Hombrehuiiniʼ ni maca guníʼ Dios chigale

Lugar de nibiguetaʼ José ne María ndaaniʼ guidxi Nazaret, biaanacaʼ Belén. Ne dxi bisaa Jesús xhono gubidxa de gule, biʼniʼ circuncidárcabe laa casi cá lu Ley stiʼ Dios naquiiñeʼ gúnicabe (Levítico 12:2, 3). Ne laaca gupa ca binni que costumbre quíxhecaʼ lá baʼduhuiiniʼ que dxi queca. Ngue runi gulee lácabe baʼduhuiiniʼ que Jesús, casi guníʼ ángel que guiree labe.

Gudiʼdiʼ si jma de ti beeu, dxi maʼ napa Jesús cuarenta dxi de gule. Yené bixhózebe ne jñaabe laabe ndaaniʼ templu ni nuu Jerusalén, ni riaana panda si kilómetru de ra nabézacabe. Ley que ná ora guizaa cuarenta dxi de gule ti hombrehuiiniʼ, naquiiñeʼ gudii jñaabe ti ofrenda de purificación (Levítico 12:4-8).

Ne nga nga biʼniʼ María. Yené chupa pájaruhuiiniʼ casi ofrenda. Ni bíʼnibe riʼ rusihuinni ni huaxiéʼ napa José ne María bueltu. Ley que ná naquiiñeʼ gudii jñaa baʼduhuiiniʼ ca ti dendxuʼ de ti iza ne ti pájaru. Peru pa qué gápabe bueltu para gudiibe ti dendxuʼ la? zanda gudiibe chupa guuguhuiiniʼ o chupa paloma. Cumu qué gapa María bueltu la? ngue runi yené chupa pájaruhuiiniʼ.

Laga nuu José ne María ndaaniʼ templu, bidxiña ti hombre gola laacaʼ. Hombre riʼ láʼ Simeón. Maca biʼniʼ prometer Dios hombre riʼ, ante gatiʼ, zuuyaʼ Cristu o Mesías ni guníʼ Jehová gueeda que. Ne dxi que bicaa espíritu santu laabe chuʼbe ndaaniʼ templu ne ora bíʼyabe José ne María nuacaʼ Jesús, gucuaabe baʼduhuiiniʼ que guluube laa ndaaniʼ nabe.

Ne óraque bidii Simeón xquixe peʼ Dios ne guníʼ: «Señor ni runi mandar guiráʼ xixé ni nuu, maʼ zanda gateʼ, casi peʼ modo guniʼluʼ, purtiʼ maʼ biiyaʼ ni chiguiquiiñeluʼ para gulaluʼ binni, ni maʼ guluuluʼ listu para guʼyaʼ guiráʼ guidxi. Laabe nga ti biaaniʼ ni cuee velu nutaaguʼ lú ca guidxi ca, ne ti gloria para xquídxiluʼ Israel» (Lucas 2:29-32).

Nabé bidxagayaa José ne María ora binadiágacaʼ ni guníʼ hombre riʼ. De raqué guluu ndaayaʼ Simeón laacabe ne bisiene hombre riʼ María: «Maʼ biseendaʼ Dios hombrehuiiniʼ riʼ para gusaba stale ne guindisaʼ stale ndaaniʼ guidxi Israel» ne gúdxibe laa ziuu yuubaʼ ladxidóʼ casi ñaca nididilaagaʼ ti espada xhialma (Lucas 2:34).

Laaca raqué nuu Ana, ti profetisa ni napa 84 iza. Qué riaadxaʼ gunaa riʼ ndaaniʼ templu. Ne oraqueca bidxíñabe José ne María ne baʼduhuiiniʼ que, ne bizulú bidiibe xquixe peʼ Dios ne guniʼbe de Jesús nezalú guiráʼ binni que.

¿Ñee ruxuíʼlunu pabiáʼ nayecheʼ guyuu José ne María pur guiráʼ ni bizaacacaʼ ndaaniʼ templu que la? Pur guiráʼ ni guca que bidiicabe cuenta xiiñicabe nga Mesías ni guníʼ Dios gueeda.