Tungusapa Kindo Gbataka Wene Pangbanga Rogo Zegino Dunduko

ANI ya nga mo mbakadi tiro tipa tungusapai mbiko wa mo andunga tipa sunge ya. Mo natiköpa nduge atikö, mbiko kpotoro na mbugo. Kpotoro naya foro si naida mo ongodi aongoda rogo gu wiso re! Ono mo kpari fu Mbori na ki diberã tipa ka ndu. I fu sosono wirina ni dee nga mo tungusipai na ri, gari hipai na wenesino zi ngbaduroyo. Wa oni atungusa gu pangbanga nga ga rengo kporo na kporo, mo tingidi gupai nga awirinamo rogo zegino dunduko namanga kina gu bangisapai re, i namangasunge na kina gu bangisa waraga re, na i dunduko nagbia undo ti kina gu bangisa rabahe re a. Fuo da mo kpuro yo, kpotoro zambua azambua dunduko. Mo na ngbarago nga mo naakpanga tungusapai rogo gi uru re te!

Wa du rago re, nyanyakipa sunge fu aKristano nga ka tungusapa ga Mbori Kindo. Yesu apepai kumbatayo nga sunge tungusapai nika du ni bakerehe ti yangara arame. (Mt. 24:14) Wai du gi gako sangbanebi re nadigisi tihe? Rogo gi paparaha re, ani nika sakapai tipa aboro, abirĩ sunge, na agu aũsunge naima du na nyanyakipaha tipa gu sunge tungusapai nga ga aKristano, nga gu naundo amirioni aboro rogo zegino dunduko i bi ga Mbori Kindo ni ndikidipai.