Ndaa ra rinabadiidxaʼ
◼ Xi zanda gúninu para gacanenu ca precursor
Lu iza dxiiñaʼ 2009, biaʼ xhono gayuaa mil hombre ne gunaa lu guidubi naca Guidxilayú gúcacaʼ precursor regular ne especial. Ca xpinni Cristu riʼ rudiicaʼ tiempu sticaʼ, stipa ne ca cosa risaca nápacaʼ para ganda gucheechecaʼ stiidxaʼ Reinu (Pro. 3:9). ¡Guizáʼ nayecheʼ runi sentir Jiobá pur stipa ni cayúnicabe ca! Yanna laanu yaʼ, ximodo zanda gusihuínninu nuunu nayecheʼ casi laabe. Ximodo zanda gacanenu ca precursor ca para chuʼcaʼ nayecheʼ ne ganda guni huantarcaʼ lu dxiiñaʼ riʼ yaʼ.
Primé la? galán gábinu laacabe diidxaʼ ni gacané laacabe para chúʼcabe gana ti cadi gusaana de gácacabe precursor (Pro. 25:11). Laaca galán quixhe chaahuinu tiempu stinu guiráʼ semana ti ganda gucheechenenu laacabe diidxaʼ. Ora guiréʼnenu tobi de laacabe, galán gábinu laabe chinenu carru stinu pa nápanu ni lugar de chinebe xcárrube o laaca zanda gudiʼnu laabe saca pasaje stibe (1 Cor. 13:5; Fili. 2:4). Laaca galán gácanu nachaʼhuiʼ ne laacabe ora chécabe ralídxinu, ne ora ganda la? galán guni invitarnu laacabe ti guendaró. Nga nga sti modo zanda gusihuínninu nadxiinu laacabe ne racaláʼdxinu gacanenu laacabe (1 Ped. 4:8, 9).
Stiidxaʼ Dios cayabi laanu zudii Jiobá ni caquiiñeʼ cani runi xhiiñaʼ Reinu primé lu xquendanabánicaʼ (Sal. 37:25; Mat. 6:33). Ti modo rúnibe ni nga ra riquiiñebe guiráʼ ca xpinni Cristu ni nadxiisaacaʼ (1 Juan 3:16-18). Nánnanu qué ribeza ca precursor ca sinu guiráʼ ni caquiiñecaʼ. Ne zándaca qué zábicabe ca xpinni Cristu pa caquiiñecabe xiixa. Nga runi, galán gúʼyanu pa nuu xiixa ni caquiiñecabe ne chuʼnu listu para gacanenu laacabe, zacá nga zanda gudiʼnu ni cayaadxaʼ laacabe (2 Cor. 8:14, 15).
Febe nga ti gunaa ni bicheeche diidxaʼ né stale gana ni guyuu lade binni ridagulisaa de Cencreas lu primé siglu que. Dxi guyebe Roma, Pablu gudxi ca xpinni Cristu de raqué ca diidxaʼ riʼ: «Cuseenda hermana Febe ra nuu tu. [...] Lauchagalú laabe casi naquiiñe guni nu irá xpinni Cristu, purti nadxii tu Señor, [...] ne lagacané laabe intiica iquiiñe be» (Rom. 16:1, 2). Ca dxi stinu riʼ, laaca naquiiñeʼ gacanenu ne gannaxhiinu ca precursor regular ne especial ni nuu ra ridagulisaanu, purtiʼ laacaʼ qué rusaana de gucheechecaʼ ca diidxaʼ nacubi ne galán (Hech. 5:42).