I Asopo Setefano Na Ambia

GU KUMBA nugo ane re nga Setefano. Ga Yesu ruru bawiriki du nga ko. Ono mo bingo gupai namanga re! Akumba nasopa ko na kikindigi ambia. Tipagine sogoyo Setefano ti ni ni kerehe si ki da ti gupai nga i mangingo ko gbegberẽ wa gure? Ani bingo nduhe.

Mbori asa Setefano ko mangi bakere iiriwoapai. Rago aangbanga ti agu akumba re na gupai re te, na i atona ka tikango na ko nibipa yugoko rengo fu aboro. Ono Mbori afu bakere tatamana fu Setefano, ko ki yugu gupai nga agi akumba re aayugo ziree fu aboro. Gipai re asayo i zingi azinga ­berewe gbe. Sidu, i azi Setefano, ki yambu aboro i ye ka gumba aziree kutiko.

Gbiamotumo asana Setefano ki ya: ‘Rengo du nga agi apai i agumbaha kutiro re?’ Setefano akaragapai ni gumbako dungu apai fuyo rogo Ziazia Kekeapai. Ti digido gako fugo, ko apepa wai fuyo gbegberẽ aboro asogo ga Yekova anebi mbata kusayo. Fuoho, ko ki ya: ‘Oni wakina gu gbegberẽ aboro re. Oni aimi ga Mbori moyambu nangia Yesu, na oni airisanga ga Mbori andiko te.’

Gipai re aba bakere zinga ti agu abarumbatayo rogo pambori re. I atona ka ri ngba rindiyo be imisiringbaduse. Ono Setefano angere ku ariyo, ki ru ki ya: ‘Oni ngere! Mi bi Yesu ko naru pati kumbabe Mbori ngbangbaturũ yo.’ Ho agi akumba re agi gipai ni re, i akisi atuyo na abeyo ki oro fuo Setefano. I ki ziko ki gbe ko kusayo bakporo yo.

I auru gayo abaukadi ki fuhe fu paranga rimoko angia Saura ko nibandaha. Ya mo mo nabi Saura? Fuoho, kura agi akumba re ki tona ka sopoda Setefano na ambia. Setefano akuku sande, ki kpari fu Mbori niya: ‘Yekova, ka mo funga mbusa fuyo tipa gi gbegberẽpai re ya.’ Ko aima ino gupai nga kura aboro kinaho dagba aguyo naasopoda ko re abarumbatayo rogo pambori aima nanga yo. Fuoho, Setefano ki kpi.

Ho boro amanga ro ni na gbegberẽpai, ya mo mo naaida ka manga funi gbegberẽ a, watadu ka sana Mbori ko mangi ní gbegberẽ? Si nga gupai Setefano watadu Yesu amangihe te. Sinoyo angba angba fu agu aboro namangiyo gbegberẽ. Si naida ani wiriki gayo kpiapai.