Vovo Paradizo Auru Kpotosende

MO BINGO gu gbangagbanga angua re, na gu wene ambumbudo na abaagangara re. Ati si ima ngba gbe? Mo bingo wai nzungba ari he kpabe gu gude yo re. Na mo bingo abahu na afarasi wa ami narundu ati yo. Ya mo mo na nyemu ka raka rogo bawene rago wa gure?

Mbori naida mo raki nyeanye kindi auru kpotosende rogo paradizo. Na ko aidanga mo du na gu igirã gbiati mbugo namanga aboro areme te. Gere nga gu kidohe Ziazia Kekeapai afuhe fu agu aboro nika raka rogo vovo paradizo: ‘Mbori adu na yo. Kpio adunga berewe na kpee na igirã te. Kuruapai ima go kusayo.’

Yesu nika sa agi apai re dunduko si mangi. Mo ini gu regbo si nika manga? Si nika manga fuo dia ko gbegberẽ apai na gbegberẽ aboro dunduko kusayo auru kpotosende. Mo tingidi gupai nga, ho Yesu adu ni sende no, ko ahusi aboro be dungu ngbatunga akaza, na ki zingisi kpikpi aboro a be kpio. Ko amangi agi apai re tipa ka yugo gupai ko nika mangaha auru kpotosende ho ko nika da ni ni bakindo.

Mo berẽnga pa wai raka nika ngba rogo gu vovo paradizo naye! Yesu gbiati gu kura aboro ko nasia yo nika sungo ngbangbaturũ yo kini zogorago ku sende no. Agi abazogo re nika ngerafuo aboro dunduko sende no na kini sayo i raki na ngbarago. Ani bingo gupai si aida ani mangihe tipa Mbori fu nyenye unga furani rogo gu vovo paradizo naye re.