Ni rinabadiidxaʼ cani ruundaʼ
Dxi guníʼ Pablu ca diidxaʼ «riguixhe ná ca luguiá sti hermanu» lu carta bicaabe ra nuu ca Hebreu que, ñee caniʼbe zacá nga ribícabe ca binnigola la? o xidé ngue guniʼbe (Heb. 6:2).
Gastiʼ razón para guininu xipeʼ nga caniʼbe racá, peru zándaca ni caniʼbe nga riguixhenácabe luguiáʼ tuuxa para guicaa espíritu.
Dxandíʼ nga lu Biblia zeeda stale ejemplu ra cayeeteʼ gudixhenácabe luguiáʼ binni para cuícabe laacaʼ ti gúnicaʼ xhiiñaʼ Dios. Moisés gudixhená luguiáʼ Josué ora gulibe laa para chuʼ xlugarbe (Deu. 34:9). Laaca zaqueca bíʼnicabe ora gulícabe ca hombre ni maʼ zanda guni xhiiñaʼ Dios lade ca binni ridagulisaa (Hech. 6:6; 1 Tim. 4:14). Ne ngueca nga gudxi Pablu Timoteu ora gúdxibe laa cadi casi zeʼ quixhenáʼ ique tuuxa para guni xhiiñaʼ Dios (1 Tim. 5:22).
Peru lu carta bicaa Pablu ra nuu ca xpinni Cristu de Hebreu que guníʼ: «Naquiiñe ucáʼ ique nu iniisi nu lu stiidxa Dios ne cadi guiaana nu casi cani deru cuzulú caziidi de Cristu». Ne laaca gúdxibe laacaʼ: «Naquiiñe [...] usaana nu modo bibani nu dxi caʼru gunibiáʼ nu stiidxaʼ [Dios]. Ma biziʼdi nu de enda riuu nisa, ne ma biziʼdi nu ni runi ca hermanu gola, riguixhe ná ca luguiá sti hermanu» (Heb. 6:1, 2). Pur ni guníʼ Pablu ca, ñee zanda guininu caquiiñeʼ gusaana ca xpinni Cristu de primé siglu que de cuicaʼ binnigola purtiʼ nga nga tobi de ca cosa ni runi cani deruʼ caziidicaʼ de Cristu para ganda guiniisicaʼ lu stiidxaʼ Dios que la? Coʼ, purtiʼ ca hombre ni maʼ biniisi lu stiidxaʼ Dios nga cani raca binnigola lade ca binni ridagulisaa, ne nga nga ti guenda ni naquiiñeʼ gusisácabe (1 Tim. 3:1).
Peru cadi gudixhenácabe luguiáʼ tuuxa para si cuícabe laa guni xhiiñaʼ Dios. Lu primé siglu que bicaanáʼ Jiobá guidxi Israel ni guyuu dxiqué ne maʼ ca xpinni Cristu ni bibí que nga gulibe para gácacaʼ Israel stiʼ Dios (Mat. 21:43; Hech. 15:14; Gál. 6:16). Ne dxandíʼ guca ni guninu ca purtiʼ gucuaacabe espíritu para gucané laacabe guiníʼcabe sti diidxaʼ (1 Cor. 12:4-11). Casi dxi guca Corneliu ne binnilidxi xpinni Cristu la? gucuaacaʼ espíritu santu, ne bihuinni ni purtiʼ guniʼcaʼ sti diidxaʼ (Hech. 10:44-46).
Guyuu biaje gulaquinácabe luguiáʼ tuuxa para guni milagru. Dxi bicheeche Felipe diidxaʼ ndaaniʼ guidxi Samaria que stale tu guyuunisa. Ngue runi grupu ni zaniruʼ ni guyuu dxiqué biseendacaʼ apóstol Pedru ne Juan raqué. Xi para yaʼ. Stiidxaʼ Dios na: «Ne udixhe ná Pedru ne Juan luguiá cabe [cani deruʼ guyuunisa que] para ucuaa cabe Espíritu Santu». Nanna dxíchinu gucuaacabe ni purtiʼ biiyaʼ binni cani bíʼnicabe. Ne nánnanu zacá gúcani purtiʼ Simón, hombre ni guca mago que, biiyaʼ xi cucaa espíritu santu que binni guni ne gucaláʼdxibe niguíxebe ca apóstol que ti nuluiʼcaʼ laabe xi gúnibe para quixhénabe ique binni ti guicaacaʼ espíritu santu para gúnicaʼ milagru (Hech. 8:5-20). Despué guyuunisa doce discípulo ndaaniʼ guidxi Éfeso. Historia ca na: «Ora udixhe ná [Pablu] luguiá caʼ, bidxá ladxidóʼ ca de Espíritu Santu. Ne uníʼ ca idioma ni qué niziidi caʼ, ne bizulú ca byuíʼ né ca binni stiidxa Dios» (Hech. 19:1-7; zanda gúʼndaluʼ 2 Timoteo 1:6).
Pur cani maʼ guninu ca ruluíʼ si ca diidxaʼ ni guníʼ Pablu lu Hebreu 6:2 que cadi caníʼdibe quixhenácabe luguiáʼ binni para gaca binnigola, sínuque para guicaa cani deruʼ caziidiʼ de Cristu espíritu ni gacané laacaʼ gúnicaʼ milagru ne guiniʼcaʼ sti diidxaʼ.