Tanvuo

Ya mo mo abingo tiro ti kura aregbo nga si ima kpakara foro mo gisangba? Bakindo Davide aima bi tiko ti kura aregbo wa gu nga ha re, na ko akpari fu Mbori ki ya: Mo “nisongodi re ni wene esuesu toro.” (Tam. 51:12) Davide aima kpinyemu Yekova. Ono wa si avura du wo, ti kura aregbo, Davide anaasota asota ka giasangba Yekova, na kinawo du ani a. Tipagine? Bambatapai nga, ani aima dia gu sino nga ga basasangba. Uepai nga, Satana naˈasada ti aregbo dũ ka sa rani ani samungu kuti Yekova, a wa gu ko amangihe. (2 Kor. 11:3) Biatapai nga, agu aboro ke rani kirikiri rogo zegino na gu bipai nga ga samungu, “nga gu toro namanga pai awere rogo agu awiri yo nakeretu.” (Ef. 2:2) Anga gu yangarapai sa nga gu si aida ani mangihe nga ka sovura kuti gaani nyemu ingapai te, ono ka ká gu maapai kurii nga ga Bakitingbanga na gi zegino re tipa ka sarani ani basasangba. Si naida ani mangi nyanyaki asadatise ka giasangba Yekova na agu aboro ko na moi yo nga aguyo du na pagbia beyo. w23.10 6 ¶1

Ginipai rengbe ani ka wirikaha ti gu iiriwopai Yesu amangihe nga ga sa ime kurogo imekakue yo re? Ani nawirikapa umbasitise. Yesu aatanga ngbaduko tipa gu iiriwopai re te; na ni rengo, ko aatanga ngbaduko tipa agu apai dunduko ko amangihe te. Ono kuba gure, ko adu na umbasitise kini fu taarimo dunduko fu Bako. (Yo. 5:19, 30; 8:28) Ka ani wiriki Yesu ni du ani na ruru bipai tipa tirani, ani atanga ngbadurani tipa agu apai ani amangaha te. Ka si vura du nga kina ginipai du ani namangihe tingba ga Yekova sunge, si aidanga ani ta ngbadurani tipa tirani te, ono si naida ani ta ngbadurani tipa gu Mbori du ani na mamu ka mangasunge fuko. (Yere. 9:23, 24) Si naida ani fu gu taarimo fuko rẽ ko na ni. Ni rengo, pai ho rengbe ani ka mangaha zanga gu undo nga ga Yekova te. (1 Kor. 1:26-31) Ho du ani ni na umbasitise, si aidanga ani di tambuahe tipa gu wene apai ani amangaha fu kura aboro te. Ani nagbia ngbarago ti ino ani gupai nga Yekova nabi gupai ani amangaha na nyanyakipaha. (Oni ringbisinga ha na Matayo 6:2-4; Eb. 13:16) Ni rengo, ani nasa ngbarago ti Yekova ho ani awirika Yesu ni niyugo ani umbasitise.—1 Pet. 5:6. w23.04 4 ¶9; 5 ¶11-12

Ga Mbori toro adu kugii gu mokedi nangia Pauro ko ngarasi aKristano tipa i naaberãpa ga akurayo apai. Waigu rengbe ani ka mangapai kuti gu rugute re ti regbo adunguratise? Ni tingida ani gupai nga, gu kura aboro wakina rani naida aida a ka fu karagapai. Mo berẽnga kuriihe ngba gi gene re. Ho mo afura ni na abakureamo, ya mo mo rengbe ka fura ni bakerehe si ki sa gupai nga ka i dunga na bakere momu tipa ka fura ya? Wa gu sa te! Mo naida aida a i fubee kuti gu fugodagbase re. Wakina gure a, ti regbo adunguratise, ani naida ka mbu momu fu dungu aboro wa rengbehe tipa i fu karagapai. Ni rengo, gene sa dagba gu kura wene agene yo rengbe ani ka ngarasa akuarani ngbaha nga, ni mbu ani momu fuyo i sakipai tipa gayo idapase. (1 Kor. 10:24) Sidu, ani ima rengba ka sa gaani akaragapai si du ni guruhe, rogo gi gene re, ani nambu regbo fu kura dungu aboro tipa i fu karagapai a. Zavura ho mo afu wiri guru karagapai ni, mo ne gupai nga ka fura tipa dungu memeapai. Ka si du nga mo ima fura tipa apai dunduko rogo genewaraga yo, dungu apai anyenga ho fu gu kura aboro tipa i pehe te. w23.04 22-23 ¶11-13

Si naida ani tingidi pa wai duhe ni nyanyakipa pai ani naandu kindi kumbatayo kaa undo kura aboro, gbe, vurube gaani sunge tungusapai nga ga aKristano. Rogo gaani sunge tungusapai yo, si aidanga ani ka kina kuti bangisapai sa te. Ani nagbia agu aboro du gayo aida a na mangaapai ni bakiakia na naye rogo aba ni bakiakia. Gu mokedi nangia Pauro anaˈaria gako gene yugopai aˈaria, na ani ima rengba ka wirikapai ti gako kpiapai. Yesu amoi Pauro ni “ga aGendiria mokedi.” (Rom. 11:13) Rogo ga Pauro sunge yo, ko aima tungusapai fu aYudo, aGiriki, agu aboro naadu na bakere inohe, aboro umbasitise, kikindigipa aboro, gbiati abakindo. Tipa gupai nga Pauro zi ngbadu agi aboro yo dunduko naadu na apai tipa yo ni bakiakia re, ko aye “ka du ni apai dunduko fu aboro dunduko.” (1 Kor. 9:19-22) Ko anaamaaberãko tipa gayo asino mangaapai, na aida na kini aria wai ko anaafura na yo ringbisihe kuti gupai ko anaabihe. Ani ima rengba a ka gbia bawene sangbanapai ti gaani sunge tungusapai ka si du nga ani na rengba ka manga ariapai tipa si undo na gu zingo nga ga agu aboro nadegatuyo furani. w23.07 23 ¶11-12

