Cadi gusaana de chuʼnu nayecheʼ pa cayápanu ti binni ni nadxiinu

1, 2. ¿Ximodo ruuyaʼ Jehová guiráʼ stipa ni rúniluʼ para gápaluʼ ti binni ni nadxiiluʼ? (Proverbios 19:17; laaca zanda gúʼyaluʼ ca imagen ca).

TI HERMANU de Corea del Sur ni láʼ Jin-yeol guníʼ: «Naa ne xheelaʼ maʼ zinedu jma de 32 iza de bichaganadu. Maʼ ziniáʼ gaayuʼ iza de cayapaʼ xheelaʼ purtiʼ nápabe párkinson, ti guendahuará ni rucaa laabe gacadítibe, ne pur nga maʼ qué randa rúnibe stale cosa. Guizáʼ nadxieeʼ laabe ne nabé riuuladxeʼ gapaʼ laabe. Guiráʼ gueelaʼ rinaazedu nadu para gásidu, naa maʼ nexheʼ lu cama stinneʼ ne laabe maʼ néxhebe cueeʼ lu ti cama especial para laabe».

² ¿Ñee cayápaluʼ ti binni ni nadxiiluʼ, casi bixhózeluʼ o jñaaluʼ, ti xiiñiluʼ, ti xhamíguluʼ o xheelaluʼ la? Pa zacá ni, cayúniluʼ ni de guidubi ladxidoʼloʼ purtiʼ nadxiiluʼ binni ca ne nadxiiluʼ Jehová (1 Tim. 5:4, 8; Sant. 1:27). Neca zacá, cudxiiluluʼ guendanagana ni zándaca qué ruuyaʼ xcaadxi o dede zándaca runi sentirluʼ lii si cadíʼdiluʼ lu guendanagana. Zándaca rusihuínniluʼ nuuluʼ nayecheʼ, peru ni dxandíʼ nga nuuluʼ triste ne ruunaluʼ ora maʼ nuuluʼ stúbiluʼ (Sal. 6:6). Neca qué ganna xcaadxi xi cazaacaluʼ, peru Jehová nanna ni ne riénebe ni cayuni sentirluʼ (bichaaga ni né Éxodo 3:7). Nabé risaca cada tobi de ca gota nisa riete luluʼ para laabe, ne rusisácabe guiráʼ ni rúniluʼ para gápaluʼ binni ni nadxiiluʼ (Sal. 56:8; 126:5). Runi sentir Jehová nuzaabiʼ lii pur guiráʼ ni cayúniluʼ ne dxandíʼ peʼ zaguíxebe lii (biindaʼ Proverbios 19:17).

3. ¿Xiñee guca nagana para Abrahán ne Sara gápacaʼ Taré?

³ Lu Biblia ridxélanu stale ejemplu stiʼ caadxi hombre ne gunaa ni gúpacaʼ tuuxa binni ni maʼ huaniisi o huará. Casi dxi biree Abrahán ne Sara de guidxi Ur, Taré, bixhózecabe, maʼ napa biaʼ chupa gayuaa iza. Neca guizáʼ maʼ huaniisibe, yenándabe laacaʼ. Biʼniʼ viajárcabe stale semana dede ra yendácabe Harán (Gén. 11:31, 32). Nánnanu guizáʼ nadxii Abrahán ne Sara Taré, peru guca nagana para laacabe gápacabe laabe, jmaruʼ si lu viaje ni cayúnicabe que. Zándaca zécabe lu camellu o lu burru, ne pur ngue gúcani nagana para Taré. Ne guyuu biaje laaca guizáʼ bidxaga Abrahán ne Sara. Peru nánnanu bidii Jehová laacabe stipa ni caquiiñecabe. Ne laaca zudiibe lii stipa ni caquiiñeluʼ (Sal. 55:22).

4. ¿Xi zadúʼyanu lu artículo riʼ?

