Sanahe fu Yesu

Badungu aboro pambori nagumba gupai nga si naida pambori rimisi tihe arimiso kurogo agu apai yo nga ga birĩ-zogarago. I naberã gupai nga pambori ima rengba ka undo tipa ka nyasa riipa gu kpakaraapai nagbia aboro. Ono tie, kura aboro pambori kinaho nagumba gupai nga si aidanga pambori rimisi tihe kurogo agu apai yo nga ga birĩ-zogarago te. Ginipai oni aberãha tigaoni tipa gipai re? Ya mo si naida pambori gbiati birĩ-zogarago mangisunge wa sa?

ABORO naya tipa Yesu Kristo wee, ko “nigu boro ome gani mangaapai namoipai kurii ngbatunga aboro kisusi rogo ga ngbatunga aboro kuru pangbanga nga ga pambori.” Oni makianga pa ga Yesu karagapai ka ani sanako na gu sanahe nga, Ya mo si naida pambori rimisi tihe kurogo agu apai yo nga ga birĩ-zogarago? Ko karagapai wai? Ho ko adu ni auru kpotosende, ko akaragapai kuti gu sanahe re rogo afugoko yo na rogo gako mangaapai yo. Nikpiapai, rogo gu gako tungusapai naadu rii bagangara yo, ko aima fu arugute nga gu narengbe ka undo apefuoko i ini agu apai si aida i mangihe rogo gayo adagbarago. Ani furanga tipa bete agu apai ko agumbaha rogo gu gako tungusapai re.

Kadu na Maapai Kurii gu Raka Nga ga Kura Aboro

Yesu afura tipa gu bipai si aida apefuoko du nani tipa aboro zegino. Ko ayaa: ‘Ga zegino tikpo nga oni; ono ka tikpo ahia nga ya, si ahia be gine? Si angba nga tipa he wa sa te, kina ba ha aba i ki simbi he ni nduyo. Ga zegino imarago nga oni. . . . Imaroni hasi rago ahasa ku bangiri aboro i bi gaoni ruruapai, ka taasa rimo Baroni du ngbangbaturũ yo.’ (Matayo 5:13-16) Tipagine Yesu aringbisi gako abawiriki ti ni kuti tikpo gbiati imarago?

Agu afugoko re nayugo gupai nga i wakina tikpo, angianga fu umba rikaaboro gbua ya, ono tipa rikaaboro dunduko. I a wakina imarago angianga fu umba rikaaboro ya, ono fu agu aboro dunduko naida kaa ngera zukazuka. Nimanga Yesu sunge na agu aringbisapai re, ko ayugu gupai gbayaga nga ko aidanga apefuoko kparatiyo ti riko nga ga aboro te. Tipagine?

Oni kparianga gipai re: Ka boro aida ka banda iwo atĩo ka ami ziringo ya, si naida ní puta ra na tikpo, ka ni aputanga ra na tikpo ya, ami ziri aziro. Imawe arengbanga ka dia bitimo kusayo vuru bambu ka si du nga i moihe zagiyo te. Si du si airiwongo ti ni tirani ka bi gupai nga uru adunga ho sa Yesu agumba gupai nga gako abawiriki ndu kurogo agu aba aboro adunga rogoho ya tipa ka tona agu ariigbu yo nga kina ga aidipase sa ya. Ko agumbanga gupai fuyo a nga i raki nikparakpara yó ti kura aboro mbiko gupai gbua nga i angia aboro pambori te. Kuba gure, a wa si aida i moi tikpo amaa kurogo riahe na wa si aida i moi imawe amaa kutii bambu tipa si di bitimo kusayo, si naida aKristano koditiyo akoda na rikaaboro tipa kadu na maapai kurii gayo raka.

“Aboro zegino nga yo te”

Ono tie, gupai Yesu agumbaha nga apefuoko nikoditiyo akoda na kura aboro re nakusa nyanyakipa sanahe nibipa gu bipai si aida aKristano du nani tipa agu apai du tipa birĩ-zogarago. Tipagine gumba ani he ti ni wo? Ngbutuko mbata fu kpio Yesu, ko akpari kpee fu Mbori tipa apefuoko ki yaa: ‘Mi akpara nga foro mo rogo yó aroga zegino te, ono mo ka aka kuti yó ti gbegberẽ ko. Aboro zegino nga yó te, wa kina re adu nga ni boro zegino ya.’ (Yoane 17:15, 16) Ono wai gu tie rengbehe kadu nga aKristano ni aboro zegino te, ono i ki nikodi tiyo akoda kurogo agu apai nga ga agu aboro i araka dagbayo? Tipa ka gbia karagapai, ani makianga kura asanahe berewe biata:

• Gini bipai Yesu adu nani tipa birĩ-zogarago?

• Ginipai si aida aKristano mangihe areme?

• Gini maapai du ga aKristano yugopai nani kurii rikaaboro?