Aboro zera nga nyanyaki aboro, angianga rurungbura aboro ya. Si naida boro ru nyanyaki tipa ka nye zezeredi ho ni agbia tini ni na akpakarapai. Zera nga papara “zuzu Toro.” (Gara. 5:22, 23) Gu pa-Giriki nga “zera” i anaamangasunge na ni ti kura aregbo tipa ka sakapai tipa gu farasi i naima raba ru. Mo bingo gupai berãro yo nga, zingizingi farasi da ni bayee ru. Wa vura duhe nga u nada ni bayee ru, u kindi na ome tiru. Wangia ani aboro, waigu rengbe ani ka sonosa gu sino nga ga zera ono ti kina gu bangisa regbo re ani kidu nyanyaki? Ka ani mangi nga gipai re ni tirani te. Si naida ani kpari tipa ga Mbori toro, kini sana ko tipa ko undo rani ani sonosi gi bawene sino re. Badungu aboro duho niima wirika wai kadu zezeredi. Ni kpiapai, badungu awirinarani ima yugo gu sino nga ga du na zera ho aboro aˈasada ni ka ti kango na yo. 2 Tim. 2:24, 25. w23.09 15 ¶3

Rogo gu iiriwo yugoti i ayuguhe fu gu mokedi nangia Yoane, ko abi abaakumba 24 ngbangbaturũ yo i niirisi Yekova. I aasambuo Mbori, na kini ya ko ima rẽ tipa ka dia “taarimo na irisa na tandu.” (Yugo. 4:10, 11) Ruru amaraika a na badungu nduapai tipa ka sambuo Yekova na ka iriso ko. I na ko ngbangbaturũ yo na i ima ye ka inoko wenengai. I nabi asinoko ni yuguyuguhe rogo agu apai ko amangaha. Ho i abi wai ni Yekova amangapai, si nafõngbaduyo yo tipa i sambuoko. (Eyo. 38:4-7) Si naida ani sambuo Yekova a rogo gaani akparakpee yo. Ani rengbe ka manga gipai re, nigumba ani gupai fu ko ani nakpinyemuhe tipa ko na gupai ani airisoko ti ni. Ho mo ageda Baibiri ni na kini wisigihe, mo asadi ka bingo agu asino Yekova du gbaiga ngba tiro gbe. (Eyo. 37:23; Rom. 11:33) Fuo gure, mo pe pa gu bipai du mo na ni tipa agu asino re. Ani ima rengba a ka sambuo Yekova bambiko ko naundo rani na kini undo akuarani aKristano dunduko.—1 Sam. 2:1, 2. w23.05 3-4 ¶6-7

Rogo 1919, Babera du ni Bakerehe nga bariwara ngbii ziree pambori aadunga berewe na ome kurii ga Mbori aboro te. Rogo gu garã re, ruru “kangara moyambu” atona mangasunge tipa gupai nga agu aboro du na ruru ngbaduyo yo tona nduge ngba “Gene Ziazia Pai.” (Mt. 24:45-47; Yes. 35:8) Gu sunge gu kura aboro amangihe mbata kusayo tipa ka mbakada gene aima undo agu aboro natona nduge ngba gu bagene re tipa i wirikipai ni bakerehe tipa Yekova na gako ringbisapai. (Snz. 4:18) I aima du a na rengba ka sa gayo raka si du na ngbanya dagbaha na gupai Yekova akpinyemuhe. Yekova abingo ho nga si naida gako aboro mangi agi aˈariapai du na nyanyakipaha re dunduko kina ti bangisa regbo te. Kuba gure, ko ima kpuruwa gako aboro yeeye. Nairiwo wai ani nika du na ngbarago ho ani nika du ni na rengba ka sa ngbarago ti Mbori rogo agu apai yo dunduko ani amangaha! Agene dunduko si naaida i naambakadaha ambakada dedede tipa si du wenengai. Natona rogo 1919, sunge mbakada “Gene Ziazia Pai” nandu kindi kumbatayo, tipa gupai nga badungu aboro mbu Babera du ni Bakerehe. w23.05 17 ¶15; 19 ¶16

Tipa badungu agarã, agi awirina du rogo Riigbu Bipasunge re aima digo nifu rabahe fu akumba dagba kura akandoro tipa i naangbembatayo. Ni kpiapai, i ima mbakada dungu asukuru tipa ka raba abaakumba, agu ababiapai ninaata ata, agu awirina du rogo gu Rondo nga ga Be Basunge, ababiapai Betere yo, amokedi, gbiati kura aboro. Agu awirina du rogo Riigbu Bipasunge aima digo nifu rabahe fu amoundo nga ga gu dungu arondo du rogo Riigbu Bipasunge. Agi amoundo re awere namanga dungu asunge rogo ga Yekova riigbu ni ruruyo. I ima mbakada tiyo wenengai tipa kaa ndu kumbatayo kaa ngerafuo ga Kristo akandoro. Ho i nika roga yangada mbedimbedi aKristano ni ku ngbangbaturũ yo bara ti digido bakere gberãngbi, airisimbori nikaa ndu kindi kumbatayo kaa irisoko ni ruruyo tii gu pagbia nga ga Kristo. Ani ima ino gupai nga ti gu regbo re, dunguradungura aringara Baibiri ayambaha nga Gogo boro Magogo nika zubo ga Mbori aboro. (Yeze. 38:18-20) Ono gi gayo zubohe nika du tipa wiri bete regbo re adunga na diabese te, si arugusa nga ga Mbori aboro ti irisoko te. Ko nika batasa yo abatasa nirengo! Rogo yuguyugupai yo, gu mokedi nangia Yoane abi “bakere rimbasa aboro” nga ga Kristo kura akandoro. I ape gupai fu Yoane nga, gi “bakere rimbasa aboro” re, nga agu yo “naakuru rogo bakere gberãngbi.” (Yugo. 7:9, 14) Sidu, ani ima inoho nirengo nga Yekova nika batasa yo abatasa! w24.02 5-6 ¶13-14

