Ora maʼ ziyoʼxhoʼ binni né xheelaʼ

1, 2. 1) Ximodo ruchaa xquendanabani binni ora maʼ ziyoʼxhoʼ. 2) Xi biʼniʼ ca xpinni Dios de dxiqué para gunda bibánicaʼ nayecheʼ dxi maʼ bióʼxhocaʼ.

ORA maʼ ziyoʼxhoʼ binni ruchaa xquendanabani. Rirá stipa xcuerpu. Ne ora gúʼyacaʼ laacaʼ lu speju rihuinni maʼ zicuuxhuʼ lucaʼ ne chaahuidugá maʼ zitoope o maʼ ziyaba guicha íquecaʼ. Zándaca maʼ nayaʼndaʼ íquecaʼ. Ruchaa xquendanabánicaʼ ora guichaganáʼ xiiñicaʼ ne ora rale xhiágacaʼ. Nuu tu laa riníʼ ique ora gaca jubilar zuchaa guiráʼ ni maca runi.

² Ni dxandíʼ nga ora maʼ ziyoʼxhoʼ binni jma raca ni nagana para laa (Eclesiastés 12:1-8). Nga runi, galán guidúʼyanu ejemplu stiʼ ca xpinni Dios ni bibani dxiqué. Neca gúticabe despué la? cásica hombre ne zaqueca gunaa, gúcacabe binni nuu xpiaaniʼ ne binni riene, ne pur nga bibánicabe nayecheʼ dxi bióʼxhocabe (Génesis 25:8; 35:29; Job 12:12; 42:17). Xi bíʼnicabe para gunda bibánicabe nayecheʼ dxi maʼ bióʼxhocabe yaʼ. Nanna dxíchinu yenándacabe ca conseju zeeda lu Biblia (Salmo 119:105; 2 Timoteo 3:16, 17).

3. Xi conseju bidii Pablu ca hombre ne ca gunaa ni maʼ bioʼxhoʼ.

³ Apóstol Pablu bicaa lu carta ni biseendaʼ ra nuu Tito conseju riʼ para cani maʼ bioʼxhoʼ: «Bisiidi ca hermanu ni ma nagola sa ca jneza, ucueeza ca laacaʼ, ne cuʼ xpiaani caʼ. Cadi iree chu ca de ni runi cre caʼ, ne cadi guiaana dxí ca de ganaxhii saa caʼ, ne cadi iree ca gana. Zaqueca bisiidi ca hermana ni ma nagola sa modo naquiiñe sa ca xpinni Dios. Cadi iníʼ cabe binni ne cadi xhudxi cabe, sínuque usiidi ca ni jneza pur modo ibani caʼ» (Tito 2:2, 3). Pa chinanda binni ni na conseju ca zacaneni laacaʼ gudxiilucaʼ ca guendanagana ni rapa binni ora maʼ ziyoʼxhoʼ.

NAQUIIÑEʼ GUIAA BINNI GUIBANI STUBI ORA MAʼ QUÉ GUINNI XIIÑICAʼ RA LÍDXICAʼ

4, 5. Xi runi sentir stale de cani napa xiiñiʼ ora maʼ cadi nabezané ca xiiñicaʼ laacaʼ, ne xi rúnicaʼ ora maʼ nuucaʼ zacá.

⁴ Naquiiñeʼ ganna binni zedandá ora maʼ qué zuni cani maca biaa guni. Rizaaca nga ora maʼ cadi nabeza ca xiiñicabe ra lídxicabe ne ora maʼ bichaganacaʼ. Para stale de cani napa xiiñiʼ, nga nga primé cosa ni rusihuinni maʼ ziyóʼxhocaʼ. Neca riéchecabe ora maʼ huaniisi xiiñicabe la? stale biaje riníʼ íquecabe pa bíʼnicabe guiráʼ ni caquiiñeʼ para guiziidiʼ xiiñicabe guibánicaʼ stúbicaʼ. Ne zándaca zabánacabe laacaʼ ora maʼ zecaʼ.

⁵ Cadi guendaridxagayaa diʼ nga chuʼ binni xizaa pa nuu ca xiiñiʼ galán, neca maʼ cadi nabezanecaʼ laacabe. Ti gunaa ni napa xiiñiʼ guníʼ: «Ñuaaʼ nayecheʼ pa gatigá ñunadiaʼgaʼ nuucabe galán». Ne ti hombre guníʼ: «Dxi biree xiiñidxaapadu de ra lídxidu, nabé triste biʼniʼ sentirdu. Casi ñaca nadachi biaana ndaaniʼ lídxidu, purtiʼ maʼ biaʼdu gúnidu ca cosa ca juntu». Xi huayúnicabe ora runi sentírcabe zacá yaʼ. Stale biaje ruyúbicabe gacanécabe xcaadxi binni.

