LECCIÓN 8

Bisiidiʼ né ejemplu

Mateo 13:34, 35

RESUMEN: Biquiiñeʼ ejemplu galán ora maʼ cusiidiluʼ, purtiʼ zacané ni para chuulaʼdxiʼ binni gucaadiaga lii ne para gusiidiluʼ laacabe gunáʼ nga ca puntu jma risaca.

XIMODO GÚNILUʼ NI

Gulí ejemplu ni cadi nagana. Yenanda ejemplu stiʼ Jesús: biquiiñeʼ cosa nahuiiniʼ para gusiéneluʼ cosa naroʼbaʼ ne cosa ni cadi nagana para gusiéneluʼ cani jma nagana. Cadi uguuluʼ detalle ni qué zacané lu ejemplu caquiiñeluʼ. Biiyaʼ chaahuiʼ pa biaʼsi ejemplu stiluʼ né puntu ni racaláʼdxiluʼ gusiidiluʼ ti cadi guni confundirluʼ cani cucaadiaga lii.

Guca observador. Biiyaʼ xi nuu neza ra nabézaluʼ, biʼniʼ estudiar ca publicación stinu ne biziidiʼ de ca maestru ni nanna gusiidiʼ. Bicaa guiráʼ ca ejemplu ni chuuláʼdxiluʼ ne ni zacané lii guni mejorarluʼ modo rusiidiluʼ ne gupa cani para iquiiñeluʼ.
Guníʼ ique ca binni cucaadiaga lii. Gulí ejemplu de ca cosa ni runi cani cucaadiaga lii o de ca tema ni runi interesar laacabe. Peru biiyaʼ cadi guni ofenderluʼ ne cadi gusituiluʼ lú guirutiʼ.
Bisiene puntu ni racaláʼdxiluʼ gusiidiluʼ. Biquiiñeʼ ejemplu para gusiéneluʼ ca idea principal, cadi ca idea secundariu. Biyubi modo ganda guietenalaʼdxiʼ cani cucaadiaga lii puntu ni racaláʼdxiluʼ gusiidiluʼ ne cadi ejemplu si ni guzeeteluʼ.