Jiobá cusiidiʼ laanu gúninu xhiiñaʼ jneza
Capítulo 11
Ca lugar ra runi adorarnu Jiobá
BIBLIA cayuni mandar cani dxandíʼ xpinni Dios guidagulisaacaʼ para guiziidicaʼ ne gacanésaacaʼ (Deu. 31:12; Heb. 10:23-25). Primé yoo ra biʼniʼ adorar ca israelita que Dios la? biree lani «yoo de lari» o «yoo ra ridagulisaa binni» (Éxo. 39:32, 40). Despué Salomón, xiiñiʼ David, bicuí ti yuʼduʼ para guni adorar binni Dios ndaaniʼ ni (1 Rey. 9:3). Binitilú si yuʼduʼ que lu iza 607 ante gueeda Jesús la? ca judíu que bizulú bidagulisaacaʼ ndaaniʼ caadxi yoo jma nahuiiniʼ ni biree lá sinagoga para biʼniʼ adorarcaʼ Dios. Gudiʼdiʼ si caadxi iza bibiguetaʼ guca chaahuiʼ yuʼduʼ que sti biaje ne biʼniʼ adorárcabe Jiobá ndaaniʼ ni. Jesús bisiidiʼ binni ndaaniʼ sinagoga ne ndaaniʼ yuʼduʼ (Luc. 4:16; Juan 18:20). Dede bicaasaabe guiráʼ ca binni guzánanda laabe que lu ti dani para bisiidibe laacaʼ de stiidxaʼ Dios (Mat. 5:1-7:29).
Guti si Jesús, ca discípulo stibe bixélecaʼ de cani qué niná ñuni cré stiidxaʼ Dios ne bidaagulisaacaʼ ca lugar ra guyuu stale binni (Hech. 19:8, 9). Laaca biquiiñecabe lidxi binni para bisiidicabe Stiidxaʼ Dios ne para guyuucabe lade xcaadxi xpinni Cristu (Rom. 16:3, 5; Col. 4:15; File. 2). Ne guyuu biaje bidagulisaacabe zitu de guidxi para cadi guidxela ca xhenemígucabe laacabe. Rihuinni dxíchica bisisaca ca xpinni Dios ni bibani dxiqué guidagulisaacaʼ para guni adorarcaʼ Jiobá ne guiziidicaʼ de laabe (Isa. 54:13).
Ca dxi nabáninu riʼ laaca raca guendaridagulisaa ra lidxi binni ne ca lugar ra zanda cheʼ stale binni. Ca yoo ca riquiiñeʼ cani para guidagulisaa Grupu ni Ruundaʼ Libru ne para ca guendaridagulisaa ni raca ante guireeche diidxaʼ. Ca xpinni Cristu nabé riéchecaʼ gutiiñecaʼ lídxicaʼ para gaca ca guendaridagulisaa ca. Stale de laacaʼ riniʼcaʼ huacaacaʼ stale ndaayaʼ purtiʼ rutiiñecaʼ lídxicaʼ.
YOO STIʼ REINU
Yoo ni jma riquiiñeʼ ca testigu stiʼ Jiobá para guidagulisaacaʼ nga Yoo stiʼ Reinu. Nuu lugar la? jma baratu riree guiaxa ti yoo para gaca ca guendaridagulisaa ca que sícabe o gucuícabe ti Yoo stiʼ Reinu. Peru stale neza binni ridagulisaa huaziʼcaʼ ti layú ne huacuicaʼ ti Yoo stiʼ Reinu ne rucuícabe ni biaʼ binni ridagulisaa rié raqué. Xcaadxi neza binni ridagulisaa huaziʼcaʼ ti yoo ne huayuni chaahuiʼ cani. Ora gácani zacá la? jma jneza tiidiʼ ti libana ra guieeteʼ maʼ zanda gaca adorar Jiobá ndaaniʼ ni. Peru pa nuu ti Yoo stiʼ Reinu guca chaahuiʼ si ndaaniʼ ni la? cadi naquiiñeʼ diʼ tiidiʼ ti libana casi maʼ guninu ca.
