Tipagine Si Aida ti ni Ani Ini Gu Boro Nga Vura-Kristo?

Bakuru kusayo, ga Mbori toro adu kugii gu mokedi nangia Yoane ko kepai ki yaa: “Oni agi he ya vurakristo naye.” (1 Yoane 2:18) Nairiwo agu afugo re! Tipa dungu kama agarã, aboro aima digo niwisigi rogo agu afugoyo re. Da nga vura-Kristo? Ti gini regbo ní nika ye? Ginipai ní nika mangaha ho ní nika ye ni?

VURU gi badungu agarã susi re, badungu aboro i naayamba yó nga avura-Kristo. Mbata kusayo, agu aboro i anaayamba yó nga ‘avura-Kristo,’ i adu dagba aYuda, dagba apapa, gbiati dagba agu abazogo nangia ga gu bariwara ngbii nangia ga aRomo. Nikpiapai, ho gu Bazogo nangia Frederick gu ue ko (1194-1250) aaidanga ni ka rimiso tiko kurogo gu vura nangia ga pambori tipa ka songoda kanisa ya, Papa Gregory gu ribua ko ayambu ko nga vura-Kristo, na kini do ko kusayo rogo gayo kanisa. Gu kumba nadiba Gregory nangia Innocent gu biama ko, ko aye ki nyakasi kina gu bangisapai re berewe tipa Frederick. Nikaragapai, Frederick ape gupai nga Innocent angia vura-Kristo.

Kina gu mokedi nangia Yoane sa dagba abakeke Ziazia Kekeapai yo namangisunge na gu fugo nga ‘vura-Kristo.’ Rogo awaraga ue dagba agu ko akehe, gu fugo nga ‘vura-Kristo’ watadu ‘avura-Kristo,’ si yo bara bisue. Agu averesi du agi afugo rogoho re, si gu tangarayó ho rogo gu kpewaraga du fuo gere. Rogo agi averesi re, ani nabi gupai nga vura-Kristo nga iraziree na kidu nibanangi aboro, nga guni naida ka gbarasa ga kurani pagume na Kristo gbiati Mbori. Mbiko agi apai re, gi mokedi nangia Yoane re angarasi akurako aKristano ki yaa: “Abadiangba, ka oni ídi nga pa agu yo dunduko naya Ziazia Toro ti yo ya, ono oni ásadi yo, si ngia i naye yo du Mbori ni, bambiko dungu zire anebi ndu rogo zegino.”—1 Yoane 4:1.

Yesu ape gupai a nga ani bandatirani ti airanangahe, watadu zire anebi. Ko ayaa: ‘I naye fuo roni na kpoto akandoro, ono kpotoyo yo du wa awaru nari ngbara. Oni aína yo ti zuzuyo [watadu ti gayo mangaapai].’ (Matayo 7:15, 16) Ya mo Yesu aaza gako abawiriki aza a ti agu avura-Kristo narukuba kurapai? Ani bingo wai rengbe ani ka ino gi gbegberẽ banangi aboro re.