Ra caniʼné ti testigu stiʼ Jiobá tuuxa: Ñee laca Jesús nga Dios la?

CA TESTIGU STIʼ JIOBÁ riuuláʼdxicaʼ guiníʼnecaʼ ca vecinu sticaʼ de Stiidxaʼ Dios. Ñee nuu xiixa tema ni zeeda lu Biblia ñuuláʼdxiluʼ ñene chaahuiluʼ la? Ñee riuuláʼdxiluʼ gánnaluʼ de xiixa ni runi ca Testigu o ni runi crecaʼ la? Pa zacá ni, xiñee qué guinabadiidxaluʼ cani laacabe ora gúʼyaluʼ laacabe sti biaje. Ne ziuuláʼdxicabe guiniʼnécabe lii de laacani.

Para gánnaluʼ ximodo ruiʼné ti testigu stiʼ Jiobá tuuxa binni diidxaʼ la? guníʼ ique yeganna ti Testigu láʼ Carmen ti gunaa láʼ Susana.

Ñee dxandíʼ qué runi cré ca Testigu Jesús la?

Susana: Pastor ni rusiidiʼ ra yuʼduʼ stinneʼ na qué runi cré ca testigu stiʼ Jiobá Jesús. Ñee dxandíʼ nga la?

Carmen: Laadu la? runi credu Jesús. Ne runi credu naquiiñeʼ gápadu fe laabe para guiladu.

Susana: Naa laaca.

Carmen: Guirópanu runi crenu nga. Ah!, naa laʼyaʼ Carmen. Lii yaʼ.

Susana: Naa laʼyaʼ Susana.

Carmen: Zándaca naluʼ, «pa runi cré ca testigu stiʼ Jiobá Jesús, xiñee gadxé ni riníʼ binni yaʼ».

Susana: Dxandíʼ, ñuuladxeʼ ñannaʼ xiñee.

Carmen: Riníʼcabe zacá purtiʼ neca nabé nápadu fe Jesús, qué runi credu guiráʼ ni riníʼ binni de laabe.

Susana: Ñee zanda gábiluʼ naa gunáʼ nga tobi de ca cosa ni qué runi cretu de laabe la?

Carmen: Zanda pue. Stale binni riníʼ guca Jesús ti hombre nachaʼhui si, peru para laadu cadi dxandíʼ diʼ nga.

Susana: Naa laaca qué runeʼ crediáʼ nga.

Carmen: Ndiʼ nga stobi de ca cosa ni runi crenu guirópanu. Peru nuu sti cosa, ca Testigu qué runi crecaʼ ora rusiidiʼ binni gadxé de ni bisiidiʼ Jesús de laa ne Bixhoze.

Susana: Xi laani yaʼ.

Carmen: Stale religión rusiidiʼ Jesús nga Dios. Ne zándaca nga nga bisiidicabe lii.

Susana: Ngapeʼ nga bisiidicabe naa. Pastor stinneʼ na laaca Jesús nga Dios.

Carmen: Ñee cadi raʼbuʼ jma galán guidúʼyanu xi guníʼ Jesús de laa, ti gánnanu tupeʼ nga laabe la?

Susana: Dxandíʼ ni naluʼ ca.

Xi bisiidiʼ Jesús

Carmen: Guidúʼyanu xi cusiene ti textu ni zeeda lu Biblia de laani. Biiyaʼ xiná ca diidxaʼ ni cá lu Juan 6:38. Jesús guní: «Purti biete de ibáʼ cadi para gune ni racaladxeʼ, sínuque para gune ni na ni biseenda naa». Cadi dxandíʼ nagana ñaca para lii ñéneluʼ ca diidxaʼ ni guníʼ Jesús ca, pa ñaca laabe nga Dios la?

Susana: Ñee zanda gusiéneluʼ nga naa la?

Carmen: Jesús cadi beeda diʼ de guibáʼ para guni ni na.

Susana: Dxandíʼ, laabe guniʼbe beedabe lu Guidxilayú para gúnibe ni na ni biseendaʼ laabe.

Carmen: Peru pa ñaca laca Jesús nga Dios, tu rábiluʼ biseendaʼ laabe de guibáʼ. Ne xiñee naquiiñeʼ guzuubabe stiidxaʼ yaʼ.

Susana: Maʼ nannaʼ xii ndiʼ nuuluʼ guiniʼluʼ. Peru zuluaʼsiaʼ cadi cusiene diʼ textu ca pa gadxé nga Jesús ne gadxé nga Dios.

Carmen: Yanna guidúʼyanu xi guníʼ Jesús sti dxi. Lu Juan capítulo 7 zeeda caadxi diidxaʼ casi bidúʼndanu lu sti textu que. Ñee ñuuláʼdxiluʼ ñuundaluʼ versículo 16 stini la?

Susana: Ñuuladxeʼ pue. «Para rabi be laacaʼ: “Cadi naa diaʼ gudixhe ni rusiideʼ, sínuque rusiide ni gudixhe ni biseenda naa”.»

Carmen: Xquíxepeʼ lii. Casi bidúʼndanu lu textu riʼ, ñee bisiidiʼ Jesús xiixa de laasi la?

Susana: Coʼ, laabe guniʼbe cusiidibe ni na ni biseendaʼ laabe.

Carmen: Dxandíʼ. Yanna, ñee cadi rábiluʼ jma risaca binni ni biseendaʼ laabe ne ni gudxi laabe xi gusiidibe la? Ni nánnanu nga jma risaca binni ni ruseendaʼ tuuxa guni xhiiñaʼ que binni ni ziguni dxiiñaʼ ca.

Susana: ¡Qué huayuu dxi guundaʼ nga!

Carmen: Laaca galán guiníʼ íqueluʼ ni na ca diidxaʼ zeeda lu Juan 14:28: «Ma bina diaga tu gudxe laatu chaaʼ, peru zabigueta ra nuu tu sti tiru. Pa ñanaxhii tu naa la? ñeche tu ti rabe chaa ra nuu Bixhozeʼ, purti jma nandxóʼ Bixhoze que naa». Casi bidúʼndanu lu textu riʼ, para Jesús tuu ndiʼ jma risaca, laabe la? o Bixhózebe.

Susana: Laabe guniʼbe jma nandxóʼ Bixhózebe que laabe. Naa rabeʼ ruuyabe Dios casi tuuxa jma risaca que laabe.

Carmen: Ngapeʼ nga laani. Yanna guidúʼndanu Mateo 28:18. Lu versículo riʼ cayabi Jesús ca discípulo stiʼ: «Irá xixé ni nuu ibáʼ ne ni nuu guidxilayú ma nexhe ladxi nayaʼ». Ñee guniʼbe maca nexheʼ guiráʼ cosa ladxinabe la?

Susana: Coʼ, raríʼ cayeneʼ casi ora sti binni gudixhe ni ladxinabe.

Carmen: Yanna, pa laaca Jesús nga Dios, ñee rábiluʼ ñanda ñuu tuuxa nusaana guiráʼ cosa ladxinabe la?

Susana: Chiguiníʼ iqueʼ ni.

Tu caníʼnebe.

Carmen: Nuu sti cosa ni ñaca nagana para binni ñene pa ñaca Jesús nga Dios.

Susana: Xi laani yaʼ.

Carmen: Guidúʼyanu lu Biblia xi bizaaca dxi guyuunisa Jesús. Guyúbinu ni lu Lucas 3:21, 22. Ñanda ñuundaluʼ ni la?

Susana: «Laga caguu nisa ru Juan binni, ye chuu nisa Jesús ra nuu. Ne ra caníʼ né Jesús Dios, bixele ibáʼ. Biete Espíritu Santu luguiáʼ, bihuinni casi ti paloma, ne ucuá ti ridxi de ibáʼ: “Lii nga Xiiñe ni nadxieeʼ ne ni rusieche naa”».

Carmen: Ñee bidiiluʼ cuenta xi cayuni Jesús ora guyuunisa que la?

Susana: Cayuni orarbe.

Carmen: Ajaʼ. Yanna, pa ñaca Jesús nga Dios, tu caníʼnebe ora cayuni orarbe que yaʼ.

Susana: Napa xidé guinabadiidxaʼ ni guniʼluʼ ca pastor stinneʼ.

Carmen: Sti cosa ni naquiiñeʼ gánnanu nga biree si Jesús de ndaaniʼ nisa que guyuu tu guniʼné laa de guibáʼ. Ñee bidiiluʼ cuenta xiná ridxi que la?

Susana: Nani Jesús nga Xiiñibe, nadxiibe laa ne rusiecheʼ laabe.

Carmen: Biaʼsi. Peru pa ñaca Jesús nga Dios, tuu ngue caniʼné laabe dede guibáʼ que yaʼ.

Susana: Qué huayuudxí guiníʼ iqueʼ nga.

