Gunna dxichi zaguixhedxí Jehová ladxidoʼloʼ

1. ¿Ximodo bibani ca judíu ni guyuu de esclavu ndaaniʼ guidxi Babilonia?

GUNÍʼ ique ximodo biʼniʼ sentir ca judíu ni yenécabe de esclavu ndaaniʼ guidxi Babilonia. Biiyacabe ximodo binitilú guidxi Jerusalén, lugar ra gúlecabe. Ne pur ca pecadu ni bíʼnicabe ne ni biʼniʼ ca bixhozebiidacabe guyécabe de esclavu ti lugar ra qué runibiáʼcabe (2 Crón. 36:​15, 16, 20, 21). Dxandíʼ, ruluíʼ nácacabe libre ndaaniʼ guidxi Babilonia ne nabánicabe casi nabani ca binni de raqué (Jer. 29:​4-7). Peru nagana nga modo bibánicabe raqué purtiʼ cadi zaqué diʼ nga gucaláʼdxicabe nibánicabe. Sicaríʼ guníʼ tobi de laacabe pur ni cayuni sentir: «Guridu guriá ca guiiguʼ stiʼ Babilonia. Bíʼnadu ra bietenaláʼdxidu Sion» (Sal. 137:1). Rihuinni dxíchica caquiiñeʼ ca judíu ni yenécabe de esclavu que tu quixhedxí ladxidóʼ ca, peru ¿tu zanda guni ni yaʼ?

2, 3. a) ¿Xi biʼniʼ Jehová pur ca judíu ni yenécabe de esclavu Babilonia? b) ¿Xi zadúʼyanu lu artículo riʼ?

² Jehová nga Dios ni «riguixhedxí ladxidoʼno» (2 Cor. 1:3). Nadxiibe ne racaláʼdxibe quixhedxibe ladxidóʼ guiráʼ ca ni ridxiña gaxha de laabe. Nanna Jehová nuu de ca judíu zanacaʼ guicaacaʼ disciplina stibe ne zabiguetaʼ zuni adorarcaʼ laabe modo riuuláʼdxibe (Is. 59:20). Ngue runi, jma de 100 iza ante chinécabe ca judíu que Babilonia, bíʼnibe gucaa Isaías libru ni ziné lá. ¿Xi para yaʼ? Laaca profeta riʼ bicaa: «“Laquixhedxí ladxidóʼ xquidxeʼ”, ná Dios stitu» (Is. 40:1). Zaqué nga biquiiñeʼ Jehová libru ni bicaa profeta Isaías para quixhedxí ladxidóʼ ca judíu ni guyé de esclavu ndaaniʼ guidxi Babilonia.

³ Laanu laaca nuu biaje caquíʼñenu tu quixhedxí ladxidoʼno. Lu artículo riʼ zadúʼyanu chonna modo gudixhedxí Jehová ladxidóʼ ca judíu: primé, biʼniʼ prometerbe zuni perdonarbe ca judíu ni gaca arrepentir, guiropa, bidiibe ca xpínnibe ti esperanza ne guionna, gucanebe laacaʼ cadi guidxíbicaʼ. Ora guidúʼyanu cada tobi de cani bizéʼtenu riʼ zadúʼyanu ximodo zaqueca nga riguixhedxí Jehová ladxidoʼno tiempu riʼ.

NABÉ RIÁ JEHOVÁ NE RUNI PERDONAR LAANU

4. ¿Ximodo bisihuinni Jehová riá? (Isaías 55:7).

⁴ Naca Jehová Bixhózenu ni nabé riá laanu (2 Cor. 1:3). Ne bisihuínnibe ni ora biʼniʼ prometerbe ca ni guyé de esclavu ndaaniʼ guidxi Babilonia zuni perdonarbe laacaʼ pa gaca arrepentircaʼ (biindaʼ Isaías 55:7). Laabe gúdxibe laacaʼ: «Qué zusaana de gannaxhieeʼ lii qué ziuu dxi gusaanaʼ de guiaʼyaʼ lii» (Is. 54:8). ¿Ximodo zúnibe ni yaʼ? Neca zapa ca judíu que guendanagana pur qué nuzuubacaʼ diidxaʼ peru biʼniʼ prometer Jehová laacabe zedandá dxi zabee laacabe de ndaaniʼ guidxi Babilonia (Is. 40:2). Nanna dxíchinu guizáʼ gudixhedxí promesa riʼ ladxidóʼ ca judíu ni guca arrepentir que.