6. Xi zacané cani napa xiiñiʼ chuʼcaʼ galán né binnilídxicaʼ.

⁶ Naquiiñeʼ ganna binni ora guichaganáʼ ca xiiñiʼ zuchaa modo nabánicaʼ. Génesis 2:24 na: «Nga runi zusaana hombre bixhoze ne jñaa, ne naquiiñeʼ guicanú xheelaʼ, ne gueeda gácacabe ti beela si». Ora guiene cani napa xiiñiʼ tuu nga naguixhe Dios gaca xaíque ndaaniʼ ti yoo casi na Stiidxabe la? zacaneni laacaʼ chuʼcaʼ galán né binnilídxicaʼ (1 Corintios 11:3; 14:33, 40).

7. Xi biʼniʼ ti hombre dxi maʼ bichaganáʼ ca xiiñiʼ.

⁷ Dxi bichaganáʼ guiropaʼ xiiñidxaapaʼ ti guendaxheelaʼ ne yebiʼcaʼ sti ladu, guendaxheelaʼ riʼ biʼniʼ sentírcabe nuucabe stúbicabe. Nacubigá que, bixhoze ca baʼdudxaapaʼ riʼ qué ñuni sentir galán né ca xpigudxi. Peru dxi guníʼ íquebe tuu nga gudixhe Dios gaca xaíque ndaaniʼ ti yoo, biénebe maʼ ca xpigúdxibe nga xaíque ndaaniʼ lídxicaʼ. Ngue runi, ora rinabaʼ ca xiiñibe laabe conseju rinabadiidxabe laacaʼ xiná xheelacaʼ, ne ora gúʼyabe biaʼsi ni na ca xpigúdxibe la? ruyúbibe modo gacanebe laacaʼ guiénecaʼ naquiiñeʼ gúnicaʼ ni na xheelacaʼ. Xi huabeendube yaʼ. Yanna maʼ ruuyaʼ ca xpigúdxibe laabe casi xhamígucaʼ ne riuuláʼdxicaʼ chinándacaʼ conseju stibe.

8, 9. Xi huayuni ca binni ni maʼ bichaganáʼ ca xiiñiʼ para guiaacaʼ chuʼcaʼ stúbicaʼ.

⁸ Ziuu biaje qué zaná cani deruʼ bichaganáʼ gúnicaʼ ni gabi bixhózecaʼ ne jñaacaʼ laacaʼ, sínuque zúnicaʼ gadxé cosa peru sin gucheenecaʼ ni na Biblia. Yanna, xi zanda gúnicabe óraca yaʼ. Sicaríʼ guníʼ ti guendaxheelaʼ ni maʼ bichaganáʼ ca xiiñiʼ: «Guiráʼ ora racanedu laacabe guiníʼ íquecabe ximodo ruuyaʼ Jiobá ni racaláʼdxicabe gúnicabe, peru pa qué chuuláʼdxidu ni quixhe íquecabe gúnicabe la? rudiʼdu lugar gúnicabe ni ne racanedu laacabe ne riguʼdu gana laacabe».

⁹ Ndaaniʼ caadxi guidxi ni nuu Asia, nuu caadxi gunaa raca nagana para laacaʼ guiree xiiñicaʼ ni naca hombre aparte. Peru pa guni respetárcabe ni maʼ gudixhe Dios tuu nga xaíque ndaaniʼ ti yoo la? maʼ qué zapapécabe guendanagana né ca xuaalídxicabe. Ti gunaa xpinni Cristu guníʼ nayecheʼ riuu purtiʼ maʼ zeʼ ca xiiñiʼ de ra lidxi. Xiñee riéchebe yaʼ. Primé la? purtiʼ riuuláʼdxibe gúʼyabe modo rápacaʼ binnilídxicaʼ. Ne guiropa la? maʼ qué rúnipebe stale dxiiñaʼ ne maʼ qué riuupebe xizaa nin xheelabe, jmaruʼ si ra ziyóʼxhocabe.

XIMODO GANNAXHII CA GUENDAXHEELAʼ CA JMA

10, 11. Xi conseju ni zeeda lu Biblia huayacané cadi guiaba binni lu caadxi trampa ora jma maʼ ziniisi.

