Ximodo uzulú gúʼndanenu binni libru Xipeʼ ndiʼ cusiidiʼ Biblia

Stale de laanu ziuláʼdxinu gúʼndanenu tuuxa de Biblia pa idxélanu tobi ni riuulaʼdxiʼ iziidiʼ. Libru cubi Xipeʼ ndiʼ cusiidiʼ Biblia zacané ni laanu. Yaza 3 dede 7 ucuá ni para ganda uzulunu inínenu binni diidxaʼ de lu Biblia. Nga runi, uzululuʼ gúʼndaneluʼ binni qué zácani nagana para lii, dede para cani deruʼ cuzulú cucheeche diidxaʼ.

◼ Zándaca chinándanu modo na lu yaza 3:

Despué de uzeeteluʼ xiixa endanagana bizaaca ne ni naguu xizaa cani nabeza neza ra rucheecheluʼ diidxaʼ la? biluíʼ laabe ca endarinabadiidxaʼ ni cá ne letra nayaasehuiiniʼ lu yaza 3 ne biyubi ximodo icábibe cani. De racá biluíʼ laabe yaza 4 ne 5.

◼ Laaca zanda uzulú uluiʼluʼ laabe yaza 4 ne 5:

Zanda inabadiidxaluʼ: «Cadi galán ñaca iráʼ ni cá raríʼ ca dxandíʼ la?». O iniʼluʼ: «De cani ruuyaluʼ raríʼ xii ndiʼ ni jma ñuláʼdxiluʼ ñaca yaʼ». Bicaadiaga chaahuiʼ xi icábibe lii.

Pa binni ca usihuinni riuulaʼdxiʼ tobi de ca textu ni zeeda ndaaniʼ Biblia la? biindané laabe ca párrafo stiʼ libru ra caníʼ de textu ca para uluiʼluʼ laabe xi rusiidiʼ Biblia de tema ca (laguuyaʼ cuadru ni zeeda lu yaza riʼ). Biindaʼ libru ca casi ñaca cayuundaneluʼ tuuxa Biblia. Ndiʼ zanda ácani primé ca chigánnaluʼ laabe ra puertaʼ lídxibe, ne gaayuʼ o chii si minutu.

◼ Sti modo zanda ácani nga gúʼyaluʼ lu yaza 6 para ucaaluʼ binni ca iníʼ:

Biluíʼ ca endarinabadiidxaʼ zeeda ñee yaza ca ne gudxi laabe: «Huaníʼ íqueluʼ lu tobi de ca endarinabadiidxaʼ riʼ la?». Pa chuláʼdxibe tobi de laacani, biluíʼ laabe ca párrafo stiʼ libru ca ra cacabi ni ca endarinabadiidxaʼ ca (biiyaʼ cuadru ni zeeda lu yaza riʼ). Ra usiéneluʼ cani laabe la? mápeca cayuundaneluʼ laabe Biblia.

◼ Zanda iquiiñeʼ yaza 7 para uluiʼluʼ ximodo ruundanécabe binni Biblia:

Biindaʼ guionnaʼ primé oración ni cá lu yaza ca, de racá la? biiyaʼ lu capítulo 3 ne biquiiñeʼ párrafo 1 dede 3 stini para uluiʼluʼ laabe ximodo raca ni. Biaanané laabe ibiguétaluʼ para gúʼyatu modo cacábini ca endarinabadiidxaʼ ni zeeda lu párrafo 3 ca.

◼ Ximodo gaʼbuʼ laabe zabiguétaluʼ sti biaje:

Ora maʼ biluxe biindaneluʼ laabe primé guyeluʼ ca, gudxi laabe zabiguétaluʼ sti biaje para gúʼndarutu. Zanda iniʼluʼ sicaríʼ: «Ne chupa chonna minutu si maʼ bizíʼidinu de ti tema ni nabé risaca zeeda ndaaniʼ Biblia. Ora ibiguetaʼ sti biaje la? zaninu de [bisaana ti endarinabadiidxaʼ para icábiluʼ despué]. Zanda tiideʼ sti semana ca hora rica la?».