5. ¿Xiñee nuunu seguru nabé riá Jehová laanu?

⁵ ¿Xi rizíʼdinu? Nuu Jehová listu para guni perdonar laanu ora tiica si. Gunna ca judíu que ni peru tiempu riʼ jmaruʼ si nuunu seguru runi perdonar Jehová. ¿Xiñee yaʼ? Purtiʼ maʼ nánnanu guiráʼ ni maʼ biʼniʼ Jehová para guni perdonar laanu. Stale iza despué de guníʼ Isaías modo runi perdonar Jehová, biseendaʼ Bixhózenu ni nuu guibáʼ Xiiñiʼ lu Guidxilayú riʼ para gatiʼ pur guiráʼ ca binni ni maʼ guca arrepentir. Pur guti Jesús pur laanu zanda «guixiá ca pecadu» stinu tobi si tiru (Hech. 3:19; Is. 1:18; Efes. 1:7). ¡Pabiáʼ riá Dios stinu laanu!

6. ¿Xiñee nabé galán guiníʼ íquenu pabiáʼ riá Jehová laanu? (Laaca zanda gúʼyaluʼ ca imagen ca).

⁶ Ca diidxaʼ ni guníʼ Jehová guicá lu Isaías 55:7 zanda quixhedxícani ladxidoʼno pa dede yanna runi sentirnu nápanu donda pur ca cosa ni cadi jneza bíninu dxiqué neca maʼ guca arrepentirnu. Nuu tu laa racanaruʼ pur ni biʼniʼ jmaruʼ si pa náparuʼ guendanagana pur laani. Peru pa maʼ guninu ra bicheʼnu ne maʼ bisaana de gúninu ni, zanda chuʼnu seguru maʼ biʼniʼ perdonar Jehová laanu. Ne ora maʼ biʼniʼ perdonarbe laanu maʼ qué rietenaláʼdxirube ca pecadu stinu (bichaaga ni ne Jeremías 31:34). Pa maʼ qué rietenalaʼdxiʼ Jehová ra bicheʼnu la? laanu laaca cadi naquiiñeʼ guietenaláʼdxinu ni. Ruuyaʼ Jehová ca cosa ni rúninu yanna ne cadi ca cosa ni cadi jneza bíninu dxiqué (Ezeq. 33:​14-16). Ne cadi guiaandaʼ laanu maʼ cadi candaa zabee Bixhózenu ni riá laanu guiráʼ ca guendanagana ni rápanu pur ca cosa ni cadi jneza bíninu.

7. ¿Xi zacané para cadi gaca nagana para laanu guininu ca pecadu ni maʼ bíninu?

⁷ Yanna, ¿xi gúninu pa runi sentirnu nápanu donda pur ti pecadu grave ni bíninu ne caʼruʼ guininu ni yaʼ? Biblia ruzeeteʼ guinábanu gacané ca ancianu laanu (Sant. 5:​14, 15). Zándaca gaca nagana guininu ni maʼ bíninu. Peru cadi guiaandaʼ laanu maʼ gulí Jehová ca hombre riʼ para gacanecaʼ laanu. Nga runi, pa maʼ guca arrepentirnu ne nánnanu nadxii ne riá Jehová ne zaqueca ca ancianu laanu la? qué zaca nagana para laanu guininu ni maʼ bíninu. Guidúʼyanu ximodo bisihuinni Jehová biá ne gudixhedxí ladxidóʼ ti hermanu láʼ Arthur, ni biʼniʼ sentir napa donda pur xiixa ni biʼniʼ.a Laabe guniʼbe: «Biiyaʼ pornografía biaʼ ti iza peru ti dxi bicaadiagaʼ ti discursu ni caníʼ de conciencia. Ngue runi gudxeʼ xheelaʼ ne ca ancianu ruuyaʼ pornografía. Ne ora bineʼ ni, bineʼ sentir casi ora ñáxhacabe xiixa nanaa lu guiaʼyaʼ. Peru neca maʼ gunieeʼ ni bineʼ, guizáʼ feu modo runeʼ sentir. Né stale cariñu gucané ca ancianu que naa guieneʼ cadi cucaanáʼ diʼ Jehová naa ne runi disciplinarbe ca ni nadxiibe. Yendá ca diidxaʼ que ndaaniʼ ladxiduáʼ ne gucanécani naa guiníʼ iqueʼ maʼ biʼniʼ perdonar Jehová naa». Yanna maʼ naca Arthur precursor regular ne siervu ministerial. ¡Nabé ratadxí ladxidoʼno gánnanu runi perdonar Jehová laanu ora raca arrepentirnu!

