Mbori Aundo Bakindo Izikiya

YA MO mo ini gupai gi kumba re akpara ti ni fu Yekova? Tipagine ko nagbaragi agi awaraga re ti ni barangba ga Yekova bamotumo? Rimo gu kumba re nga Izikiya. Ko nga bakindo gu kindo nga ga aYisaraere naadu na atunga rogoho ue. Na ko rogo bakere kpakarapai. Tipagine?

Bambiko agu aborovura nga ga aAsuro yo ima gbarasa gu kindo nga ga aYisaraere naadu na atunga rogoho 10. Yekova ambu gipai re si mangi bambiko agu aboro re aima sa tiyo ni bagbegberẽ aboro. Na awere tie, agu abanzengere nga ga aAsuro yo ima ye ka sovura kuti gu kindo naadu na atunga rogoho ue.

Bakindo aAsuro akedi awaraga fu Bakindo Izikiya. Gere nga agu awaraga Izikiya nagbaragihe barabangiri Mbori re. I asawia Yekova rogo agu awaraga re, na kini ya fu Izikiya ko fu tiko ku beyo. Si du Izikiya akpari ti ni ki ya: ‘Ako Yekova, mo batasi rani be bakindo aAsuro. Arikaaboro dunduko ki inihe ya mo nga Mbori.’ Ya mo Yekova agi ga Izikiya kpee?

Izikiya angia wene bakindo. Ko aadunga wa agu abakindo naadu rogo gu kindo naadu na atunga rogoho bawe te, watadu ka du wa gbegberẽ bako nangia Aza te. Izikiya anaairisa ga Yekova arugute dunduko. Fuo nyasa Izikiya kpee, gu nebi nangia Yesaya akedi sangba Yekova fuko ki ya: ‘Bakindo aAsuro ayengo ku Yerusarema yo te. Gako banzengere ho nika mbeda na ni a te. I azumongo guanza sa kuti gu bakporo re a te.’

Mo bingo gu sura du ti gi kpewaraga re. Mo ini ada duku akangbayo re? Akangba agu abanzengere nga ga aAsuro yo du. Yekova akedi gako maraika ko ki imi abanzengere nga ga aAsuro yo rogo bangisa yuru sa nga 185,000. Bakindo aAsuro agunde ki ga ku kpuko yo.

Gu kindo nga ga aYisaraere re abati, na aboro ki raki rogo zereda tipa bete regbo. Ono fuo kpi Izikiya, wiriko nangia Manase ada ni bakindo. Manase angia gbegberẽ bakindo, na kinawo a gu wiriko naadu fuoko nangia Amona adu. Ringara ahi berewe be gbegberẽ apai na zuu. Ho ga Bakindo Amona amoyambu aimiko ni, wiriko nangia Yosiya ada ni bakindo kubako.