Ya Mo Airisombori Dunduko Mbori Aida Nani?

Agu akaragapai aboro naafuhe nga:

▪ “Apambori dunduko nandu na boro koyo du Mbori ni.”

▪ “Ka mo vura du kina rogo gini pambori, si agberãnga bangiriko te, padu mo nirururo ko aida nani.” Ginipai Yesu agumbaha tipa gipai re?

▪ “Oni rími rogo pangipangi ngbadimo; bambiko gu ngbadimo na gu gene nangbe koyo du kpio ni, si du ni kikii he, ni basisi he, dungu aboro narima koyo. Bambiko gu ngbadimo na gu gene nangbe koyo du unga ni, si du ni pangipangi he, ni fitikiri he, aboro nabi he ni kina umba yo.” (Matayo 7:13, 14) Yesu agumbanga gupai ane nga, apambori dunduko nandu koyo du Mbori ni te.

▪ “‘Dungu aboro nikaya fere ni gu rago re wẽ, Gbia, Gbia, ani afuga nga pai ni rimoro, te? Ani ado nga adaimona ni rimoro, te? Ani amanga nga agu apai du na tandu ni rimoro te?’ Ono mi akúsa ha fu yo ki ya, ‘Mi aína nga roni wa sa te; oni gúari pati re, amangi irairapai.’” (Matayo 7:22, 23) Agu aboro natangbaduyo kini yawee i nga apefuo Yesu, ko aidanga naayó te.

DUNGU aboro nabi gayó aida gbiati asino atitayo na nyanyakipaha. Ono ginipai rengbe ka manga ka si du nga gi gayó aida na asino atitase re si na ngbanya kuti Fugo Mbori nga Ziazia Kekeapai te? Yesu ayugu gu kerepai rengbe ka gbia boro ti pekafuo sino atitase fu agu abarumbatayo rogo pambori nadu ti ragoko niyaa: “Oni sa ga Mbori rugute ni kungba he mbiko sinoroni.” Ko akodi gu kura fugo Mbori kuti ni nga: “Agi aboro re i nairisa re kina auru ngbayo; ono kpotoyo yo ti re tuturũ; ono i airisa re airisa vurũ niyugu gayo apai nga kina ga aboro ndika.”—Matayo 15:1-9; Yesaya 29:13.

Si naida gaani sino mangaapai ringbisitihe sa na gaani idapase, angianga kadu na kina kungbo ida sa ya. Agu aboro natangbaduyo kini yawee i nairiso Mbori, Ziazia Kekeapai naya tipa yó wee: “Ya yo auru ngbayo i ini Mbori; ono i naora rimoko [aora] ti gayo mangaapai.” (Tito 1:16) Nirengo, Ziazia Kekeapai nafura tipa agu aboro naraka ti gi gaani regbo re niyaa: “I [n]akpí nyemu sangba borose susi nyemu Mbori; ki nika kuti kpia sinombori, ono i ati kangu tandu he. Oni kpára tironi ti agi yo re a.”—2 Timoteo 3:4, 5.

Si daada boro naanyakasa apai watadu kaa mangapai kakaka, ono si naida ní mangi gu kurapai amanga berewe kurigure. Tipagine gumba ani he ti ni wo? Gumba ani he wo mbiko gupai nga, boro rengbe arengba kaa nyakasa kungbopai watadu ka konga kuti manga gu kungbopai arunga ya. Sidu, si ninyanyakipa pai furani ani du na ndikidi inohe tipa Mbori. (ARomo 10:2, 3) Ka ani du na ndikidi inohe tipa Mbori na kini mangipai ringbisihe kuti gupai Ziazia Kekeapai agumbaha, si nika sa rani ani fu ngbarago fuko. (Matayo 7:21) Nirengo, ndikidi pambori nakoda wene ndu mangaapai, gu ida du niruruhe, na ruru mangapai. Na ruru mangapai nga ka manga gupai Mbori akpinyemuhe rogo gaani raka yo na aʹuru dunduko!—1 Yoane 2:17.

Ka oni aida ka ino kura dungu apai nibipa gupai Ziazia Kekeapai ayugoho tipa Mbori, oni sana aDezire Yekova i ye ka wisigo Ziazia Kekeapai na oni zanga oni tumo atumo tipaha.

[Gu kpiahe du ti kpewaraga 9]

Ndikidi pambori nakoda wene ndu mangaapai, gu ida du niruruhe, na ruru mangapai