«Nabé risácaluʼ»

1, 2. ¿Xi zacané laanu chuʼnu seguru nabé risácanu para Jehová?

NABÉ rusisaca Jehová ca xpinni. Peru nuu de laacaʼ riníʼ íquecaʼ qué risácacaʼ. ¿Xiñee yaʼ? Zándaca purtiʼ huayuu tu huayuni menu laacabe ne huayabi laacabe qué risácacabe. Pa cayuni sentirluʼ zacá, ¿xi zacané lii chuʼluʼ seguru nabé risácaluʼ para Jehová yaʼ?

² Ti cosa ni zacané lii nga gúʼndaluʼ ca relatu ni zeeda lu Biblia ni rusihuinni ximodo racalaʼdxiʼ Jehová guni tratarnu xcaadxi. Jesús, Xiiñibe, biʼniʼ tratar binni né guendanachaʼhuiʼ ne respetu. Ra bíʼnibe zacá, laabe ne Bixhózebe, rusihuínnicabe nabé rusisácacabe ca binni humilde ne ca ni runi sentir huaxiéʼ risaca (Juan 5:19; Heb. 1:3). Lu artículo riʼ zadúʼyanu chupa cosa nabé risaca: primé, ximodo gucané Jesús binni guni sentircaʼ nabé risácacaʼ para Jehová, ne guiropa, xi zanda gúniluʼ para chuʼluʼ seguru laaca nabé risácaluʼ para laabe (Ageo 2:7).

XIMODO GUCANÉ JESÚS BINNI GUNI SENTIRCAʼ RISÁCACAʼ

3. ¿Ximodo biʼniʼ tratar Jesús ca binni de Galilea ni yeyubi laa?

³ Guionna viaje yeguni predicar Jesús ndaaniʼ guidxi Galilea, stale binni yeyubi laabe para gusiidibe laacaʼ ne gusiándabe laacaʼ. Biiyaʼ Jesús «guizáʼ maʼ gucanacaʼ ne nuucaʼ stúbicaʼ casi dendxuʼ ni qué gapa pastor» (Mat. 9:36; biiyaʼ ca nota de estudiu). Biiyaʼ ca xaíque yuʼduʼ que laacabe casi binni ni qué ganna ne ni qué risaca, ne rábicabe laacaʼ «qué iquiiñecaʼ» (Juan 7:47-49 ne nota de estudiu diidxastiá). Peru Jesús biʼniʼ tratar laacabe né guendanachaʼhuiʼ, purtiʼ gulee tiempu para gusiidiʼ ne gusianda laacabe (Mat. 9:35). Ne para gacanebe jma binni, bisiidibe ca apóstol stibe guni predicarcaʼ ne bidiibe laacaʼ autoridad para gusiándacaʼ guiráʼ clase guendahuará (Mat. 10:5-8).

4. ¿Xi rizíʼdinu de modo biʼniʼ tratar Jesús ca binni humilde?

⁴ Ra biʼniʼ tratar Jesús né guendanachaʼhuiʼ ne respetu ca binni ni rúnicabe menu laacaʼ, bihuinni, laabe ne Bixhózebe, rusisácacabe binni. Nga runi, pa cayúniluʼ ni ná Jehová peru runi sentirluʼ huaxiéʼ risácaluʼ la? cadi guiaandaʼ lii ximodo biʼniʼ tratar Jesús ca binni humilde ne ca ni biyubi guiziidiʼ de laa. Nga zacané lii gúʼyaluʼ nabé risácaluʼ para Jehová.

5. ¿Xi cazaaca gunaa ni biʼyaʼ Jesús ndaaniʼ guidxi Galilea?