Ginipai rengbe ani ka mangaha tipa ka gbia ziazia toro? Ani ima rengba ka kparakpee tipaha, kini wisigi Fugo Mbori, na kini kodi tirani na gako riigbu gako toro angbe fuhe kumbatayo. Pa mangaha wo nika undo rani ani sonosi “zuzu toro.” (Gara. 5:22, 23) Mbori nafu gako toro sa fu kina agu aboro nabanda gayo aberã na mangaapai ni gigirihe. Ko arengbanga ka fu gako toro furani ka si du nga ani nandu kindi kumbatayo kaa berã tipa agu apai adunga ni gigirihe ya na kini mangipai kuti ni te. (1 Tesa. 4:7, 8) Tipa kaa gbia ga Mbori toro kindi, si naida a ka ani ‘páyasi nga agu apai i nagumbaha ni sangba Mbori ya.’ (1 Tesa. 5:20) Gi “sangba Mbori” du ane re nafura tipa agu apangbanga ga Mbori toro adu kugiihe nga gu nakoda agu apai nabi pa ga Yekova uru na pa wai ga Yekova uru ambeda gbe ti gi gaani regbo re. Si aidanga ani berẽ gupai nga ga Yekova uru watadu Aramegido ayengo ti gaani regbo te te. Kuba gure, ani nayugo gupai nga ani naberãpa ha aberã si ye bambeda ni du ani zaaza ti ngba manga agu apai nga ga “sinombori.”—2 Pet. 3:11, 12. w23.06 12 ¶13-14

Wangia ani aKristano, ginipai si aida ani mangihe ka si du nga sura kundiri boro kuru ni tunguotunguoho rogo gaani aterefuni na ataburet? Si naida ani mbu ngana gu sura re niipo. Si rengbe kadu furani taata ani mangi gupai re ka si du nga ani tingidi gupai nga gu nyanyakipa ũkumuko du berani nga gaani pagume na Yekova. Ono gu kura asura kinaho naima rengba ka zanga du ni ndikidi kpia kundiri boro, ono si ima rengba ka sarani ani du na wasiwasi nyemuapai. Tipagine si aida ani nehe ti ni? Bambiko ani aidanga ka manga diandue kandara tooni kuti manga bari kpotorani yo te. (Mt. 5:28, 29) Bakumba rogo gu ringara nga Thailand du rimoko nga David aya: “Mi naasana tire nga: ‘Ka si vura du nga, agi asura re arengbanga nzunzu kadu ni kpia kundiri aboro te, ono ya mo Yekova adu na ngbarago ka mi aangana agu asura re?’ Ngbatunga gi berãkuriipai re ninaaundo re mi naamangapai ni tatamana.” Ka ani aagunde be manga gupai nga gu rengbe ka sa Yekova ka ko du nga na ngbarago ya, si nika undo rani ani naamangapai ni tatamana. Gunde ti Mbori nga “tonatona mburu tatamana.” w23.06 23 ¶12-13

“Gaoni abambu” ima rengba kadu nga gaani adungurati. Ti regbo bakere gberãngbi, Yekova nakidohe nga, ko nika banda rani ka ani aandu kindi kumbatayo kaa irisoko na awirinarani. Sidu tie, si naida ani mangi nyanyaki asadatise awere tipa kadu na dudunguro nyemuse koyo du awirinarani ni. Pa bata ani na ru kuriihe! “Gu bakere rago nga ga Yekova” nika du ni kpakarakpakaraha fu wiri aboro dunduko. (Zef. 1:14, 15) Ga Yekova aboro nika gbiatiyo agbia na akpakarapai a. Ono ka ani mbakadi tirani awere, ani nika du na rengba kadu zezeredi na ki undo kura aboro. Ani nika hi agu akpakarapai dunduko ani nika gbiatirani na ni. Ho awirinarani nikaa rungo ni, ani nika manga gupai rengbe omerani na ni tipa ka undo yo niyugo ani nunga na kini fu agu ahe fuyo du yo na zingoho. Na ka ani wiriki ka kpinyemu awirinarani awere, ani nika yugo nyemuse fuyo kumbatayo. Yekova nika fu gu mosoro furani nga ga nyenye unga rogo gu zegino agberãngo na arungosiro nikaa du nga rogoho ya.—Yes. 65:17. w23.07 7 ¶16-17

