¿Xi naquiiñeʼ guneʼ para gacaʼ testigu stiʼ Jehová?

Lu Mateo 28:19 ne 20, biluíʼ Jesús xi naquiiñeʼ guni binni para gaca testigu stiʼ Jehová. Ca versículo riʼ ruzeeteʼ cani para ganda gaca ti binni discípulo stiʼ Jesús naquiiñeʼ guiníʼ de Jehová nezalú xcaadxi binni.

Primé pasu: Guiziidiʼ binni ni rusiidiʼ Biblia. Jesús biseendaʼ ca xpinni para gacanecaʼ binni gaca discípulo ne gusiidicaʼ laacabe guiráʼ ni maʼ biʼniʼ mandarbe laacaʼ gúnicaʼ (Mateo 28:19, 20). Significadu literal napa diidxaʼ discípulo ca riníʼ ni «tuuxa ni nacubi caziidi» o «ni cusiidicabe laa». Ra zeeda cani bisiidiʼ Jesús lu Biblia zanda guidxélaluʼ información ni caquiiñeluʼ para guibániluʼ nayecheʼ ne gánnaluʼ xi pur nabániluʼ (2 Timoteo 3:16, 17). Ziéchedu nga guluidu lii xi rusiidiʼ Biblia ra gudiʼdu lii ti cursu sin quíxeluʼ (Mateo 10:7, 8; 1 Tesalonicenses 2:13).

Guiropa pasu: Guʼnuʼ ni caziidiluʼ. Jesús gudxi ca discípulo stiʼ cadi caquiiñeʼ si guiziidicaʼ, laaca caquiiñeʼ guni cumplircaʼ guiráʼ ni maʼ biʼniʼ mandarbe laacaʼ (Mateo 28:20). Nga caníʼ cadi naquiiñeʼ si guiziidiʼ binni de Biblia. Zándaca caquiiñeʼ guchaaluʼ stale cosa lú cani rúniluʼ ne lú cani riníʼ íqueluʼ (Hechos 10:42; Efesios 4:22-29; Hebreos 10:24, 25). Cani runi ni ná ca mandatu stiʼ Jesús rucaani laacaʼ chinándacaʼ laabe, ne pur nga rudiicaʼ xquendanabánicaʼ Jehová (Mateo 16:24).

Guionna pasu: Chuʼnísaluʼ (Mateo 28:19). Biblia riníʼ ora chúʼnisa ti binni zeeda gaca ni casi ora nigaachiʼ (zadxélaluʼ xcaadxi ni caníʼ de laani lu Romanos 6:2-4). Ora riuunisa binni zeeda gaca ni casi ora ñati para nusaana modo bibani dxiqué ne guibani sti biaje para guni ni jneza. Nga runi, ra chuʼnísaluʼ cusihuínniluʼ nezalú xcaadxi binni maʼ bíʼniluʼ primé ne guiropa pasu ni bizeeteʼ Jesús ne maʼ canábaluʼ Dios ti guendabiaaniʼ nayá (Hebreos 9:14;1 Pedro 3:21).

¿Ximodo zanda gannaʼ pa maʼ nuaaʼ listu para chuaanisaʼ?

Gudxi ni ca ancianu de congregación stiluʼ. Laacabe zuiʼnécabe lii diidxaʼ para gánnacabe pa riéneluʼ ni rusiidiʼ Biblia, ne pa cayúniluʼ guiráʼ ni caziidiluʼ ne pa de lii biale gudiiluʼ lii Dios (Hechos 20:28; 1 Pedro 5:1-3).

¿Ñee laaca naquiiñeʼ guni ca xiiñiʼ ca Testigu ca ndiʼ la?

Laaca pue, laadu rusiniisidu xiiñidu casi rusiidiʼ Biblia ra ná: «Laulidxe laacabe. Lausiniisi laacabe modo na [Jehová]» (Efesios 6:4). Peru ora guiniisicabe la? maʼ laacabe nga guicaacabe decisión pa zaziidicabe, pa zacaacabe cani rusiidiʼ Biblia ne pa zinándacabe niná cani para ganda chuʼnísacabe (Romanos 12:2). Maʼ binni nga guʼyaʼ pa zuni adorar Jehová o pa coʼ (Romanos 14:12; Gálatas 6:5).