Ya Mo Mbori Naberã Pare Aberã?

Agu akaragapai aboro naafuhe nga:

▪ “Pa Mbori ima kio, ko arengbanga ka berã tipa gimi apai te.”

▪ “Mi ainongo ho tigu nga ko naberã aberã tipa re te.” Ginipai Yesu agumbaha tipa gipai re?

▪ “I nabaga[nga] abavurukporo bisue tipa rukutu marã ue te? Bangiri Mbori ago nga ti gu ru wa sa te. Ono mangerironi tigaha ni gedigedi he dunduko. Ka oni gúnde nga ya; oni nga bahe ti dungu abavurukporo.” (Ruka 12:6, 7) Zanga kapa, Yesu ayugu gupai ane nga Mbori naberã parani aberã.

▪ “Ka oni wísigi nga pai ki ya, ‘Gine ani ka ri he?’ na, ‘Gine ani ka mbira ha?’ na, ‘Gini roko ani ka ukadi tirani na ni?’ ya. Bambiko aGendiria nagbata agi ahe re dunduko; bambiko Baroni du ngbangbaturũ yo ini he ya oni nara mbiko agi ahe re dũ.” (Matayo 6:31, 32) Yesu aima ino gupai nga, Mbori ima inopa agu ahe du ani na zingoho.

ZIAZIA KEKEAPAI nagumba gupai nga Mbori naberã parani aberã. (Atambuahe 55:22; 1 Petero 5:7) Ka si du tie nga ko naberã parani aberã areme, tipagine ani arungo ti ni wa gere? Ka si du nga Mbori nga nyemuse na kidu na bakere ome tiko, tipagine ko anyasanga ti ni riipa agu arungo namanga ya?

Gu karagapai du tipa agi asanahe re, si nga Satana Bakitingbanga nga bazogo gi zegino re, nga gu karagapai dungu aboro ainongo pai tipaha ya. Ho Satana aʹasadi Yesu ni na ki idi ka fu agu akindo dunduko nga ga zegino fuko, ko ape gupai fuko nga: “Mi afú gi tandu foro dunduko re na gaha taarimo; bambiko i afu he ku bere; mi ki fu he fu gu ni idi mi ka fu he fu ni.”—Ruka 4:5-7.

Da nafu gu pagbia fu Satana nga ga zoga zegino? Ho gu bambata avungurani nangia Adamu na Eva agisangba Satana ni na ki basasangba Mbori, gure ayugu gupai nga i ima sia Satana ko du nibazogo gi zegino re. Natona ti gu regbo samungu re kada ku areme, Yekova Mbori ambu gene fu Satana ka yugo nani fu aboro nga rurupai ti ga Satana zogarago te. Yekova amanganga aboro ngbaome i naairisoko te, ono ko ima zaka gene furani ani karaga tirani koyo du ko ni.—ARomo 5:10.

Pa berã Mbori parani nasako ko idi Yesu ye ka kpi ka kusa rani tii ga Satana zogarago. Barambeda kumbatayo, Yesu nika ‘gbarasa guko rogo kpio yo, nadu na tandu kpio, nga bakitingbanga.’ (AEbere 2:14) Gure nika sako ko “gbarasi ga bakitingbanga mangaapai” kusayo.—1 Yoane 3:8.

Gi kpotosende re asatihe berewe ni Paradizo wa gu si adumbata. Ti gu regbo re, Mbori ‘awéga aume ti bangiri aboro kusayo dunduko. Kpio adunga berewe te, rungo adunga yo na akpee na ima a te, bambiko bambata apai aima nyasa.’—Yugoti 21:4, 5.a

[Gu rukutu kekeapai du bandu kpewaraga yo]

[Gu kpiahe du ti kpewaraga 8]

Gi kpotosende re asatihe berewe ni Paradizo wa gu si adumbata