Gupai Ka Ani Mangihe Ka Raka Nyeanye

YA MO mo ini rimo gu kitabu gu tooni degude re agedaha na anakureari? Ii, kina boro gi kitabu re du​—⁠Gimi Kitabu Apangbanga Nga ga Ziazia Kekeapai. I nageda kina boro gi yangara pangbanga re​—⁠“Gupai Ka Ani Mangihe Ka Raka Nyeanye Kindi.”

Ya mo mo ini gupai i awirikaha? Bambataha nga, si naida ani inipai tipa Yekova na Wiriko nga Yesu ka ani aida ka raka nyeanye kindi. Ziazia Kekeapai naya: ‘Gene nyenye unga nga gere. Nga wirikapai tipa bangisa ndikidi Mbori, na guko ko akedi ko ku sende no, nga Yesu Kristo.’

ai rengbe ani ka wirikapai tipa Yekova Mbori na Yesu Kristo? Gene sa dagba agu akuraha nga geda Gimi Kitabu Apangbanga Nga ga Ziazia Kekeapai tona ti tonatonaha ki da ti digidoho. Si nagumba badungu apai tipa Yekova na Yesu, ya mo ziree du? Na si nagumba badungu apai tipa agu apai i amangihe na gu i nika mangaha. Ono kura apai kinaho berewe si aida ani mangihe fuo gu nga geda gi kitabu re.

Ya mo mo bi gu kura buku du sande re? Ziazia Kekeapai du. Ka si du nga mo ainongo gedapai te, mo sana boro ní gedi agu apapara Ziazia Kekeapai foro i adi agu apangbanga du rogo gi kitabu re rogoho. Ziazia Kekeapai nagumba agu apai furani dunduko si aida ani inihe tipa ka iriso Yekova ngba wene gene na ki gbia nyenye unga. Si du si aida ani naagedaha ti ni na kini berẽkuriihe dedede.

Ono anga wirikapai tipa Yekova Mbori na Yesu Kristo nga gu yangarapai si aidaha te. Ani rengbe arengba ka ino badungu apai tipa yo, ono ani ki zanga nyenye unga azanga. Ya mo mo ini gu kurapai si aidaha berewe?

Si naida ani naaraka ringbisihe kuti agu apai ani awirikaha. Ya mo mo natingidapa Yuda Keriota? Ko adu dagba agu aboro naadu 12 Yesu asiayo ni gako amokedi. Yuda aima ino badungu apai tipa Yekova na Yesu. Ono ginipai namangi tipa ko? Fuo bete regbo, ko asatiko ni gbegberẽ boro ki kusi Yesu fu avurako tipa rukutu marã feda 30. Yuda agbianga nyenye unga te.

Ya mo mo natingidapa Geazi, nga gu kumba ani agedi pako rogo namba 69 pangbanga? Ko akpinyemu kadu na agu aroko beko gbiati marã naangianga gako ya. Sidu, ko andu ki gumba ziree tipa ka gbia agi ahe re. Yekova afu mbusa fuko tipa gipai re. Na ka ani airisanga gako andiko ya, ko fu mbusa afu furani a.

Ono dungu wene aboro duho a nga aguyo naadu ni ruruyo fu Yekova. Si naida ani du wa yo a. Gu gude nangia Samuere nga bawene kpiapai furani. A wa ani abihe rogo gu pangbanga nga namba 55, garãko adu gbua biama watadu bisue ho ko atona mangasunge ni fu Yekova rogo gako banye yo. Ka mo vura du ni tooni ro kina wai vurũ, mo rengbe arengba ka mangasunge fu Yekova.

Ono gu boro si aida ani pekefuo gani kpiapai gbe nga Yesu Kristo. A wa ani abihe rogo namba 87 pangbanga, zavura ho Yesu adu ni ni tooni gude, ko asungu yekaru yo kini fura fu aboro tipa gu Bako du ngbangbaturũ yo. Ani pekefuo gako kpiapai. Ani pekenga pa gaani bawene Mbori nga Yekova na Wiriko nga Yesu Kristo fu aboro wenengai a wa rengbe omerani na ni. Ka ani amanga agi apai re, ani raki araka nyeanye kindi rogo gu vovo paradizo nika du auru kpotosende.