⁵ Cadi pur grupu si bisiidiʼ ne gucané Jesús binni, sínuque laaca bizaaláʼdxibe cada tobi de laacaʼ. Casi ti biaje dxi canayuni predicarbe ndaaniʼ guidxi Galilea, biiyabe ti gunaa ni maʼ ziné 12 iza de caxii rini (Mar. 5:25). Pur guendahuará stiʼ gunaa riʼ, beeda gácabe ti binni nabiidiʼ, ne tutiica canaʼ laabe laaca zaca ti binni nabiidiʼ, nga runi zanda chuʼnu seguru huaxiéʼ si riuube lade binni. Ne laaca qué zanda chuʼbe lade binni para guni adorarbe Jehová ndaaniʼ sinagoga nin lu ca saa ni raca que (Lev. 15:19, 25). ¿Ñee riníʼ íqueluʼ pabiáʼ gucaná ne biuubaʼ ladxidóʼ gunaa riʼ la? (Mar. 5:26).

6. ¿Ximodo bianda xa gunaa ni caxii rini que?

⁶ Ni racalaʼdxiʼ gunaa riʼ nga gusianda Jesús laa, peru qué ninábadibe ni Jesús. ¿Xiñee yaʼ? Zándaca purtiʼ guizáʼ catuí lube pur guendahuará ni nápabe que. O zándaca cadxíbibe tindené Jesús laabe purtiʼ nácabe ti binni nabiidiʼ ne guyuube lade ca binni que. Ngue runi gudáʼnabe xhaba Jesús, purtiʼ nápabe fe ziándabe pa cánasibe xhaba Jesús (Mar. 5:27, 28). Ne dxandíʼ ni: ¡zeʼ guendahuará que! Óraque gunabadiidxaʼ Jesús tu gudaʼnaʼ laa, para gudxi gunaa que laabe laa gudaʼnaʼ laabe. ¿Xi biʼniʼ Jesús yaʼ?

7. ¿Ximodo biʼniʼ tratar Jesús xa gunaa que? (Marcos 5:34).

⁷ Biiyaʼ Jesús «guizáʼ cadxibi ne cayacaditi» gunaa que, ngue runi guníʼnebe laa né stale cariñu ne respetu (Mar. 5:33). Dede gúdxibe laa «xiiñeʼ», ra biquiiñeʼ Jesús diidxaʼ riʼ bisihuinni nachaʼhuiʼ ne nadxii binni (biindaʼ Marcos 5:34). Lu nota de estudiu para diidxaʼ ca cusiene: «Ndiʼ si nga biaje riete gudxi Jesús ti gunaa “xiiñeʼ”. Zándaca bíʼnibe ni purtiʼ biiyabe cayacaditi gunaa que». ¡Nanna pabiáʼ gutadxí ladxidóʼ gunaa que yaʼ! Guníʼ ique xi nizaaca pa nidindené Jesús laabe. Ñándabe, peru zándaca guizáʼ feu ñuni sentirbe. Ngue runi, qué nusianda si Jesús laabe, sínuque laaca gucané laabe guiénebe ti cosa: guizáʼ nadxii Bixhózebe ni nuu guibáʼ laabe.

8. ¿Xi guendanagana bidxagalú ti hermana de Brasil?

⁸ Tiempu riʼ, laaca nuu caadxi xpinni Dios ni napa xiixa guendahuará ni rucaa laacaʼ chuʼcaʼ triste o guni sentircaʼ qué risácacaʼ. Guidúʼyanu ni bizaaca ti precursora regular de Brasil ni láʼ Renata.a Gúlebe sin ñeebe ne sin nabe ladu bigaʼ. Laabe guniʼbe: «Nabé biʼniʼ búrlacabe naa ra scuela ne gúdxicabe naa apodo feu. Nuu biaje dede né ca familia stinneʼ bicaacaʼ naa guneʼ sentir qué risacaʼ».

9. ¿Xi gucané Renata guni sentir nabé risaca?