RUDII JEHOVÁ LAANU TI ESPERANZA

8. a) ¿Xi esperanza bidii Jehová ca judíu ni guyé de esclavu? b) Casi ná Isaías 40:​29-31, ¿ximodo zacané esperanza que ca judíu ni guca arrepentir?

⁸ Nabé binibiáʼcabe guidxi Babilonia casi ti guidxi ni qué lica rundaa ca binni ni napa casi esclavu. Ngue runi para binni la? ruluíʼ qué ziuu dxi guibiguetaʼ ca judíu que xquídxicaʼ (Is. 14:17). Peru bidii Jehová ti esperanza ca xpinni. Biʼniʼ prometerbe laacaʼ: zusaana de gácacaʼ esclavu. ¡Ne guirutiʼ zanda gucueezaʼ laabe de gúnibe ni! (Is. 44:26; 55:12). Para Jehová la? zeeda gaca guidxi Babilonia casi ti capa laseʼ de yudé (Is. 40:15). Ne caadxi bihuiiniʼ si gundubi Jehová ¡maca zeʼ yudé ca! Nabé zacané esperanza riʼ ca judíu ni nuu de esclavu que. Ne cadi ngasi, Isaías bicaa: «Ca ni cabeza gacané Jehová laacaʼ la? zabiguetaʼ stipa sticaʼ» (biindaʼ Isaías 40:​29-31). Guizáʼ zudii esperanza que laacabe stipa ne dede «luguiáʼ zapápacaʼ casi ora ñápacaʼ xhiaa águila».

9. ¿Xi razón risaca napa ca judíu que para gápacaʼ confianza Jehová ne ca promesa stiʼ?

⁹ Napa ca judíu que ti razón risaca para gápacaʼ confianza Jehová ne ca promesa stiʼ. Guiníʼ íquenu guiráʼ ca profecía ni maʼ guníʼ Jehová ne maʼ biiyacabe guca cumplir. Guzéʼtenu ti ejemplu, nánnacabe biʼniʼ ganar rey de Asiria guidxi Israel, reinu ni nuu ladu guiáʼ, ne yené ca binni guidxi que casi esclavu (Is. 8:4) Biiyacabe modo binitilú ca binni de Babilonia que guidxi Jerusalén ne guleecaʼ ca binni que de guidxi que (Is. 39:​5-7). Ne nánnacabe bisicheepaʼ rey de Babilonia lú rey Sedequías ne yenebe laa Babilonia (Jer. 39:7; Ezeq. 12:​12, 13). Guca cumplir guiráʼ ni guníʼ Jehová (Is. 42:9; 46:10). Zándaca guiráʼ ndiʼ gucané laacabe chúʼcabe seguru laaca zuni cumplir Jehová promesa stiʼ ra guníʼ zabee laacabe de esclavu.

10. ¿Xi zacané laanu cadi gusiáʼndanu esperanza ni nápanu?

¹⁰ ¿Xi rizíʼdinu? Pa maʼ careenu gana, zanda quixhedxí esperanza ca ladxidoʼno ne gudiini laanu stipa. Dxandíʼ, nabé nagana tiempu nabáninu riʼ ne nápanu enemigu ni cucaalú laanu, peru cadi naquiiñeʼ guidxíbinu. Maʼ bidii Jehová laanu ti esperanza de guibáninu sin qué chuʼ dxi gátinu, ra zápanu paz ne gastiʼ ni zuchibi laanu. Naquiiñeʼ guiníʼ íquenu promesa riʼ casi ñaca maʼ cadúʼyanu ni. Purtiʼ pa qué gúninu ni, zanda gusiáʼndanu ni o guidúʼyanu ni nachuunduʼ casi xa ñaca nidúʼyanu ti paisaje sicarú lu ti ventana nabiidiʼ. ¿Xi zacané laanu gusianu ventana ca yaʼ? Ni nuunu guininu nga ¿xi zacané laanu guiníʼ íquenu ca promesa riʼ casi ñaca maʼ cadúʼyanu cani yaʼ? Ni zacané laanu nga cueenu tiempu guiníʼ íquenu pabiáʼ sicarú zabáninu ndaaniʼ guidxilayú cubi ca. Nga runi, galán guidúʼndanu ca artículo, guidúʼyanu ca videu ne ca canción ra riete de esperanza ni nápanu. Ne gábinu Jehová gunáʼ nga ca promesa ni jma rusiecheʼ laanu ni racaláʼdxinu guidúʼyanu.