Laga zidxíñanu dxi naguixhe Jiobá la? laabe cudiibe laanu iráʼ ni caquiiñenu para gúninu xhiiñabe (Mat. 28:19, 20; 2 Tim. 3:17). Iquiiñeʼ chaahuinu libru cubi riʼ para uzulunu gúʼndanenu binni Biblia.

Ximodo zanda usaananenu binni libru Xipeʼ ndiʼ cusiidiʼ Biblia

Ni rizaané Xhiiñaʼ Reinu ni Rúninu riʼ neni caadxi modo zanda usaananenu binni libru Xipeʼ ndiʼ cusiidiʼ Biblia. Jma zabeendunu ni galán pa iquiiñenu cani ne ininu casi ora maʼ cayuinu diidxaʼ, ininu modo ganda guiene ca binni ni nuu neza ra rucheechenu diidxaʼ ne laaca naquiiñeʼ guʼndaʼ chaahuinu iráʼ cani zeeda lu libru ca ni zanda acané laanu para uzulú inínenu binni. Laaca zanda iquiiñenu xcaadxi modo zanda inínenu binni neza ra rucheechenu diidxaʼ (laguuyaʼ Xhiiñaʼ Reinu ni Rúninu stiʼ enero 2005, yaza 8).

Armagedón

◼ «Stale binni ora gunadiágacaʼ diidxaʼ Armagedón riníʼ íquecaʼ chiguinitilú guidxilayú riʼ. Ñee nánnaluʼ galán para laanu nga gueeda Armagedón la? [Uleza icábibe. De racá biindaʼ Apocalipsis 16:14, 16.] Biiyaʼ ximodo ndiʼ chiguibani binni tiidiʼ si Armagedón.» Biiyaʼ lu yaza 82 dede 84 ne biindaʼ párrafo 21.

Biblia

◼ «Stale binni riníʼ Stiidxaʼ Dios nga Biblia. Ñee huayuu dxi inabadiidxaluʼ xiñee nácabe Biblia ca nga Stiidxaʼ Dios pa hombre bicaa ni la? [Uleza icábibe. De racá biindaʼ 2 Pedro 1:21 ne párrafo 5 stiʼ yaza 19.] Libru riʼ culuiʼni laanu ximodo ricabi Biblia ca endarinabadiidxaʼ riʼ». Biluíʼ laabe ca endarinabadiidxaʼ zeeda lu yaza 6.

◼ «Ca dxi riʼ zanda gánnanu stale cosa de ni qué huayuu dxi gánnanu. Peru, paraa raʼbuʼ zadxélanu conseju para ibáninu nayecheʼ yaʼ [Uleza icábibe. De racá biindaʼ 2 Timoteo 3:16, 17 ne párrafo 12 stiʼ yaza 22]. Libru  riʼ cusiéneni ximodo zanda ibáninu galán ne modo riuulaʼdxiʼ Dios.» Biluíʼ cuadru ne ca dibuju zeeda lu yaza 122 ne 123.

Desgracia/yuubaʼ

◼ «Ora rizaaca ti desgracia stale tu rinabadiidxaʼ pa dxandíʼ rizalaʼdxiʼ Dios binni, ne pa ruuyabe iráʼ endananá cadiʼdiʼ binni. Ñee huanabadiidxaluʼ ndiʼ la? [Uleza icábibe. De racá biindaʼ 1 Pedro 5:7 ne párrafo 11 stiʼ yaza 11.] Libru riʼ cusiéneni ximodo chindee Dios iráʼ yuubaʼ cadiʼdiʼ binni lu guidxilayú riʼ.» Biluíʼ ca endarinabadiidxaʼ zeeda ra ruzulú yaza 106.