Ora guiníʼ íquetu gucuitu ti Yoo stiʼ Reinu la? cadi naquiiñeʼ guicá íquetu gúnituni para si guidxagayaa binni ni. Nuu biaje neca guchaa modo guiluxe ca yoo riʼ ndaaniʼ gadxé gadxé guidxi la? zaquiiñecani para gaca adorar Jiobá ndaaniʼ cani (Hech. 17:24). Ne naquiiñeʼ gaca Yoo stiʼ Reinu ca biaʼ binni rié ca guendaridagulisaa ca ti zacá ganda iquiiñeʼ ni jneza.
Ca binni ni ridagulisaa ndaaniʼ Yoo stiʼ Reinu ca nga naquiiñeʼ quíxecaʼ guiráʼ ni riquiiñeʼ ndaaniʼ ni. Guirutiʼ diʼ rinabaʼ guna ndaaniʼ yoo riʼ, peru nuu ti caja ndaaniʼ ni ra zanda gusaba ca binni ridagulisaa bueltu ti zacá guiaxa guiráʼ ni riquiiñeʼ ndaaniʼ ni. Ca binni ca rudiicabe biaʼ náʼ ladxidóʼcabe (2 Cor. 9:7). Ca binnigola nánnacaʼ ximodo nexheʼ chaahuiʼ ca guiʼchiʼ stiʼ Yoo stiʼ Reinu ca ne xi guiráʼ zanda gaca ndaaniʼ ni. Lu Xhiiñaʼ Reinu ni Rúninu, Carta ni ruseendaʼ Betel ne xcaadxi guiʼchiʼ rieeteʼ ximodo raca cani maʼ bizéʼtenu ca.
Ca binni ridagulisaa naquiiñeʼ guiéchecaʼ purtiʼ chigacanecaʼ para guiaxa guiráʼ ni riquiiñeʼ ndaaniʼ Yoo stiʼ Reinu ca. Laaca naquiiñeʼ guiéchecabe gacanécabe para guiá ndaaniʼ ni ti guihuínnini galán. Ndaaniʼ yoo ca ne fuera naquiiñeʼ guihuínnini galán ti zacá guʼyaʼ binni stiʼ xquidxi Jiobá ni. Stale biaje la? ti binnigola o ti siervu ministerial runi ti guiʼchiʼ ra cá tu chigusiá ndaaniʼ yoo ca guiráʼ semana. Cada Grupu de Binni Ruundaʼ Libru nga rusiá ndaaniʼ Yoo riʼ ne maca nexheʼ dxi gúnicabe ni. Ni rusiidiʼ ra riuundaʼ libru ca ne ni racané laabe ca naquiiñeʼ guzulú gusiacaʼ ora maʼ chiguiá ndaaniʼ yoo ca.
Ora tobi o stale neza binni ridagulisaa riuucaʼ ndaaniʼ ti Yoo stiʼ Reinu, ca binnigola ni nuu ndaaniʼ guiráʼ ca neza binni ridagulisaa ca zabícabe ti grupu de binnigola para guʼyaʼ guiá o gaca chaahuiʼ xiixa ndaaniʼ Yoo ca. Ca binnigola stiʼ guiráʼ ca neza binni ridagulisaa ca zabicaʼ ti binnigola para gaca xaíque stiʼ grupu de binnigola ruuyaʼ guiá Yoo stiʼ Reinu ca. Ca binnigola stiʼ ca neza binni ridagulisaa ca zuuyacabe guni grupu de binnigola ca xhiiñacaʼ jneza. Xhiiñaʼ ca binnigola riʼ nga gúʼyacaʼ guiá Yoo ca jneza ne cadi guiaadxaʼ diʼ ca cosa ni riquiiñeʼ para guiá ne gaca chaahuiʼ Yoo stiʼ Reinu ca. Ora ti neza si binni ridagulisaa riuu ndaaniʼ ti yoo riʼ la? ti binnigola o ti siervu ministerial si nga runi ca dxiiñaʼ ni maʼ bizéʼtenu ca. Guiráʼ cani nuu lu ca grupu ni runi ca dxiiñaʼ riʼ naquiiñeʼ gacanésaacaʼ.
