Biquiiñeʼ ni guiráʼ ora
1. Xi para guca tratadu Ñuuláʼdxiluʼ ñánnaluʼ xi riníʼ Biblia.
1 Tratadu ni láʼ Ñuuláʼdxiluʼ ñánnaluʼ xi riníʼ Biblia de cani huanabadiidxaluʼ la? gúcani para gacaneni laanu guzulú gúʼndanenu binni de Biblia, peru laaca zanda iquiiñenu ni para gucheechenu stiidxaʼ Dios ni zeeda gaca casi biidxiʼ (Ecl. 11:6). Yanna, chiguzéʼtenu chupa chonna modo zanda iquiiñenu tratadu riʼ.
2. Ximodo zanda iquiiñenu tratadu ca para guzulú guinínenu binni.
2 Para guzulú guiníʼneluʼ binni. Zanda gudiiluʼ laabe tratadu ca, biluíʼ laabe ca guendarinabadiidxaʼ ni zeeda lu primé yaza stini ne gunabadiidxaʼ laabe: «Gunáʼ de cani zeeda raríʼ huanabadiidxaluʼ laca lii». Ora maʼ bicaadiágaluʼ ni gábibe lii la? biquiiñeʼ tratadu ca para guluiʼluʼ laabe ximodo cacabi Biblia ni gunabadiidxabe ca ne biindané laabe tobi de ca textu ni zeeda lu tratadu ca. Despué biindaʼ o bizeeteʼ né chupa chonna si diidxaʼ ni cá lu últimu yaza stini ne bisaanané laabe libru Xipeʼ ndiʼ cusiidiʼ Biblia. Neca qué guiaananebe libru ca, peru maʼ biaananebe tratadu ca. Laani zacaneni laabe para guiale de ndaaniʼ ladxidoʼbe guiziidibe jma (Mat. 13:23).
3. Xi zanda gúninu pa nuu xhiiñaʼ binni.
3 Pa nuu xhiiñaʼ binni. Zanda gábiluʼ laabe: «Cayuuyaʼ ruluíʼ qué zanda gucaadiágaluʼ naa nagasi, peru ñuuladxeʼ nusaananiáʼ lii tratadu riʼ. Neni xhoopaʼ guendarinabadiidxaʼ ni huayuni casi guiráʼ binni, ne Biblia ricabi cada tobi de laacani. Sti biaje guibiguetaʼ ca ñuuladxeʼ ñannaʼ xi riníʼ íqueluʼ de laani».
4. Xi zanda guininu ora gusaananenu binni tratadu ca lu calle.
4 Ora gucheechenu diidxaʼ lu calle. Ti modo zanda guiniʼluʼ nga: «Xitalxa. Ñee huanabadiidxaluʼ cani zeeda raríʼ la? [Guleza guicábibe.] Tratadu riʼ cusiene pabiáʼ nayá ne jneza modo ricabi Biblia ca guendarinabadiidxaʼ riʼ». Pa cadi cayacapurá binni ca la? zanda gusiéneluʼ laabe ximodo cacabi tratadu riʼ tobi de ca guendarinabadiidxaʼ ca ne dede zanda gusaananeluʼ laabe libru Xipeʼ ndiʼ cusiidiʼ Biblia.
5. Xi zanda gúninu para gusaananu tratadu riʼ ralidxi binni ora guirutiʼ guinni.
5 Ora qué guinni binni ralidxi. Nuu lugar rusaana cani rucheeche diidxaʼ tratadu o revista ndaaniʼ lidxi binni ora guirutiʼ guinni. Pa zacá rúnitu neza ra rucheechetu diidxaʼ la? galán gusaanaluʼ tratadu Ñuuláʼdxiluʼ ñánnaluʼ xi riníʼ Biblia. Ne ora guibiguétaluʼ sti biaje zanda guiniʼluʼ: «Nase gudídidu cheríʼ ne cumu qué nidxéladu lii la? bisaanadu tratadu riʼ ra puertaʼ stiluʼ. Ñuuláʼdxiluʼ ñánnaluʼ ximodo ricabi Biblia tobi de ca guendarinabadiidxaʼ zeeda raríʼ la?».
6. Xiñee nabé galán tratadu Ñuuláʼdxiluʼ ñánnaluʼ xi riníʼ Biblia para gusaananenu ni binni.
6 Tratadu Ñuuláʼdxiluʼ ñánnaluʼ xi riníʼ Biblia riquiiñeni chupa chonna si diidxaʼ para gusiéneni ni cá lu Biblia. Ne binni de guiráʼ religión ne de guiráʼ guidxi riuuláʼdxicaʼ gúʼndacaʼ ni. Laaca cadi nagana para gusaananenu ni binni, dede cani nahuiiniʼ ne cani nacubi cucheeche diidxaʼ zanda gúnini. Ñee riquiiñeluʼ ni ora tiisi ganda la?