 7:33; Luc. 7:44). Qué ñuu dxi nucaanáʼ Jesús ca binni huará o ca binni ni biʼniʼ ti pecadu grave, sínuque bidiibe lugar guidxiña ca binni que laabe ne bisihuínnibe pabiáʼ riabe laacaʼ. Nanna dxíchinu ngueca nga ni rúnibe pur laanu.

CHINÁNDANU EJEMPLU STIʼ SUMO SACERDOTE STINU

10. ¿Xi maʼ bidii xquidxi Dios laanu para gacanenu ca binni ni qué runadiaga ne ca ni qué ruuyaʼ para gunibiaʼcaʼ Jehová? (Laaca zanda gúʼyaluʼ ca imagen ca).

¹⁰ Cumu racaláʼdxinu chinándanu ejemplu stiʼ Jesús la? rúninu stipa gusihuínninu nadxiinu binni, riuʼnu lugar sticaʼ ne rianu laacaʼ (1 Ped. 2:21; 3:8). Laanu qué zanda gusiándanu ca binni ni qué runadiaga o ca ni qué ruuyaʼ, peru zanda gacanenu laacabe gunibiáʼcabe Jehová. Guzéʼtenu ti ejemplu, ca publicación ni nápanu para gusíʼdinu binni maʼ bireecani lu jma de ti gayuaa lenguaje de seña. Laaca nápanu publicación ni nuu lu braille lu jma de sesenta idioma ne zaqueca videu ni napa audiodescripción lu jma de ti gayuaa idioma. Nga zacané ca binni ni qué runadiaga ne ca ni qué ruuyaʼ guidxíñacaʼ gaxha de Jehová ne de Xiiñibe.

11. ¿Ximodo zinanda xquidxi Jehová ejemplu stiʼ Jesús? (Hechos 2:5-7, 33; laaca zanda gúʼyaluʼ ca imagen ca).

¹¹ Biasa si Jesús de lade gueʼtuʼ, bindaateʼ espíritu santu luguiáʼ ca discípulo stiʼ para guni predicarcaʼ ca noticia galán lu idioma stiʼ ca binni ni guyé Saa stiʼ Pentecostés (biindaʼ Hechos 2:5-7, 33). Zinanda xquidxi Jehová ejemplu stiʼ Jesús purtiʼ cayacanecaʼ binni de guiráʼ guidxi guidxíñacaʼ gaxha de Jehová. Ne para ganda gúnicabe ni la? cabeecabe publicación lu jma de ti mil ti gayuaa idioma, ne nuu de ca idioma ca huaxiéʼ binni riníʼ cani. Nga peʼ nga ni rizaaca caadxi idioma nahuiiniʼ ni nuu lu continente americano. Maʼ gulee xquidxi Dios stale guendaró espiritual lu jma de ti gayuaa sesenta de ca idioma nahuiiniʼ ca para ganda guiziidiʼ ca binni ni riníʼ ca idioma ca de ca noticia galán. Ne laaca cayaca traducir ca publicación stinu lu jma de gande variante stiʼ idioma romaní (o gitano). Ne pur nga guizáʼ maʼ stale binni caziidicaʼ de lu Biblia.

12. ¿Xiruʼ runi xquidxi Jehová?

¹² Cadi racané si xquidxi Jehová guiziidiʼ binni de ca noticia galán, sínuque laaca racaneni gatachaahuiʼ caadxi dxiiñaʼ para gacanécabe ca hermanu ora guizaaca xiixa desastre natural. Stale hermanu rúnicaʼ stipa gácacaʼ voluntariu para gacanecaʼ ca ni caquiiñeʼ gacanécabe laacaʼ. Ne laaca rucuí xquidxi Dios Yoo stiʼ Reinu ra zanda cheʼ binni para guni adorarcaʼ Dios ne guiziidicaʼ pabiáʼ nadxiibe laacaʼ.

RACANÉ SUMO SACERDOTE STINU CADA TOBI DE LAANU

13. ¿Gunáʼ nga caadxi modo racané Jesús laanu?