11. ¿Ximodo biguetaʼ stipa stiʼ ti hermana ni napa ti guendahuará malu?

¹¹ Guzéʼtenu ni bizaaca ti hermana ni láʼ Joy, nápabe ti guendahuará malu. Bizeetebe riguixhedxí esperanza ca ladxidoʼbe ne rudiini stipa laabe. Laabe nabe: «Ora runeʼ sentir maʼ qué zanda guneʼ huantar, ruxheleʼ ladxiduáʼ nezalú Jehová ne rabeʼ laa guiráʼ ni cayuneʼ sentir, purtiʼ nannaʼ riénebe naa. Ne ricabi Jehová naa ra rudii stipa naa» (2 Cor. 4:7). Laaca riníʼ íquebe maʼ nuube ndaaniʼ guidxilayú cubi ra guirutiʼ zaníʼ: «Huaraʼyaʼ» (Is. 33:24). Laanu laaca zabiguetaʼ stipa stinu pa gábinu Jehová guiráʼ ni cayuni sentirnu ne guiníʼ íquenu esperanza ni nápanu.

12. ¿Xi razón risaca nápanu para gápanu confianza Jehová ne ca promesa stiʼ? (Laaca zanda gúʼyaluʼ ca imagen ca).

¹² Cásica ca judíu que, laanu laaca nápanu ti razón risaca para gápanu confianza Jehová ne ca promesa stiʼ. Guiníʼ íquenu ca profecía ni cadúʼyanu cayaca cumplir. Guzéʼtenu ti ejemplu, nuu ti potencia mundial, nuu parte de laani naguidxi ne nuu parte de laani nadá (Dan. 2:​42, 43). Laaca cadúʼyanu cayaca «xu roʼ ti lugar ne sti lugar», ne cayuni predicarnu «lu guidubi guidxilayú» (Mat. 24:​7, 14). Ora ridúʼyanu cayaca cumplir ca profecía riʼ, riguixhedxícani ladxidoʼno ne racanécani laanu guni crenu zaca cumplir guiráʼ ca promesa ni maʼ guníʼ Jehová.

RACANÉ JEHOVÁ LAANU CADI GUIDXÍBINU

13. a) ¿Xi guendanagana zadxaagalú ca judíu que ora mayaca guireecaʼ de esclavu? b) Casi ná Isaías 41:​10-13, ¿ximodo gudixhedxí Jehová ladxidóʼ ca judíu que?

¹³ Gudixhedxí Jehová ladxidóʼ ca judíu que ra bidiibe laacaʼ ti esperanza guizáʼ sicarú, peru laaca nánnabe zadxaagalucaʼ guendanagana ora mayaca guireecaʼ de esclavu. Maca guníʼ Jehová tiempu que ziuu ti rey ni zuni ganar ca guidxi ni nuu gaxha de guidxi Babilonia ne laaca zucaalube guidxi ca (Is. 41:​2-5). ¿Ñee napa ca judíu que razón para guidxíbicaʼ la? Stale iza ante guizaaca ni, maca guníʼ Jehová guicá ca diidxaʼ riʼ para quixhedxini ladxidóʼcabe: «Cadi guidxíbiluʼ purtiʼ nuaaniáʼ lii, cadi chuʼluʼ xizaa purtiʼ naa nga Dios stiluʼ» (biindaʼ Isaías 41:​10-13). ¿Xiñee guniʼbe «naa nga Dios stiluʼ»? Guniʼbe ni cadi para gusietenaláʼdxibe laacaʼ caquiiñeʼ guni adorarcaʼ laabe, sínuque para cadi guiaandaʼ laacaʼ qué zusaanabe de gacanebe laacaʼ (Sal. 118:6).

14. ¿Xi sti cosa biʼniʼ Jehová para gacané ca judíu que cadi guidxíbicaʼ?

