Asanahe be Agedihe

Rogo 2 AKorindo 6:14, ada Pauro aafura tipa yo ho ko agumba gu fugo ni nga, “azangaidapase”?

Ani nageda gupai rogo 2 AKorindo 6:14 nga: “Ka i kpamianga roni na azangaidapase ya.” Ka ani wisigi agu apai du pati gu fugo re, ani bi gupai abi ziazia nga, Pauro aafura tipa agu aboro adunga nipapara gu dungurati nga ga aKristano ya. Gu kura averesi Pauro akehe rogo Ziazia Kekeapai tipa gi fugo nga “azangaidapase” watadu “zangaidapase” re, si nasongoda gi giarogopai re asongoda.

Nikpiapai, Pauro abira aKristano tipa ndu na akurayo ku ngbangaa yo “ku barangba azangaidapase.” (1 AKorindo 6:6) Agu azangaidapase ko agumba payo herẽ re, i angia agu abasapungbangaa nanamangasunge rogo agu abambu gumba-ngbangaa nangia ga Korinda. Rogo gako ue waraga, Pauro ayawee Satana ‘akisi berã azangaidapase.’ Bangiri ngbatunga agu azangaidapase re ‘nidadidadihe’ ti wene pangbangaa. Agi azangaidapase re amanganga asadatise tipa ka mangasunge fu Yekova te, mbiko Pauro asakirogoyo mbata fu ko gumba agu afugo re ki yaa: ‘Ho i asatiyo ni koyo du Gbia ni, i nadia ũdadahe kusayo tiyo.’—2 AKorindo 3:16; 4:4.

Gu kura azangaidapase nakuo andiko watadu nairisokpiaahe. (2 AKorindo 6:15, 16) Ono tie, anga agu aboro dunduko nga azangaidapase nasoga ga Yekova amoyambu te. Beteyo nayugo gayo nyemu rengo ayugo. Dunguyo du gayo abadiarogatise nga aKristano na i na ngbarago ka sungo na yo. (1 AKorindo 7:12-14; 10:27; 14:22-25; 1 Petero 3:1, 2) Sidu, Pauro amangisunge na gu fugo nga “azangaidapase” tipa agu aboro adunga rogo gu dungurati nga ga aKristano ya a wa gumba ani he kuari re, nga gu dungurati duna agu aboro rogoho ‘idipa Gbia.’—Amokedi 2:41; 5:14; 8:12, 13.

Agu arugute adunga ngburungburu ya du rogo 2 AKorindo 6:14 nayugo gene fu agu aKristano dunduko du apai tipa yo nibakiakia na i naadia afugoho dedede ni agu arugute nga ga tatamana tipa gu Kristano nagbata kurani ka manga rogatise na ni. (Matayo 19:4-6) Nipatatamana, gu Kristano naima kpara tini fu Mbori na ki zi bapatiza agbatanga badiarogatise dagba azangaidapase te, mbiko gani andiko mangaapai, asásá, na agu apai idi ni kuti ni, si kia gbe ti gu nga ga ndikidi Kristano.

Ono tie, ginipai tipa agu aboro nawisigo Ziazia Kekeapai na kini koditiyo na gu dungurati nga ga aKristano? Ginipai tipa aguyo nga agu abatungusipai azionga bapatiza ya? Ya mo i a nga azangaidapase? Oó. Agu aboro ima dia gu rengo nga ga wene pangbangaa kugume na kini sono kumbatayo rogo gayo inohe tipa ka zio bapatiza, si aidanga i yambu yo ni azangaidapase te. (ARomo 10:10; 2 AKorindo 4:13) Mbata fu Korunerio zi bapatiza, i aayamba ko nga ‘gu ruru kumba nagunde ti Mbori.’—Amokedi 10:2.

Ya mo si adu tie nipatatamana fu gu Kristano naima kpara gani raka fu Mbori ni zi gu bakure nga ga rogatise na ki mangi rogatise na gu boro i nadi ni ku dagba awirina nigu batungusipai azionga bapatiza ya, wa duhe nga, gu ga Pauro arugute du nikekehe rogo 2 AKorindo 6:14 si arengbanga kadu tipa ni tee? Oó, anga patatamana ngaha te. Tipagine arunga ha ti ni ya? Mbiko gu rugute Pauro afuhe tipa agu aKristano nangia adekurugbo. Ko akepai tipa yo ki yaa: ‘Ri rengbe ka dia gu kumba ri aida ko, ono kina rogo Gbia yo.’ (1 AKorindo 7:39) Na ngbanyaa kuti agu arugute re, i nangarasa agu aKristano naima kpara gayo raka fu Mbori i gbata agu aboro i ka manga rogatise na yo kina “rogo Gbia yo.”