¹³ Naca Jesús Pastor chaʼhuiʼ stinu, nga runi ruuyabe gapa cada tobi de laanu ni caquiiñeʼ para chuʼ jma gaxha de Dios (Juan 10:14; Efes. 4:7). Pur ca guendanagana ni rudxíʼlunu zanda guni sentirnu nácanu casi ti ubaguí ni maʼ caluuza o ti mecha ni mayaca guizuíʼ. Zándaca nuunu triste pur ti guendahuará malu ni nápanu, zándaca ruchiiñaruʼ xquendabiaaninu laanu pur xiixa ni cadi jneza bíninu dxiqué o zándaca nuudindenenu ti hermanu stinu. Pur ca ni bizéʼtenu riʼ, zándaca gaca nagana para laanu guicá íquenu ca ndaayaʼ ni chigudii Dios laanu ne jma guicá íquenu yuubaʼ ni cadídinu. Peru cadi guiaandaʼ laanu nanna Jesús guiráʼ ni cazaacanu ne riénebe modo runi sentirnu. Ne cumu guizáʼ riabe binni la? racanebe laanu. Zanda iquiiñebe espíritu santu para gudiibe stipa laanu (Juan 16:7; Tito 3:6). Laaca zanda iquiiñebe ca ancianu, ni maʼ bidiibe casi regalu para congregación, ne zaqueca zanda iquiiñebe xcaadxi hermanu para cuʼcaʼ gana laanu ne gacanecaʼ laanu ora peʼ caquíʼñenu ni (Efes. 4:8).

14. ¿Xi zanda gúninu para cadi chuʼnu triste?

¹⁴ Pa nuunu triste ne runi sentirnu maʼ qué ganda laanu, galán guiníʼ íquenu dxiiñaʼ ni napa Jesús casi Sumo Sacerdote. Cadi guiaandaʼ laanu biseendaʼ Jehová laabe lu guidxilayú, cadi para gudiisibe xquendanabánibe para guilanu, sínuque para guiene chaahuibe ca guendanagana ni ridiʼdiʼ binni. Ora guni sentirnu nuunu triste pur ca pecadu ni bíninu dxiqué o pur ca cosa ni ruquiinde laanu gúninu, nuuca Jesús listu para gacané laanu «ora peʼ caquiiñenu tu gacané laanu» (Heb. 4:15, 16).

15. ¿Xi gucané ti hermanu guibiguetaʼ ndaaniʼ congregación?

¹⁵ Racané Jesús ca xpinni para guidxélacaʼ ne gacanecaʼ ca dendxuhuiiniʼ stiʼ Dios ni maʼ bixeleʼ de xquidxi (Mat. 18:12, 13). Guidúʼyanu ni bizaaca Stefano.b Guleecabe laabe de ndaaniʼ congregación ne despué de 12 iza gudixhe íquebe chebe reunión. Sicaríʼ bizeetebe: «Huaxiéʼ galán bineʼ sentir ora guyuaaʼ ndaaniʼ Yoo stiʼ Reinu que, peru de guidubi ladxiduáʼ racalaʼdxeʼ guibiguetaʼ ndaaniʼ familia stiʼ Jehová sti biaje. Ca ancianu ni guniʼné naa que guizáʼ galán modo bidxaagalucaʼ naa. Stale biaje bineʼ sentir triste ne guníʼ iqueʼ maʼ qué gapaʼ remediu purtiʼ bixeleʼ de Jehová. Peru bisietenalaʼdxiʼ ca hermanu que naa racalaʼdxiʼ Jehová ne Jesús cadi guireeʼ gana. Ora bibiguetaʼ ndaaniʼ xquidxi Dios guizáʼ galán modo bidxagalú congregación ne familia stinneʼ naa. Despué laaca guná xheelaʼ guʼndanécabe laa Biblia ne yanna maʼ juntu cayuninedu xiiñidu ni ná Jehová». Guizáʼ riecheʼ Sumo Sacerdote stinu ni guizáʼ nadxii laanu ora ruuyaʼ cayacanécabe ca binni ni maʼ guca arrepentir guibiguétacaʼ ndaaniʼ congregación.

16. ¿Xiñee rudiʼnu xquixe peʼ Jehová pur nápanu ti Sumo Sacerdote ni riá binni?

¹⁶ Dxi guyuu Jesús lu guidxilayú riʼ, guizáʼ stale binni gucanebe ora peʼ caquiiñecaʼ tu gacané laacaʼ. Tiempu riʼ zanda chuʼnu seguru laaca zacané Jesús laanu ora peʼ caquíʼñenu tu gacané laanu. Ne maʼ cadi candaa, lu guidxilayú cubi ca, zacanebe guiráʼ binni ni guzuubaʼ diidxaʼ guireecaʼ de lu náʼ pecadu ne guendaruchee. Guizáʼ rudiʼnu xquixe peʼ Jehová, Dios stinu, purtiʼ pur guendarannaxhii ne misericordia stiʼ maʼ gulí Xiiñiʼ para gaca ti Sumo Sacerdote ni riá binni.