Ñee guniʼluʼ zúniluʼ xiixa ne maʼ qué ñúniluʼ ni la?

Yanna guníʼ ique sti cosa ni bizaacaʼ riʼ. Ti guendaxheelaʼ biʼniʼ invitar ti gunaa xpinni Cristu ni cusiniisi chupa xiiñiʼ stubi para chitóxhicaʼ ra lídxicabe. Guizáʼ biecheʼ ca xcuidihuiiniʼ que ora gudxi jñaacaʼ ni laacaʼ. Pa ñanda si maʼ ñedandá gueelaʼ que. Peru ti dxi ante, guniʼné guendaxheelaʼ que jñaa ca xcuidihuiiniʼ riʼ para gabi laabe bizaaca xiixa ne maʼ qué zanda guidxaagalú laacabe ra lidxi. Despué gunna gunaa riʼ xii ngue bizaacacabe: biʼniʼ invitar si guendaxheelaʼ riʼ familia que la? guniʼné chupa chonna xhamígucabe laacabe para guni invitar laacabe gueelaʼ que, ne guendaxheelaʼ que guníʼ zie.

Ca xpinni Cristu naquiiñeʼ gúnicaʼ ni maʼ bidii stiidxacaʼ. Cadi galán diʼ guininu zúninu xiixa ni nánnanu qué zúninu (2 Cor. 1:18). Peru casi bidúʼyanu lu guiropaʼ ejemplu riʼ, cadi guiráʼ biaje randa rúninu ni maʼ bidii stiidxanu. Ziuu biaje maʼ qué zanda gúninu xiixa ni maʼ guninu. Ne ngapeʼ nga bizaaca apóstol Pablu ti dxi.

ÑEE QUÉ ÑUNI PABLU NI GUNÍʼ LA?

Lu iza 55, dxi cayuni Pablu guionna biaje stiʼ casi misioneru ndaaniʼ guidxi Éfeso, gudixhe ique cheʼ Corinto, tiidiʼ nisadóʼ Egeo ne de raqué cheʼ Macedonia. Neza zebe para guibiguétabe Jerusalén, gudixhe íquebe chigánnabe neza binni ridagulisaa ni nuu Corinto sti biaje. Zándaca gudíʼdibe ndaaniʼ guidxi riʼ para nudii ca xpinni Cristu de raqué laabe bueltu ni bidopa para ca xpinni Cristu de Jerusalén (1 Cor. 16:3). Ne ngapeʼ nga ni rieeteʼ lu 2 Corintios 1:15, 16, ra na: «Nga runi gudixhe niganna laatu ora ziaa Macedonia ne laca ora nibiguetaʼ, para nusieche laatu chupa tiru. Oraque ma ñacané tu naa para ñaa Judea».

Zándaca maca bicaa Pablu ti carta ra nuu ca xpinni Cristu de Corinto ra gúdxibe laacaʼ ni naguixhe íquebe gúnibe (1 Cor. 5:9). Peru cadi xadxí de bicaabe carta riʼ, ca binni ni beeda de ra lidxi Cloe ne xcaadxi binni gúdxicaʼ laabe nabé ridinde diidxaʼ ca xpinni Cristu ni nuu Corinto (1 Cor. 1:10, 11). Nga runi, bichaa Pablu ni maʼ gudixhe ique guni ne bicaabe primé carta ra nuu ca xpinni Cristu de Corinto. Lu carta riʼ bidiibe laacaʼ conseju sicarú ne gulídxebe laacaʼ. Ne laaca gúdxibe laacaʼ primé ziebe Macedonia, de racá maʼ chebe Corinto (1 Cor. 16:5, 6).a

Dxi yendá carta stibe ra nuu ca xpinni Cristu de Corinto, zándaca «cani na apóstol laa» gundísacaʼ falsu luguiabe ne naca qué rúnibe ni riniʼbe. Para gusihuinni Pablu cadi dxandíʼ ni na ca binni que, gunabadiidxabe laacaʼ: «Ñee na tu unié siaʼ ni la? Cadi zácaxa tu rune casi runi binni guidxilayú, riníʼ zie neca nanna qué zie» (2 Cor. 1:17; 11:5).

Ñee guníʼ si Pablu zié neca nanna qué zanda cheʼ la? Coʼ, Pablu guníʼ: «Cadi zácaxa tu rune casi runi binni guidxilayú». Ca diidxaʼ riʼ gucané ni ca xpinni Cristu de Corinto para biiyacaʼ risaca para laabe gúnibe ni maʼ guniʼbe ne cadi pur racaláʼdxisibe bichaabe ni maʼ gudixhe íquebe gúnibe.

Pablu bisiene cadi jneza diʼ nga ora riníʼ binni zuni xiixa ne qué gúnini. Laa bicaa: «Cásica qué rusiguii Dios la? zacaca qué huayabi du laatu zuni du xiixa ni nanna du qué zuni du» (2 Cor. 1:18). Bichaa Pablu ni maʼ gudixhe ique guni ne guyé Corinto para gacané ca xpinni Cristu de raqué. Xiñee bíʼnibe ni yaʼ. Lu 2 Corintios 1:23 guniʼbe: «Purti qué racaladxe gune naʼya laatu». Zacá zanda gúnicabe ni jneza ante chigánnabe laacaʼ. Ne guizáʼ biéchebe dxi nuube Macedonia ora gudxi Tito laabe biʼniʼ ca xpinni Cristu ni gúdxibe laacaʼ lu carta ni biseendabe ra nuucaʼ: bicaa ni laacaʼ gaca arrepentircaʼ (2 Cor. 6:11; 7:5-7).

