Tipagine Nyakipa Tungusapai Ti Ni Awere Nitanga Nani Ti Akporo?
“Na uru ka i apiriga nga ti yugo pai na tungusa pa Yesu ya ko nga Kristo ti yekaru yo, na ku kpuyo yo ya.”—AMO. 5:42.
1, 2. (a) Gini gene tungusapai aboro naini aDezire Yekova ti ni gbe? (b) Gini apai ani ka wisigoho rogo gi papara kekeapai re?
ROGO dungu aringara, wo aboro naabi aboro niba-ue-ue voditiyo wenengai i nindu kurogo akporo ka fura na aboro tipa ga Mbori Kindo. Ka si du nga i gbia gu boro duna nyemu gayó pangbangaa tiní, i rengbe ka fu gu waraga funi nasaka rogo Ziazia Kekeapai yo, na ki sana ní tipa ka tona wisigo Ziazia Kekeapai na ní zanga ní niitumo atumo tipaha. Fuo gure, i ki gbisi kurogo kura kporo. Ka si du nga oni dagba agu aboro namanga gi sunge re, si ima du nga ho aboro abironi ni, i naima ino niipo nga Dezire Yekova du nga oni zavura mbata fu oni tona fugo naayó. Nirengo, aboro ini aDezire Yekova ti gu gayó sunge nga ga tungusapai nitanga nani ti akporo.
2 Dungu agene duho ani amanga gu sunge ngbaha Yesu afuhe furani nga tungusapai na sunge sa aboro ni abawiriki. (Mt. 28:19, 20) Ani naamanga dezirepai bangbeahe yo, pangba agene, na rogo kura aba dungu aboro asungo rogoho. (Amo. 17:17) Ani naatungusapai fu kura aboro rogo terefuni, watadu ka ke waraga fuyó. Ani naagumba gu rengo du rogo Ziazia Kekeapai fu agu aboro ani naagbia yo ho ani amanga gaani apai ni. Ani a na bangiriba berani nga ga Internet (Web site) nga gu nasa boro nigedi agu apangbangaa du mburuhe rii Ziazia Kekeapai, nga gu du rogo afugo susi 300.a Agi agene dunduko ani atungusapai ngbaha re nayeaye na wene asangbanaha. Ono tie, rogo badungu aringara, gu bangua gene ani atungusa wene pangbangaa ngbaha nga tanga nani ti akporo. Wai gi gene tungusapai re atona? Wai gu ga Mbori aboro du ti gi gaani regbo re atona mangasunge gbe na gi gene tungusapai re? Na gine nyakipaha ti ni awere?
Wai Amokedi Anaatungusapai
3. Gini arugute Yesu afuhe fu amokedi tipa tungusapai, na wai gipai re ayugo gu gene si aidi i nitungusipai ngbaha?
3 Pa tungusapai nitanga nani ti akporo aenge kina rogo Ziazia Kekeapai yo. Ho Yesu akedi amokedi ni i ndu ka tungusapai, ko aruguyo ki yaa: “Gu bakporo na gu kporo oni ka rima ku rogo, oni gbáta gu boro du ho rengbe na dia roni kugume.” Rogo gini gene si aidi i gbata agu aboro narengbe ka dia yó kugume? Yesu aya fuyó wee i ndu kurogo akporo. Ko ayaa: ‘Oni ta rima ku bambu yo, nipoi kuti aboro. Ka gu bambu re rengbe tipa roni, gaoni zereda ki ye kuriihe.’ Ya mo si adu nga kina yó guari nitiyo ka ndu kurogo akporo zanga irakporo yambu yó ayamba? Ii, wo si adu. Oni bingo gupai Yesu agumbaha berewe ki yaa: “Gu ni ka dia nga roni ku gume ya, ka ni agia nga sangbaroni ya, ho oni ka kura ni rogo gu bambu re na bakporo a, oni ki tadi nvutu ti nduroni.” (Mt. 10:11-14) Agi arugute re nayugo gupai ziazia nga, si aidi kina amokedi guari nitiyo ka “merã ku rogo akporo, nitungusi wene pangbanga” zanga boro yambu yó ayamba mbata ku kpuni yo.—Ruka 9:6.