Fugo Mbori ninaasakapai dedede tipa gu ruru akumba naadu mbata nga i adu nyanyaki. Ono i anaabingo tiyo ti aregbo dunduko nga i ni nyanyaki yo te. Ni kpiapai, ti gu kura aregbo, Bakindo Davide anaabi tiko nga ko nyanyaki wakina “nyanyaki bagangara,” ono ti kura aregbo, ko anidu rurungbura kidu ‘ni fudifudi ko.’ (Tam. 30:7) Ga Mbori toro afu bakere ome fu Samusona, ono Samusona aima ino gupai nga, zanga na gu ome naye be Mbori, ko rengbe ka “rungbura arungbura ki du wa kina kura aboro.” (Abasa. 14:5, 6; 16:17) Gi ruru akumba re adu nyanyaki mbiko gupai nga Yekova du naafu ome fuyo. Gu mokedi nangia Pauro aima ino gupai nga ko aaida aida na ome be Yekova. (2 Kor. 12:9, 10) Ko adu na akpakarapai nga ga kaza kpotose. (Gara. 4:13, 14) Ti kura aregbo, si aima kpakara fuko ka manga gupai du ni ruruhe. (Rom. 7:18, 19) Na ti kura aregbo, ko anidu adu na gunde tipa gupai narengbe ka manga ko. (2 Kor. 1:8, 9) Ono tie, ho Pauro adu ni rurungbura, ko adu nyanyaki. Ngba gini gene? Yekova afu gu ome fu Pauro naadunga ti ko ya. Ko asa Pauro ko du nyanyaki. w23.10 12 ¶1-2

Ka si dunga ti kura aregbo ani nasota asota na gu bipai nga sunge tirani te, ani ima rengba ka tingida gupai nga Yekova nitiko nagbe rani koyo du ko ni. (Yo. 6:44) Ko nabi gu wene asino du rogo rani yo nga gu ani arengbanga ka bihe nitirani ya na ko ima ino kpotorani yo wenengai. (2 Peka 6:30) Sidu, ani ima rengba kadu na kido kutiko ho ko aya ni furani ani na nyanyakipa rani. (1 Yo. 3:19, 20) Mbata fu ani wiriki rengo, dungu rani kinaho naima manga agu apai ani abira tirani kindi ti ni. (1 Pet. 4:3) Zavura agu aKristano naima iriso Yekova tipa dungu aregbo ima rengba kaa sota kindi na gayo arungbura. Ya mo kpotoroyo nakita ngbanga ro? Kangia wo duhe, mo gbia wasa mbiko ino mo gupai nga ga Yekova ruru amoyambu nasota asota na kina ngbatunga agu abipai re. Ni kpiapai, rago aima gberã ti gu mokedi nangia Pauro ho ko aaberã ni kurii gako azangarengba. (Rom. 7:24) Rengo ngaha nga, Pauro aima sa berãko ti gako aingapai na ki zi bapatiza. Wa si avura duwo, ko aafura kindi tipa tiko nga “mi nga gu umba ni dagba amokedi yo dunduko” na “mi nga barumbatayo” dagba aboro ingapai yo.—1 Kor. 15:9; 1 Tim. 1:15. w24.03 27 ¶5-6

Pai sa ani narengbe ka wirikaha ti ga Bakindo Yoasa gbegberẽ diaberã nga, si naida ani sia agu abakure nika du na wene maapai kurirani—agu abakure nakpinyemu Yekova nga aguyo naida ka sa ngbarago tiko. Ani ima rengba ka zio bakure na agu aboro garãyo naima kio ti gaani watadu aguyo du garãyo kusende ti gaani. Oni tingidi gupai nga, garã Yoasa adu kusende ti garã bakureako nangia Yoyada. Nibipa agu aboro mo asiayo ni abakureamo, mo sananga tiro nga: ‘Ya mo i naundo re tipa mi nyakasi gimi idapase kuti Yekova? Ya mo i nangarasa re tipa mi naaraka kuti ga Mbori arugute? Ya mo i nafura tipa Yekova na gako nyanyakipa arengo? Ya mo i nayugo irisa tipa ga Mbori arugute? Ya mo i nape kina gupai fere mi aida kaa giaha, watadu i na wingbaduse ka ruga re ho mi amanga ingahe ni?’ (Snz. 27:5, 6, 17) Ka pe rengo, ka abakureamo aakpingo nyemu Yekova ya, si aidanga mo zi bakure na yo te. Ono ka si du nga abakureamo nakpinyemu Yekova, mo kakuti yo nyanyaki—i nikaa undo ro ti aregbo dunduko mo naamanga gupai du ni wenehe!—Snz. 13:20. w23.09 9-10 ¶6-7

Arufa nga bambata bangiri kekeapai nga ga aGiriki, na Omega ki ngia yangara bangiri kekeapai. Nigumba Yekova gupai nga ko nga “Arufa na Omega,” ko aaundo rani ani rugutirani na gupai nga, ho ko atona pai ni, ko du wa ka ko digisihe. Tifuo Yekova kusi aAdamu na Eva, Ko aya: “Mbori ki fu maku fu yo, Mbori ki ya fu yo, ‘Oni zúga azuga, ki nge ange, ki hisi kpotosende berewe ki zogo ho.” (Bam. P. 1:28) Ti gu bambata regbo Yekova apepa gako ringbisapai, si adu wa ko naya “Arufa.” Ko aima pepa gako ringbisapai ziazia nga: Regbo nika yeaye ho rengberengbe atita aAdamu na Eva ni aboro giasangba nika hiiso kpotosende ni na ki saha ni paradizo. Ho gako ringbisapai tipa kpotosende na aboro nika digisotihe ni dunduko, na agu atita aAdamu na Eva nga aboro giasangba ki hiisi kpotosende, na ki saha ni Paradizo, si nika ngia “Omega.” Tingbafuo Yekova nyasi kusa “ngbangbaturũ na kpotosende, na rimbasa agu ahe du rogo ho dunduko,” ko ape gu kurapai tipa ka yugo gupai nga gako ringbisapai du wa ka si digisitihe. Ga Yekova ringbisapai tipa aboro na kpotosende nika digisotihe dunduko ti digido saba uru.—Bam. P. 2:1-3. w23.11 5 ¶13-14