⁹ ¿Xi gucané Renata guni sentir nabé risaca? Ora gúcabe testigu stiʼ Jehová, ca hermanu de congregación nabé guluucaʼ gana laabe né stale cariñu ne gucanecaʼ laabe gúʼyabe laabe cásica ruuyaʼ Jehová laabe. Laabe guniʼbe: «Pa ñuneʼ ti lista ra nucaaʼ lá guiráʼ ca binni ni huayacané naa, ¡qué niluxegaʼyaʼ! De guidubi ladxiduáʼ rudieeʼ xquixe peʼ Jehová purtiʼ bisigaʼdeʼ naa ti familia espiritual nabé sicarú». Pur guiráʼ ni bíʼnicabe para gucanécabe Renata, biene nabé risaca nezalú Jehová.

10. ¿Xi guendanagana gupa María Magdalena? (Laaca zanda gúʼyaluʼ ca imagen ca).

¹⁰ Guininu de sti binni ni gucané Jesús, laabe nga María Magdalena. Guyuu gadxe demonio lu xcuérpube (Luc. 8:2). Zándaca rucaa ca demonio que laabe gúnibe cosa ni ruchibi binni, ngue runi ruxooñelúcabe de laabe. Tiempu cazaacabe ngue, zándaca biʼniʼ sentirbe nuube stúbibe, guirutiʼ tu gapa laabe ne guizáʼ cadxíbibe. Ruluíʼ si gulee Jesús ca demonio que lu xcuérpube ne bizulú yenándabe Jesús né stale fe. Zacá gucanebe gunaa que guʼyaʼ nabé risaca nezalú Dios. Peru cadi nga si nga ni bíʼnibe pur laa.

11. ¿Ximodo gucané Jesús María Magdalena guʼyaʼ nabé risaca nezalú Jehová? (Laaca zanda gúʼyaluʼ ca imagen ca).

¹¹ Biʼniʼ invitar Jesús María Magdalena chiguni predicarné laacabe ndaaniʼ ca guidxihuiiniʼ que.b Ne pur ngue, laapebe bicaadiágabe ni zigusiidiʼ Jesús. Laaca bihuinni Jesús nezalube dxi biasa de lade gueʼtuʼ; laabe nga tobi de ca primé binni ni guniʼné Jesús. Ne gunabaʼ Jesús laabe chitídxibe ca apóstol stiʼ maʼ biasa de lade gueʼtuʼ. Sicaríʼ gucanebe gunaa riʼ guʼyaʼ nabé risaca nezalú Jehová (Juan 20:11-18).

12. ¿Xiñee guníʼ ique Lidia qué risaca?

¹² Cásica María Magdalena, yanna riʼ nuu stale binni runi sentircaʼ qué risácacaʼ purtiʼ rucaanáʼ xcaadxi laacaʼ. Ti hermana de España láʼ Lidia guníʼ, dxi nacaxiiñiʼ jñaa laa, guníʼ ique nutiidixiiñiʼ laabe. Ne neca qué ñuni jñaabe ni, peru rietenaláʼdxibe maca dede dxi nahuiinibe qué rizaalaʼdxiʼ jñaabe laabe ne rabi laabe diidxaʼ feu. Laaca guniʼbe: «Siempre biyubeʼ gannaxhii xcaadxi binni naa ne gacaʼ xhamiguaʼ laacaʼ, peru guníʼ iqueʼ qué zanda guizaaca ngue purtiʼ pur guiráʼ ni biʼniʼ jñaaʼ naa guníʼ iqueʼ nacaʼ ti binni malu ne qué runeʼ merecer gannaxhiicabe naa».

13. ¿Xi gucané Lidia guiene nabé risaca nezalú Jehová?

¹³ Bichaa xquendanabani Lidia dxi bizulú caziidiʼ de lu Biblia. Nabé biʼniʼ orarbe, biindabe Biblia ne biʼniʼ sentirbe nadxii ca hermanu laabe, nga gucané laabe guiénebe nabé risácabe nezalú Jehová. Laabe guniʼbe: «Gatigá rabi xheelaʼ naa nabé nadxii naa ne siempre rusietenaláʼdxibe naa ca cualidad galán ni napaʼ. Laaca napaʼ xhamiguaʼ ne xhamigaʼ ni nabé nadxii naa ne laaca runi tratarcaʼ naa cásica runi xheelaʼ ni». Cásica Lidia, ¿ñee nuu tuuxa ndaaniʼ congregación stiluʼ ni caquiiñeʼ gacanécabe laa guiene nabé risaca nezalú Jehová la? ¿Xi zanda gúniluʼ pur laabe yaʼ?