4. Wari gumbayo ho ni rogo Ziazia Kekeapai nga amokedi anaatungusapai rogo akporo na kini tangara abambu a?
4 Ziazia Kekeapai nagumbaha agumba ziazia ya amokedi anaatungusapai nitanga nani ti akporo. Nikpiapai, Amokedi 5:42 nayaa: ‘Na uru ka i apiriganga ti yugopai na tungusapa Yesu ya ko nga Kristo tii yekaru yo, na ku kpuyo yo ya.’ Fuo agarã wa 20, gu mokedi nangia Pauro atingidi agu abaakumba nadu rogo gu dungurati nadu Efesa yo ki yaa: ‘Mi anenga tungusa agu apai dunduko ka ngba fu roni te, kini yugupai furoni gbayaga, nitangara bambu a.’ Ya mo Pauro andu fuo agu abaakumba re mbata fu da yó ni aidipase? Wo si adu nirengo, bambiko ko ayugupai fuyó a tipa “saberã fu Mbori na idapa gaani Gbia Yesu Kristo.” (Amo. 20:20, 21) Buku sa nafura tipa Amokedi 20:20 niyaa: “Si nibawenepai ka ino gupai nga, agi abatungusipai re anaatungusapai kakaka nitangara abambu nani a.”—Robertson’s Word Pictures in the New Testament.
Agu Ayere Du ti Gi Gaani Regbo Re
5. Wai ringbisiyó pa sunge tungusapai rogo gu sangbanebi nga ga Yoere?
5 Gu tungusapai aKristano amangihe rogo bambata sa kama agarã angia kpia gu bakere sunge aKristano amangaha areme. Gu nebi nangia Yoere aringbisi gu sunge tungusapai mbedimbedi aKristano amangaha kuti gu gbarasahe agbiro aye nani, kodihe na ayere. (Yoe. 1:4) Agu ayere re nadiabe apai, kini rimi kurogo abambu, na kini riti agu ahe dunduko ami agbiaha gene. (Oni gedi Yoere 2:2, 7-9.) Wo i aringbisapa gu ga Mbori aboro du ti gi gaani regbo re wa i akpatagara kuti tungusapai sirisiri. Gu bangua gene mbedimbedi aKristano na “kura akandoro” atungusapai ngbaha nga, tanga nani ti akporo. (Yo. 10:16) Wai aDezire Yekova atona tungusapai wakina gu amokedi anaamangaha?
6. Rogo 1922, wai kangara moyambu anyakasipa tungusapai nitanga nani ti akporo, na gipai re asa kura aboro i mangi wai?
6 Tona rogo 1919 ka ndu kumbatayo, i anyakasi gupai nga si naida aKristano dunduko nibasasa naatungusapai. Nikpiapai, rogo gu Ngbaõbambu Sinziri nangia ga Buza 15, 1922, riipai adu yo nga “Service Essential [Tungusapai Nga Nyanyakipa Sunge].” Si atingidi mbedimbedi aKristano naapa wai nyakipa “ndu kurogo akporo na wene pangbangaa, kini gumba gupai fu aboro nga, gu kindo nga ga ngbangbaturũ ima mbeda.” Rogo Gaani Sunge Nga ga Kindo, i agumbapa agu agene rengbeyó ka gumba wene pangbangaa ngbaha. Ono tie, bange agu aboro naatungusapai kini tanga nani ti akporo, si adu ti tonatonaha nikina umbaha. Gu kura awirina aaidanga ka mangaha te. I agumba dungu nduapai i aidanga ti ni ka tungusapai rogo akporo ya, ono gu banguapai nasa yó ka i idinga ka mangaha ya angia, i abihe nga iriiri sunge ngaha te. Wa kangara moyambu aanyakasapa tungusapai kindi, badungu mbedimbedi aKristano atona kura kusayo rogo ga Yekova riigbu.