Gu kpakarakpakara nunguro naaguari Babera yo ka ndu ku Yisaraere yo re arengbe ka dia adiwi biama tipa boro da yo, ono Yekova akidohe nga ko nika dia ai gupai narengbe ka ka nayo ti gate. Agu aYudo naadu ni ruruyo aima ino pa agu aundo naadu ti karagatise ku Yisaraere yo, nga agu aundo paha aima kio gbe kisusi pa agu apai ka i ambupaha. Gu bakere mosoro ka i agbia ha aakodapa gayo irisombori. Bamotumo aadunga ho nga gu aYisaraere arengbe kaa fu amotumo riihe wa gu si aaidaha kuti ga Moize aNdiko te, aboromotumo aadunga ho ni mbakadimbakadi yo narengbe kaa zo agu amotumo re te. Na badungu aboro naadu ho rogo gu gbata re naairiso ziree ambori, bange agu aboro re aima nge kisusi bange agu aboro naadu na irisa tipa Yekova watadu gako arugute. Sidu, agu akutu aYudo naadu ho naakpinyemu Yekova aangera kumbatayo tipa ka karagatiyo ku rogo gayo ringara, yo i arengbe ka karaga ziazia irisombori ni berewe kubaha. w23.05 14-15 ¶3-4

Ani naida na gu undo nga ga ga Mbori ziazia toro tipa wa ka ani aandu kumbatayo kindi kaa mangapai “wa awiri imarago.” Tipagine? Mbiko taatapai ngaha ka nye ni gigiri rani rogo gi wasiwasi zegino re te. (1 Tesa. 4:3-5, 7, 8) Ziazia toro ima rengba ka undo rani ani di agu aberãpai kusayo nga ga agu aboro du rogo zegino nga aguyo abingo apai wa gu Yekova abihe ya. Ziazia toro ima rengba ka undo rani a ani kusi “zuzu imarago du rogo wenepai yo dunduko na rurupai.” (Ef. 5:9) Gene sa rengbe ani ka gbia ziazia toro ngbaha nga ni manga ani kparakpee tipaha. Yesu ape gupai nga Yekova nafu “Ziazia Toro fu agu yo nasana ko.” (Rk. 11:13) Na ani nagbia ziazia toro a ho ani atambua Yekova ni wa sa ti regbo agu adunguratise nga ga aKristano. (Ef. 5:19, 20) Gu wene maapai ga Mbori ziazia toro nika du na ni kurirani nika undo rani ani raki ngba gu gene nafu ngbarago fu Mbori. w24.03 23-24 ¶13-15

Ya mo mo naida na bakere hipai? Ka si du wo, mo mangi kparakpee tipaha. Hipai nga papara zuzu toro. (Gara. 5:22, 23) Sidu, ani ima rengba ka kpara fu Yekova tipa ziazia toro na ki sana ko ko undo rani ani sonosi apapara zuzu toro. Ka ani gbiatirani na gupai naˈasada gaani padu na hipai watadu zerangbaduse, si nika ida ani “sána he” kindi tipa ziazia toro tipa si undo rani ani du na zerangbaduse. (Rk. 11:13) Ani ima rengba a ka sana Yekova ko undo rani ani naabi apai wa gu ko abihe. Na tifuo manga ani kparakpee, si naida ani mangi bakere asadatise tipa kadu na zerangbaduse na aˈuru dunduko. Ka ani aandu kindi kumbatayo kaa manga kparakpee tipa zerangbaduse na kini mangi asadatise kadu na ni, Yekova nika undo rani aundo ani du na zerangbaduse ka si vura du vurũ nga gi sino re aadunga tirani mbata te.Si ni wenepai a ka berẽkurii agu akpiapai nga ga Baibiri. Baibiri na dungu akpiapai rogoho nga ga agu aboro nadu na zerangbaduse. Ka ani berẽkurii agu apangbanga re, ani ima rengba ka wirika agu agene rengbe ani kadu na zerangbaduse rogoho. w23.08 22 ¶10-11

Yesu akido gu mokedi nangia Petero na pa ga Yekova aundo. Tingbafuo i zingisi Yesu be kpio, ko apepa kurapai fu Petero na akurako abawiriki nibipa gu kura iiriwo gene nga ga zio atĩo. (Yo. 21:4-6) Zanga kapa, gi iiriwopai re akido Petero na gupai nga Yekova ima rengba ka fu agu ahe nga ga borose fuko taata nga gu du ko na zingoho. Isoke gu bawiriki re aima tingida agu afugo Yesu nangia Yekova nika fu ahe afu fu agu aboro ‘nagbáta gako ngbi mbata.’ (Mt. 6:33) Agi apai re dunduko naundo Petero ko moi sunge tungusapai ni bambatapai rogo gako raka yo, angianga gako sunge zio atĩo ya. Ko amangi dezirepai ni wingbaduse rago Pendekote rogo 33 Fuo Batikayo Kristo, ki undo akutu aboro i idi na wene pangbanga. (Amo. 2:14, 37-41) Tifuo gure, ko aundo aboro Somorona gbiati aGendiria i wirikipai tipa Kristo na ki pekefuo ko. (Amo. 8:14-17; 10:44-48) Ni rengo, Yekova amangisunge na Petero ngba bakere gene tipa ko ye na ngbatunga aboro dunduko ku rogo dungurati. w23.09 20 ¶1; 23 ¶11

