Waraga fu Noa

“AKO Noa, mi ima gedapai tipa ro bara dunguhe rogo Ziazia Kekeapai na tipa wai mo ambakadi bakurungba nga gu Mbori abatasi ro rogoho na gamo aborokporo be Ime Akangbii.”

Wogu Minnamaria nga degude du garãri 15 atona ka ke gari waraga nga gu waraga nangia abaangira sukuru yo na agu agude du garãyo tona ti 14 ki da kodi 21. Agu aboro biroo nga ga bambu-keda-awaraga du Finland yo, na gu riigbu nga ga abayugu fugo aboro Finland, na gu riigbu nangerafuo sunge kusa abuku rogo pa aboro Finland angia agu aboro nambakadipai tipa agu abaangira re. Si aida agu agude nadu rogo agu abaangira re keke awaraga du mburuhe rii buku. I arengbe ka ke gu waraga re fu gu boro nake gu buku re watadu fu boro sa dagba agu aboro du payo rogoho. Abayugupai asiaka awaraga susi 1,400 be gayo agude ki kedihe fu agu abaakumba naangera kurii agu awaraga abaangira re. Fuo gure, agu abaakumba re asia waraga sa nga gu nangba kisusi, fuo gure i ki siaka agu akuraha bawe nangbaki fuo gure ninamba ue, na ki siaka agu akuraha bawe nangbaki fuo gure ninamba biata. Minnamaria aduna ngbarago mbiko i amoi gari waraga rogo gu badona nangia namba biata.

Tipagine gu sosono degude nga Minnamaria ake gari waraga ti ni fu Noa, nga gu kumba naraki bakuru kusayo mbata fu agarã wa 5,000? Ri nasakapai tipaha niyaa: “Ziazia Kekeapai angia gu bambata he paha aye ku bangire. Mi ima ye ki rugutire wenengai na pa agu aboro du payo rogo Ziazia Kekeapai. Mi ima gedapai tipa yo bakere gbe, sidu, i fere wa i nikina unga yo. Noa mi asia ko tipa ka kepai tipa ko mbiko gako iiriwo raka adu kia ti gimi.”

Ga Minnamaria waraga fu Noa nadigo na agu afugo nga: “Mo kindi nga kpiapai tipa idapase na giasangbaa. Gamo raka nangarasa agu aboro dunduko nageda Ziazia Kekeapai i mangipai na ngbanyaa kuti gayo idapase.”

Gi waraga gi paranga nagedi Ziazia Kekeapai akehe re nayugo gupai nga, Ziazia Kekeapai nirengo ‘niungaha na kidu na tandu’ kurii aboro, nga aparanga na sosono aboro. —AEbere 4:12.