Gu fugo nga “rogo Gbia yo,” rogoyo nga gine gbiati gu du wa kinaha nga “rogo Kristo yo”? Pauro afura tipa agu aboro nadu “rogo Kristo yo” watadu “rogo Gbia” yo rogo ARomo 16:8–10 na rogo AKorosaio 4:7. Ka oni gedi agu veresi re, oni abi gupai yo nga, ngbatunga agu aboro re angia ‘abadiasunge’ na Pauro, ‘rugu yo tise na pako,’ ‘du nyemuko tirani,’ “kangara boromangapai,” na “amoyambu rogo Gbia.”

Gini regbo boro asa tini ni ‘moyambu rogo Gbia’? Ni nasa tini ho ni aguari ni nitini ka manga gupai moyambu naamangaha na ki mbupa gani apai. Yesu asakirogoyo ki yaa: ‘Gu boro ka kpinyemu peka re, ni mbupa gani apai, ki di gani wagiwagi ngua, kini peke re kindi.’ (Matayo 16:24) Boro natona ka pefuo Kristo na kini fu tini fu Mbori ka manga agu apai dunduko ko akpinyemuhe ho ni akpara gani raka ni fuko. Ngbutuko fuo gure, ni nafu tini tipa ka zio bapatiza na ki da niga Mbori siasia bamangisunge ki du gigirii barabangiri Yekova Mbori.a Sidu tie, pa manga boro ‘rogatise kina rogo Gbia yo’ nayugo gupai nga, boro nadia kina gu boro yugu gupai nga ni nirengo nga idipase, ima kpara gani raka fu Mbori ki sa tini ‘niga Mbori moyambu, na niga Gbia Yesu Kristo moyambu a.’—Yakoba 1:1.

Si naida i tambua gu boro nawisigo Ziazia Kekeapai na aDezire Yekova na nasona wenengai rogo toroyo. Wa vura duhe wo, ni ata kparanga gani raka fu Yekova na ki fu gani raka tipa mangasunge fuko na ki mbupa kura gani apai te. Ni kindi ngba gene kini mangi agu a’aria si aida ni mangihe. Si naida ni nyasi gu bangua a’ariapai si aidaha beni tipa ni kpara gani raka na ki zi bapatiza ki sa tini ni Kristano mbata fu ni nika berãpa gu kura bangua ariapai rogo gani raka, ngbatunga gu du wa rogatise.

Ya mo si adu niwenepai fu Kristano ni zi gu bakure nga ga rogatise na gu boro nawira ni nasona asona wenengai rogo gani wisigo Ziazia Kekeapai na isoke kidu na nyemu pido ni daho ni ka zio bapatiza ni mbata i kini mo ka rogatiyo? Oó, si adanga te. Ka si mangi wo, ndu gupai gi boro re awisigo Ziazia Kekeapai ti ni dunga ziazia te ka ni ini gupai nga, gu Kristano naima kpara tini fu Mbori napido ni ka dia ni fuo zio ni bapatiza.

Bakere gbe, gi batungusipai azionga bapatiza re ya aimanga te ni ki sono rogo gani wirikapai na ki zi bapatiza. Sidu gu rugute du kuari tipa boro mangi rogatise kina rogo Gbia yo re ni gupai ruaru. Ono ginipai ka mangi ka singia boro ho garã ni naima da ba rogatise, na i asonosi ni rogo gu kporo nga ga aKristano, na ni niima du ngangaraa rogo dungurati tipa bete agarã, na kini mangisunge nigu batungusipai azionga bapatiza ya? Kangia wo tie duhe, gine naká na ni ti kpara ni gani raka fu Yekova? Tipagine du ni adu ti ni dindikodindiko? Ni nakapa akapa kuti apai? Wa avuranga du ni nigu boro zangaidapase ya, ono tie ani arengbanga ka fura tipa ni ya ni “rogo Gbia yo” te.

Ga Pauro arugute tipa rogatise, si tipa undo rani. (Yesaya 48:17) Ho duhe ni nga agu aboro ue naida ka rogatiyo re i aima kpara gayo raka fu Yekova, gu ngbaanga nga ga rogatise mangi yo ho dagbayo re, si na mburuhe nyanyakii rii agu apai nga ga toro. Gayo andiko mangaapai gbiati asásá, si kina sa. Gipai re nafubee bakere tipa ngbarago rogo gayo ramukporo. Kurii gure, pa manga boro ‘rogatise rogo Gbia yo’ nayugo gupai nga, ni kakuti manga rurupai fu Yekova na si nandu na ni sa agu amaku nika nyeanye, mbiko Yekova ‘nayugo tiko niruru ko fu ruru boro.’—Atambuahe 18:25.

[Gu rukutu kekeapai du bandu kpewaraga yo]