Agarã wa ue fuo aBabero gbarasi Yerusarema, Bakindo Nebukadenesara arari gbegberẽ musumo tipa bakere kpiahe. Ko afu gu zinahe nga, gako aboro tatamana kodihe na Daniere pepa gu musumo fuko ko ararihe gbiati gupai gu musumo re ayugoho, ka i aamanganga gipai re ya, ko nika imo yo dunduko. (Dan. 2:3-5) Si aaida Daniere mangipai niipo; ka si adu nga wo ya dungu aboro narengbe ka kpi. Ko arimi “ku dimoyo ki sana bakindo ko ringbisi rago fu ko, ko kusi sangba musumo fu bakindo.” (Dan. 2:16) Gipai re nayugo gupai nga Daniere adu na wingbaduse gbiati idapase. Ngba gini gene? Baibiri apenga gupai nga Daniere asakirogo amusumo yo mbata te. Ko asana abakureako “i sana Mbori tipa inapai tipa gi okooko pai re.” (Dan. 2:18) Yekova aima karagapai kuti agu akparakpee re. Na ga Yekova undo, Daniere asakirogo ga Nebukadenesara musumo yo. Si ki sa gupai nga ka Daniere na abakureako kpingo ya. w23.08 3 ¶4

Mo bi agu aundo du ti du na zerangbaduse. Ho du ani ni na zerangbaduse, ani nadu na bakere ngbarago na kidu zezeredi. Sidu, zerangbaduse ima rengba ka sa gupai nga berãrani yo gbiati kpotorani du wenengai. Ho du ani ni na zerangbaduse na kura aboro, ani nagbia ngbarago ti du ani na wene pagume na yo. Gaani dungurati nadu na bakere kodatise rogoho. Ka boro pe gupai nga gu ba zinga tirani, ani agunga sa zinga te, na ani asanga gu kpakarapai re si du ni bakerepai te. (Tam. 37:8; Snz. 14:29) Ono gu nyakipaha gbe nga, ani nawirika gu Barani du ngbangbaturũ yo na ani nambeda gbe na ko. Zerangbaduse ni rengo nga bawene sino nga gu ani dunduko agbia undo ti ni! Si taata ti aregbo dunduko kadu na zerangbaduse te, ono na ga Yekova undo, ani ima rengba kaa ndu kumbatayo kindi kaa sonosa gi sino re. Na wa ani nikaa ‘súnguda’ vovo zegino ni zerangbaduse si ye, ani ima rengba kadu na gu kido nga Yekova nika undo rani aundo na ki banda rani. (Mika 7:7) Ani dunduko dinga berã adia kaa ndu kumbatayo kindi kaa du na zerangbaduse. w23.08 22 ¶7; 25 ¶16-17

Yakoba ape gupai nga gi kumba re aima rengba kaa pe gupai nga ko na idapase, ono gako mangaapai aayugongo gupai nga ko adu na idapase te. (Yak. 2:1-5, 9) Yakoba afura a tipa gu boro ‘naabi wirina naadunga na roko ti ni watadu riahe ya’ ono ka ni afunga gu undo si aida na ni ya. Ka gu boro re vura pe gupai nga ni na idapase, gani mangaapai ayugongo gupai nga ni na idapase te. (Yak. 2:14-16) Yakoba afura tipa Raba nga ri nga gu boro nayuguhe rogo gari mangaapai yo nga ri na idapase. (Yak. 2:25, 26) Ri aima giapai tipa Yekova, na ri aini gupai nga ko aundo aYisaraere. (Yos. 2:9-11) Gari mangaapai ayugu gupai nga ri adu na idapase rogo gari mangaapai yo—bambiko gari idapase, ri abanda gu raka naadu ngbapai yo nangia ga agu abamoirago ue nangia aYisaraere. Ni sangbana gipai re, i aya ti Raba na Abarayama i nga ruru aboro si ki vura du vurũ nga i dunduko nangia kpakpa aboro na ka i amanganga pai kuti ga Moize aNdiko ya. Gu kpiapai i amoihe nayugo gupai nga si naida ani yuguhe rogo gaani mangaapai yo nga ani na idapase. w23.12 5-6 ¶12-13

Wangia ani aKristano, si aidanga ani rengbe kina be gu tonatona ayugopai nga ga Baibiri te. Na gu undo nga ga ga Mbori ziazia toro, ani na nyemu ka wirika “gu dudungura apai nga ga Mbori.” (1 Kor. 2:9, 10) Mo ima rengba ka manga dudunguro wisigopai na gu sasa nga ga mbeda na Yekova. Ni kpiapai, mo ima rengba ka manga dudunguro wisigopai ka bi wai ko ayugu gako nyemuse fu gako amoyambu bakuru kusayo na wai gipai re ayugo gupai nga ko ima kpinyemu ro a. Mo ima rengba ka manga wisigopai a ka bi wai Yekova aaida aYisaraere naairisoko na ki ringbisihe kuti wai ko aida ani naairiso ko awere. Watadu mo ima rengba ka manga dudunguro wisigopai tipa gu sangbaanebi Yesu adigisihe ti regbo gako raka na gako tungusapai auru kpotosende. Mo ima rengba ka gbia bakere ngbarago ni wisigo mo pai tipa gu riiapai re na gu undo nga ga agu abuku nga Watch Tower Publications Index watadu Research Guide for Jehovah’s Witnesses. Manga dudunguro wisigo Baibiri ima rengba ka nyakasa gamo idapase na ki undo ro mo “bi gu inahe nga ga Mbori.”—Snz. 2:4, 5. w23.10 18-19 ¶3-5

