Gini Bipai Yesu Adu Nani Tipa Birĩ-Zogarago?

ABAKEKE akitabu Wene Pangbanga akeke apai tipa gu dungu aregbo Yesu agbiatiko na pa birĩ-zogarago ti regbo gako sunge tungusapai. Nikpiapai, ngbutuko tifuo Yesu zi bapatiza garãko kidu wa 30, Bakitingbanga agumba gupai fuko nga ko du ni bazogo zegino dunduko. Kusa, ndurumo aboro aida ka maa ko nigayo bakindo. Berewe a, aboro aʹasadi ka sosoda ko tipa ko da ni boro birĩ-zogarago. Ginipai Yesu amangihe? Ani makianga pai tipa agi apai re.

Bazogo zegino. Akitabu Wene Pangbanga nagumba gupai nga Bakitingbanga aya fu Yesu wee, ko nika maa ko nibakindo kurii agu ‘angbi nga ga zegino dunduko.’ Oni berẽnga pa gu weneapai Yesu arengbe ka mangaha fu aboro ka ko adi gu pagbia kubeko nga ga bazogo zegino ka mangasunge nani! Gini boro birĩ-zogarago nzunzu nga guni du na nyemu ka ye na ariapai fu rikaaboro rengbe ka ká momu wa gure? Ono Yesu aima káha.—Matayo 4:8-11.

Bakindo. Badungu agu aboro naaraka ti rago Yesu naaida gu bakindo narengbe ka nyasa riipa gayo azingo marã gbiati agu akpakarapai i aagbia tiyo nani rogo gayo birĩ-zogarago. Bambiko gu iiriwoapai i abi Yesu ko nimangihe, i aidi ko rimisi tiko kurogo agu apai yo nga ga birĩ-zogarago. Ginipai ko amangihe? Gu bake Kitabu Wene Pangbanga nangia Yoane akepai ki yaa: “Yesu ki nimo ka ina ha ya i nikaye ka zia ko, ka sa ko ni bakindo, ko ki di tiko berewe ku ri bagangara yo ni sa ko.” (Yoane 6:10-15) Si tie ziazia nga, Yesu aima ká ka rimiso tiko kurogo agu apai yo nga ga birĩ-zogarago.

Boro birĩ-zogarago. Oni bingo gupai namangi bete aʹuru mbata fu i imi Yesu. Agu abawiriki nangia ga aFarusi yó, nga aguyo naaida gayo ranirii be ga aRomo Bariwara Ngbii, kodihe kuti agu aboro naangbe na Erode, nga agu aboro naaida aida na Roma, aye fuo Yesu. I aida ka mangako ngbaome ko ngbe na aboro birĩ-zogarago. I asanako singia si aruaru aYudo tumo marã-ngbeti fu Roma.

Marako ake gu karagapai Yesu afuhe ki yaa: “‘Tipagine oni aasada re ti ni? oni ye na rukutu marã feda fere mi bi ru.’ I ki ye na u. Ko ki ya fu yo, ‘Kpia da du re, pa da ke yo ba ri he?’ I ki ya fu ko, ‘Ga Kaisara du.’ Yesu ki ya fu yo, ‘Agu ahe nga ga Kaisara oni nifu kina ha fu Kaisara, agu ahe nga ga Mbori oni nifu kina ha fu Mbori.’” (Marako 12:13-17) Buku sa nafura tipa ndu gupai Yesu akaragapai ti ni wa gure kini yaa: “Yesu aima ká kadu nigu Masiya nga bazogo rogo gi zegino re na ki moi ngbanda ti agu ahe nga ga Mbori na agu ahe nga ga Kaisara.”—Church and State—The Story of Two Kingdoms.

Wa vura duhe nga Yesu arimisongo tiko kurogo agu apai yo nga ga birĩ-zogarago te, ko aaberãpa agu akpakarapai aberã naagbia aboro wa rungo tipa aũzegino, irairapai, gbiati iraira sarangbanga. Nirengo, Ziazia Kekeapai nayugo gupai nga nunga aboro anaazio ko azio ho ko anaabi agu apai ni naamanga yó. (Marako 6:33, 34) Wa nunga aboro avura kaa manga ko vurũ, ko atonanga tua tipa ka nyasa riipa iraira sarangbanga rogo zegino te, wa kura aboro avura manga ome vurũ tipa ka rimiso ko kurogo gayo vunduvundu apai nga ga birĩ-zogarago.

Si tie ziazia rogo agi akpiapai ani nabihe re nga, Yesu aima ká ka rimiso tiko kurogo agu apai yo nga ga birĩ-zogarago. Ginipai tie du tipa aKristano areme? Ginipai si aida i mangihe?