⁴ Ti cosa ni zacané lii cadi guireeluʼ gana pa cayápaluʼ tuuxa nga chuʼluʼ nayecheʼ (Prov. 15:13). Cadi guiaandaʼ lii, zanda chuʼ ti binni nayecheʼ intiica si guizaaca (Sant. 1:2, 3). ¿Xi zacané lii guni sentirluʼ zacá yaʼ? Cadi gusaana de guinábaluʼ Jehová gacané lii gúʼyaluʼ ca razón ni nápaluʼ para chuʼluʼ nayecheʼ. Lu artículo riʼ zadúʼyanu xcaadxi conseju ni zacané lii para cadi gusaana de chuʼluʼ nayecheʼ. Laaca zadúʼyanu xi zanda guni xcaadxi para gacanecaʼ ca ni cayapa tuuxa ni nadxii. Peru primé zadúʼyanu xiñee nabé risaca chuʼ ca ni cayapa tuuxa nayecheʼ ne xii nga ca cosa ni zanda cuee gana laacabe.

XI ZANDA GUCAA LAANU MAʼ CADI CHUʼNU NAYECHEʼ

5. ¿Xiñee nabé risaca cadi gusaana de chuʼnu nayecheʼ?

⁵ Pa gusaana ti binni ni cayapa tuuxa de chuʼ nayecheʼ la? jma nagueenda zaree gana ne zadxaga (Prov. 24:10). Ne pa maʼ bidxágabe la? zándaca gusaana de gácabe nachaʼhuiʼ ne maʼ qué zúnibe ca cosa ca de guidubi ladxidoʼbe. Guidúʼyanu chupa chonna cosa ni zanda gucaa laacabe maʼ cadi chúʼcabe nayecheʼ.

6. ¿Xiñee ridxaga ca ni cayapa tuuxa?

⁶ Zanda guidxaga xcuerpu ne xquendabiaaniʼ ca ni cayapa tuuxa. Sicaríʼ guníʼ ti hermana láʼ Leah: «Dede né ca dxi nuu ca cosa ca galán, nabé ridxagaʼ gapaʼ tuuxa. Ra guiluxe dxi, stale biaje runeʼ sentir maʼ qué gapaʼ stipa. Dede maʼ qué rudii gana naa guicabeʼ nin ti mensaje». Xcaadxi raca nagana para laacaʼ cueecaʼ tiempu para guiziiláʼdxicaʼ neca nánnacaʼ caquiiñeʼ gúnicaʼ ni. Ti hermana láʼ Inés guníʼ: «Nabé ribeeʼ xcaandaʼ. Stale gueelaʼ napaʼ xidé guiasaʼ cada chupa hora para guuyaʼ suegraʼ. Naa ne xheelaʼ maʼ xadxí qué huayanda chuudu de vacación». Nuu de ca ni cayapa tuuxa maʼ qué rinacaʼ guireenecaʼ ca xhamígucaʼ o maʼ qué rinacaʼ guicaacaʼ xiixa dxiiñaʼ ndaaniʼ xquidxi Dios purtiʼ qué zanda gusaanacaʼ binni ni cayápacaʼ nin ti ratuhuiiniʼ. Ne pur nga zándaca guni sentírcabe nuucabe stúbicabe o deguyoocabe purtiʼ maʼ qué randa rúnicabe ni riuuláʼdxicabe.

7. ¿Xiñee runi sentir ca ni cayapa tuuxa feu o triste?