¹⁰ Ora maʼ huaniisi binni, ruchaa modo riníʼ ique ne ni runi. Nuu hombre ruchaa modo racu lari para guihuinni nahuiiniruʼ. Stale gunaa riuu xizaa pur ca guendanagana ni rápacaʼ ora maʼ cusaana de guiete ndaanicaʼ. Triste guininu ni, peru nuu binni ni maʼ huaniisi runiná xheelaʼ, purtiʼ maʼ cayuulaʼdxiʼ stobi ni jma nahuiiniʼ. Ca hombre huaniisi ni runi adorar Dios nuu xpiaanicaʼ ne rucueezacaʼ laacaʼ para cadi gúnicaʼ ni cadi jneza (1 Pedro 4:7). Ca gunaa ni nuu xpiaaniʼ laaca rúnicaʼ stipa pur chuʼ xquendaxheelacaʼ galán, purtiʼ nadxiicaʼ xheelacaʼ ne racaláʼdxicaʼ gusiéchecaʼ ladxidóʼ Jiobá.

¹¹ Jiobá biquiiñeʼ ti rey ni láʼ Lemuel para gucaa caadxi diidxaʼ ni gusisaca «ti gunaa ni nuu xpiaaniʼ» ni nachaʼhuiʼ né xheelaʼ biaʼ dxi nabani ne qué runiná laabe. Ca hombre xpinni Cristu ni maʼ bichaganáʼ naquiiñeʼ gusisácacaʼ stipa ni runi xheelacaʼ para cadi chúʼcabe triste ora guni sentírcabe jma maʼ ziniisicabe. Cumu nadxiibe xheelabe la? zucaa nga laabe gusisácabe laa (Proverbios 31:10, 12, 28).

12. Xi zacané ca guendaxheelaʼ ca chuʼcaʼ tobi si ora maʼ zidiʼdiʼ ca iza ca.

¹² Ora cusiniisi binni xiiñiʼ, zándaca guiropaʼ xheelacaʼ gusaana de gúnicaʼ cani ñuuláʼdxicaʼ ti gudiicaʼ ni iquiiñeʼ xiiñicaʼ. Peru ora maʼ qué guinni xiiñicabe lúcabe la? óraca nga naquiiñeʼ guizaalaʼdxiʼ ca guendaxheelaʼ ca laacaʼ sti biaje. Ti hombre ni maʼ bichaganáʼ guníʼ: «Dxi maʼ qué guinni ca xiiñedxaapaʼ ra yoo, bizuluáʼ gunieniáʼ xheelaʼ sti biaje casi dxi guzayanandaʼ laa para guichaganaʼyaʼ laa». Sti hombre ni maʼ bichaganáʼ guníʼ: «Rizaaláʼdxisaadu chuʼdu nazaaca, ne rusietenaláʼdxisaadu laadu naquiiñeʼ gúnidu ejerciciu». Ne para cadi guni sentírcabe stúbicabe, runi invitárcabe ca binni ni ridagulisaanécabe ra lídxicabe. Casi maʼ bidúʼyanu ca, pa guizaaláʼdxinu xcaadxi binni zacané nga laanu. Ne ni jma risaca nga riuulaʼdxiʼ Jiobá gúninu zacá (Filipenses 2:4; Hebreos 13:2, 16).

13. Xiñee nabé risaca guiníʼ ca guendaxheelaʼ ca de guidubi ladxidoʼcaʼ ni runi sentircaʼ ne cadi gusiguiicaʼ ora jma maʼ ziniisicaʼ.

¹³ Cadi gudiʼnu lugar chuʼ xiixa ni guxheleʼ laanu de güínenu xheelanu diidxaʼ. Naquiiñeʼ guininu ni nuu ndaaniʼ ladxidoʼno (Proverbios 17:27). Ti hombre ni maʼ bichaganáʼ guníʼ: «Ora rizaaláʼdxisaadu ne guiénesaadu laadu, jma riénedu ni runi sentirdu». Xheelabe na: «Ra maʼ huaniisidu riʼ huazíʼdidu gusisácadu cani rúnidu casi guideʼdu ti té guirópadu, güidu diidxaʼ ne gacanésaadu laadu». Ora guiníʼ ca guendaxheelaʼ ca ni nuu ndaaniʼ ladxidoʼcaʼ ne sin gusiguiicaʼ la? racané nga laacaʼ guni huantarcaʼ guendanagana ni gulaa Binidxabaʼ luguiacaʼ, purtiʼ laa racalaʼdxiʼ guchiá ca guendaxheelaʼ ca.