Gu fugo gu mokedi nangia Petero amangisunge na ni nga “bakere” rogo yo nga “ka zaraga ha.” Ue papara gu veresi re nasakapai tipa gu maapai rengbe bakere nyemuse kadu na ni. Si nadada agu aingahe nga ga awirinarani. “Mo berẽnga gupai nga mbisa na gbakigbaki ahe rihe. Mo ima rengba ka dia roko ki gbaragihe ri gu mbisa re dunduko, angianga ka dada kina gbakigbaki he sa ya, ono tipa ka dada rihe dunduko na ni. Wa kina gure a, ka ani du na bakere nyemuse tipa awirinarani, ani ima rengba ka dada watadu ka mbupai fuyo angianga tipa zanga rengba sa watadu ue ya, ono ‘badungu aingapai.’ Si naida gaani nyemuse tipa kura aboro du ni nyanyakihe si ki sarani ani rengbe ka mbupai ti agu aingahe nga ga akuarani aidipase—ka si vura du vurũ nga gipai re ni kere kpakarakpakaraha. (Koro. 3:13) Ho ani ambupai ni fu kura aboro, ani nayugo na ni nga gaani nyemuse ni nyanyakihe na ani naida ka sa ngbarago ti Yekova. w23.11 11-12 ¶13-15

Ho garã Bakindo Yosiya adu ni 26, ko atona ka mbakada yekaru berewe kubaha. Ti regbo gu sunge re, i abi ‘kitabu na ga Yekova rugute rogo ho, gu ko agumba ha ku ngba Mose.’ Ho bakindo agi gupai ni i agedihe rogoho, ko amangipai nibasa tipa ka mangapai kuti gupai i akehe rogoho. (2 Peka 34:14, 19-21) Ya mo mo nakpinyemu kaa geda Baibiri dedede? Isoke mo naˈasada aˈasada kaa gedaha na aˈuru dunduko, ya mo mo naagbia ngbarago ti ni? Ya mo mo nazio agu averesi kuriro yo nga gu rengbe ka undo ro nitiro? Ho garã Yosiya adu ni 39, ko amangi gu ingahe nga gu nasa gupai nga ko kpi. Ko akido kina kuti tiko kuba ko sana Yekova tipa arugapai. (2 Peka 35:20-25) Pai kina ane rengbe ani ka wirikaha. Ka si vura du vurũ nga garã rani ima nge watadu ani ima dia gbanga regbo kuti wisigo Baibiri, si naida ani naandu kindi kumbatayo kaa gbata Yekova. Gere nakoda manga kparakpee dedede tipa gako arugapai, wisigo Fugoko, gbiati degatue kuti agu arugute agu aKristano naima nyaka rogo toro yo afuhe. Si ima rengba ka sarani ka ani mangingo bakere aingahe ya na si nawiraha nga ani nika du na ngbarago.—Yak. 1:25. w23.09 12 ¶15-16

Baibiri fura tipa dungu wene sino adee nga agu yo naakpinyemu Yekova na kini irisiko. I adu na agu asino tiyo nga, “zogatise” na “ki nimangi apai dunduko nzunzu.” (1 Tim. 3:11) Kurii gure, agu awirina nga adee ima rengba ka bi wene akpiapai nga ga agu awirina niima nyaka rogo toro yo rogo gayo dungurati nga gu rengbe yo ka wirikaha. Gu paranga awirina nga adee, oni berẽnga pa agu awirina nga adee oni naini yo rogo gaoni dungurati nga agu yo moi wene kpiapai nga gu rengbe oni ka wirikaha. Oni bi gu wene asino du tiyo; na oni ki bi wai rengbe oni ka yugo agu asino re. Gu nyanyakipa sino si aida si du ti agu aKristano niima nyaka rogo toro yo nga umbasitise. Ka si du nga dee na umbasitise, ri nika du na wene pagume dagba ri na Yekova gbiati kura aboro. Ni kpiapai, gu dee kpinyemu Yekova nasia ka pekafuo agu arugapai ni umbasitise gu Barani du ngbangbaturũ yo asigiraha. (1 Kor. 11:3) Yekova sakipai rogo gu veresi re tipa gu boro Ko nafu pagbia fu ni ni naangbembatayo rogo dungurati na rogo ngbadimokporo. w23.12 18-19 ¶3-5

Yekova naida gupai be kumbakudee nga ko du ni wene bakureari na ki undo ri ri nye mbembedi na Yekova. Sia pa apai, yugo irisa fu adee, na kidu ni gu boro aboro akido akido kutini, nika undo ro mo du ni wene kumbakudee. Tingbafuo manga mo rogatise, mo ima rengba kadu ni baagude. Ginipai rengbe mo ka wirikaha be Yekova tipa kadu ni wene baagude? (Ef. 6:4) Yekova ape gupai gbaiga fu Wiriko nga Yesu nga, ko ima kpinyemu ko na ko ima ngba gbe tiko. (Mt. 3:17) Ka mo da ni baagude, si naida mo naakido awiro dedede na gupai nga mo ima kpinyemu yo. Mo naatambua yo dedede tipa gu wene apai i amangaha. Gu baagude na wirika ga Yekova kpiapai naundo awiriyo tipa i da ni agu aKristano niima nyaka rogo toro yo. Mo ima rengba ka mbakada tiro awere kadu ni wene baagude niyugo mo nyemuse fu agu aboro du rogo gamo ngbadimokporo na rogo dungurati na kini ngerefuo yo wenengai na ki wiriki wai ka pe gupai fuyo nga mo ima kpinyemu yo na i na nyanyakipa yo bangiro.—Yo. 15:9. w23.12 28-29 ¶17-18

