De dxi beeda Jesús ne ca discípulo stiʼ de Jericó, maʼ zinecaʼ chonna gueelaʼ de nuucaʼ Betania. Ne lunes siadóʼ 10 de nisán, bireecabe zécabe Jerusalén. Cumu bindaana Jesús neza la? casi biʼyaʼ ti yaga duʼgaʼ bidxiña ra zuhuaa ni. ¿Ñee cá cuananaxhi luni la?

Mayaca guiluxe beeu marzo, ne dede lu junio nga temporada ricá cuananaxhi lu yaga duʼgaʼ. Peru guizáʼ napa yaga riʼ bandaga. Ngue runi guníʼ ique Jesús maʼ cá cuananaxhi luni, peru nin ti cuananaxhi cadi cá luni. Puru bandaga nápani. Óraque ná Jesús: «Qué chuʼruʼ dxi gó tuuxa cuananaxhi stiluʼ» (Marcos 11:14). Oraqueca bibidxi yaga que. Peru maʼ sti dxi siadóʼ que gusiene Jesús xi riníʼ ni guníʼ que.

Yendá si Jesús ne ca discípulo stiʼ Jerusalén, cumu maca yeguuyabe xi cayaca ra templu que ti dxi ante la? zebe raqué. Peru dxi riʼ bíʼnibe ti cosa casi ni bíʼnibe raca chonna iza, lu Pascua stiʼ iza 30 que (Juan 2:14-16). Biaje riʼ, guladxi Jesús ca ni cutoo ne ca ni cazíʼ. Laaca bitiixhibe mexaʼ stiʼ ca ni cuchaa bueltu ne banguʼ stiʼ ca ni cutoo paloma (Marcos 11:15). Ne laaca qué nudiibe lugar nididiné ca binni que ca cosa sticaʼ ndaaniʼ templu que, para ninecaʼ ni sti ladu guidxi que.

¿Xiñee guladxi Jesús ca ni cuchaa bueltu ne ca ni cutoo maniʼ? Laapebe guniʼbe: «¿Cadi cá lu Stiidxaʼ Dios: “Zábicabe lidxeʼ yoo ra raca oración para guiráʼ guidxi” la? Peru laatu maʼ bíʼnitu ni lidxi gubaanaʼ» (Marcos 11:17). Gúdxibe laaca gubaanaʼ purtiʼ caru cutoocaʼ ca maniʼ ni rizíʼ binni para gudii sacrificiu. Ne para Jesús la? maʼ cabáʼnacabe.

Binadiaga si ca sacerdote principal, ca escriba ne ca binni risaca de guidxi que ni bíʼnibe jmaruʼ si biyúbicaʼ modo guuticaʼ laabe. Peru qué gánnacaʼ ximodo gúnicaʼ ni purtiʼ nabé rizananda binni Jesús para gucaadiaga guiráʼ ni rusiidibe.

Peru cadi ca judíu si nga guyecaʼ para guni celebrarcaʼ Saa Pascua que, laaca guyé ca prosélito, ca binni ni guyuu lade religión stiʼ ca judíu. Lade ca binni riʼ nuu caadxi griegu ni beeda para guni adorar Dios. Bidxiña ca binni riʼ Felipe, zándaca purtiʼ nápabe ti lá griegu, ne gunábacabe laa gúʼyacabe Jesús. Peru qué ganna Felipe pa jneza ngue ni canábacabe que, ngue runi yenabadiidxabe Andrés pa zanda guʼyaʼ ca binni que Jesús. Óraque guyé guirópacabe yetídxicabe ni Jesús, zándaca nuuruʼ ra templu.

Nanna Jesús mayaca guuticabe laa, cadi nuube gunítibe tiempu para güínebe binni diidxaʼ ti gunibiáʼ xcaadxi binni laabe. Ngue runi biquiiñeʼ Jesús ti ejemplu para bicabi ca apóstol que: «Maʼ bidxiña hora guisaca Xiiñiʼ Hombre. Dxandíʼ ni chitidxeʼ laatu riʼ, pa qué gatiʼ ti biidxiʼ stiʼ trigu ora guiaba ndaaniʼ yu la? qué zandani ni. Peru pa gatiʼ ni la? zandani ni ne zacá stale luni» (Juan 12:23, 24).

