«Laguzuhuaa dxiichiʼ, ne cadi guiree cueʼtu»

1, 2. ¿Ximodo zeeda gaca ca xpinni Cristu casi ti edificiu nasoo? (1 Corintios 15:58).

LU IZA 1978, ndaaniʼ guidxi Tokio (Japón) bicuícabe ti edificiu guizáʼ nasoo, nápani 60 pisu. Ora ridiʼdiʼ binni ne ruuyaʼ ni riníʼ ique pa zanda guni huantar ni ora gueeda ti xu naroʼbaʼ. Peru, ¿xi biʼniʼ ca binni ni bicuí ni para cadi guiaba ni yaʼ? Bíʼnicabe ni naguidxi ne zaqueca ganda guiniibi ni para ganda guni huantar ni ora guniibi Guidxilayú. Laanu ca xpinni Cristu zeeda gácanu casi edificiu nasoo riʼ. ¿Ximodo yaʼ?

² Ti biʼniʼ ni runi ni ná Jehová caquiiñeʼ gaca naguidxi ne naguudxi. Naguidxi para guzuhuaa dxiichiʼ lu ni runi cré ne cadi guiree cueʼ de ca norma ne ca ley stiʼ Jehová (biindaʼ 1 Corintios 15:58). Ti xpinni Cristu napa xidé «chuʼ listu para guzuuba diidxaʼ» ne cadi gucheené ca principiu ni zeeda lu Stiidxaʼ Dios. Ne laaca gaca naguudxi o riuu «razón» ora caquiiñeʼ ni ne ora zanda (Sant. 3:17). Pa gúninu stipa gácanu zacá, zacané ni laanu para cadi guiníʼ íquenu jma de biaʼ ni caquiiñeʼ guiníʼ íquenu ne laaca qué zaníʼ íquenu zanda gúninu intiica cosa. Lu artículo riʼ zadúʼyanu paraa caquiiñeʼ guzuhuaʼnu dxiichiʼ ne cadi guiree cueʼnu. Ne laaca zadúʼyanu gaayuʼ cosa ni riquiiñeʼ Binidxabaʼ para cueechú laanu de ni runi crenu ne ximodo zanda gudxíʼlunu ca ni.

¿XIMODO ZANDA GUZUHUAʼNU DXIICHIʼ?

3. ¿Xii nga ca ley ni cudii Jehová laanu lu Hechos 15:28, 29?

³ Jehová nga ni riguixhe ley para laanu, laasibe nga ni napa autoridad ni jma risaca para gudii laanu ley. Ne nabé nayaʼniʼ modo rusiénebe xquídxibe xi naquiiñeʼ guni (Is. 33:22). Guzéʼtenu ti ejemplu, lu primé siglu que, grupu ni zániru bizeeteʼ chonna cosa ra caquiiñeʼ guzuhuaa dxiichiʼ ca xpinni Cristu. Primé, cadi guni adorarcaʼ bidóʼ ne guni adorarcaʼ Jehová si, guiropa, gusisácacaʼ rini casi runi Dios ne guionna, gucaanácabe pecadu sexual (biindaʼ Hechos 15:28, 29). Yanna, laanu ca xpinni Cristu de tiempu riʼ, ¿ximodo guzuhuaʼnu dxiichiʼ lu guionnaʼ cosa riʼ yaʼ?

4. ¿Ximodo rusihuínninu runi adorarnu Jehová si? (Apocalipsis 4:11).

⁴ Cadi guni adorarnu bidóʼ ne guni adorarnu Jehová si. Biʼniʼ mandar Jehová ca israelita laasibe guni adorarcaʼ (Deut. 5:6-10). Dxi biʼniʼ tentar Binidxabaʼ Jesús, laa guníʼ Jehová si nga naquiiñeʼ gaca adorar (Mat. 4:8-10). Nga runi, qué runi adorarnu bidóʼ, qué runi adorarnu binni, qué ridúʼyanu ca líder stiʼ ca religión, ca políticu, ca artista, ca deportista casi ti dios. Sínuque rusisácanu Jehová Dios, ni bizáʼ guiráʼ xixé ni nuu ne runi adorarnu laasibe (biindaʼ Apocalipsis 4:11).