⁷ Zanda guni sentir ca ni cayapa tuuxa feu o triste. Ti hermana láʼ Jessica, guníʼ: «Feu runeʼ sentir purtiʼ riníʼ iqueʼ zándaruʼ guneʼ jma cosa pur bixhozeʼ peru cadi cayuneʼ ni. Nuu biaje runeʼ sentir caquiiñeʼ cuee tiempu para guiziiladxeʼ, peru ora runeʼ ni qué runeʼ sentir diaʼ galán purtiʼ rabeʼ ñanda niquiiñeʼ tiempu ca para bixhozeʼ». Nuu tu laa nabé riuu xizaa purtiʼ riníʼ ique maʼ huaxiéʼ ni cayuni para gacané binni ni cayapa o zándaca guni sentircaʼ maʼ qué ganda laacaʼ. Ne nuu tu laa feu runi sentircaʼ purtiʼ zándaca biníticaʼ paciencia ne guniʼcaʼ xiixa ni bininá binni ni cayápacaʼ (Sant. 3:2). Ne zándaca laaca riuubaʼ ladxidóʼcabe gúʼyacabe zirá stipa stiʼ binni ni nadxiicabe ne zeʼ dxi jma maʼ huará. Ti hermana láʼ Bárbara, guníʼ: «Guizáʼ nagana raca para naa guuyaʼ modo zigusuíʼ ti guendahuará ti xhamigaʼ ni guizáʼ nadxieeʼ».

8. ¿Ximodo runi sentir ca ni cayapa tuuxa ora rudiicabe xquixe peʼ laacaʼ?

⁸ Zanda guni sentir ca ni cayapa tuuxa qué rusisácacabe ni rúnicaʼ. ¿Xiñee yaʼ? Purtiʼ huaxiéʼ si biaje rudiicabe xquixe peʼ laacaʼ pur ca stipa ne sacrificiu ni rúnicaʼ. Guiranu nánnanu ora rudiicabe xquixe peʼ laanu riuunu nayecheʼ (1 Tes. 5:18). Guzéʼtenu ti ejemplu, ti hermana láʼ Melissa, guníʼ: «Nuu biaje ora maʼ qué guidxelaʼ xi guneʼ ruzuluáʼ ruunaʼ. Peru guizáʼ riuaaʼ gana ora ca binni ni rapaʼ rábicaʼ naa “Xquixe peʼ lii pur guiráʼ ni rúniluʼ pur naa”. Nga racané naa guiasaʼ sti dxi né stale gana para cadi gusaana de gapaʼ laacabe». Ne ti hermanu láʼ Ahmadu rusiene xi runi sentir ora gábicabe laa rusisácacabe dxiiñaʼ ni cayuni. Laabe ne xheelabe cayápacabe ti sobrinahuiiniʼ stícabe ni rudii ataque laa. Laabe guniʼbe: «Neca nahuiinibe ne huaxiéʼ riénebe xi guiráʼ rúnidu pur laabe para gápadu laabe, guizáʼ riecheʼ ora rudiibe xquixe peʼ laadu ne ora rucaabe lu ti guiʼchiʼ “Guizáʼ nadxieeʼ laatu”».

CAADXI CONSEJU NI ZACANÉ LII CADI GUSAANA DE CHUʼLUʼ NAYECHEʼ

9. ¿Ximodo rusihuinni ca ni rapa tuuxa nánnacaʼ nuu cosa ni qué zanda gúnicaʼ?

⁹ Gunna nuu cosa ni qué zanda gúniluʼ (Prov. 11:2). Guiranu nuu biaje rirá stipa stinu ne huaxiéʼ tiempu nápanu. Nga runi, lii zanda quíxheluʼ xi zanda ne xi qué zanda gúniluʼ, ne nuu biaje zusaana de gúniluʼ caadxi cosa. Ne cadi malu diʼ gúniluʼ nga purtiʼ cusihuínniluʼ nácaluʼ ti binni ni nanna nuu cosa ni qué zanda guni. Pa chuʼ tu gacalaʼdxiʼ gacané lii, bidii lugar gúnibe ni. Ti hermanu láʼ Jay, guníʼ: «Nagana nga gúniluʼ guiráʼ ni riuuláʼdxiluʼ. Para cadi gusaana de chuʼluʼ nayecheʼ naquiiñeʼ gánnaluʼ pabiaʼtiʼ zanda gúniluʼ ne cadi guicaluʼ tema gúniluʼ ni qué zanda gúniluʼ».