Ora stale neza binni ridagulisaa riquiiñecaʼ ti Yoo stiʼ Reinu ne gacaláʼdxicaʼ guchaacaʼ hora rápacaʼ ca guendaridagulisaa sticaʼ guiráʼ iza la? naquiiñeʼ gusihuínnicabe nadxiisaacabe ora gúnicabe ni (Fili. 2:2-4; 1 Ped. 3:8). Guiráʼ iza o cada chupa chonna iza zanda guchaa ca neza binni ridagulisaa hora rápacaʼ guendaridagulisaa sticaʼ. Guirutiʼ diʼ zanda guiníʼ pora guidagulisaa xcaadxi neza binni ridagulisaa. Primé semana stiʼ enero nga naquiiñeʼ guzulúcabe ne ora cubi stícabe. Ora binnigola ni riganna ca binni ridagulisaa ca chiganna ti neza binni ridagulisaa ni riuu ndaaniʼ Yoo stiʼ Reinu ca la? xcaadxi neza binni ridagulisaa ni riquiiñeʼ yoo ca zuchaacaʼ hora rápacaʼ ca guendaridagulisaa sticaʼ semana ca.
Ndaaniʼ Yoo stiʼ Reinu ca zanda tiidiʼ libana para cani cachaganáʼ, ne laaca zanda tiidiʼ libana para cani gati, peru para ganda gaca cani la? naquiiñeʼ guiníʼ Grupu ni Ruuyaʼ Dxiiñaʼ stiʼ ca Binni Ridagulisaa ca pa zanda gácani. Grupu de binnigola riʼ zuuyaʼ chaahuicabe tu laa zanda iquiiñeʼ Yoo stiʼ Reinu ca ne zinándacabe modo naguixhe Betel gácani.
Ca binni ni chiguiquiiñeʼ Yoo stiʼ Reinu ca naquiiñeʼ gúnicaʼ ni jneza ora maʼ nuucaʼ racá purtiʼ lidxi Dios ni. Cani gutiiñeʼ yoo riʼ ne cani chiguiquiiñeʼ ni naquiiñeʼ guʼyaʼ chaahuicaʼ cadi gaca xiixa ni guchiichi ca xpinni Cristu o pur laani guiníʼcabe mal de Jiobá ne de ca binni ridagulisaa (Fili. 2:14, 15). Nuu tiru Betel riquiiñeʼ Yoo stiʼ Reinu riʼ para gaca Scuela stiʼ Xhiiñaʼ Reinu o Scuela stiʼ ca Precursor Regular ndaaniʼ ni.
Ca binni ridagulisaa naquiiñeʼ gusihuínnicaʼ rusisácacaʼ ca lugar ra ridagulisaacaʼ. Ne cani rié ca lugar ca naquiiñeʼ gácucaʼ lari jneza ne gusihuínnicaʼ Dios nga cayuni adorarcaʼ (Ecl. 5:1; 1 Tim. 2:9, 10). Guiráʼ cani guni casi maʼ guninu ca zusihuínnicaʼ rusisácacaʼ ca guendaridagulisaa runi xquidxi Dios.