Endaguti/ora guiasa gueʼtuʼ

◼ «Stale binni rinabadiidxaʼ paraa riuunu ora gátinu. Ñee raʼbuʼ zanda gánnanu ni la? [Uleza icábibe. De racá biindaʼ Eclesiastés 9:5 ne ca párrafo 5 ne 6 stiʼ yaza 58.] Libru riʼ laaca cusiéneni xiñee riníʼ Biblia ziasa cani maʼ guti sti biaje.» Biluíʼ laabe dibuju cá lu yaza 75.

◼ «Ora gati tuuxa ni nadxiinu, cadi dxandíʼ nga ñuláʼdxinu nidúʼyanu laacabe sti biaje  la? [Uleza icábibe.] Stale tu huayatadxí ladxidóʼ ora ganna ni caníʼ Biblia chiguni Dios ra na: ziasa ca gueʼtuʼ ca [biindaʼ Juan 5:28, 29 ne ca párrafo 16 ne 17 stiʼ yaza 71 ne 72]. Capítulo riʼ ricabi ni ca endarinabadiidxaʼ ca.» Biluíʼ laabe ca endarinabadiidxaʼ zeeda ra ruzulú yaza 66.

Endanabani ni qué zaluxe

◼ «Stale de laanu riuuláʼdxinu ibáninu xadxí ne chuʼnu nazaaca. Peru, ñuláʼdxiluʼ nibániluʼ sin ñátiluʼ pa ñanda la? [Uleza icábibe. De racá biindaʼ Apocalipsis 21:3, 4 ne párrafo 17 stiʼ yaza 53]. Libru riʼ caniʼni ximodo zanda icaanu ti endanabani ni qué zaluxe ne ximodo zabani binni ora maʼ guni Dios ni maʼ uníʼ.»

Endaridinde/endariuudxi

◼ «Binni riuulaʼdxiʼ chuʼ endariuudxi iráʼ ladu. Ñee raʼbuʼ ti bacaandaʼ ndiʼ iníʼ ique binni ziuu endariuudxi lu Guidxilayú riʼ la? [Uleza icábibe. De racá biindaʼ Salmo 46:8, 9.] Libru riʼ cusiéneni ximodo chiguni Dios ni maʼ naguixhe ique ne zedanebe endariuudxi lu guidxilayú riʼ.» Biluíʼ dibuju ni cá lu yaza 35 ne biindané laabe párrafo 17 dede 21 stiʼ yaza 34 ne 36.

Familia

◼ «Iranu riuuláʼdxinu ibaninenu binnilídxinu galán, cadi dxandíʼ la? [Uleza icábibe.] Stiidxaʼ Dios cayabi laanu xi zanda guni cada tobi de ca binnilídxinu para chuʼnu jma nayecheʼ: nga nga gannaxhiisaanu casi runi Dios.» Biindaʼ Efesios 5:1, 2 ne párrafo 4 stiʼ yaza 135.

Jesucristu

◼ «Iráʼ binni huayunadiaga de Jesucristu. Nuu tu riníʼ úcabe ti hombre ni risaca si. Xcaadxi runi adorar laabe casi ti Dios ni jma nandxóʼ. Ñee raʼbuʼ risaca ni runi crenu de Jesús la?» Uleza icábibe. De racá biindaʼ Juan 17:3 ne párrafo 3 stiʼ yaza 37. Biluíʼ laabe ca endarinabadiidxaʼ ni zeeda despué de tema stiʼ capítulo ca.

Jiobá Dios

◼ «Stale binni ni runi cré nuu Dios ñuláʼdxicaʼ ñuucaʼ jma gaxha de laabe. Ñee nánnaluʼ cayuni invitar Biblia laanu idxíñanu Dios la? [Uleza icábibe. De racá biindaʼ Santiago 4:8a ne párrafo 20 stiʼ yaza 16.] Libru riʼ úcani para acané ni binni gunibiáʼ chaahuiʼ Dios ra iquiiñecabe laca Biblia stícabe.» Biluíʼ ca endarinabadiidxaʼ ni cá ra ruzulú yaza 8.

