Gupai I Akusiyo ti ni Rogo Kpuyo

MO BINGO gupai namanga awere. I ima kusa aAdamu na Eva ati Edene yo. Mo ini nduhe?

Bambiko i amangi gupai naadu ni gbegberẽhe gbe. Si du Yekova afu mbusa ti ni fuyo. Mo ini gu gbegberẽpai aAdamu na Eva amangihe?

I amangi gupai Yekova aya fuyo ka i mangingo ho ya. Mbori aya fuyo i niri zuzu agu angua ari du ati yo. Ono ngua adu sa dagba agu angua re Mbori aya fuyo ka i ringa ha ya, ka i rihe i akpi akpi. Mbori aakusanga gu ngua re tipa i ri zuzuhe te. Na ani ima ino gupai nga si ni gbegberẽpai ka dia gu he nga ga boro ní ayanga furani ani dihe ya. Ono ginipai namangi?

Rogo kura uru sa ho Eva adu ni nisari ati yo, woo afura furi. Mo bingo gupai re! U aya fu Eva wẽ, ri ri zuzu gu ngua Mbori aya fuyo ka i ringa ha ya. Ono tie, ho Yekova akusi woo ni ko aakusanga ru u nifura te. Gure tie nga kura boro kinaho nasa gupai nga gu woo re naafura. Da du nangia gu boro re?

Anga Adamu naadu te. Ono ní angia boro sa dagba agu aboro Yekova akusiyo mbata fu ko kusi kpotosende. Agu aboro re nga amaraika ka ani abingo yo ya. Gu maraika re ada ni boro rukö. Ko atona ka berã gupai nga si naida ko du ni bazogo wakina Mbori a. Na ko aaida gupai nga aboro nigisangbako kuba giasangba Yekova. Ko nga gu maraika nasa woo u fura.

Gi maraika re aima nanga Eva. Ho ko ayani furi ri nika da wakina Mbori ka ri ri zuzu gu ngua re, ri aima ida kuti gupai re. Ri ari zuzu gu ngua re, ki ndu na gu fu Adamu ko ki rihe a. Adamu na Eva abasasangba Mbori, si du nga ndu gupai Mbori akusiyo ti ni kusayo rogo bawene kpuyo.

Ono regbo kinaho Mbori nika sa kpotosende dunduko wakina ati Edene. Ani nika wirikapai kusa tipa wai rengbe mo ka koda tiro kuti sa kpotosende wa ati Edene. Ono awere tie, ani bingo gupai namangi tipa aAdamu na Eva.