BISIHUINNI JESÚS ZUNI JIOBÁ CANI MAʼ GUNÍʼ

Ora gundísacabe falsu luguiáʼ Pablu, laaca bisihuínnicabe qué zanda guni cré binni ni riniʼbe ora rucheechebe diidxaʼ. Peru bisietenaláʼdxibe ca xpinni Cristu de Corinto rucheechebe stiidxaʼ Jesucristu. Gúdxibe laacaʼ: «Naa ne Silvanu ne Timoteu byuí du stiidxa Cristu Jesús Xiiñi Dios lade tu. Ximodo ñanda ñabi du laatu zuni du xiixa pa nanna du qué zuni du ni, nanna nda du qué ñuu dxi ñuni Cristu zacá» (2 Cor. 1:19). Jesucristu, hombre ni yenanda Pablu, biʼniʼ cré binni guiráʼ ni guníʼ. Biaʼ tiempu bibánibe ndaaniʼ Guidxilayú ne bicheechebe diidxaʼ guniʼbe ni dxandíʼ (Juan 14:6; 18:37). Pa guiráʼ ni guníʼ Jesús dxandíʼ cani ne zanda guni cré binni cani la? laaca dxandíʼ cani guníʼ Pablu ne zanda guni cré binni cani, purtiʼ laaca ni bisiidiʼ Jesús nga bisiidibe.

Jiobá nga «Dios ni dxandíʼ» (Sal. 31:5). Ne nánnanu zacá ni pur ca diidxaʼ ni bicaa Pablu riʼ: «Laape be [Cristu] beda guni be irá ni ma bidii stiidxa Dios gacaʼ». Qué ñuu dxi nucheené Jesús Dios dxi guyuu ndaaniʼ Guidxilayú, ne zacá bisihuínnibe runi Jiobá guiráʼ ni maʼ guníʼ. Guniʼruʼ Pablu: «Ngue runi ora riní né nu Dios riní nu “Amén” purti nanna nu zaca ni, casi guca stiidxa Dios dxi beeda Cristu, ne zacá rusisaca nu Dios» (2 Cor. 1:20). Nga runi, zanda guininu Jesús nga «Amén», purtiʼ bisihuinni raca guiráʼ ni maʼ bizabiruaa Jiobá.

Cásica raca guiráʼ ni riníʼ Jiobá ne Jesús, Pablu laaca guníʼ zuni cani nanna zanda guni (2 Cor. 1:19). Qué ñúnibe «casi runi binni guidxilayú», purtiʼ laacaʼ riniʼcaʼ zúnicaʼ xiixa peru qué rúnicaʼ (2 Cor. 1:17). Ni bíʼnibe nga bisiidibe «modo rusiidi Espíritu Santu» (Gál. 5:16). Guiráʼ ni bíʼnibe bisihuínnibe rizaaláʼdxibe binni. Bíʼnibe guiráʼ ni guniʼbe zúnibe.

ÑEE RÚNILUʼ GUIRÁʼ NI RINIʼLUʼ ZÚNILUʼ LA?

Ca dxi stinu riʼ, ca binni ni qué rinanda ca conseju ni zeeda lu Biblia riniʼcaʼ zúnicaʼ xiixa, peru pur intiica si cosa qué rúnicaʼ ni maʼ bidii stiidxacaʼ o qué rúnicaʼ ni riniʼcaʼ purtiʼ riree sti cosa jma galán gúnicaʼ. Ora runi binni negocio, cadi guiráʼ diʼ biaje runi ni maʼ bidii stiidxaʼ, ne nuu tiru neca gucaacabe ni lu guiʼchiʼ. Stale binni maʼ qué ruuyaʼ guendaxheelaʼ casi ti compromisu ni runi chupa binni biaʼ dxi guibani. Zeʼ dxi jma stale binni cayaca divorciar, nga rusihuinni ruuyacabe guendaxheelaʼ casi guendariguite ne riníʼ íquecabe zanda guibiá ni ora gápacabe gana (2 Tim. 3:1, 2).

Ñee dxandipeʼ rúniluʼ ni maʼ bidii stiidxaluʼ la? Casi bidúʼyanu ra bizulú tema riʼ, ziuu biaje qué zúniluʼ ni maʼ guniʼluʼ, cadi pur qué risaca ni bidii stiidxaluʼ, sínuque pur xiixa guendanagana bidxaagaluluʼ. Peru ti xpinni Cristu ni maʼ bidii stiidxaʼ guni xiixa o maʼ biʼniʼ ti compromisu la? Naquiiñeʼ guni stipa pur guni ni maʼ bidii stiidxaʼ (Sal. 15:4; Mat. 5:37). Zacá zunibiáʼcabe laabe casi ti binni ni zanda guni crécabe ni guiníʼ, ni runi ni maʼ bidii stiidxaʼ ne qué rusiguii (Efes. 4:15, 25; Sant. 5:12). Pa ruuyaʼ xcaadxi binni nácaluʼ ti binni ni zanda guni crecaʼ, zándaca jma zanacaʼ gucaadiágacaʼ lii ora guiníʼneluʼ laacaʼ de Reinu stiʼ Dios. Nga runi, biʼniʼ stipa pur gúniluʼ cani maʼ guniʼluʼ zúniluʼ.