Gu Waraga Naye be Riigbu Bipasunge

Wene Akpinyemu Yekova:

Yesu aya: “Oni aína rengo aina, ki ra ni rironi be rengo.” (Yoane 8:32) Nga gu wene afugo ngarasaro! Si taata ka ino rengo, zavura ti gi “kusa rago” ziree namoipai ti ni re. (2 Timoteo 3:1) Ya mo mo natingida gu bambata regbo mo agi rengo i nisakihe rogo Fugo Mbori yo? Si adu foro ni bawenepai kisusi!

Ono tie, ki nawai nyakipa gbia gu ndikidi inohe nga ga rengo furani na pa gumbapaha fu kura aboro, kinawo a si aida ani mangipai ringbisihe kuti rengo. Tipa ani mangihe wo, si naida ani banda tirani rogo ga Mbori nyemuse yo. Bandatise rogo ga Mbori nyemuse yo nakoda gini apai? Agu afugo Yesu agumbaha rogo gu yuru naadu mbata fu kpioko nakaragapai kuti gu sanahe re. Ko agumba gupai fu gako ruru amokedi nga: “Ka oni ka kuti gi rugute, oni nye anye rogo gi nyemuse; wa ka mi kuti ga Buba rugute, ki nye rogo gako nyemuse.”​—Yoane 15:10.

Yesu anye rogo ga Mbori nyemuse yo ni ka ko kuti ga Bako arugute. Kina gu bangisa pai re du tipa rani areme. Tipa ka nye rogo ga Mbori nyemuse yo, ani du wa ka ani amanga agu apai nga ga rengo rogo gaani raka yo naˈauru dũ. Rogo kina gu bangisa nyemu re, Yesu aya: “Ka oni ini agi apai re, rago ngba angba ti roni ka oni amanga ha.”​—Yoane 13:17.

Si nga gaani maabangirise nga gi buku re nika undo roni oni ndu kindi kumbatayo kaa manga agu apai nga ga rengo rogo gaoni raka na kini banda tironi rogo “ga Mbori nyemuse yo sa nyenye unga.”​—Yuda 21.