Yesu Akpi Gorogota Yo

Agbiamotumo andu na Yesu kua gavana yo. Pirato asanayo nga: ‘Gini gbegberẽpai gi kumba re namangihe?’ I aya: ‘Ko naya bakindo nga ko!’ Pirato asana Yesu ki ya: “Bakindo aYudo nga mo?” Yesu ki karagapai ki ya: “Gi ngbi aenga nga rogo gi zegino te re.”

Sidu, Pirato akedi Yesu koyo du Erode ni nangia bazogo Gariraya, singia ko rengbe ka bi irairapai tiko. Erode aabingo irairapai ti Yesu te, ko ki karaga ko koyo du Pirato ni. Fuoho, Pirato aya fu aboro wẽ: ‘Mi gbiati Erode, ani abingo irairapai ti gi kumba re te. Mi nika kusako ko ga.’ Rimbasa aboro apoi kuari ki ya: ‘I imiko! I imiko!’ Asekere ata Yesu na kpudu kini suku sure kutiko, na kini ta ko ni beyo. I amoi kpakpari kiwe kuriko yo kita sawia ko niya: ‘Wene uru Bakindo aYudo.’ Pirato ki ya berewe fu rimbasa aboro: ‘Mi abingo irairapai ti gi kumba re te.’ Ono i apoi kuari ki ya: “Mo wági ko awaga!” Sidu, Pirato ki fuko ku vurube yo tipa i imiko.

I andu na Yesu ku rogo gu ba nga Gorogota, ki banga ko kuti ngua ki tumbaha kuari. Yesu akparikpee ki ya: ‘Buba, mo mbupai fuyo, mbiko i ainongo gupai i amangaha te.’ Aboro aasawia Yesu kini ya: ‘Ka si dunga Wiri Mbori du nga mo zorõ ti gu ngua re! Mo batasi tiro.’

Boro sa dagba agu amangi gbegberẽ apai i aˈasi yo na ko ki ya: “Mo tíngidi pa re ho mo ka da ni ku rogo ga ngbi.” Yesu akido ko nga: “Ani adú na mo Paradizo yo.” Tingbafuo bebere uru, bitimo ati nga gu namangi asaa biata ku rogo gu ringara re. Bete abawiriki aru kinaho rogo gu ba i aˈasi ko rogoho re kodihe na gu Maria nangia na Yesu. Yesu aya fu Yoane ko ngere fuo Maria wa kai ya ndikidi nako du nga ri.

Ni yangaraha, Yesu aya: “Si nyasi!” Ko adua riko ki gbe yangara onga ko. Ti gu regbo re, kere bazigizo amangi. Gu roko dada rago naadu yekaru yo nga gu naakpara Ziazia Ba ti Kparakpara Ziazia Ba Kisusi asiri ku rogoyo ue. Kura bangerekurii asekere sa aya: ‘Wiri Mbori du nidu nirengo.’