5. ¿Xiñee rusisácanu guendanabani ne rini?

⁵ Rusisácanu guendanabani ne rini. ¿Xiñee? Purtiʼ Jehová guníʼ zeeda gaca rini ca guendanabani. Ne guendanabani ca zeeda gácani ti regalu ni bidiibe laanu (Lev. 17:14). Ora bidii Jehová lugar gó binni maniʼ la? guniʼbe qué zanda gó rini stime (Gén. 9:4). Despué lu Ley ni bidiibe Moisés bizeetebe ni sti biaje (Lev. 17:10). Ne lu primé siglu que biquiiñebe grupu ni zániru para gudii mandatu riʼ: «Guni rechazartu rini» (Hech. 15:28, 29). Laanu laaca rinándanu mandatu riʼ ora guicaanu xiixa tratamientu ni gudii doctor laanu.b

6. ¿Xi zanda gúninu para ganda chinándanu ca norma stiʼ Jehová?

⁶ Rúninu stipa chinándanu ca norma stiʼ Jehová ni caníʼ cadi guni cometernu pecadu sexual (Heb. 13:4). Bidii Apóstol Pablo conseju riʼ: «Lagucueeza ca deseu malu ni nuu lu cuerpu stitu». Racané ca diidxaʼ riʼ laanu gucáʼnanu ca deseu malu ni gápanu. Casi, cadi guidúʼyanu ca imagen ni zanda gucaa laanu guni cometernu pecadu sexual (Col. 3:5; Job 31:1). Ne nagueendacaʼ rucáʼnanu xiixa tentación, o xiixa cosa ni cadi jneza guiníʼ íquenu ni zanda guxheleʼ laanu de Jehová.

7. ¿Xi caquiiñeʼ gúninu ne xiñee?

⁷ Ribeza Jehová guzúʼbanu stiidxaʼ de guidubi ladxidoʼno (Rom. 6:17). Laabe nánnabe xii nga ni galán para laanu ne qué zanda guchaʼnu ca norma ne ca ley stibe (Is. 48:17, 18; 1 Cor. 6:9, 10). Rúninu stipa para gusiéchenu Jehová, ne racaláʼdxinu gácani cásica guníʼ hombre bicaa Salmo riʼ: «Maʼ gudixhe iqueʼ guneʼ ni ná ca norma stiluʼ guiráʼ ora, dede ora gateʼ» (Sal. 119:112). Peru nánnanu zuyubi Binidxabaʼ ximodo gusaba laanu. ¿Guná nga ca trampa riquiiñebe para gúnibe ni yaʼ?

¿XI TRAMPA RIQUIIÑEʼ BINIDXABAʼ PARA GUSABA LAANU?

8. ¿Xi racalaʼdxiʼ Binidxabaʼ ora sanándacabe laanu?

⁸ Ora sanándacabe laanu. Ruyubi Binidxabaʼ modo guniná laanu ne modo guniná xquendabiaaninu para gusaba laanu ne guxheleʼ laanu de Jehová. Ni racaláʼdxibe nga guxuuxebe laanu ne maʼ cadi gaca xhamígunu Jehová (1 Ped. 5:8). Ca xpinni Cristu de primé siglu que, biʼniʼ amenazárcabe, gudíñecabe dede biiticabe laacaʼ purtiʼ zuhuaacaʼ dxiichiʼ lu ni runi crecaʼ (Hech. 5:27, 28, 40; 7:54-60). Ca dxi riʼ, laaca rizanándacabe ca xpinni Cristu. Ne zacá rihuinni ni, nabé maʼ bininácabe ca hermanu ne hermana stinu ni nuu ndaaniʼ guidxi Rusia ne xcaadxi guidxi. Peru laaca riquiiñebe xcaadxi cosa para guninabe ca hermanu stinu.