◼ «Stale binni rinabaʼ isaca lá Dios. Ñee huanabadiidxaluʼ tu labe la? [Uleza icábibe. De racá biindaʼ Salmo 83:18 ne párrafo 2 ne 3 stiʼ yaza 195.] Libru riʼ cusiéneni xipeʼ ndiʼ rusiidiʼ Biblia de Jiobá ne ximodo chigúnibe ni maʼ udixhe íquebe gúnibe para binni.»

Oración

◼ «Ñee huanabadiidxaluʼ pa ricabi Dios ca oración runi binni la? [Uleza icábibe. De racá biindaʼ 1 Juan 5:14, 15 ne ca párrafo 16 dede 18 stiʼ yaza 170 ne 171.] Capítulo riʼ laaca cusiéneni xiñee naquiiñeʼ guni orarnu Dios ne xi naquiiñeʼ gúninu para ucaadiágabe laanu.»

Religión

◼ «Yanna riʼ stale binni riníʼ ique ca religión ca nga nápacaʼ donda pur stale endanagana napa binni ne nácabe qué zanda diʼ acané cani binni ibani galán. Ñee rábiluʼ ziné ca religión ca binni lu neza ni racalaʼdxiʼ Dios la? [Uleza icábibe. De racá biindaʼ Mateo 7:13, 14 ne párrafo 5 stiʼ yaza 145.] Capítulo riʼ cusiéneni xhoopaʼ cosa ni rusihuinni unáʼ nga religión ni dxandíʼ runi ni na Dios.» Biluíʼ laabe lista zeeda lu yaza 147.

Yoo ra ibani binni

◼ «Stale lugar nabé nagana nga gapa binni ti lidxi purtiʼ qué gapa bueltu para laani. Ñee raʼbuʼ zedandá ti dxi iráʼ binni zapa lidxi la? [Uleza icábibe. De racá biindaʼ Isaías 65:21, 22 ne párrafo 20 stiʼ yaza 34.] Libru riʼ cusiéneni ximodo zaca ni maʼ uníʼ Dios.»

[Box on page 5]

Modo zanda uzeetenu paraa reeda bueltu para dxiiñaʼ ni rúninu

«Pa riuuláʼdxiluʼ udiiluʼ xiixa para dxiiñaʼ ni raca lu idubi naca guidxilayú la? zanda udiiluʼ ni laadu.»

«Neca ca libru ne revista ni rudiʼdu binni cadi cá pagala sácani, peru ricaadu ni udii binni laadu para acané dxiiñaʼ ni cayaca lu idubi naca guidxilayú.»

«Zándaca inabadiidxaluʼ ximodo riaxa para aca ca dxiiñaʼ riʼ. Para ganda aca dxiiñaʼ riʼ la? ricaadu bueltu ni guiale de binni udii. Pa lii riuuláʼdxiluʼ udiiluʼ xiixa la? zanda udiiluʼ ni laadu.»

1) Guendarinabadiidxaʼ, 2) textu stiʼ Biblia 3) capítulo

Ti modo zanda usaananu libru Xipeʼ ndiʼ cusiidiʼ Biblia nga 1) inabadiidxanu xi riníʼ ique binni de xiixa inínenu laa; 2) gúʼndanenu laabe ti textu stiʼ Biblia ni zanda iquiiñeʼ, ne 3) guluinu laabe ti capítulo stiʼ libru ca ra cá de ni caninu ca ne gúʼndanu ca endarinabadiidxaʼ ni cá despué de tema ca. Ndiʼ zacané laanu para ganda uzulú gúʼndanenu binni primé ca chigánnanu laa ne ora ibiguetaʼ chigánnanu laaca sti biaje.

◼ «Ñee raʼbuʼ zanda gunibiáʼ binni Dios ni jma nandxóʼ, casi na textu riʼ la?» Biindaʼ Hechos 17:26, 27 ne uleza icábibe. De racá biluíʼ laabe ni zeeda lu capítulo 1.