XI ZANDA GÚNILUʼ PARA GÚʼYALUʼ LII MODO RUUYAʼ JEHOVÁ LII

14. ¿Xi rusiidiʼ 1 Samuel 16:7 laanu de modo ruuyaʼ Jehová ca cosa ca? (Laaca zanda gúʼyaluʼ cuadru ni láʼ «¿Xiñee nabé rusisaca Jehová ca xpinni?»).

¹⁴ Cadi guiaandaʼ lii gadxé modo ruuyaʼ Jehová ca cosa ca de modo ruuyaʼ binni cani (biindaʼ 1 Samuel 16:7). Para binni la? ti binni risaca nga tuuxa ni rihuinni galán, ni napa bueltu o ni guzáʼ scuela roʼ, peru cadi zacá diʼ riníʼ ique Jehová (Is. 55:8, 9). Nga runi, ora guiníʼ íqueluʼ pa risácaluʼ o pa coʼ, biiyaʼ ca cosa ca modo ruuyaʼ Jehová cani. ¿Xi zacané lii yaʼ? Biindaʼ ca relatu ni zeeda lu Biblia ni caníʼ de ca binni ni biʼniʼ sentircaʼ qué risácacaʼ, casi Elías, Noemí ne Ana, ne biiyaʼ chaahuiʼ ximodo bisihuinni Jehová rusisaca laacabe. Laaca zanda gucaaluʼ ca biaje maʼ biiyaluʼ maʼ bisihuinni Jehová guizáʼ nadxii ne rusisaca lii. Sti cosa ni zanda gúniluʼ nga guyúbiluʼ información lu ca publicación stinu ni caníʼ de ora runi sentir binni huaxiéʼ risaca.c

15. ¿Xiñee gudxi Jehová Daniel «Nabé risácaluʼ»? (Daniel 9:23).

¹⁵ Cadi guiaandaʼ lii rusisaca Jehová lii purtiʼ cadi caxéleluʼ de laa. Dxi napa profeta Daniel biaʼ 100 iza, ti biaje biʼniʼ sentirbe nabé maʼ bidxágabe ne maʼ careebe gana (Dan. 9:20, 21). ¿Xi biʼniʼ Jehová para guluu gana laabe yaʼ? Biseendaʼ ángel Gabriel para gabi laabe maʼ bicaadiaga ca oración ni bíʼnibe ne gudxi laabe: «Nabé risácaluʼ» (biindaʼ Daniel 9:23). ¿Xiñee nabé gunnaxhii Jehová laabe yaʼ? Pur ca cualidad ni gúpabe, bisihuínnibe guendarannaxhii, bíʼnibe ni jneza ne qué nixélebe de laa (Ezeq. 14:14). Bisaana Dios relatu riʼ lu Stiidxaʼ para quixhedxí ladxidoʼno (Rom. 15:4). Cásica bicaadiaga Jehová Daniel, gunna dxichi laaca rucaadiágabe ca oración stiluʼ ne rusisácabe lii purtiʼ rúniluʼ ni jneza ne cadi caxéleluʼ de laabe (Miq. 6:8, ne ca nota; Heb. 6:10).

16. ¿Xi zacané lii gúʼyaluʼ Jehová casi ti padre ni nadxii lii?