10. ¿Xiñee naquiiñeʼ gaca ca binni ni cayapa tuuxa ti binni ni riníʼ ique chaahuiʼ ante guni xiixa? (Proverbios 19:11).

¹⁰ Biʼniʼ stipa guiéneluʼ xi pur runi tuuxa xiixa (biindaʼ Proverbios 19:11). Pa nácaluʼ ti binni ni riníʼ ique chaahuiʼ ante guni xiixa la? zacaneni lii guiéneluʼ xiñee runi o riníʼ binni ni cayápaluʼ ca xiixa cosa ne nga zacané lii cadi guidxiichiluʼ ora guizaaca xiixa. Nuu guendahuará rucaani binni guni o guiníʼ xiixa ni qué ñuu dxi ñuni dxiqué (Ecl. 7:7). Guzéʼtenu ti ejemplu, ti binni ni naca amable ne nachaʼhuiʼ zanda gueeda gaca ti binni ni guidubi ora cadxiichi o nisi cuyubi tinde. Zándaca gacaláʼdxibe gaca ca cosa ca modo nabe, nisi maʼ caguiche ruaabe o gueeda gácabe ti binni ni qué zanda chúʼcabe laa. Peru ti cosa ni zacané lii nga guni investigarluʼ jma de guendahuará ni napa binni ni cayápaluʼ ca. Ra jma gunibiaʼluʼ guendahuará ca qué zaca nagana para lii guiéneluʼ guendahuará ca nga ni rucaa binni ni cayápaluʼ guni ne guiníʼ ca cosa ca (Prov. 14:29).

11. ¿Gunáʼ nga ca cosa risaca ni naquiiñeʼ guni ca ni cayapa tuuxa guiráʼ dxi? (Salmo 132:4, 5).

¹¹ Gulee tiempu para chuʼluʼ gaxha de Jehová. Ziuu biaje zusaana de gúniluʼ caadxi cosa para gúniluʼ ca «ni jma risaca», casi ca cosa ni zacané lii chuʼluʼ jma gaxha de Jehová (Filip. 1:10). Guizáʼ guyuu xhiiñaʼ rey David, peru bisihuínnibe ni jma risaca para laabe nga gúnibe ni ná Jehová (biindaʼ Salmo 132:4, 5). Zaqueca nga naquiiñeʼ gúninu, neca nabé nuu xhiiñanu, risaca cueenu tiempu guiráʼ dxi para guidúʼndanu Biblia ne guni orarnu. Ti hermana ni láʼ Elisha, guníʼ: «Riuaaʼ nayecheʼ ora runeʼ orar ne ora riníʼ iqueʼ lu ca diidxaʼ ni riguixhedxí ladxiduáʼ ni zeeda lu caadxi Salmo. Nabé racané ca oración ca naa. Rinieniáʼ Jehová guiráʼ dxi para gacané naa gatadxí ladxiduáʼ».

12. ¿Xiñee caquiiñeʼ cuee ca ni cayapa tuuxa tiempu para chuʼcaʼ nazaaca?