9. Bizeeteʼ ti ejemplu ni rusihuinni caquiiñeʼ gatananu ora chuʼ tu gacalaʼdxiʼ guchaa decisión stinu.

⁹ Xcaadxi trampa ni riquiiñeʼ Binidxabaʼ. Nuu tiru nagueenda ca rudiʼnu cuenta cucaalú Binidxabaʼ laanu, peru laaca riquiiñebe «trampa» sin gudiʼnu cuenta (Efes. 6:11). Guzéʼtenu ni bizaaca ti hermanu láʼ Bob, nuube ra hospital ne caquiiñeʼ gaca operarbe. Gúdxibe ca doctor que cadi gucaacaʼ laabe rini. Doctor ni chiguni operar laabe que biʼniʼ respetar decisión stibe. Peru gueelaʼ maʼ chiguni operárcabe laabe, zeʼ si familia stibe, bidxiña doctor ni chigucaa laabe anestesia que ne gudxi laabe: «Zándaca qué zaquíʼñedu rini, peru raríʼ nápadu ni pa málasi iquíʼñedu ni». Guníʼ ique doctor que, cumu maʼ qué guinni familia stibe la? zanda guchaabe decisión stibe. Peru qué nuchaa Bob decisión stiʼ, guniʼbe qué zacabe rini guizaaca intiica si guizaaca.

10. ¿Xiñee zeeda gaca ti trampa para laanu modo riníʼ ique binni guidxilayú? (1 Corintios 3:19, 20).

¹⁰ Modo riníʼ ique ca binni ni qué runi ni ná Dios. Pa chinándanu modo riníʼ ique binni ni qué runi ni ná Dios, zanda gucáʼnanu ca norma stiʼ Jehová (biindaʼ 1 Corintios 3:19, 20). «Guendabiaaniʼ stiʼ binni guidxilayú» riʼ rucaani laanu gúninu ni racaláʼdxinu. Guidúʼyanu ni bizaaca caadxi hermanu ni guyuu ndaaniʼ congregación de Pérgamo ne de Tiatira. Bizulú guníʼ íquecabe casi ca binni ni qué runi ni ná Dios, biʼniʼ adorárcabe bidóʼ ne biʼniʼ cometércabe pecadu sexual. Ngue runi bidii Jesús conseju nadipaʼ guiropaʼ congregación riʼ, purtiʼ bidiicaʼ lugar chuʼ ca ni runi cometer pecadu sexual ndaaniʼ congregación (Apoc. 2:14, 20). Ca dxi stinu riʼ, laaca zanda gucaa binni laanu guiníʼ íquenu modo riníʼ íquecaʼ. Zándaca gabi familia stinu laanu gúninu ni ná ladxidoʼno ne cadi ni ná ca ley stiʼ Jehová. Ne ngaca zándaca guiníʼ ca binni ni runibiaʼnu. Zándaca gábicabe laanu cadi malu gúninu ni riuuláʼdxinu ne maʼ guirutiʼ qué runi guiráʼ ni zeeda lu Biblia.

11. ¿Xi caquiiñeʼ gucáʼnanu?

¹¹ Nuu biaje zanda guiníʼ íquenu cadi nayaʼniʼ ca instrucción ni cudii Jehová laanu o zándaca guiníʼ íquenu gúninu «ni maʼ cadi cá lu Stiidxaʼ Dios» (1 Cor. 4:6). Ca líder stiʼ ca religión stiʼ ca judíu ni bibánicaʼ tiempu stiʼ Jesús biábacabe lu pecadu riʼ. Gunábacabe guni binni caadxi cosa ni cadi cá lu Ley ne maʼ beeda gácani ti carga para binni (Mat. 23:4). Peru Jehová riquiiñeʼ Stiidxaʼ ne xquidxi para gusiene chaahuiʼ laanu xi peʼ naquiiñeʼ gúninu. (Prov. 3:5-7). Nga runi, qué ruyúbinu gúninu ni maʼ cadi cá lu Stiidxaʼ Dios ne qué riguíxhenu xi guni xcaadxi lu xiixa cosa ra maʼ cada tobi naquiiñeʼ guicaa decisión stiʼ.