Ora raca guendaridagulisaa ndaaniʼ Yoo stiʼ Reinu la? maca nuu tu ridxagalú binni. Dxiiñaʼ riʼ zanda guni ca xpinni Cristu ni nachaʼhuiʼ ni, ne cani nanna xi guni ora guizaaca xiixa. Caadxi de ca dxiiñaʼ napa ca hombre riʼ nga guidxagalucaʼ cani zeedayuu ti zacá guni sentir ca binni ca galán, racanécabe cani guedandá maʼ huadxí guidxélacaʼ ra cuicaʼ, rugábacabe panda binni riuu, ne laaca ruuyacabe cadi tan gaca nandáʼ ne gaca nanda ca binni nuu ndaaniʼ Yoo stiʼ Reinu ca. Cadi naquiiñeʼ diʼ chuʼ ni guchiiñaʼ cani cucaadiaga, nga runi cani napa xiiñiʼ naquiiñeʼ cuinecaʼ laacabe. Ora guchiichi ti xcuidihuiiniʼ la? ca bíʼchinu ni ridxagalú ca binni ca zábibe bixhoze o jñaa xcuidihuiiniʼ riʼ ne diidxaʼ nadóʼ cueecabe laa de ra zuba ti zacá cadi guchiiñabe cani cucaadiaga. Cani napa xiiñiʼ nahuiiniʼ la? zanda gábicabe laacaʼ jma jneza cuinecaʼ xiiñicaʼ lu ca banguʼ ni nuu atrá ti cadi guchiiñacabe cani cucaadiaga ora cueecabe laacaʼ fuera ora maʼ cazíñecaʼ o para chinécabe laacaʼ bañu.
Cumu modo guni cani nahuiiniʼ ca ndaaniʼ Yoo stiʼ Reinu ne fuera zucaani binni gusisaca xquidxi Dios o guiniʼcaʼ mal la? ca xpinni Cristu ni ridxagalú binni ca zaníʼnecabe ne diidxaʼ nadó bixhoze ca xcuidihuiiniʼ riʼ ora gúʼyacaʼ maʼ canaguxooñecaʼ ndaaniʼ Yoo stiʼ Reinu ne fuera ante guzulú ne guiluxe ca guendaridagulisaa ti cuidxicaʼ. Rihuinni dxíchica ca xpinni Cristu ni ridxagalú ca binni ridagulisaa ca racanécabe para gucaadiaga chaahuinu ora nuunu ra cayaca ca guendaridagulisaa. Jma jneza gudiicabe dxiiñaʼ riʼ ca siervu ministerial ni nanna ximodo gucueeza ca xcuidihuinniʼ ora maʼ cazíñecaʼ (1 Tim. 3:12).
ORA CUÍ YOO STIʼ REINU
Ndaaniʼ ca Yoo stiʼ Reinu ni nuu ndaaniʼ stale guidxi la? nuu ti caja ra riaba Bueltu para guiráʼ Yoo stiʼ Reinu. Bueltu ni riaba ndaaniʼ caja riʼ riquiiñeni para ganda cuiruʼ jma Yoo stiʼ Reinu o gacachaahuiʼ cani. Pa qué ñuu ca caja riʼ la? stale neza binni ridagulisaa qué ñanda diʼ nucuicaʼ ñunichaahuicaʼ ra ridagulisaacaʼ.
Lu primé siglu que guyuu caadxi xpinni Cristu gúpaca jma bidxiichi que xcaadxi, ngue runi apóstol Pablu gudxi laacabe: «Para gapa tu biaʼca, biaʼca. Laga napa tu yanna la? laudii cani huaxiéʼ napa, ne ora ma qué gapa tu ne napa cabe la? ma laacabe udii cabe laatu, ne zacá ziaana tu biaʼca» (2 Cor. 8:14). Ca dxi nabáninu riʼ laaca zacaca raca, purtiʼ nuu Betel ruseendaʼ Bueltu para cuí Yoo stiʼ Reinu ndaaniʼ ca guidxi jma pobre. Xquidxi Dios ne ca neza binni ridagulisaa ni racanécabe laacaʼ para cuí Yoo stiʼ Reinu sticaʼ la? nabé rudiicaʼ xquíxepeʼ ca xpinni Cristu ni racané laacaʼ.