¹² Gulee tiempu para gúniluʼ cosa ni gacané lii chuʼluʼ nazaaca. Cumu guizáʼ nuu xhiiñaluʼ cayápaluʼ binni ni nadxiiluʼ la? zándaca huaxiéʼ galán cayoloʼ purtiʼ qué gápaluʼ tiempu para chisiluʼ guendaró ni gacané cuerpu stiluʼ ne laaca qué randa rúniluʼ guendaró ni gacané lii. Peru cadi guiaandaʼ lii para chuʼ cuerpu stiluʼ ne xquendabiaaniluʼ nazaaca caquiiñeʼ goloʼ jneza ne gúniluʼ ejerciciu. Nga runi, biquiiñeʼ tiempu stiluʼ jneza, gudó guendaró ni gacané lii ne gatigá biʼniʼ ejerciciu (Efes. 5:15, 16). Laaca gudixhe ique guiziiláʼdxiluʼ biaʼ tiempu caquiiñeluʼ (Ecl. 4:6). Ora rasi binni jneza la? nabé racaneni laa. Ca doctor ca riniʼcaʼ ora gasi binni galán racaneni laa para cadi chuʼ xhaataʼ xizaa ne chuʼ tranquilu ora tidiʼ lu xiixa guendanagana. Peru laaca galán cueeluʼ tiempu para gúniluʼ ca cosa ni riuuláʼdxiluʼ (Ecl. 8:15). Ti hermana ni cayapa tuuxa ni nadxii guníʼ xii nga ni racané laa para chuʼ nayecheʼ: «Ora galán nuu tiempu la? rireeʼ ti ratu para guinaaze gubidxa naa. Ne neca ti biaje lu ti beeu rireeniáʼ ti xhamigaʼ para chuʼdu nayecheʼ ti ratu».

13. ¿Xiñee nabé risaca guxidxi binni? (Proverbios 17:22).

¹³ Cadi guiaandaʼ lii naquiiñeʼ guxídxiluʼ (biindaʼ Proverbios 17:22; Ecl. 3:1, 4). Ora ruxidxi binni la? racaneni cuerpu stiʼ ne xquendabiaaniʼ. Dxandíʼ, ora cayápaluʼ tuuxa, stale biaje qué riree ca cosa ca modo racaláʼdxiluʼ. Peru pa guxídxiluʼ de ni cazaacaluʼ neca ñanda nuchiichi ni lii la? qué zaca nagana para lii gudxiiluluʼ ni. Ne pa guxidxineluʼ binni ni cayápaluʼ ca la? jma ziuutu tobi si.

14. ¿Xiñee nabé risaca guiníʼneluʼ ti xhamíguluʼ ni nápaluʼ confianza?

¹⁴ Guniʼné ti xhamíguluʼ ni nápaluʼ confianza. Neca gúniluʼ stipa para cadi gusaana de chuʼluʼ nayecheʼ ziuu biaje zuni sentirluʼ maʼ qué ganda lii ne caquiiñeʼ guiníʼneluʼ ti xhamíguluʼ, tuuxa ni cadi guiníʼ mal de lii pur ni gábiluʼ laa (Prov. 17:17). Zucaadiágabe lii né paciencia ne zábibe lii diidxaʼ ni quixhedxí ladxidoʼloʼ, ni peʼ caquiiñeluʼ para cadi gusaana de chuʼluʼ nayecheʼ (Prov. 12:25).

15. ¿Ximodo runi sentirnu ora rininu modo chiguibáninu ndaaniʼ Paraísu?

¹⁵ Guníʼ ique xi zunineluʼ binni ca ndaaniʼ Paraísu. Cadi guiaandaʼ lii, ora bizáʼ Jehová binni guidxilayú, qué niguixhe íquebe ñápanu binni huará o binni huaniisi. Yanna si nga cayúninu ni (2 Cor. 4:16-18). Cabeza ti «guendanabani, ni dxandíʼ guendanabani» laanu (1 Tim. 6:19). Pa guiníʼneluʼ binni ni cayápaluʼ ca xi zúnitu ndaaniʼ Paraísu, nabé nayecheʼ ziuutu (Is. 33:24; 65:21). Ti hermana láʼ Heather guníʼ: «Rabeʼ ca binni ni cayapaʼ maʼ cadi candaa zaguíbadu lari juntu, zuxóñedu juntu ne zusadu bicicleta juntu. Zúnidu pan ne zúnidu guendaró nanixe para ca binni ni nadxiidu ni guiasa de lade gueʼtuʼ. Ne siempre rudiʼdu xquixe peʼ Jehová pur esperanza ni nápadu».

XI ZANDA GÚNINU PARA GACANENU CA NI CAYAPA TUUXA

16. ¿Xi zanda gúninu pa nuu ti binni ndaaniʼ congregación stinu ni cayapa tuuxa? (Laaca zanda gúʼyaluʼ imagen ca).