¹⁴ Biʼniʼ Jehová sti cosa para gacané ca judíu que cadi guidxíbicaʼ. Bisietenaláʼdxibe laacaʼ qué gapa xquendabiaanibe ne poder stibe ra riluxe. Gunábabe laacaʼ guuyadxicaʼ guibáʼ ne gúdxibe laacaʼ cadi bizáʼsibe ca beleguí ca, sínuque nánnabe lá cada tobi de laacani (Is. 40:​25-28). Nga runi laaca nánnabe tu lá cada tobi de ca xpínnibe. Ne pa biquiiñebe poder stibe para guzaʼbe ca beleguí ca la? nánnanu laaca zanda iquiiñebe ni para gacanebe xquídxibe. Ni dxandíʼ nga qué gapa ca judíu que razón para guidxíbicaʼ.

15. ¿Xi biʼniʼ Jehová para gacané ca judíu que chuʼcaʼ listu?

¹⁵ Laaca gudxi Jehová ca xpinni xi naquiiñeʼ gúnicaʼ ti chuʼcaʼ listu. Lu ti capítulo ni zeeda lu libru stiʼ Isaías gúdxibe xquídxibe ca diidxaʼ riʼ: «Lachuu ndaaniʼ ca cuartu stitu ne laguseeguʼ puertaʼ stícani. Lagucachilú ti ratu dede ora gudiʼdiʼ xiana ca» (Is. 26:20). Zándaca primé biaje guca cumplir ca diidxaʼ riʼ nga dxi biʼniʼ ganar Ciro guidxi Babilonia. Ti historiador griegu láʼ Jenofonte, bizeeteʼ ora guyuu Ciro ndaaniʼ guidxi Babilonia, «gúdxibe ca soldadu stibe guuticaʼ ca ni nuu [fuera de ra lidxi]» (Ciropedia, traducción de Ana Vegas Sansalvador). ¡Nanna pabiáʼ bidxibi ca binni de Babilonia que yaʼ! Peru ca judíu ni bizuubaʼ stiidxaʼ Jehová bilacaʼ.

16. ¿Xiñee cadi naquiiñeʼ guidxíbinu ora guiníʼ íquenu zedandá dxi ziuu stale yuubaʼ o gran tribulación? (Laaca zanda gúʼyaluʼ imagen ca).

¹⁶ ¿Xi rizíʼdinu? Maʼ cadi candaa ziuu stale yuubaʼ lu Guidxilayú riʼ ne qué ziuu dxi chuʼ yuubaʼ casi laani. Ora guzulú guizaacani, stale binni zadxibi ne qué zadxélacaʼ xi gúnicaʼ. Peru laanu qué zuni sentirnu zacá purtiʼ nánnanu Jehová nga Dios stinu. Zandisaʼ íquenu né stale confianza purtiʼ nánnanu maʼ zedadxiña dxi gácanu libre (Luc. 21:28). Qué zusaana de gápanu confianza Jehová dede né ora gucaalú ti grupu de guidxi roʼ laanu. Zaquiiñeʼ Jehová ca ángel stiʼ para gapaʼ laanu ne zudiibe laanu instrucción para guilanu. ¿Ximodo zudiibe laanu ca instrucción ca yaʼ? Qué gánnanu ni. Zándaca zudiibe ni laanu ndaaniʼ ca congregación ra nuunu. Ne zándaca ca congregación ca nga gácacaʼ «ca cuartu» ra zanda guilanu. Pa racaláʼdxinu chuʼnu listu dxi ca la? caquiiñeʼ chuʼnu gaxha de ca hermanu, chinándanu ca instrucción ni gudii xquidxi Jehová laanu sin quicheruaanu ne chuʼnu seguru Jehová nga cayuni dirigir xquidxi (Heb. 10:​24, 25; 13:17).

17. ¿Xi caquiiñeʼ gúniluʼ para quixhedxí Jehová ladxidoʼloʼ?

¹⁷ Neca nagana modo bibani ca judíu que ndaaniʼ guidxi Babilonia peru gudixhedxí Jehová ladxidóʼcabe ora peʼ caquiiñecabe ni. Ne ngueca zúnibe né laanu. Nga runi intiica si guizaaca biyubi quixhedxí Jehová ladxidoʼloʼ. Biʼniʼ stipa guiníʼ íqueluʼ esperanza ni nápaluʼ casi ñaca maʼ cayuuyaluʼ ni. Ne cadi guiaandaʼ lii Jehová nga Dios stiluʼ nga runi cadi naquiiñeʼ guidxíbiluʼ.