GALÁN GUIECHENÉCABE XHIÁGACABE

14. Ximodo gucané jñaabidaʼ Timoteu laa para beeda gaca xpinni Cristu.

¹⁴ Xhiaga binni zeeda gaca casi ti «corona» para laacaʼ (Proverbios 17:6). Nabé sicarú nga ora maʼ nuuné binni ca xhiaga, purtiʼ riuucaʼ nayecheʼ. Biblia ruzeeteʼ de Loida, jñaabidaʼ Timoteu ne jñaabe Eunice, laacaʼ bisiidicaʼ laabe de Dios. Ra ziniisi Timoteu gunna rusisaca jñaa ne jñaabidaʼ guiráʼ ni rusiidiʼ Biblia (2 Timoteo 1:5; 3:14, 15).

15. Ximodo zanda gacané binni ca xhiaga, peru xi cadi naquiiñeʼ gúnicabe.

¹⁵ Nabé risaca dxiiñaʼ ni runi ca binni ni napa xhiaga. Maʼ bisiidicabe xiiñicabe de cani naguixhe ique Jiobá guni. Yanna laaca zanda gacanécabe xhiágacabe. Stale de ca baʼduhuiiniʼ ca riuuláʼdxicaʼ güiné bixhozebídacaʼ ne jñaabídacaʼ laacaʼ xiixa historia ni zeeda lu Biblia. Peru naquiiñeʼ gudiicabe lugar gusiidiʼ bixhózecaʼ laacaʼ cani rusiidiʼ Biblia, neca zanda gacanécabe laacaʼ (Deuteronomio 6:7). Ca binni ni napa xhiaga laaca zanda guiniʼcaʼ ca diidxaʼ ni guníʼ salmista riʼ: «Neca guioxhuaʼ ne guitoope iqueʼ, cadi gusaanaluʼ naa Dios stinneʼ, ti ganda gabeʼ ca binni ni gueeda ca pabiáʼ nadipaʼ naluʼ ne pabiáʼ naroʼbaʼ poder stiluʼ» (Salmo 71:18; 78:5, 6).

16. Xi zanda guni cani napa xhiaga para cadi gápacaʼ guendanagana né binnilídxicaʼ.

¹⁶ Nabé triste guininu ni, peru caadxi binni nabé runi consentircaʼ xhiágacaʼ dede riuudindenecaʼ xiiñicaʼ. Peru zándaca pur gácacabe nachaʼhuiʼ né xhiágacabe gucaa ni laacaʼ gábicaʼ laacabe xiixa ni qué nacaʼ gábicaʼ bixhózecaʼ ne jñaacaʼ. Nuu tiru riníʼ ique cani nahuiiniʼ jma ziene bixhozebídacaʼ ne jñaabídacaʼ laacaʼ ne ziuucabe pur laacaʼ ora qué náʼ bixhózecaʼ ne jñaacaʼ guni ni racaláʼdxicaʼ. Xi naquiiñeʼ guni cani napa xhiaga óraca yaʼ. Naquiiñeʼ gácacabe binni nuu xpiaaniʼ ne gábicabe ca xhiágacabe galán güinecaʼ bixhózecaʼ ne jñaacaʼ de ni cazaacacaʼ. Ne zanda gusiénecabe laacaʼ zusiéchecaʼ Jiobá pa gúnicaʼ zacá (Efesios 6:1-3). Pa caquiiñeʼ la? bixhozebídacabe ne jñaabídacabe zanda guiniʼné bixhózecabe ne jñaacabe ante guiniʼnécabe laacaʼ. Naquiiñeʼ gabi binni xhiaga guiráʼ ni maʼ biziidiʼ biaʼ dxi huabani. Pa gábicabe ca xhiágacabe ni dxandíʼ la? zanda gacanécabe laacaʼ.

XI ZANDA GUNI BINNI ORA MAʼ ZIGOLA

17. Xi gudixhe ique ti salmista guni ni naquiiñeʼ chinanda ca xpinni Cristu ni maʼ nagola.

¹⁷ Ora maʼ zidiʼdiʼ ca iza ca, runi sentir binni maʼ qué zanda guni cani maca biaʼ guni o cani ñuulaʼdxiʼ ñuni. Xi naquiiñeʼ guni binni ora maʼ zigola yaʼ. Zándaca chuʼ tu guni sentir casi ñaca ñapa 30 iza, peru ora guʼyaʼ laa lu speju rihuinni maʼ bichaa stálepeʼ. Peru cadi pur nga guireecaʼ gana. Salmista riʼ gunabaʼ Jiobá: «Cadi gusáʼbiluʼ naa ora maʼ nagolaʼ; cadi gusaanaluʼ naa órapeʼ maʼ qué gapaʼ stipa». Naquiiñeʼ guiníʼ íquenu casi guníʼ ique salmista riʼ. Laabe guniʼbe: «Qué zusaanaʼ de cuezaʼ lii ne dxandipeʼ zusisacaʼ lii» (Salmo 71:9, 14).