¹⁶ Biʼniʼ stipa gúʼyaluʼ Jehová casi ti padre ni nadxii lii. Cadi cayuuyaʼ diʼ Jehová ra cucheeluʼ, ni racaláʼdxibe nga gacanebe lii (Sal. 130:3; Mat. 7:11; Luc. 12:6, 7). Ora riníʼ ique ca binni ni runi sentir huaxiéʼ risaca ni bizéʼtenu riʼ, racaneni laacaʼ guni sentircaʼ jma galán. Guidúʼyanu ni bizaaca Michelle, ti hermana de España. Cumu nabé xadxí biʼniʼ huantarbe guiráʼ diidxaʼ feu ni rabi xheelabe laabe la? biʼniʼ sentirbe qué risácabe ne guirutiʼ cadi nadxii laabe. Sicaríʼ guniʼbe: «Cada biaje runeʼ sentir qué risacaʼ, runeʼ stipa guiníʼ iqueʼ nuaaʼ ndaaniʼ ná Jehová ne rusihuinni nadxii naa ne cayapa naa» (Sal. 28:9). Ne Lauren, ti hermana de Sudáfrica, guníʼ «Pa bichiña Jehová naa ra nuu né guendarannaxhii, pa huayacanebe naa cadi guixeleʼ de laabe ne pa huaquiiñebe naa para gusiideʼ xcaadxi la? nga riníʼ rusisácabe naa ne rudiibe lugar gacaniáʼ laabe» (Os. 11:4).

17. ¿Xi zanda gacané lii ganna dxíchiluʼ riuulaʼdxiʼ Jehová ni rúniluʼ? (Salmo 5:12; laaca zanda gúʼyaluʼ imagen ca).

¹⁷ Gunna dxichi riuulaʼdxiʼ Jehová ni cayúniluʼ (biindaʼ Salmo 5:12). David guníʼ ora riuulaʼdxiʼ Jehová ni runi tuuxa, reeda gácani casi ti escudu naroʼbaʼ ni rapa laa. Pa nuuluʼ seguru riuulaʼdxiʼ Dios ni rúniluʼ ne cayacanebe lii, nga zapa lii ora guiníʼ íqueluʼ qué risácaluʼ. ¿Ximodo zanda gánnaluʼ pa cayechené Jehová lii yaʼ? Casi maʼ bidúʼyanu, lu Stiidxabe rábibe lii dxandíʼ nadxiibe lii. Ne laaca riquiiñebe ca ancianu, ca xhamíguluʼ ne xcaadxi hermanu para gusietenaláʼdxibe lii nabé risácaluʼ para laabe. Peru ¿xi naquiiñeʼ gúniluʼ ora cuʼ tuuxa gana lii yaʼ?

18. ¿Xiñee naquiiñeʼ gudiiluʼ lugar cúʼcabe gana lii?

¹⁸ Pa gabi ca binni ni runibiáʼ ne nadxii lii cosa galán de lii, cadi guiníʼ íqueluʼ cadi dxandíʼ ni cayábicabe lii. Guníʼ ique caquiiñeʼ Jehová ca binni ca para gabi lii riuulaʼdxiʼ ni cayúniluʼ. Michelle, hermana ni maca bizéʼtenu que, guníʼ: «Neca raca ni nagana para naa, chaahuiʼ chaahuiʼ caziideʼ guneʼ cré ca diidxaʼ ni rábicabe naa para cúʼcabe gana naa, purtiʼ nannaʼ racalaʼdxiʼ Jehová guicaaʼ cani». Laaca cayacané ca ancianu laabe né stale cariñu, ne yanna maʼ nácabe precursora ne nácabe voluntaria Betel.

19. ¿Xiñee zanda chuʼluʼ seguru nabé risácaluʼ nezalú Jehová?

¹⁹ Né stale guendarannaxhii bisiidiʼ Jesús laanu nabé risácanu nezalú Bixhózenu ni nuu guibáʼ (Luc. 12:24). Nga runi zanda chuʼluʼ seguru nabé risácaluʼ para Jehová. ¡Qué chuʼ dxi gusiaandaluʼ nga! Ne biʼniʼ guiráʼ ni nuu lu naluʼ para gacaneluʼ xcaadxi gúʼyacaʼ nabé risácacaʼ nezalú Jehová.