¹⁶ Gacanenu ca ni cayapa tuuxa gápacaʼ tiempu para guiziiláʼdxicaʼ. Zanda cueenu tiempu para gápanu binni ni cayápacabe. Nga zacané laacabe guiziilaʼdxiʼ xquendabiaanicabe ne gúnicabe ca cosa ni caquiiñeʼ gúnicabe (Gál. 6:2). Nuu hermanu rúnicaʼ ti programa para chuʼ tu gacané laacabe guiráʼ semana. Natalya, ti hermana ni cayapa xheelaʼ, guníʼ: «Ti biaje o chupa biaje lu semana reeda ti hermanu de congregación stidu ra yoo. Runi predicárcabe, ruíʼcabe diidxaʼ ne nuu biaje ruuyacabe xiixa película. Guizáʼ riuulaʼdxiʼ xheelaʼ ora reeda ganna xhamigu laa, ne nga racané naa guiziiladxeʼ ti ratu o guneʼ ca cosa ni riuuladxeʼ guneʼ, casi guireeʼ chizayaʼ ti ratu». Zanda gucaʼnu lanu para chiguiaananenu binni ca ti gueelaʼ, zacá zanda gacanenu binni ni cayapa laabe guiziilaʼdxiʼ jma galán.

17. ¿Ximodo zanda gacanenu ca ni cayapa tuuxa lu ca reunión stinu?

¹⁷ Gacanenu ca ni cayapa tuuxa lu ca reunión stinu. Zándaca qué rucaadiaga chaahuiʼ ca ni cayapa tuuxa ni riete lu reunión o lu ca asamblea purtiʼ nuu xhiiñacaʼ cayuni tendercaʼ binni ni nadxiicaʼ. Nga runi, zanda chitínenu binni ni cayápacabe ca lu tobi de ca reunión stinu o neca ti ratu. Ne pa qué randa riree binni ca zanda chuunu ra lidxi ne gaca conectárnenu laa lu reunión para ganda cheʼ binni ni rapa laabe ra Yoo stiʼ Reinu.

18. ¿Xiruʼ zanda gúninu pur ca binni ni cayapa tuuxa?

¹⁸ Cuʼnu gana ca ni cayapa tuuxa ne guni orarnu pur laacaʼ. Gatigá naquiiñeʼ chiganna ca ancianu ca hermanu riʼ (Prov. 27:23). Ne intiica si cazaacanu, galán gábinu ca hermanu ca diidxaʼ ni cuʼ gana laacaʼ ne ni gusihuinni nadxiinu laacaʼ. Laaca zanda guinábanu Jehová gudii stipa laacabe ne gacané laacabe cadi gusaana de chúʼcabe nayecheʼ (2 Cor. 1:11).

19. ¿Xi cabézanu guizaaca huidxe si?

¹⁹ Maʼ cadi candaa zabee Jehová guiráʼ yuubaʼ ni rusiguunaʼ laanu. Maʼ qué ziuu guendahuará nin guendaguti (Apoc. 21:3, 4). «Zachesa binni ni nachiitaʼ ñee casi runi ti bidxiñaʼ» (Is. 35:5, 6). «Maʼ guirutiʼ tu zietenalaʼdxiʼ ca cosa ni guyuu dxiqué», ládecani nuu ca guendanagana ni rapa binni ora maʼ huaniisi ne yuubaʼ ni ridiʼdiʼ tuuxa ora rapa ti binni ni nadxii ni huará (Is. 65:17). Laga guedandá dxi guni cumplir Jehová ca promesa sicarú ni maʼ biʼniʼ, nánnanu qué ziuu dxi guixélebe de laanu. Pa qué gusaana de guinábanu Jehová gudii stipa laanu, laa zacané laanu guni huantarnu guiráʼ cosa né paciencia ne guendanayecheʼ (Col. 1:11).