18. Ximodo zanda iquiiñeʼ ti xpinni Cristu tiempu stiʼ despué de gaca jubilar.

¹⁸ Stale tu riguixhe ique jma gusisaca Jiobá ora gaca jubilar. Sicaríʼ guníʼ ti hombre ni maʼ guca jubilar: «Dede ante gudixheʼ xi guneʼ ora gunduuxeʼ xiiñidxaapadu scuela stiʼ. Gudixhe iqueʼ gacaʼ precursor regular, ne bituaaʼ negocio stinneʼ ti ganda gapaʼ tiempu ne guneʼ jma lu xhiiñaʼ Jiobá. Gunabaʼ Dios guluíʼ naa xi guneʼ». Pa mayaca gaca jubilarluʼ, zanda quixhedxí ca diidxaʼ ni guníʼ Jiobá, Dios ni bizáʼ laanu ca, ladxidoʼloʼ: «Dede dxi guióʼxhotu qué zuchaaʼ modo naa; ne dede ora guitoope guicha íquetu naa zacaniáʼ laatu» (Isaías 46:4).

19. Xi conseju cudii Pablu ca binni ni maʼ zigola.

¹⁹ Despué de gaca jubilar binni raca nagana para laa guiaa maʼ qué guni dxiiñaʼ. Apóstol Pablu gudxi ca hombre ni maʼ nagola «ucueeza ca laacaʼ». Ca diidxaʼ riʼ culídxicani cani maʼ zigola cadi tiidisucaʼ lu cani gúnicaʼ ne guicá íquecaʼ gúnicaʼ xiixa lu xquendanabánicaʼ. Zándaca ora maʼ guca jubilar tuuxa jma caquiiñeʼ gucueeza laa para cadi guni cani riuulaʼdxiʼ si ne quixhe chaahuiʼ cani guni. Nga runi, qué chuʼ dxi gusaana de gúniluʼ xhiiñaʼ Señor biaʼ gándatiʼ, purtiʼ cadi pur gana si cayúniluʼ ni (1 Corintios 15:58). Galán quixhe ique binni guni jma lu xhiiñaʼ Dios ti gacané xcaadxi binni (2 Corintios 6:13). Stale xpinni Cristu runi ni ora rucheechecaʼ diidxaʼ nacubi ne galán de guidubi ladxidoʼcaʼ biaʼ gándatiʼ ne biaʼ iza nápacaʼ. Sicaríʼ guníʼ Pablu de binni ora maʼ huaniisi: «Cadi iree chu ca de ni runi crecaʼ, ne cadi guiaana dxi ca de gannaxhii saa caʼ, ne cadi iree ca gana» (Tito 2:2).

ORA GATI XHEELAʼ BINNI

20, 21. 1) Lu guidxilayú malu nabáninu riʼ, xi ruxheleʼ ca guendaxheelaʼ ca. 2) Xi ejemplu sicarú bisaana Ana para cani maʼ guti xheelaʼ.

²⁰ Nabé triste nga ora guxheleʼ guendaguti binni de xheelaʼ, peru laga nabáninu lu guidxilayú malu riʼ gastiʼ zanda gúninu para cadi guizaacanu nga. Xpinni Cristu ni naná nuu ladxidóʼ pur guti xheelaʼ nanna nisiaasibe ne runi cré zuuyaʼ laabe sti biaje (Juan 11:11, 25). Neca nánnanu nga, naná nga ora gatiʼ tuuxa binnilídxinu. Yanna, ximodo zanda gudxiilú binni yuubaʼ ca yaʼ.a

²¹ Ora guidúʼyanu ni biʼniʼ Ana, ti gunaa ni cuzeeteʼ Biblia, zanda gacaneni laanu. Despué de gadxe iza de bichaganáʼ Ana guti xheelaʼ, ne ora ruzeeteʼ Biblia de laabe maʼ nápabe 84 iza. Nanna dxíchinu nabé biuubaʼ ladxidoʼbe pur guti xheelabe. Ximodo bidxiilube yuubaʼ que yaʼ. Bisisácabe Jiobá ridxíʼ ne huaxhinni ndaaniʼ yuʼduʼ stiʼ (Lucas 2:36-38). Nánnanu guiráʼ ca iza bisisácabe Jiobá ne ca oración bíʼnibe gucanécani laabe gudxiilube yuubaʼ ni gúpabe guti si xheelabe ne para cadi ñuni sentirbe nuube stúbibe.