7. Ginipai namangi tona rogo 1950 ki da kurogo 1953?
7 Rogo agu agarã naye tifuoho, badungu aboro nakoditiyo kuti gi sunge re. Ono tie, si aidi i yugupai ayugo fu aboro berewe tipa wai rengbeyó ka tungusapai rogo akporo. Ani bingo gupai nadu Amerika yo. Tona rogo 1950 ki da kurogo 1953, 28 rii kama nga ga agu aDezire Yekova nadu rogo gu ringara re anaatungusapai sa kina rogo gu gene nga kpakara rukutu akpewaraga takapande dunguratise, watadu ka runda bangiri agene na amagazini beyo. Biama-bawe rii kama nga ga abatungusipai naatungusanga pai dedede ya. I anaadia dungu adiwi zanga i mangi dezirepai fu boro. Ginipai kangara moyambu amangihe tipa ka undo aKristano dunduko i naatungusapai rogo akporo?
8, 9. Gini yugopai i atonaha rogo 1953, na asangbanaha angia gine?
8 Ti regbo gu bakere dunguratise nga ga dungu aringara i amangihe New York yo rogo 1953, i anyakasipa tungusapai nitanga nani rogo akporo. Gu wirina nangia Nathan H. Knorr naangerakurii sunge tungusapai, ko ape gupai nga, gu nyanyakipa sunge si aida agu aKristano dunduko nga ababiapai nimangihe nga ka undo aKristano dunduko nibasasa i naatungusapai dedede rogo akporo. Ko ayaa: “Aboro dunduko si aida i du na gene beyo ka tungusapai nitanga nani ti akporo.” I atona yugopai fu abatungusipai rogo zegino dunduko tipa i niitungusipai rogo akporo. I ayugupai fu agu abatungusipai naatungusanga pai rogo akporo ya, ki yugu wai fuyó rengbeyó ka ndu kurogo akporo, ki sakipai na aboro rogo Ziazia Kekeapai, na ki karagapai kuti gayó asanahe.
9 Asangbana gi yugopai re adu nibakerehe. Vuru agarã bawe gbua, bange abatungusipai rogo zegino dunduko asono na 100 rii kama, bange agu aboro abatungusipai akaragatiyo ka biyo ki sono na 126 rii kama, na bange agu aboro naawirika Ziazia Kekeapai ki sono na 150 rii kama. Areme, abatungusipa Kindo bangeyo ambeda kuti amirioni saba natungusa wene pangbangaa rogo zegino dunduko. Gi bakere sona kumbatayo re nga gu gopai nayugo gupai nga, Yekova ima fu maku fu gako aboro i naatungusapai nitanga nani ti akporo.—Yes. 60:22.
Gbahe ti Kpakpu Aboro Sa Bata
10, 11. (a) Gini yuguyugupai Yezekere abihe du paha nikekehe rogo Yezekere kapita 9? (b) Wai gu yuguyugupai re adigo ti gi gaani regbo re?
10 Gu yuguyugupai Yezekere abihe nayugopa wai nyakipa tungusapai nitanga nani ti akporo. Rogo gu yuguyugupai re, ko abi akumba sita na aũvura beyo, na ki bi kura kumba naukadi rokoo nitutu giri nzibi, kambu ime-ke-waraga kidu pavuko. Yekova aya fu gu kumba re wee ko “ndú rogo bakporo, rogo Yerusarema, ki gba fuohe ti ngbandia kpakpu agu aboro nauka omeyo ki nikpari mbiko gu kere gbegberẽ asino nga gu du ni mangimangi he rogo ho.” Fuo gu kumba re ndu ka gbahe ti kpakpu aboro, Yekova aya fu agu akumba nadu sita na aũvura beyo, i ndu ka imo agu aboro dunduko adunga na fuohe ti kpakpuyo ya.—Oni gedi Yezekere 9:1-6.
