Maraika Aye ka bi Maria

GI BAWENE dee re rimori nga Maria. Ri angia Yisaraere naaraka rogo gu wiri gbata nangia Nazareta. Mbori aima ino gupai nga ri angia bawene boro. Si du ko akedi gu maraika ti ni nga Gaburere ko ye ka fura na ri. Ya mo mo ini gupai Gaburere aye ka pehe fu Maria? Ani bingoho.

Ho Gaburere ada ni fuo Maria, ko afu sene furi ki ya: ‘Sene foro, mo nga bawene dee. Yekova gu du na mo.’ Maria aabingo gu kumba re mbata te. Gi sene re airiwo airiwo tiri bambiko ri aainongo gupai nzunzu gu kumba re agumbaha te. Ono Gaburere adi gari gunde kusayo nibasa.

Ko aya fu Maria: ‘Ka mo gundenga ya. Rago ima ngba ti Yekova na mo gbe. Si du ko nika manga iiriwopai ti ni foro. Mo nika vunga gude fuo regbo tooni. Na mo ki yambu rimoko nga Yesu.’

Gaburere andu ku mbatayo na fugo niya: ‘Gi gude re nika du ni bakere boro, i nika ya tiko Wiri Mbori Nga Bahe Kisusi. Yekova nika maa ko ni bakindo, a wa Davide adu. Ono Yesu nika du tigako ni bakindo nyeanye kindi, na gako zogarago adigongo te!’

Maria ki sanahe ki ya: ‘Ka agi apai re wiripa manga wai? Kumba ata dianga re te. Mi nika ru wai ka du na gude wa mi ata pingo pati kumba ya?’

Gaburere ki karagaha ki ya: ‘Ga Mbori ome nika ye kuriro. Si du i nika yamba guko mo nika vunga ko ti ni nga Wiri Mbori.’ Ko ki ru ki ya fu Maria: ‘Mo berẽnga pa gumero nga Erizabeta. Aboro naaya wẽ ri ima gbinza ki go ba vungu. Ono fuo regbo tooni, ri nika vunga kumbagude. Gupai si aida mo inihe nga, pai ho rengbe ka gasa Mbori te.’

Maria ki ya: ‘Ga Yekova kanga nga mi! Si mangi fere a wa gumba mo ho.’ Maraika ki guari pati ri ki ga.

Maria ki guari ni ipo ka ndu ka bi Erizabeta. Ho Erizabeta agi fugo Maria ni, gu gude naadu vuriyo agu kuari na ngbarago. Ziazia toro ki ukadi Erizabeta, ri ki ya: ‘Mo nga demaku dagba adee.’ Maria araki fuo Erizabeta tipa adiwi wa biata ri ki karaga tiri ku Nazareta yo.

Ti gu regbo maraika aye fuo Maria re, kumba nangia Yosefa aima pazua ri. Ono ho Yosefa agi gupai ni nga Maria nika vunga gude, ko abihe nga si aidanga ko di ri te. Ga Mbori maraika ki ya fuko: ‘Ka mo gundenga ti dia Maria ni diaro ya. Bambiko Mbori du moi gude ku vuriyo.’ AMaria na Yosefa ki rogotiyo, i kini sungudi gu regbo ri nika vunga Yesu.