Bawene Ati

MO BINGO gi rago re! Nangba bibi agu ahe du rogoho! Mo bingo gu nvuo na angua na ambumbudo na agu anya dunduko du ane. Mo yugungo mbarã gbiati bahu dagba agi anya re?

Da nakusi gi bawene ati re? Mbori du nakusihe. Ani bingo wai Mbori asa kpotosende si du ni wenehe tipa rani.

Ni bambatapai, Mbori akusi nvuo. Na ko ki kusi ngbatunga rukutu angua na kurukuru ahe dunduko. Gi kurukuru ahe re nasa kpotosende si du ni wenehe. Ono agu ahe re ­namanga dungu apai susi gu nga ka sa kpotosende ni wenehe. Dungu agu ahe re nafu riahe furani nga gu ani araka mbikoho, na Mbori ambakadi agu ariahe re si du ni wenehe ngbaseyo.

Kusa, Mbori akusi atĩo ami niguzo ime yo na azire ami nigu ariyo. Ko akusi aango na apusu na afarasi; kikindigi anya na rukutu ra. Gini anya mo naini ra? Ya mo rago angbanga tirani ka bi gupai nga Mbori akusi agi ahe re tipa rani te?

Ni yangaraha, Mbori ambakadi gu kura papara kpotosende ni bawenehe kisusi. Ko ayambu rimo gi ba re nga ati Edene. Agu ahe naadu rogoho dunduko adu ni bawenehe. Agu apai naadu tipaha dunduko adu ni bawenehe. Na Mbori aaida gupai nga kpotosende naabaha da ni bawenehe wakina ati Edene.

Ono mo bingo gu sura ati re berewe. Mo ini gu he Mbori abihe nga si nakpa koyo? Ani bingoho.