Anton Petrus/Moment via Getty Images
¡GATANANU!
¿Ñee nuusi de gaca ti guerra lu guidubi Guidxilayú la? | ¿Xi caníʼ Biblia de laani?
Lu ca últimu 30 iza riʼ, stale binni huaníʼ ique gastiʼ cayaca lu Guidxilayú, ne dede nuu tu riníʼ ique zeʼ dxi nabáninu jma galán. Peru ca dxi riʼ, maʼ cadi guiráʼ binni riníʼ ique zacá, ¿xiñee yaʼ? Pur ca noticia ni riree, ndiʼ nga caadxi de laacani:
«Stale binni nuu xizaa pur guerra ni cayaca guidxi Gaza, cadxíbicaʼ gueeda guniná guerra riʼ xcaadxi guidxi ora guzulú tinde guidxi Israel ne Hizbulá lu frontera stiʼ Líbano» (Reuters, 6 de enero de 2024).
«Nuusi de gucaalú guidxi Irán ca guidxi ni nuu Occidente, ne maʼ bieeguʼ Rusia ne China laacabe. Ca grupu ni nuu lu náʼ guidxi Irán nabé cucaalucaʼ stale lugar, ne maʼ bizulucaʼ cúzacaʼ arma nuclear sti biaje» (The New York Times, 7 de enero de 2024).
«Cadi cusaana de gucaalú ne guniná Rusia guidxi Ucrania» (UN News, 11 de enero de 2024).
«Ra zidiʼdiʼ dxi ziroobaʼ economía stiʼ China ne napa ejércitu stiʼ stale poder, ne ca binni de Taiwan nabé cudxíʼbacaʼ xquídxicaʼ, laaca cadi nuu diʼ China ne Estados Unidos de acuerdu lu caadxi cosa ne runi nga zanda guzulú tíndecaʼ» (The Japan Times, 9 de enero de 2024).
¿Ñee riete lu Biblia zazaaca guiráʼ ca cosa ni bizéʼtenu riʼ la? ¿Ñee zucaa guiráʼ ca cosa riʼ guzulú ti guerra lu guidubi Guidxilayú la?
Maca biete lu Biblia zazaaca ca cosa riʼ
Qué nusiene peʼ Biblia pa zazaaca tobi de ca guerra ni cayaca ca dxi riʼ. Peru bizeeteʼ ziuu stale guendaridinde ne runi laacani qué ziuu «paz ndaaniʼ guidxilayú» (Apocalipsis 6:4).
Lu libru stiʼ Daniel biete «lu tiempu ra mayaca gueeda fin», zadinde ca guidxi roʼ para guihuinni tu laa napa jma poder. Lu guendaridinde riʼ zusihuínnicaʼ pabiáʼ napa ejércitu sticaʼ poder ne zaquiiñecaʼ stale «tesoro» o bueltu para gúnicaʼ ni (Daniel 11:40, 42, 43).
Zedadxiña ti guerra
Lu Biblia riete qué zaca chaahuiʼ ca guendanagana ni nuu lu Guidxilayú, sínuque jma peʼ zaroobaʼ cani. Jesucristu peʼ bizeeteʼ: «Ziuu stale yuubaʼ. Dede dxi bizulú guidxilayú hasta nagasi, qué huayuu dxi chuʼ yuubaʼ casi laani ne maʼ qué ziuuruʼ dxi gaca ni sti biaje» (Mateo 24:21). Despué de guzulú «yuubaʼ» o gran tribulación ca, qué zandaa zaca ti guerra ni láʼ «Armagedón», ne laani nga «guerra ni chigaca dxi roʼ stiʼ Dios ni jma napa poder» (Apocalipsis 16:14, 16).
Peru qué zunitilú Armagedón binni, sínuque zulá ni laacabe. Zaquiiñeʼ Dios guerra riʼ para gunitilú ca gobiernu ni huayuni chuʼ guerra ne gacaná stale binni lu Guidxilayú. Pa racaláʼdxiluʼ gánnaluʼ ximodo nga ziuu paz lu Guidxilayú despué de Armagedón la? biindaʼ ca tema riʼ: