Ni rinabadiidxaʼ cani ruundaʼ
Xiñee guníʼ Pedru qué ganna ca judíu ne ca xaíque sticaʼ xi cayúnicaʼ ora gunábacaʼ gati Jesús, pa laabe bicheechebe diidxaʼ guidubi naca Israel (Hech. 3:17).
Dxi gudxi apóstol Pedru ca judíu que xi guiráʼ bíʼnicaʼ para biiticaʼ Mesías que, guniʼbe: «Nanna biʼni tu irá nga purti qué ganna tu xi cayuni tu, laatu ne ca xaíque stitu» (Hech. 3:14-17). Nuu de laacabe qué ñánnacabe xi bíʼnicabe, purtiʼ zándaca qué nudiicabe cuenta pa Jesús ngue Mesías o zándaca qué ñene chaahuicabe guiráʼ ni bisiidibe. Xcaadxi la? purtiʼ huaxiéʼ guyuuláʼdxicaʼ niziidicaʼ ximodo ñuni adorarcaʼ Dios jneza. Ne zándaca guyuu xcaadxi guníʼ íquecaʼ mal de Jesús, gúpacaʼ envidia o guca nanaláʼdxicaʼ laabe.
Guidúʼyanu xi guleendú stale de ca judíu que purtiʼ qué ninacaʼ niziidicaʼ ximodo ñuni adorarcaʼ Dios jneza. Jesús nabé biquiiñeʼ ejemplu ora bisiidiʼ ne bisiénebe ni cani racalaʼdxiʼ ganna jma. Peru qué ñuulaʼdxiʼ ca judíu que niziidicaʼ jma ngue runi maca zecaʼ de raqué. Ti biaje dede ne chupa chonna de ca discípulo stiʼ Jesús bidxiichicaʼ pur ti ejemplu ni biquiiñebe (Juan 6:52-66). Nin tobi de laacaʼ qué ñénecaʼ pa caquiiñeʼ Jesús ca ejemplu que para gacané laacaʼ guchaacaʼ modo laacaʼ ne modo riníʼ íquecaʼ (Isa. 6:9, 10; 44:18; Mat. 13:10-15). Laaca qué nulábicabe ca diidxaʼ riguixhená zeeda lu Biblia ra na zaquiiñeʼ Mesías que ejemplu para gusiidiʼ (Sal. 78:2).
Ne xcaadxi de laacabe qué nucaadiágacabe Jesús purtiʼ guníʼ íquecabe mal de laabe. Casi dxi guyebe ndaaniʼ yuʼduʼ ni guyuu xquídxibe Nazaret la? nabé bidxagayaa ca binni que modo bisiidibe. Lugar de niníʼ íquecabe laabe nga Mesías ni gueeda que, laga bizulú guníʼcabe padé laabe. Ne bizulú gunabadiidxacabe: «Paraa biziidi hombre ri irá ndi pue. [...] Lácaxa cadi dxa carpinteru xiiñi María que ndiʼ, biʼchi Jacobo ne José ne Judas ne Simón. Ca bizaʼna be laca rarí nabeza caʼ» (Mar. 6:1-3). Cumu biiyacabe zeeda Jesús de ti familia pobre la? ngue runi qué ninácabe nucaadiágacabe cani bisiidiʼ.
Yanna xi bizaaca ca xaíque yuʼduʼ que yaʼ. Laaca pur cani maca bizéʼtenu ca stale de laacabe huaxiéʼ bicaadiágacabe cani bisiidiʼ Jesús (Juan 7:47-52). Laaca gúpacabe envidia laabe purtiʼ nabé yenanda binni laabe (Mar. 15:10). Ne stale de laacabe bidxiichicabe ora bisihuinni Jesús gadxé ni rusiidicabe ne gadxé ni rúnicabe ne qué rusiidicabe ni dxandíʼ (Mat. 23:13-36). Cumu qué ninácabe nixeleʼ xpiaanicabe la? ngue runi gudxi Jesús laacabe ca diidxaʼ riʼ: «Lagapa gá si laatu, ma[e]stru de ley caʼ. Purti casi ñaca naaze tu llave para guiene tu stiidxa Dios, peru qué na tu guiene tu, ne nin qué na tu udii tu lugar guiene xcaadxi» (Luc. 11:37-52).
Jesús bicheeche ca diidxaʼ nacubi ne galán stiʼ Dios chonna iza arondaʼ ndaaniʼ guidxi Israel. Laaca bisiidibe ca discípulo stibe para gúnicaʼ dxiiñaʼ que (Luc. 9:1, 2; 10:1, 16, 17). Jesús ne ca discípulo stiʼ bíʼnicaʼ ti dxiiñaʼ nabé galán ngue runi qué ñuulaʼdxiʼ ca fariseu que ni bíʼnicabe ne guniʼcaʼ: «Biaa guuyuʼ. [...] Ma irá xixé binni guidxilayú zinanda laabe» (Juan 12:19). Racá ridúʼyanu gunna ca judíu que de dxiiñaʼ biʼniʼ Jesús, peru qué ninácabe ñénecabe laabe nga Mesías que pur guiráʼ ni cayúnibe que. Ñándaca niziidicabe jma ne ñannaxhiicabe laabe peru qué ninácabe. Chupa chonna de laacabe guyuu lade ca binni ni biiti Jesús. Ngue runi gudxi apóstol Pedru stale de laacabe: «Lainaba perdón Dios, laudxii lú jneza ti ixá stonda tu ne zacá zusieche be ladxidóʼ to, ra useenda be Jesús ra nuu tu sti tiru, ne nga nga Cristu ni ulí be gueda ulá laatu» (Hech. 3:19, 20). Stale de ca judíu que yenándacaʼ ni na conseju bidii Pedru que, ne ládecabe guyuu «stale sacerdote». Guirácabe biyúbicabe guiénecabe, guca arrepentírcabe ne guyuulaʼdxiʼ Jiobá ni bíʼnicabe que (Hech. 2:41; 4:4; 5:14; 6:7).