Ruluíʼ qué risaca ti biidxiʼ trigu. Peru pa guiaba ni ndaaniʼ yu ne «gatiʼ» ni, zandani ni ne ra tidiʼ tiempu zaca ni ti yagahuiiniʼ ni zapa stale espiga. Zacaca nga zeeda gaca Jesús, naca ti hombre perfectu ne ra gatiʼ sin gucheené Dios, zanda gudiibe guendanabani ni qué zaluxe ca binni ni nuu dispuestu guni sacrificiu casi laabe. De raqué guníʼ Jesús: «Tu gannaxhii xquendanabani zunitilú ni, peru tu gaca nanalaʼdxiʼ xquendanabani ndaaniʼ guidxilayú riʼ cayapa ni para guicaa guendanabani ni qué zaluxe» (Juan 12:25).

Peru cadi caníʼ diʼ Jesús de laa si, purtiʼ guniʼbe: «Pa racalaʼdxiʼ tuuxa gaca xpinneʼ, guedananda naa, ne ra chaaʼ, raqueca zié. Pa racalaʼdxiʼ tuuxa gaca xpinneʼ, zusisaca Bixhozeʼ laa» (Juan 12:26). ¡Aque galán ca ndaayaʼ chicaa ca binni riʼ xa! Ca ni gusisaca Bixhózebe laa, zuni mandárnecaʼ Cristu lu Reinu nuu guibáʼ.

Ora bietenalaʼdxiʼ Jesús ca yuubaʼ ni chitidiʼ ne pabiáʼ feu modo chiguuticabe laa, guníʼ: «Cadi nuudxí diʼ ladxiduáʼ. ¿Xi guinieeʼ yaʼ? Bixhozeʼ, bilá naa de ni chitideʼ riʼ. Peru para tideʼ ni nga bidxiñaʼ dede raríʼ» (Juan 12:27). Nanna Jesús naquiiñeʼ gudii xquendanabani para gaca cumplir ni maʼ gudixhe ique Dios gaca.

Caʼruʼ guiluxe lunes 10 de nisán, ne nuu Jesús ndaaniʼ templu caníʼ ximodo chiguuticabe laa. Nuube xizaa xi guiníʼ binni de Dios, ngue runi nabe: «Bixhozeʼ, bisisaca laluʼ». Oraqueca gucuá ti ridxi de guibáʼ ne ná: «Maʼ bisisacaʼ ni, ne laaca zusisacaʼ ni sti biaje» (Juan 12:27, 28).

Cadi cayene ca binni que xii ngue cazaaca. Nuu tu ná ti rayu ngue guxidxi, xcaadxi ná: «Ti ángel nga guniʼné laabe» (Juan 12:29). Peru Jehová ngue guníʼ. Cadi primé biaje nga gunadiaga binni stidxi Dios dede dxi bizulú Jesús cayuni xhiiñaʼ Dios.

Dxi guyuunisa Jesús, raca chonna iza arondaʼ, binadiaga Juan Bautista guníʼ Dios: «Ndiʼ nga Xiiñeʼ ni nadxieeʼ; ni rusiecheʼ naa». Despué, lu Pascua stiʼ iza 32, dxi bidxaa modo rihuinni Jesús nezalú Santiago, Juan ne Pedro, laaca binadiágacaʼ ora guníʼ Dios: «Ndiʼ nga Xiiñeʼ ni nadxieeʼ; ni rusiecheʼ naa. Lagucaadiaga laa» (Mateo 3:17; 17:5). Peru guionna biaje riʼ stale binni binadiaga stidxi Jehová.

De raqué bisiene Jesús: «Gucuá ridxi riʼ, cadi pur naa, sínuque pur laatu» (Juan 12:30). Ni guca riʼ bisihuinni dxandíʼ laabe nga Xiiñiʼ Dios, Mesías ni maca cá gueeda.