12. ¿Ximodo riquiiñeʼ Binidxabaʼ ni zeeda si de xquendabiaaniʼ binni guidxilayú?

¹² Ni zeeda si de xquendabiaaniʼ binni. Riquiiñeʼ Binidxabaʼ «ni zeeda si de xquendabiaaniʼ» binni guidxilayú ne «modo riníʼ íquecaʼ» para gusiguii binni ne para gutinde (Col. 2:8). Lu primé siglu que biquiiñeʼ Binidxabaʼ ni zeeda si de xquendabiaaniʼ binni, ca tradición ni yenanda ca judíu ne ni riníʼ ca ni bisiidiʼ naquiiñeʼ chinándaruʼ ca xpinni Cristu Ley stiʼ Moisés. Ni zeeda si de xquendabiaaniʼ binni guiráʼ ngue ne pur laacani maʼ qué nucaadiaga binni ni zeeda de guendabiaaniʼ stiʼ Jehová. Ca dxi stinu riʼ, riquiiñebe información ne noticia ni cadi dxandíʼ ni zeeda de ca líder políticu, ni riete lu radiu, televisión, internet ne ca red social ca. Ne nga nga ni bidúʼyanu lu pandemia stiʼ COVID-19 que stale información biree, cadi dxandíʼ ca ni.c Ca testigu stiʼ Jehová ni yenanda ca instrucción ni bidii organización stibe, gucané ni laacaʼ cadi gaca preocupar xhaatacaʼ pur guiráʼ ca noticia ni cadi jneza ni caguite binni tiempu que (Mat. 24:45).

13. ¿Xiñee caquiiñeʼ gápanu cuidadu né ca cosa ni zanda cuee tiempu stinu?

¹³ Ca cosa ni zanda cuee tiempu stinu. Caquiiñeʼ guiduʼyaʼ chaahuinu «xii nga ni jma risaca» (Filip. 1:9, 10). Nuu caadxi cosa ni zanda cuee tiempu stinu ne pur laacani zanda gusaananu de gúninu ca cosa jma risaca. Ca cosa ni rúninu guiráʼ dxi casi guidoʼno, guideʼnu, gúninu xiixa para chuʼnu nayecheʼ ne gúninu dxiiñaʼ zanda gueeda gácacani ca cosa ni cuee tiempu stinu pa qué gápanu cuidadu (Luc. 21:34, 35). Ne guiráʼ dxi lu ca noticia ca rihuinni ximodo ridinde ca líder políticu ne zaqueca modo rucaalú binni gobiernu. Cadi gudiʼnu lugar gaxha ni ridúʼyanu ne ni runadiáganu tiempu stinu, purtiʼ zanda gucaa ca ni laanu guiníʼ íquenu jneza ni nácabe dede guni apoyarnu xiixa partidu. Riquiiñeʼ Binidxabaʼ gaayuʼ cosa ni bizéʼtenu riʼ para gusaana de gúninu ni jneza. Yanna, ¿xi zacané laanu cadi guiábanu lu ca trampa riʼ ne guzuhuaʼnu dxiichiʼ yaʼ?

¿XI ZACANÉ LAANU GUZUHUAʼNU DXIICHIʼ?

14. ¿Xi zacané laanu guzuhuaʼnu dxiichiʼ ne chuʼnu gaxha de Jehová?

