¿Ñee naquiiñeʼ gusaana de gusayaʼ la?

¿Ñee cazaacaluʼ ni bizéʼtenu riʼ la? Pa zacá ni, ¿xi zacané lii gánnaluʼ pa naquiiñeʼ gusaana de gusaluʼ?

Ndaaniʼ caadxi guidxi rinábacabe ca binni ni maʼ huaniisi naquiiñeʼ guuyaʼ ti doctor laacaʼ ante cueecaʼ licencia sticaʼ sti biaje ti guihuinni pa zándaruʼ gusacaʼ. Ca xpinni Cristu rinándacaʼ ca ley ne ni maʼ gudixhe gobiernu gaca ndaaniʼ cada guidxi (Rom. 13:1). Peru ra tiica si nabézaluʼ nuu caadxi cosa ni zacané lii para gánnaluʼ pa caquiiñeʼ gusaana de gusaluʼ.

BIIYAʼ PA ZÁNDARUʼ GUSALUʼ

Ti organización ni ruuyaʼ ca binni huaniisi rinabaʼ laacabe guiníʼ íquecabe ca pregunta riʼ:

• ¿Ñee raca nagana para naa guuyaʼ ca señal de tránsitu o maʼ huaxiéʼ ruuyaʼ huaxhinni la?

• ¿Ñee raca nagana para naa guniibeʼ iqueʼ para guuyaʼ lu ca retrovisor la?

• ¿Ñee raca nagana para naa gaxhañeeʼ lu acelerador ne guxhatañeeʼ frenu ora málasi gueeda guizaaca xiixa la?

• ¿Ñee nanene peʼ rusayaʼ dede rucueezaʼ ca ni zeeda atrá de naa la?

• ¿Ñee huayuu biaje maʼ bilá nidxelasaaʼ tuuxa o nilayaʼ paxaraa?

• ¿Ñee maʼ bicueeza policía naa pur modo rusayaʼ la?

• ¿Ñee huacá bacaandaʼ naa laga zigusayaʼ la?

• ¿Ñee reeʼ xiixa medicamentu ni qué zanda gueʼ tuuxa ni rusá la?

• ¿Ñee riuu ca familia stinneʼ ne ca xhamiguaʼ xizaa gusayaʼ carru la?

Pa bicábiluʼ ya lu tobi o chupa de ca pregunta riʼ la? zándaca naquiiñeʼ gúniluʼ xiixa. Zándaca maʼ cadi naquiiñeʼ peʼ gusaluʼ, jmaruʼ si huaxhinni. Ne gatigá guníʼ ique pa zándaruʼ gusaluʼ. Zanda guinabadiidxaluʼ ti familia stiluʼ o ti xhamíguluʼ ximodo ruuyaʼ modo rusaluʼ o dede zanda guicaaluʼ ti cursu para gusaluʼ jma jneza ti cadi gacanaluʼ. Ne pa bicábiluʼ ya lu stale de ca pregunta ca, zándaca ni jma jneza nga maʼ cadi lica gusaluʼ.a

CA PRINCIPIU NI ZEEDA LU BIBLIA NI ZACANÉ LII GUICAALUʼ TI DECISIÓN

Zándaca qué rudiʼnu cuenta maʼ huaxiéʼ galán modo rusanu ne pur nga ni jma galán zanda gúninu nga maʼ cadi gusanu. Ne nabé nadá tema ca. Guidúʼyanu chupa principiu ni zeeda lu Biblia ni zacané lii gúʼyaluʼ xi cazaacaluʼ ne guicaaluʼ ti decisión jneza.

Gunna nuu cosa ni maʼ qué zanda gúniluʼ (Prov. 11:2). Ora maʼ ziniisinu maʼ huaxiéʼ rúʼyanu, huaxiéʼ runadiáganu, maʼ huaxiéʼ stipa nápanu ne maʼ nanene rúninu stale cosa. Nga runi, stale de ca binni ni maʼ huaniisi rusaana de gúnicaʼ xiixa deporte purtiʼ rudiicaʼ cuenta jma nagueenda zanda gacanacaʼ. Ne ngaca nga rizaaca né ca binni ni rusá carru: zándaca zedandá ora zudiʼnu cuenta maʼ qué zanda gúninu ni ne pur nga maʼ qué zusanu para cadi guizaacanu xiixa (Prov. 22:3). Ne pa guiníʼ tuuxa nuu xizaa pur laanu la? ni jma galán gúninu nga gácanu humilde ne gucaadiáganu laabe (bichaaga ni né 2 Samuel 21:15-17).

Qué racaláʼdxiluʼ guutiluʼ tuuxa (Deut. 22:8). Ora qué rusá ti binni jneza zanda guniná o guuti tuuxa. Ti binni ni rusá carru neca nanna maʼ qué zanda guni ni, riguu xquendanabani ra naxoo ne zaqueca xquendanabani xcaadxi binni. Ne pa gueeda gúnibe ti accidente ra gati tuuxa, zanda gudxiibacabe donda íquebe.

Pa caníʼ íqueluʼ gusaana de gusaluʼ, cadi guiníʼ íqueluʼ maʼ qué risácaluʼ. Guizáʼ nadxii Jehová lii pur ca cualidad ni nápaluʼ, nánnaluʼ nuu cosa ni maʼ qué zanda gúniluʼ, nácaluʼ humilde ne ruuyaluʼ cadi gacaná xcaadxi binni. Ne cayabi Jehová lii zacané lii ne zaguixhedxí ladxidoʼloʼ (Is. 46:4). Qué ziuu dxi gusaanabe lii. Zanda guyúbiluʼ laabe ne chuʼluʼ seguru zusiidibe lii ne zacanebe lii guiníʼ ique chaahuiluʼ para guicaaluʼ ti decisión jneza.