Xiñee gudxi Dios laabe «Xiiñe» ne laabe gúdxibe laa «Bixhoze»

Carmen: Guidúʼyanu sti cosa. Laaca bidúʼndanu ra guníʼ Jesús Dios nga bixhoze. Ne ora guyuunisa Jesús, ucuá ti ridxi de guibáʼ ni na Xiiñiʼ laabe. Ne Jesús peʼ guníʼ laa nga Xiiñiʼ Dios. Pa ñacaláʼdxiluʼ nusiéneluʼ naa de chupa binni igual laacaʼ, tu niniʼluʼ zeeda gaca ti binni ca para stobi ca ndaaniʼ ti familia.

Susana: Naa niniéʼ bíʼchicabe.

Carmen: Biáʼsipeʼ bicábiluʼ, o dede ñanda nuchaaganu laacabe chupa cuachi ni nabé yendeecaʼ. Peru Jesús gúdxibe Dios Bixhozeʼ ne guniʼbe nácabe Xiiñiʼ Dios. Yanna, xii nga gucalaʼdxiʼ Jesús niníʼ yaʼ.

Susana: Maʼ bieneʼ. Cuzeeteʼ Jesús ti binni jma huaniisi ne jma napa poder que sti binni ca.

Carmen: Biaʼsi nga niquiiñeluʼ ejemplu stiʼ chupa binni bíʼchicaʼ o cuachi laacaʼ para nuluiʼluʼ igual laacaʼ. Yanna pa nusiene Jesús, Maestru ni jma nanna gusiidiʼ, igual laa ne Dios, cadi dxandíʼ nga nga ejemplu niquiiñebe o dede nuyúbibe stobi jma galán la?

Susana: Nga pue.

Carmen: Lugar de niniʼbe ca ejemplu ca la? laga guniʼbe Bixhózebe ne laaca guniʼbe Xiiñiʼ Dios laabe para guniʼbe tu rácabe laa.

Susana: Galán ni guniʼluʼ ca.

Xi bisiidiʼ ca primé xpinni Jesús.

Carmen: Pa nápaluʼ sti tiempu huiiniʼ la? ñuuladxeʼ nuluéʼ lii sti cosa de tema ni caninu riʼ ante chaaʼ.

Susana: Neca sti ratu huiiniʼ si.

Carmen: Pa ñaca dxandíʼ Jesús Dios, ñee cadi nusiidiʼ ca discípulo stibe ni la?

Susana: Jneza ni guniʼluʼ ca.

Carmen: Peru qué liica rieeteʼ lu Biblia pa bisiidicabe nga. Gadxepeʼ nga ni bisiidicabe. Guidúʼyanu ni bicaa apóstol Pablu, tobi de ca primé xpinni Jesús. Lu Filipenses 2:9 bisiénebe xi biʼniʼ Dios guti si Jesús ne biasa si lade gueʼtuʼ, textu ca na: «Bidxiiba Dios laabe ne bisisaca laabe jma que irá xixé». Xiná textu ca biʼniʼ Dios pur Jesús yaʼ.

Susana: Textu ca na bidxiibaʼ Dios laabe ne bisisaca laabe.

Carmen: Ngapeʼ nga ni biʼniʼ Dios. Peru pa ñaca biaʼcaʼ Dios nga Jesús ante gati, ne despué jma nudxiibaʼ Dios laabe ne nusisaca laabe, ñee cadi nusihuinni nga jma dxíʼbabe que Dios la? Yanna ñee zándaxa chuʼ tuuxa jma dxiʼbaʼ que Dios.

Susana: Coʼ, qué zanda diʼ.

Carmen: Yanna, pur guiráʼ ni maʼ guninu ca, Ñee niniʼluʼ rusiidiʼ Biblia Jesús nga Dios la?

Susana: Coʼ njaʼ. Ni rusiidini nga Xiiñiʼ Dios Jesús.

Carmen: Ngapeʼ nga laani. Peru cadi pur nga huaxiéʼ risaca Jesús para ca testigu stiʼ Jiobá. Ni runi credu nga beeda Mesías que para gulá ca binni ni guzuubaʼ stiidxaʼ Dios.

Susana: Ngaca runeʼ cré.

Carmen: Pa zacá ni, zándaca galán guiníʼ íquenu ximodo zanda gudiʼnu xquíxepeʼ Jesús pur bidii xquendanabani para gulá laanu.a

Susana: Nuu tiru huaníʼ iqueʼ zacá.

Carmen: Pa riuulaʼdxuʼ la? zanda guibiguetaʼ sti dxi ne guluéʼ lii ximodo na Biblia gúninu ni. Ñee nuuluʼ yoo sti semana ca biaʼ hora riʼ la?

Susana: Nuaaʼ, zabezaʼ lii.

Carmen: Biaʼsi. Guidúʼyanu dxi ca pue.

[Nota]