¹⁴ Galán guiníʼ íqueluʼ dxi bidiiluʼ lii Jehová ne dxi guyuunísaluʼ. Bíʼniluʼ ni purtiʼ racaláʼdxiluʼ chuʼluʼ gaxha de Jehová. Guníʼ ique xi gucané lii chuʼluʼ seguru ni caziidiluʼ que nga ni dxandíʼ. Bizulú binibiaʼluʼ Jehová, gunnaxhiiluʼ laabe ne beeda guni respetarluʼ laabe casi Bixhózeluʼ ni nuu guibáʼ. Biroobaʼ fe stiluʼ ne nga bicaa lii gaca arrepentirluʼ de ca cosa ni cadi jneza bíʼniluʼ. Bizulú bichaaluʼ ne bíʼniluʼ ca cosa ca casi racalaʼdxiʼ Dios. Ne guizáʼ gutadxí ladxidoʼloʼ ora bidiiluʼ cuenta pabiáʼ riá Dios laanu (Sal. 32:1, 2). Bizulú guyeluʼ, ca reunión, biʼniʼ predicarluʼ dede yendá ora bíʼniluʼ ti oración para bidiiluʼ xpídaluʼ Jehová ne guyuunísaluʼ, yanna maʼ nuuluʼ lu neza ni ziné lu guendanabani ni qué zaluxe ne maʼ gudixhe íqueluʼ cadi gusaanaluʼ de saluʼ lu neza ca (Mat. 7:13, 14).

15. ¿Xi ribeendunu ora guidúʼndanu Stiidxaʼ Dios ne guiníʼ íquenu ni cadúʼndanu?

¹⁵ Biʼniʼ estudiar Stiidxaʼ Dios ne guníʼ ique ni cayuundaluʼ. Caquiiñeʼ chuʼ xcu ti yaga gueteʼ para ganda guzuhuaa dxiichiʼ. Zaqueca nga zeeda gácanu, dxandíʼ pe naquiiñeʼ guni crenu Stiidxaʼ Dios para guzuhuaʼnu dxiichiʼ. Ne laga ziniisi ti yaga laaca ziyaca xcu ni jma ziuula ne riaaziʼ ni gueteʼ. Ora ridúʼndanu Stiidxaʼ Dios ne riníʼ íquenu ni cadúʼndanu riguidxi fe stinu ne riuʼnu seguru ni rusiidiʼ Dios nga ni jma galán (Col. 2:6, 7). Guiníʼ íquenu ximodo gucané Jehová ca xpinni de dxiqué ra bidii laacabe instrucción, gucané laacabe ne gupa laacabe. Guzéʼtenu ti ejemplu, lu ti visión biiyaʼ Ezequiel ti ángel cacaa ca medida stiʼ templu que. Gucané ni laabe stale ne dede laanu ribeendunu xiixa ni galán, casi ximodo gúʼyanu ca norma stiʼ Jehová ora guni adorarnu laa (Ezeq. 40:1-4; 43:10-12).d Laaca zabeendunu ni galán pa cueenu tiempu para guni estudiarnu ca cosa ni jma nagana ni zeeda lu Stiidxaʼ Dios ne guiníʼ íquenu ni.

16. ¿Xi gucané Bob gapa ti ladxidóʼ ni qué zusaana Dios? (Salmo 112:7).

¹⁶ Gúninu stipa gápanu ti ladxidóʼ ni qué zusaana Dios. Lu ti canción bicaa rey David qué ziuu dxi gusaana Dios. Laabe guniʼbe: «Qué zusaana ladxiduáʼ lii, Dios stinneʼ» (Sal. 57:7). Laanu laaca zanda gápanu ti ladxidóʼ ni qué zusaana Dios, ni gapa confianza Jehová (biindaʼ Salmo 112:7). Guibiguetaʼ guininu de Bob, hermanu ni bizéʼtenu lu párrafo 9 que. Ra gúpabe ti ladxidóʼ ni qué rusaana Dios, ¿ximodo gucané ngue laabe yaʼ? Ora gudxi doctor que laabe nuu rini que listu pa málasi iquiiñeʼ ni la? laabe guniʼbe pa nuu ca binni que gucaacaʼ rini laabe la? oraqueca zareebe de ra hospital que. Bob guníʼ: «Nagueenda ca gudxeʼ laabe ni riníʼ iqueʼ ne qué ñuaaʼ xizaa pur xi nizaaca».