Dede biaʼ dxi nabani Jesús qué huayuu dxi gucheené Dios. Zacá gudíxhebe ti ejemplu de ximodo naquiiñeʼ guibani binni ne bisihuínnibe naquiiñeʼ guinitilú Binidxabaʼ, ni naca gobernante stiʼ guidxilayú riʼ. Guniʼruʼ Jesús: «Yanna maʼ cayaca juzgar guidxilayú; yanna maʼ chindeecabe gobernante stiʼ guidxilayú riʼ ti ladu». Cadi pur gana si nga chigati Jesús. ¿Xiñee yaʼ? Jesús peʼ guníʼ xiñee: «Peru ora guindísacabe naa de lu guidxilayú, zusendacaaʼ guiráʼ clase binni para gueeda ra nuaaʼ» (Juan 12:31, 32). Zacá ni, ra guuticabe Jesús lu ti yaga, zusendacaabe guiráʼ clase binni ne zuxhélebe ti neza ni ziné lu guendanabani ni qué zaluxe.

Ora binadiaga binni guniʼbe: «Ora guindísacabe naa», gunabadiidxacaʼ laabe: «Nánnadu ná Ley qué ziuu dxi gatiʼ Cristu. Yanna, ¿ximodo nga naluʼ zandísacabe Xiiñiʼ Hombre yaʼ? ¿Tuu nga Xiiñiʼ Hombre?» (Juan 12:34). Neca maʼ stale cosa biiyaʼ ca binni que biʼniʼ Jesús dede maʼ binadiágacabe stidxi Dios, stale de laacaʼ, qué runi crecaʼ pa dxandíʼ laabe nga Xiiñiʼ Hombre o Mesías ni maca cá gueeda que.

Bibiguetaʼ guníʼ Jesús sti biaje laa nga: «Biaaniʼ stiʼ guidxilayú» (Juan 8:12; 9:5). Gúdxibe ca binni que: «Ziuuruʼ biaaniʼ que sti tiempuhuiiniʼ ládetu. Lasá laga náparutu biaaniʼ, ti cadi guinaazeʼ guelacahui laatu [...]. Laga náparutu biaaniʼ, lagapa fe biaaniʼ ca, ti gácatu xpinni Dios» (Juan 12:35, 36). Despué de ni bizaaca riʼ, biree Jesús zeʼ, purtiʼ cadi 10 de nisán que nga naquiiñeʼ gátibe. 14 de nisán, lu Pascua que nga «zandísacabe» laabe o zuuticabe laabe lu ti yaga (Gálatas 3:13).

Ora guidúʼyanu xi guiráʼ biʼniʼ Jesús dxi biʼniʼ xhiiñaʼ Dios, rihuínnica guca cumplir profecía ni ná qué zuni cré ca judíu laabe. Maca bicaa Isaías zaca ca judíu casi ciegu, zaca ladxidoʼcaʼ naguidxi ne qué zabiguétacaʼ ra nuu Dios para guiándacaʼ (Isaías 6:10; Juan 12:40). Peru stale de ca judíu qué nacaʼ guni crecaʼ dxandíʼ peʼ Jesús nga ni chigulá laacaʼ, ne laa nga neza ni ziné lu guendanabani.

Nicodemo, José de Arimatea ne xcaadxi gobernante gúpacaʼ fe Jesús. Peru, ¿zusihuínnicaʼ nápacaʼ fe la? ¿O qué zusihuínnicaʼ fe sticaʼ para cadi guiládxicabe laacaʼ de ndaaniʼ sinagoga o purtiʼ «jma riuuláʼdxicaʼ gusisaca binni laacaʼ»? (Juan 12:42, 43).

De raqué bisiene Jesús xi riníʼ gapa binni fe laa: «Tu gapa fe naa, cadi naa siaʼ nga cayápabe fe, sínuque laaca cayápabe fe ni biseendaʼ naa». Nabé risaca ca cosa ni gudxi Dios laabe gusiidibe, ngue runi guniʼbe: «Peru tu qué guni tender naa ne qué guicaa stiidxaʼ la? nuu tu guni juzgar laa: ca diidxaʼ ni maʼ gunieeʼ nga chiguni juzgar laa lu últimu dxi» (Juan 12:44, 45, 48).

Maʼ para guiluxe Jesús guníʼ: «Purtiʼ cadi de naa siaʼ nga riree ni rinieeʼ, sínuque Bixhozeʼ ni biseendaʼ naa, maʼ gudxi naa xi guinieeʼ ne xi gusiideʼ. Ne nannaʼ guendanabani ni qué zaluxe nga raca significar mandamientu stibe» (Juan 12:49, 50). Nanna Jesús maʼ cadi candaa, zudii xquendanabani para guilá ca binni ni gapa fe laa (Romanos 5:8, 9).