Abakurea Mbori Nane Gupai Duni Gbegberẽhe

Satana naˈasada aboro i mangi gbegberẽ apai. Gu boro naida ka duni bakurea Mbori, si naida ni sogo gupai Yekova asogaha. (Atambuahe 97:10) Bete apai gere nga gu abakurea Mbori ambuhe:

Gu ingaapai nga ga kodaba. “Ka mo mángi nga bari ya.” (Gate 20:14) Manga kodaba mbata fu rogatise ni kina irairaha a.​—1 AKorindo 6:18.

Kpibuda. “Akpibuda . . . adía nga kumbo ga Mbori ngbi te.”​—1 AKorindo 6:10.

Imo Boro, Bagude Vuseyo. “Ka mo ími nga boro ya.”​—Gate 20:13.

Dĩ. “Ka mo dí nga he ya.” ​—Gate 20:15.

Ziree. Yekova nasoga “gu mirãse nare zire.”​—Asanza 6:17.

Zuu Gbiati gu Zinga Adunga Bazaha Tini Ya. “Mbisimoko [Yekova] nasoga airazuu.” (Atambuahe 11:5) “Agu apai borose amanga [nakoda] . . . azinga.”​—AGaratio 5:19, 20.

Baake. ‘Ka oni kódi nga tironi na boro ngbaduse ya.’​—1 AKorindo 5:11.

Sogote nga ga Angbatunga. “Oni kpí nyemu avuraroni, ki kpari tipa aguyo narungosi roni.”​—Matayo 5:43, 44.

Agu apai Mbori apehe fu rani si tipa undo rani. Si dedede ni taatapai ka mbu manga gbegberẽ apai te. Mbiko gu undo nga ga Yekova na mbiko gu undo nga ga gako aDezire, mo rengbe arengba ka mbu manga agu apai nafu gberãrago fu Mbori.​—Yesaya 48:17; AFiripoio 4:13; AEbere 10:24, 25.