22. Xi huayuni cani maʼ guti xheelaʼ para cadi guni sentircaʼ nuucaʼ stúbicaʼ.

²² Sicaríʼ bisiene ti gunaa ni napa 72 iza ne maʼ raca chii iza de guti xheelaʼ: «Ni jma nagana guca para naa nga guirutiʼ tu güeniáʼ diidxaʼ. Nabé bicaadiaga xheelaʼ naa dxi bibani. Ora maʼ cayuidu diidxaʼ ruzéʼtedu de ca binni ridagulisaa ne ximodo rucheechedu diidxaʼ». Sti gunaa ni guti xheelaʼ guníʼ: «Neca riníʼcabe ridiʼdiʼ yuubaʼ stiʼ binni ora maʼ zidiʼdiʼ dxi la? naa rabeʼ jma jneza guininu ni zacané tiidiʼ yuubaʼ stinu nga cani gúninu ora maʼ zidiʼdiʼ dxi. Ne óraca jma zanda gacanenu xcaadxi binni». Ti hombre ni napa 67 iza ne maʼ guti xheelaʼ guníʼ: «Ti modo jma jneza para ganda gudxiilú binni yuubaʼ ni napa nga gacané xcaadxi binni para gatadxí ladxidóʼ».

DIOS RUSISACA CA BINNI HUANIISI

23, 24. Ximodo riguixhedxí Biblia ladxidóʼ cani maʼ nagola, ne jmaruʼ si cani maʼ guti xheelaʼ.

²³ Neca pur guendaguti rusaana xheelaʼ binni laa la? nanna qué zusaana Jiobá laa. Rey David biindaʼ sicaríʼ: «Ti cosa maʼ gunabaʼ Jiobá... ne laani nga chiyubeʼ, cuezaʼ ndaaniʼ lidxi Jiobá biaʼ dxi guibaneʼ, ti guuyaʼ pabiáʼ nacháʼhuibe ne chuaaʼ nayecheʼ guuyaʼ yuʼduʼ stibe» (Salmo 27:4).

²⁴ Apóstol Pablu guníʼ ca diidxaʼ riʼ: «Gucané ca viuda ni huandí qué gapa tu guʼya laa» (1 Timoteo 5:3). Conseju ni zeeda despué de ca diidxaʼ ca na zanda gacané ca binni ridagulisaa tuuxa ni maʼ guti xheelaʼ pa qué gapa binnilidxi ni guʼyaʼ laa. Peru cadi cuzeeteʼ si Biblia naquiiñeʼ gacanécabe laabe, purtiʼ Pablu biquiiñeʼ ti diidxaʼ griegu ni culuíʼ naquiiñeʼ gusisácacabe ca gunaa ni maʼ guti xheelaʼ. Ca hombre ne ca gunaa ni maʼ guti xheelaʼ zatadxí ladxidoʼcaʼ gánnacaʼ rusisaca Jiobá laacaʼ ne zudiibe ni iquiiñecaʼ (Santiago 1:27).

25. Xi zanda quixhe ique ca binni huaniisi gúnicaʼ.

²⁵ Sicaríʼ na Stiidxaʼ Dios: «Ni galán stiʼ ca binnigola ca nga guicha toope sticaʼ», ne laaca cuzeeteni: «Guicha toope stiʼ ca binnigola ca zeeda gaca casi ti corona sicarú ora rúnicaʼ ni jneza» (Proverbios 16:31; 20:29). Nga runi, pa tuuxa maʼ bichaganáʼ o maʼ nuu stubi sti biaje, cadi gusaana de guni xhiiñaʼ Jiobá primé lu xquendanabani. Zacá zuuyaʼ Dios jneza ni cayuni ne zanda guicaa ti guendanabani ni qué ziuu dxi guiluxe ndaaniʼ ti guidxilayú ra maʼ qué ziuu ca yuubaʼ ni rapa binni ora maʼ bioʼxhoʼ (Salmo 37:3-5; Isaías 65:20).