◼ «Ne iráʼ ca endanagana nápanu yanna riʼ, ñee raʼbuʼ zanda gatadxí ladxidoʼno ne cuézanu cani cayeeteʼ lu Biblia riʼ la?» Biindaʼ Romanos 15:4 ne uleza icábibe. De racá biluíʼ laabe ni zeeda lu capítulo 2.

◼ «Pa lii ñápaluʼ stale poder, nuchaaluʼ modo nabani binni yanna la?» Biindaʼ Apocalipsis 21:4 ne uleza icábibe. De racá biluíʼ laabe ni zeeda lu capítulo 3.

◼ «Ñee raʼbuʼ zedandá ti dxi ibani ca xiiñinu casi cá lu canción ucuá maʼ raca stale iza riʼ la?» Biindaʼ Salmo 37:10, 11 ne uleza icábibe. De racá biluíʼ laabe ni zeeda lu capítulo 3.

◼ «Ñee raʼbuʼ ziuu ti dxi aca ni na ca diidxaʼ zeeda raríʼ la?» Biindaʼ Isaías 33:24 ne uleza icábibe. De racá biluíʼ laabe ni zeeda lu capítulo 3.

◼ «Ñee huanabadiidxaluʼ pa nanna cani maʼ guti ca xi runi ca binni ni nabani la?» Uleza icábibe. De racá biindaʼ Eclesiastés 9:5 ne biluíʼ laabe ni zeeda lu capítulo 6.

◼ «Ñee raʼbuʼ zedandá ti dxi idúʼyanu ca binnilídxinu ni maʼ guti, casi uníʼ Jesús lu ca versículo riʼ la?» Biindaʼ Juan 5:28, 29 ne uleza icábibe. De racá biluíʼ laabe ni zeeda lu capítulo 7.

◼ «Lii xi rábiluʼ caquiiñeʼ para ganda aca ni na Dios lu Guidxilayú riʼ cásica cayaca ni ibáʼ, casi modo uníʼ Jesús lu oración ni runibiáʼ stale binni riʼ yaʼ». Biindaʼ Mateo 6:9, 10 ne uleza icábibe. De racá biluíʼ laabe ni zeeda lu capítulo 8.

◼ «Ñee rábiluʼ cayaca ni na ca diidxaʼ riguixhená riʼ lu ca dxi stinu riʼ la?» Biindaʼ 2 Timoteo 3:1-4 ne uleza icábibe. De racá biluíʼ laabe ni zeeda lu capítulo 9.

◼ «Stale binni huanabadiidxaʼ xiñee zeʼ dxi jma zinitilú guidxilayú riʼ. Ñee huaníʼ íqueluʼ pa pur cani cayeeteʼ raríʼ nga cazaaca iráʼ ca cosa ca la?» Biindaʼ Apocalipsis 12:9 ne uleza icábibe. De racá biluíʼ laabe ni zeeda lu capítulo 10.

◼ «Ñee huayacaláʼdxiluʼ gánnaluʼ xi ricabi ca endarinabadiidxaʼ ni zeeda raríʼ la?» Biindaʼ Job 21:7 ne uleza icábibe. De racá biluíʼ laabe ni zeeda lu capítulo 11.

◼ «Cadi dxandíʼ nga pa ninándanu iráʼ conseju zeeda ndaaniʼ Biblia nibaninenu binnilídxinu nayecheʼ la?» Biindaʼ Efesios 5:33 ne uleza icábibe. De racá biluíʼ laabe ni zeeda lu capítulo 14.

Zanda ucaʼnu lu informe maʼ cayúʼundanenu ti binni, ora maʼ biluinu laabe ximodo rácani, ora maʼ bíʼndanenu laabe chupa biaje ne ora usihuínnibe riuuláʼdxibe gúʼndanenu laabe jma de Stiidxaʼ Dios.