11 Ani ima rugatirani na gupai nga, rogo digisidigisi gu sangbanebi re, gu kumba “naukadi roko ni tutu giri nzibi,” ko narukuba yangara mbedimbedi aKristano. Mbedimbedi aKristano natungusapai na kini sa aboro ni abawiriki na kini gba fuohe ti kpakpu agu aboro nada niga Kristo “kura akandoro.” (Yo. 10:16) Ginihe nga gi fuohe re? Si nga gu gopai nayugo gupai nga, agu akandoro re, i nga gu ga Yesu Kristo abawiriki naima kpara gayó raka fu Mbori, ki zi bapatiza, na ki ukadi vovo boro. (Ef. 4:20-24) Agi aboro duwa akandoro re nakodatiyo na mbedimbedi aKristano kidu nibangisa rimbasa akandoro, na kini undoyo ti gbahe ti kpakpu kura aboro.—Yugo. 22:17.
12. Wai gu yuguyugupai Yezekere abihe tipa gbahe ti kpakpu aboro ayugopa wai nyakipa gbata agu aboro duwa akandoro?
12 Gu yuguyugupai Yezekere abihe nayugo ndupai sa dagba agu akuraha si aida ti ni ani gbata agu aboro niʹipiʹipihe “nauka omeyo ki nikpari.” Ga aboro raka ngbapai. Fuo regbo ngbutuko, ga Yekova ariivura du ngbangbaturũ yo, nga gu agu akumba nadu sita na aũvura beyo arukubaha, i nika imo agu aboro adunga na gbagbahe ti kpakpuyo ya. Gu mokedi nangia Pauro afura tipa gu sapangbangaa re ki yawee Gbia Yesu nika zora na “amaraika gako tandu” tipa ka ‘íra bape fu agu aboro ainanga Mbori ya, na aguyo agianga sangba wene pangbangaa nga ga gaani Gbia Yesu ya.’ (2 Tesa. 1:7, 8) Oni kparia gupai nga, i nika sapangbangaa aboro ringbisihe kuti agu apai i amangihe sa wene pangbangaa. Sidu, si naida takapande ga Mbori pangbangaa nindu andu kindi kumbatayo dati kina digido gi zegino re. (Yugo. 14:6, 7) Gipai re namaa ga Yekova amoyambu dunduko ti dingisaro.—Oni gedi Yezekere 3:17-19.
13. (a) Gini sunge Pauro abihe nga si kuriko, na tipagine? (b) Gini sunge bi oni he nga si kurironi be agu aboro du rogo gaoni dagbarago?
13 Gu mokedi nangia Pauro abihe nga si adu nidingisoro fuko ko gumba wene pangbangaa fu aboro. Ko akepai ki yaa: “Mi nga ga aGiriki borobape na aboro kura ringara a, na airatatamana na airamungo a. Si du, mi asó gima tungusa wene pangbanga ti ni fu roni du Roma yo a, wa gu ka mi rengbe na ni.” (Rom. 1:14, 15) Pauro aduna tambuahe tipa gu inapai Mbori ainihe fuko, sidu, ko kini bihe nga si nidingisoro fuko ko asadi ka undo kura aboro a i gbia undo be ga Mbori weneringise. (1 Tim. 1:12-16) Si aduwa ka i yawee bape du ko arogodihe be agu aboro re dunduko, nga gu bape rengbe ko ka gasaha kina rogo tungusa wene pangbangaa yo fuyó. Ya mo oni nabihe nga oni nga aboro bape fu agu aboro du rogo gaoni dagbarago?—Oni gedi Amokedi 20:26, 27.
14. Gini bambata ndupai ani atungusapai ti ni gbaiga na rogo akporo?
14 Wa vura duhe nga ani natungusapai rogo akporo mbiko gupai nga ani naida ka batasa aboro, kura ndupai kinaho berewe kii kisusi gure. Rogo gu sangbanebi du rogo Maraki 1:11, Yekova ayaa: “Ho uru nakura ni dati ti he rimore du ni bakere he dagba arikaaboro, na . . . gigiri motumo nga ga riahe; bambiko rimore du ni bakere he dagba arikaaboro.” Nidigisidigisi gi sangbanebi re, ga Yekova amoyambu nasambuo rimoko auru kpotosende dunduko wa i tungusapai fu aboro. (Tam. 109:30; Mt. 24:14) Gu bambata ndupai ani atungusapai ti ni gbaiga na rogo akporo nga, ani naida ka “tumo ni motumo tambuahe” fu Yekova.—Eb. 13:15.