Ndaaniʼ stale guidxi riuu stale Grupu de Binnigola ni Ruuyaʼ Cuí Yoo stiʼ Reinu ne laaca ruuyacabe gacachaahuiʼ ca Yoo stiʼ Reinu ca. Cada Grupu riʼ racanecaʼ ca neza binni ridagulisaa ni nuu gaxha de laacaʼ. Ca hombre ni nuu lu ca Grupu de binnigola riʼ nánnacabe ximodo ribí yoo, nánnacabe sícabe ne gutoocabe layú, laaca nánnacabe guniibicabe binni ti guni dxiiñaʼ, ne laaca nánnacabe ximodo chinécabe cuenta, o xcaadxi ni riquiiñeʼ para cuí yoo. Nga runi ca hombre riʼ guizáʼ racanécabe para ganda guiluxe ti Yoo stiʼ Reinu.
Ante guzulú cuí ti yoo stiʼ Reinu la? Ca binnigola naquiiñeʼ guiníʼnecabe Grupu de Binnigola ni Ruuyaʼ Cuí Yoo stiʼ Reinu ni nuu gaxha de ra chigucuícabe ni. Pa nuu ti grupu de binnigola riʼ la? laacabe zanda gacanécabe neza binni ridagulisaa ca guyúbicaʼ ti layú ra zanda cuí Yoo stiʼ Reinu ca, ne laacabe zábicabe laacaʼ ximodo naquiiñeʼ gucuícani. Laacabe zaguixhe chaahuicabe ximodo guni cani guiníʼ napa gana gacané. Guiráʼ cani racalaʼdxiʼ gacané ne zanda gúnini la? zanda guchacaʼ ti guiʼchiʼ ra canábacaʼ gacanecaʼ ra cabí Yoo stiʼ Reinu, óraca maʼ grupu de binnigola ni ruuyaʼ dxiiñaʼ stiʼ ca binni ridagulisaa ra rié binni ca guuyaʼ pa zanda gacanécabe.
Ora guizaaca xiixa desgracia la? zándaca guinábacabe ca Grupu de Binnigola ni Ruuyaʼ Cuí Yoo stiʼ Reinu gacanecaʼ gacachaahuiʼ ca Yoo stiʼ Reinu ni guca feu ne nuu biaje lidxi ca xpinni Cristu. Ne dede zanda guseendaʼ Betel laacabe sti guidxi para gúnicabe dxiiñaʼ o gusiidicabe ca xpinni Cristu ni nuu raqué. Nuu biaje ca grupu riʼ laaca racanecaʼ cuí ca Yoo ra raca ca Guendaridagulisaa jma naroʼbaʼ ne gaca ca yoo Betel. Ca grupu riʼ nuucani ne rúnicani dxiiñaʼ purtiʼ stale xpinni Dios riuuláʼdxicaʼ gúnicaʼ ni nabe de guidubi ladxidoʼcaʼ (Col. 3:23, 24).
Cumu caquiiñeruʼ cuí jma Yoo stiʼ Reinu ne ra jma caquiiñeʼ gácani nga ndaaniʼ ca guidxi ra huaxiéʼ bueltu nuu la? nga runi guyáʼ jma Grupu ni Rucuí Yoo stiʼ Reinu. Ca xpinni Cristu ni runi dxiiñaʼ lu ca grupu riʼ racanecaʼ cuí jma Yoo stiʼ Reinu ndaaniʼ guidxi ra nabézacaʼ, ne pur nga rinácabe chécabe ra nuu sti neza binni ridagulisaa ra cabí ca yoo ca. Zacá la? jma nagueenda ribí Yoo stiʼ Reinu ne nabé huaziidiʼ chaahuiʼ cani rigacané ca
YOO RA RACA GUENDARIDAGULISAA NAROʼBAʼ
Nécapeʼ ca primé xpinni Cristu bidagulisaacaʼ pur grupuhuiiniʼ la? Guyuu biaje «bisiidi cabe stale binni» (Hech. 11:26). Ca dxi nabáninu riʼ xquidxi Dios laaca ridagulisaanecaʼ stale binni para gápacaʼ guendaridagulisaa de ti dxi ne de chupa gubidxa. Ora raca cani la? stale biaje riguíxecabe ti lugar naroʼbaʼ para gúnicabe ni, peru pa qué guidxélacabe ti lugar ra zanda gúnicabe ni la? rizíʼcabe tobi. Ne lugar ca riree lani Yoo ra raca Guendaridagulisaa jma naroʼbaʼ.