17. ¿Xi rizíʼdinu de ni bizaaca Bob? (Biiyaʼ ca imagen ca).

¹⁷ Gunda bizuhuaa dxiichiʼ Bob lu ni runi cré purtiʼ dede ante chebe hospital que maca gudixhe íquebe xi decisión guicaabe. Primé, ni racaláʼdxibe nga gusiéchebe Jehová. Guiropa, biindaʼ chaahuibe Stiidxaʼ Dios ne ca publicación ni cusiene pabiáʼ risaca rini ne guendanabani nezalú Dios. Guionna, nanna dxíchibe zabeendube stale cosa ni galán pa gúnibe ni ná Jehová. Cásica Bob, laanu laaca zanda gápanu ti ladxidóʼ ni qué zusaana Dios neca tídinu lu intiica guendanagana.

18. ¿Xi rusiidiʼ ejemplu stiʼ Barac laanu? (Biiyaʼ foto ni zeeda lu portada).

¹⁸ Gupa confianza Jehová. Guidúʼyanu ni bizaaca Barac, gunda guleendú ni galán purtiʼ yenanda ca instrucción ni bidii Jehová laa. Tiempu que cadi nuu ca israelita listu para checaʼ lu guerra. Qué gápacaʼ ni tindenecaʼ, casi escudu nin lanza. Peru Jehová gudxi Barac gucaalú Sísara, jefe stiʼ ejércitu cananeu, ejércitu ni nuu listu para tinde ne napa stale guiibaʼ (Juec. 5:8). Gudxi profetisa Débora Barac guiete de lu dani Tabor para gucaalú Sísara ne ejércitu stiʼ, ni ziné gaʼ gayuaa carru de guerra. Ruluíʼ zuni ganar ejercitu que pur guiráʼ carru sticaʼ ora maʼ nuucaʼ lu layú planu, peru bizuubaʼ Barac diidxaʼ. Ora zedayete ca soldadu stiʼ Barac de lu dani que, bisabaʼ Jehová ti nisaguié nadipaʼ. Bidaabi ca carru que ndaaniʼ beñe, ne zaqué gucané Jehová Barac para guni ganar (Juec. 4:1-7, 10, 13-16). Pa gápanu confianza ne chinándanu ca instrucción ni rudii xquidxi Jehová laanu la? nanna dxíchinu zacané Jehová laanu guni ganarnu (Deut. 31:6).

CADI GUSAANA DE GUZUHUAʼNU DXIICHIʼ

19. ¿Xiñee maʼ gudixhe íqueluʼ guzuhuaaluʼ dxiichiʼ?

¹⁹ Laga nuunu lu guidxilayú stiʼ Binidxabaʼ riʼ, zúninu stipa guzuhuaʼnu dxiichiʼ lu ni runi crenu (1 Tim. 6:11, 12; 2 Ped. 3:17). Ngue runi cadi gudiʼnu lugar guiree cueʼnu ora sanándacabe laanu, ora tídinu lu xcaadxi trampa ni riquiiñeʼ Binidxabaʼ ne laaca cadi gudiʼnu lugar guicá modo riníʼ ique binni guidxilayú laanu, gápanu laanu para cadi guni crenu ca cosa ni zeeda si de xquendabiaaniʼ binni ne zaqueca cadi gudiʼnu lugar cuee ca cosa ni qué risaca peʼ tiempu stinu (Efes. 4:14). Quixhe íquenu guzuhuaʼnu dxiichiʼ ne cadi guiree cueʼnu, ne chinándanu ca ley stiʼ Jehová ne gannaxhiinu laa. Ne gúninu stipa gácanu binni ni riuu razón. Lu sti artículo ca zadúʼyanu ximodo chinándanu ejemplu stiʼ Jesús ne Jehová ra gácanu binni riuu razón.