Gu Bakereapai Nika Manga Kumbatayo
15. (a) Wai aYisaraere akiisi gayó sunge ti gu saba uru i ake pati Yereo? (b) Ginipai gipai re ayugoho nibipa sunge tungusapai?
15 Ginipai nika manga kumbatayo nibipa sunge tungusapai? Gu nguru aYisaraere aruhe pati Yereo, si nayugo gupai nika manga kumbatayo. Oni tingidi gupai nga, mbata fu Mbori gbarasi Yereo, ko aya fu aYisaraere wee i niike pati gu bakporo re bara sa rogo uru sa tipa aʹuru sita. Ono ti saba uru, si aidi i kiisi gayó sunge. Yekova aya fu Yosua wee: “Oni aké pati bakporo kirikiri bara saba, aboromotumo ki vudi anambongo. Si nika du wa gere, ho i ka vuda anambongo ni nga gbanga abaakandoro ni gbanga ha, . . . aboro ki ta ngbayo ni bakere wawa gbe; ngapa bakporo atiwa ku sande kpaserekpasere.” (Yos. 6:2-5) Apai rengbe arengba ka manga wakina gure nibipa gaani sunge tungusapai. Zanga kapa, mbata fu Mbori gbarasi gi zegino re, ani nika bi bakere dezirepai abi si namangi tipa rimo Mbori na tipa gako Kindo, nga gu dezirepai naamanganga mbata ya.
16, 17. (a) Ginipai awirina nika mangaha mbata fu “bakere gberãngbi” nyasi? (b) Ginipai ani ka wisigoho rogo gu papara kekeapai naye fuo gere?
16 Regbo nika yeaye gu pangbangaa ani atungusaha nikadu wa “bakere wawa.” Rogo gu kitabu nga Yugoti, i naringbisa gu iigirã apangbangaa nga ga sapangbangaa kuti ‘bakindigi morogumba du barõaha nibasasa wa akiro 40.’ Si du Yugoti 16:21 aya ti ni wee: “Gaha rungosi adu ni bakere he gbe.” Ono ani ainongo singia ani nika tungusa yangara papara ga Mbori pangbangaa sapangbangaa nitanga nani ti akporo te. Ono ani naa kido nga, mbata fu “bakere gberãngbi” digi, dungu aboro nika ino rimo Yekova susi gu nidumbata.—Yugo. 7:14; Yeze. 38:23.
17 Wa ani asungudo gu nyanyakipa regbo du kumbatayo re, si naida ani du dunduko zaaza rogo takapande gu wene pangbangaa nga ga Kindo. Gini kpakaraapai ani naagbia tirani nani tingba tungusapai ho ani naatanga nani ni ti akporo, na wai rengbe ani ka diabe agi apai re? Ani nika gbia akaragapai kuti agi asanahe re rogo gu papara kekeapai naye fuo gere.
[Gu rukutu kekeapai du bandu kpewaraga yo]
a Gu gaani bangiriba nga ga Internet, si nga www.watchtower.org.
Gaoni Karagapai Nga Gine?
• Gine nayugo gupai nga, pa tungusapai nitanga nani ti akporo aenge kina rogo Ziazia Kekeapai yo?
• Wai i atona ka nyakasapa sunge tungusapai nitanga nani ti akporo ti gi gaani regbo re?
• Tipagine du ga Yekova amoyambu ti ni na gu sunge kuriyó nga sunge tungusapai?
• Gini nyanyakipa regbo du kumbatayo?
[Gu kpiahe du ti kpewaraga 12]
A wa si adu tipa Pauro, ya mo oni nabihe nidingisoro furoni oni tungusipai?
[Gu kpiahe du ti kpewaraga 13]
Nathan H. Knorr rogo 1953