Nuu biaje xquidxi Dios riziʼcaʼ ti yoo naroʼbaʼ ne runi chaahuicabeni para gácani ti lugar ra gaca ca guendaridagulisaa jma naroʼbaʼ. Peru ni jma rúnicabe nga rizíʼcabe ti layú ne racá rucuícabe ti Yoo stiʼ Reinu para gápacabe ca guendaridagulisaa jma naroʼbaʼ. Ca Lugar ra raca ca guendaridagulisaa jma naroʼbaʼ ca raca cani biaʼ xpinni Cristu nuu lugar ca. Betel nga riníʼ pora nga zanda cuí tobi de ca Yoo ca, ne rúnicabeni despué de guuyacabe pagala cuini ne panda biaje zaquiiñeʼ ni.
Betel riníʼ tu laa zanda chuʼ lu Grupu de binnigola ni guuyaʼ ximodo gaca dxiiñaʼ ndaaniʼ ca Yoo ra raca ca Guendaridagulisaa jma naroʼbaʼ ca. Cumu nabé naroʼbaʼ ca lugar riʼ la? laaca Betel ribí tu gapa ne gusiá ca lugar ca. Raca ti guiʼchiʼ ra cá tu laa gusiá yoo riʼ ti zacá ganda gacané guiráʼ tu ridagulisaa ca lugar riʼ para guiá yoo ca. Laaca zanda guiá ca yoo riʼ cada xhoopaʼ beeu ne gaca xcaadxi dxiiñaʼ para gacachaahuiʼ ndaaniʼ ni. Jma jneza laaca ca xpinni Cristu nga gusiá ca lugar ca qué guiaxa tu gúnini. Nga runi raca invitar guiráʼ ca binni ridagulisaa para gacanecaʼ (Sal. 110:3; Mal. 1:10).
Nuu biaje la? riquiiñeʼ ca Yoo ra raca ca guendaridagulisaa jma naroʼbaʼ ca para gaca Scuela ra Riziidicabe Gúnicabe Xhiiñaʼ Dios ne xcaadxi guendaridagulisaa ni rápacabe ne ca binnigola ni riganna ca binni ridagulisaa. Ca Yoo stiʼ Reinu ne ca yoo ra raca ca guendaridagulisaa jma naroʼbaʼ ca nácacani lugar ra runi adorarnu Jiobá. Ora ridagulisaanu ndaaniʼ ti Yoo ra raca ca guendaridagulisaa jma naroʼbaʼ ca naquiiñeʼ gusihuínninu pur ni gúninu ne modo gácunu lari Jiobá nga runi adorarnu (Ecl. 5:1; 1 Tim. 2:9, 10).
Cumu guizáʼ stale binni nga cadxiña ndaaniʼ xquidxi Dios lu ca últimu dxi riʼ la? nga rusihuinni caguu ndaayaʼ Dios dxiiñaʼ cayúninu (Isa. 60:8, 10, 11, 22). Nga runi, guiranu naquiiñeʼ gacanenu para guidxela lugar para guni adorarnu Jiobá ne laaca naquiiñeʼ gacanenu guiácani. Pa gúninu zacá la? zusihuínninu rudiʼnu xquíxepeʼ Jiobá purtiʼ nápanu ca lugar ra rusiidibe laanu ne ra racanésaanu, ne yanna nga jma caquiiñenu cani purtiʼ guizáʼ maʼ gaxha nuu dxi stiʼ Jiobá.