¿Xiñee maʼ qué gapa binni respetu laca laa?

XIÑEE RISACA GUNI RESPETAR BINNI LACA LAA

• Maʼ bisihuinni ca investigación ni huayaca, ca binni ni riníʼ ique qué risaca la? jma nagueenda rápacaʼ ansiedad, depresión ne rusaana de gocaʼ o rocaʼ stale. Laaca ruyúbicaʼ gué xhaatacaʼ alcohol, gábicaʼ stale medicina ne cúbacaʼ droga.

• Ti binni ni runi respetar laca laa la? qué ruchaaga laa né xcaadxi, ne pur nga qué raca nagana para laa gaca llevar xcaadxi ne gapa buen amigu. Peru ca ni huaxiéʼ napa respetu laca laa la? jma nga riniʼcaʼ mal de xcaadxi. Ne pur nga maʼ qué rápacaʼ tu gaca xhamígucaʼ.

• Ca binni ni runi respetar laca laa, neca guidxaagalucaʼ guendanagana jma runi huantarcaʼ; qué rudiicaʼ lugar gucueeza ca guendanagana ca laaca para ugaandacaʼ ni maʼ gudixhe íquecaʼ. Peru ca ni huaxiéʼ runi respetar laca laa la? ruuyacaʼ ca problemahuiiniʼ sticaʼ casi xiixa nabé naroʼbaʼ; ne jma nagueenda rireecaʼ gana.

XI ZANDA GÚNILUʼ

Biyubi xhamíguluʼ ni zanda gacané lii. Bidxaaga binni ni napa respetu xcaadxi, ni guizaalaʼdxiʼ lii ne ni gusiidiʼ lii xiixa ni zacané lii.

Gucané xcaadxi binni. Pa nacháʼhuiluʼ ne rúniluʼ cosa galán pur xcaadxi, ne pur ca binni ni qué zanda gudxiguetaʼ ni lii, jma nayecheʼ zabániluʼ ne zuni sentirluʼ caquiiñeluʼ xquendanabániluʼ jneza. Ne dxandíʼ zacá ni neca guirutiʼ gudii xquixe peʼ lii pur cosa galán ni bíʼniluʼ.

Gucané ca xiiñiluʼ guiziidicaʼ guni respetarcaʼ laca laacaʼ. Ti modo zanda gúniluʼ ni nga ra gudiiluʼ lugar stubi ca xiiñiluʼ guni chaahuicaʼ xiixa guendanagana ni gápacaʼ. Ndiʼ zacané laacabe gudxiilúcabe guendanagana jma naroʼbaʼ ne guni chaahuicabe cani. Laaca zacané nga laacabe gápacabe respetu laca laacabe ne zacaneni laacabe ora guiniisicabe.

NI RUNI CA TESTIGU STIʼ JEHOVÁ

Ca reunión ni rápadu ne modo ridúʼndanedu binni, racaneni laacaʼ guibánicaʼ jma galán ne nga racané laacaʼ jma guni respetarcaʼ laca laacaʼ.

CA REUNIÓN NI RÁPADU GUIRÁʼ SEMANA

Lu ca reunion ni rápadu guiráʼ semana rucaʼdiágadu discursu ni biree lu Biblia. Luni riete ca conseju ni zanda gacané laadu guni respetardu laca laadu jma. Qué zaguíxeluʼ para chuʼluʼ, ne tutiica zanda cheʼ. Lúcani zaziidiluʼ…

• . . . xiñee risácaluʼ para Dios.

• . . . guibániluʼ nayecheʼ.

• . . . gápaluʼ buen amigu ni cadi gusaana lii.

Laaca zadxélaluʼ buen amigu, binni ni dxandíʼ dxandíʼ peʼ rizaalaʼdxisaa (1 Corintios 12:​25, 26).

Pa riuuláʼdxiluʼ gánnaluʼ jma de ca reunión stidu, guyuu lu jw.org ne biiyaʼ videu ni láʼ Ximodo raca ca guendaridagulisaa stidu.

MODO RIDÚʼNDANEDU BINNI BIBLIA

Riquíʼñedu libru ni láʼ ¡Zanda guibániluʼ nayecheʼ! para guidúʼndanedu binni Biblia sin quixe. Napa libru riʼ caadxi pregunta ni racané binni guiníʼ ique ti ganda guiene ca textu stiʼ Biblia ni zeeda luni. Laaca cadi nagana ca diidxaʼ ni zeeda luni, nápani caadxi videu ne imagen nabé sicarú. Racané cursu riʼ binni guni sentircaʼ risácacaʼ ne ribánicaʼ jma galán.

Pa racaláʼdxiluʼ gánnaluʼ ximodo zanda gacané cursu de lu Biblia ni rudii ca testigu stiʼ Jehová lii la? guyuu lu jw.org ne biiyaʼ videu ni láʼ Xiñee naquiiñeʼ gúʼndaluʼ Biblia.