“Oni Nye na Gi Pai”

“Ka oni nye na gi pai, oni du adu tie ni gimi abawiriki ni rengo; oni aína rengo aina, ki ra ni rironi be rengo.”—YOANE 8:31, 32.

Rogoyo Nga Gine? Ga Yesu “pai” nayugopa agu apai ko anaayugoho, nga gu naaye be nyanyakipa boro. Yesu ayaa: “Buba nakedi re, ko fu gu rugute fere mi ka gumba, na gu mi ka tungusa.” (Yoane 12:49) Yesu aya fu Bako nga Yekova Mbori rogo kpee yo wee: “Ga pai nga rengo.” Wo ko anaadia apai dedede rogo fugo Mbori yo tipa ka songoda gako yugopai nani. (Yoane 17:17; Matayo 4:4, 7, 10) Sidu tie, ndikidi aKristano ‘nanye rogo gako pai yo,’ watadu i naida kuti fugo Mbori nga Ziazia Kekeapai nga si nga “rengo” na si nga gu yangada he gayo idapase na gayo mangapai aru riihe.

Wai Agu AKristano Nadumbata Amangihe? Gu mokedi nangia Pauro ayugu kina gu bangisa irisa tipa Ziazia Kekeapai Yesu adu nani. Ko akepai ki yaa: “Ziazia Kekeapai dunduko si aye be ga Mbori Toro si ki rengbe tipa yugopai.” (2 Timoteo 3:16) Agu akumba i asiayo i naayugopai fu akurayo aKristano anaaka “kuti ruru afugo nyanyaki.” (Tito 1:7, 9, NW) I azungodi agu aKristano nadumbata i ká “nyemu tatamana na kungba nangahe, wa du pa aboro, na gu tata pai nga ga zegino, wa pa Kristo te.”—AKorosaio 2:8.

Ada Namangaha Wo Areme? Ringbisihe kuti gu ga Vatikani buku nga Dogmatic Constitution on Divine Revelation, i akusihe rogo gu garã nangia 1965, i ake paparaha rogo gu katekisimo nga ga agu aKanisa Nga ga aKatoriko nga gu nayaa: “Anga kina rogo Ziazia Kekeapai sa gu Kanisa nga aKatoriko amaa mburu gaha apai dunduko riihe te. Sidu, sino atitase na nyanyakipaha kina wai a du Ziazia Kekeapai.” Bake magazini du rimoko nga Maclean adi fugo natungusipai sa du Toronto yo rogo gu ringara nga Canada ki kehe nga gu ri asanahe nga: “Tipagine ani akpinyemu gupai ti ni nga agu afugo naima dia agarã wakina akutu ue nungusi rani? Ani gu duadu na badungu aberãpai nga gaani, ono gu yugopai nga ga Yesu gbiati Ziazia Kekeapai nasa gupai nga ka si nyakinga ya.”

Buku sa du rimoho nga New Catholic Encyclopedia afura tipa aDezire Yekova ki yaa: “I nabi Ziazia Kekeapai niguhe mburu gayo idapase aru kurihe gbiati gayo andiko nga ga sino mangapai.” Barambeda kusayo, kumba naraka Canada yo ade fugo ngba Dezire Yekova sa wa ri atona ka sakapai tipa tiri. Ko aya furi wee: “Mi ima ino da nga mo,” ko ata pe gipai re kini yugu beko kuti gari Ziazia Kekeapai ki gumba gupai nga, “si i aino roni ti ni.”