Wa vura duhe nga ani nga ga Yekova ruru amoyambu, ani nagbiatirani kindi na akpakarapai na kini woki wakina gu kura aboro dunduko agbiatiyo na ni. Kupati gure, ani ima rengba kaa hi sogote na arungosiro be agu aboro nasoga ga Mbori aboro. Wa vura duhe nga Yekova abandanga rani ti gbia ani tirani na agu akpakarapai re te, ko nakidohe ka undo rani. (Yes. 41:10) Na gako undo, ani ima rengba ka banda gaani ngbarago, ki mangi wene adiaberã, na ki nye niruru rani fuko zavura rogo kere kpakarakpakaraapai. Yekova nakidohe ka fu guhe furani Baibiri ayambaha nga “gu zereda nga ga Mbori.” (Frp. 4:6, 7) Ani nagbia gi zereda re mbiko kina gupai nga ani na mbembedi pabakure na Yekova. Gi zereda re ‘gasi rugatinapai dunduko’; si ni bawenehe gbe kisusi wai rengbe ani ka berãpaha. Ya mo mo amangingo kparakpee kakaka fu ko na tingbafuo gure kina ngbaro ki zere ka bi wai mo agbia zereda? Mo abi tiro wa gure mbiko Yekova afu “gu zereda nga ga Mbori” foro. w24.01 20 ¶2; 21 ¶4

Agu aboro nakpinyemu Yekova naida ka taasarimo ko na ngbaduyo yo dunduko. Bakindo Davide ake gupai nga: “Ako mbisimore, mo sámbua Yekova; agu apare du rogo re yo dunduko, si sámbua kparakpara ziazia rimoko!” Davide aima rugatiko na gupai nga ho ani atambua rimo Yekova ni, gure a nga ani natambua Yekova. Ho ani agia rimo Yekova ni, ani naberãpa gu wene sino boro nga ko na gu weneapai ko amangaha. Davide aaida si du ni ziaziaha na kini tambuaha. Ko aaida ka manga gipai re na ‘abarapa ko dunduko’—du rogoyo nga na ngbadukoyo dunduko. Wakina gure a, aRevi nanaangbembatayo rogo tambua Yekova yo. I aima ida kuti gupai nga fugo ho rengbe yo ka mangasunge na ni tipa ka peka gu weneapai du tipa Yekova na ziazia rimoko te. (Nem. 9:5) Zanga kapa, ngbatunga gi umbasitise na tambuahe re aye na ngbarago ku kpoto Yekova yo. w24.02 9 ¶6

Ka si du nga mo adanga ti sásá nga gu mo arengbanga ka da ti ni ya te, Yekova abingo ro nga mo na diabese te te. (2 Kor. 8:12) Mo bi agu akpakarapai naká na mo ti gamo sasa ni gupai rengbe mo ka wirikapai ti ni. Mo berãpa agu apai mo naima da ti ni. Baibiri nape gupai nga “Mbori ni iraira ko te. Bangiriko ago nga ti gaoni sunge te.” (Eb. 6:10) Sidu, si aidanga bangiro go a ti gupai mo namangihe te. Mo berẽkuriipa agu asásá mo naima da ti niwa gu nga sonosa wene pabakure na Yekova, fura fu kura aboro tipa ko, watadu zio bapatiza. Kina wai mo amangi sonakumbatayo ki da ti gamo asásá nga ga toro bakuru kusayo, mo ima rengba kaa ndu kumbatayo kaa manga sonakumbatayo tipa ka da ti gu gamo sásá du awere. Mbiko gu undo nga ga Yekova, mo ima rengba ka da ti gamo sásá. Wa mo nikaa asada ka bi wai Yekova naundo ro mo da ti gamo sásá na gipai re nika undo ro mo du na ngbarago wa mo nikaa mangapai ka da ti gamo sásá. (2 Kor. 4:7) Ka omero aabatanga ya, mo nika gbia bakere amaku.—Gara. 6:9. w23.05 31 ¶16-18

Yekova nangera tipa agene ka yugoho ngbaha fu gako aboro nga ko ima kpinyemuyo na ko na ngbarago na yo. Ziazia Kekeapai fura tipa aregbo ue nga gu Yekova agumba gupai fu Yesu ti ni nga ko nga gu Wiriko ko nakpinyemuko gbe na ko ima ngba tiko. (Mt. 3:17; 17:5) Ya mo mo nakpinyemu Yekova gumba gupai foro nga ko na ngbarago na mo? Yekova afuranga areme furani ngbangbaturũ yo te, ono ko nafura furani rogo Fugoko yo nga Baibiri. Ani ima rengba ka gia agu afugo nga gu nayugoho nga Yekova na ngbarago na ani ho ani ageda agu afugo Yesu ni du rogo Akitabu Wene Pangbanga. Yesu awiriki asino Bako teketeke. Sidu, ho ani ageda gupai ni nga Yesu aya ko na ngbarago na gu ruru apefuoko nangia aboro zangarengba, ani ima rengba ka maa gupai ku berãrani yo nga Yekova nape kina gu bangisa afugo re furani a. (Yo. 15:9, 15) Ka si du nga aasada namanga rani, si ayugongo gupai nga Mbori aidanga na ani berewe te te. Kuba gure, si nafu momu furani ani yugu bakio gaani nyemuse tipa Mbori na wai ani nakido kuti ko.—Yak. 1:12. w24.03 28 ¶10-11