Petero Aoro Rimo Yesu

Ho Yesu adu ni na gako amokedi rogo gu vurubambu yo naadu kuari, ko aya fuyo: ‘Oni dunduko nika mbu re areme rogo gi yuru re.’ Petero aya: ‘Mi tigu te! Ka kura aboro vura mbu ro ambu vurũ mi ambunga ro tigimi te.’ Ono Yesu aya fu Petero wẽ: ‘Mbata fu bakondo kua, mo nika gumba gupai bara biata nga mo ainongo re te.’

Ho asekere andu na Yesu ni kua Kayafa yo, badungu gako amokedi aima ora. Ono aguyo ue aapeka ko kindi dagba rimbasa aboro yo. Petero nangia boro sa dagbayo yo. Ko andu kutii mburu gu bambu nga ga Kayafa ki sungu yo kaa faada we. Moyambu ni dee abi kpakpu Petero ima we ki ya: ‘Mi ima ino ro! Mo nidu na Yesu!’

Petero ki ya: ‘Oó, mi nidu te! Mi ainongo gupai mo afura tipaha re te!’ Ko ki ndu mbembedi ku pangbadimo yo. Ono si aaimanga te, kura moyambu ni dee ki biko ki ya fu rimbasa aboro: ‘Gi kumba re nidu na Yesu!’ Petero ki ya: ‘Mi ainongo Yesu te!’ Gu kura kumba sa ki ya: ‘Mo nga boro sa dagba gako abawiriki! Fugoro nayugoho ayugo nga boro Gariraya nga mo wakina Yesu.’ Ono Petero azungahe ki ya: ‘Mi ainongo ko te!’

Ti gu regbo re, bakondo akua. Petero abi Yesu ko nasa tiko kaa ngana ko. Ko atingidi fugo Yesu ko ki kuru ku zegiyo ki kpari nyanyaki gbe.

Ti kina gu bangisa regbo re, ga aYudo agbia-ngbanga adunguratiyo ku dimo kua Kayafa yo tipa ka asada Yesu. I aima dakuti gupai nga i naida ka imo Yesu, ono awere i aangera tipa gu ndupai rengbe yo ka imo ko ti ni. Ono ka i abingo gupai ko amangihe ya. Ni yangaraha, Kayafa asana Yesu gbaiga nga: ‘Wiri Mbori du nga mo?’ Yesu ki ya: ‘Ii, mi nga wiriko.’ Kayafa ki ya: ‘Kura ndupai ho berewe ani aidaha te. Gere nga gberãngbayo!’ Bambu ngbanga ki idi kuti gupai re ki ya: ‘Gi kumba re duwa ka ko kpi.’ I azokodi pangba Yesu, kini suku sure kutiko, ki vo bangiriko, kini ta ko, ni ya: ‘Ka sidu nga nebi nga mo mo gumbanga ha furani da nari ro!’

Ho wiso ada ni, i adi Yesu ki ndu na ko ku rogo gu bambu ngbanga nga ga aYudo ki sana ko berewe nga: ‘Wiri Mbori du nga mo?’ Yesu ki karagapai nga: ‘A si mo agumbaha re.’ Sidu, i akiti ngbanga ko nga ko nagberã ngbakoyo i ki ndu na ko kua Pondio Pirato yo nangia gu gavana nga ga aRomo ko. Ginipai namangi tingbafuoho? Ani bingoho.