Ya Mo Iiriwoapai ti ni Nirengo?—Agu Akango Biata Aboro Naatihe

BAMBATA KANGO: Iiriwoapai arengbanga ka manga te mbiko si nagbarasa pa agu andiko ahe andu kutini. Gu inohe du ani nani tipa agu andiko ahe andu kutini, mburuhe rii agu apai aboro-birĩ-inohe abihe si nimangi rogo zegino pati rani. Ono tie, gu inohe du ani nani tipaha nikina betehe na gaani rugatinapai tipa agu andiko ahe andu kutini si nika wiri toonihe. (Eyobo 38:4) Boro-birĩ-inohe ima rengba ka dia bakere regbo rogo gaani raka yo naabaha tipa ka wirikapai tipa ndiko sa ahe andu kutini. Ono “kparakparapai” gu du ho sa nayugo gupai nga anga agu andiko re ti aregbo dunduko nga rengo te.

Pangbanga gu duho sa nayugo wai duhe taata boro moi gani berãpai kurii gupai adunga nirengo ya. John Locke (1632-170) ape gu pangbanga naadu tipa gu mokedi nangia boro Holland na gu bakindo nangia ga Thailand ko. Baraho gu mokedi re aaringbisapa gako ringara ni nga Holland fu gu bakindo re, ko ape gupai fu bakindo nga, ti kura aregbo mbarã rengbe arengba ka ndu rii ime. Bakindo aidanga kuti gupai re te mbiko ko abihe nga gu mokedi re nananga ko. Ono tie, gu mokedi re aape gupai gu bakindo re ainongo pai tipaha mbata rogo gako raka ya. Gu bakindo re ainongo gupai nga ho ime akputa ni ki da wakina mbia, mbarã rengbe arengba ka ndu rihe te. Gipai re aima kpakara bangiri gu bakindo re mbiko ko ainongo agu arengo dunduko naadu tipa gupai re te.

Ani makianga bete gu vovo apai namanga awere nga gu aboro aarengbanga ka ida kutini bete bawe agarã kusayo ya.

● Tiara rengbe ka dia aboro niima susa 800 New York yo ka ndu naayo ku Singapore yo zanga si ru gene, na kini oro ato nga amairo 560 vuru saa yo sa.

● Aboro naraka rogo aringara nibakiakia rengbe ka yamba tiyo rogo Internet ki ta fura kini bi tiyo abi.

● I rengbe ka igo akutu abia rogo wiri tooni he du wakina sisi kibiriti.

● Amunganga rengbe arengba ka dia ngbadu gu kura boro kia watadu gu kura barapa boro kia ki moihe ti gu kurani.

Gini digisopai rengbe ani kada kutini nibi agi apai re? Kangia aboro rengbe arengba ka manga agu apai aboro aabihe bete agarã kusayo nga ka si mangingo te, nirengo tie, gu Mbori nakusi zegino na agu ahe dunduko du rogoho rengbe arengba ka manga gupai du niʹiiriwoho ani arengbanga ka rugatirani nani ya watadu ka mangaha a ya.a—Bambata Pai 18:14; Matayo 19:26.

UE KANGO: Gu iiriwopai du rogo Ziazia Kekeapai nasa gupai nga aboro niidi kutini. Ziazia Kekeapai apenga gupai furani nga ani idi kuti iiriwoapai dunduko te. Nirengo, Ziazia Kekeapai naza rani nga ani du na rubangirise tipa kido kuti iiriwoapai gbiati gu mangaapai nga ga tandu. Oni makianga gi zahe re: “Gu ni ki ye ku sangba gu mangapai yo nga ga Satana ni tandu dunduko na agu apai i aina pai ti ni na irazire iiriwo apai, na gu biriki dunduko nga ga irairapai.”—2 ATesaroniko 2:9, 10.

Yesu Kristo ape gupai nga dungu aboro nika ta ngbaduyo nga i napekafuo ko ono ndikidi apefuoko nga yó te. Aguyo nika ya fuko wee: “Gbia, Gbia, ani afuga nga pai ni rimoro, te? Ani ado nga adaimona ni rimoro, te? Ani amanga nga agu apai du na tandu ni rimoro te?” (Matayo 7:22) Ono Yesu agumba gupai nga ko adianga yó ni apefuoko te. (Matayo 7:23) Si tie ziazia nga, Yesu ayugongo gupai nga iiriwoapai dunduko naye be Mbori te.

Mbori aidanga airisiko moi mburu gayo idapase rii iiriwoapai gbua te. Kuba gure, ko naida i moi mburu gayo idapase rii arengo.—AEbere 11:1.

Ani makianga pai sa tipa gu iiriwopai du rogo Ziazia Kekeapai nga gu dungu aboro nainipai tipaha nga pa zinga Yesu Kristo bekpio. Dungu agarã kusa fuo manga gupai re, kura aKristano Korinda yo atona ka tikango singia Yesu azingi nzunzu bekpio. Gu mokedi nangia Pauro aundo agi aKristano re wai? Ya mo ko aya fuyo gbua we “I Duna Bakere Idapase”? Oó. Oni kparia wai ko atingidiyo naapa gu rengo namangi. Ko ape gupai nga, ‘i akpisidi Yesu; na i azingisi ko ti biata uru ku sangba Ziazia Kekeapai yo. Na ko ayugu tiko fu Kefa; fuoho fu aguyo naanidu bawe na ue; ko ki yugu tiko fu agu awirina nasusi 500 nibasa, aguyo nye nidunguyo da ku awere, ono beteyo ti nirame. Ko ki yugu tiko tie fu Yakoba, fu amokedi dunduko tie. Ti yangara ha dunduko, ko ayugu tiko fere wa fu gu boro i avunganga ní ti rago vunga ya.’—1 AKorindo 15:4-8.

Ya mo si adu ni nyanyakipa pai fu agu aKristano re i idi kuti gu iiriwopai re? Pauro ape gu kurapai ki yaa: “Ka i azingisa nga Kristo ya, gaani tungusapai du tie gbua, gaoni idapase a si gbua.” (1 AKorindo 15:14) Si aima du ninyanyakipa pai fu Pauro ko moi mburu gako idapase kurii gu iiriwopai namangi amanga nzunzu re. Na ko aima inoho nga gu iiriwopai namangi tipa ga Yesu zinga bekpio re, kina rengo du. Na ko aima inoho nga kina rengo du mbiko kama adezire naadu kina ti unga ragoko. Nirengo, agu adezire re aima ida ka kpi kuba gupai nga i tikango gupai i abihe nibangiriyo.—1 AKorindo 15:17-19.

BIATA KANGO: Iiriwoapai nga kungbo yuguyugupai azanga wirikapai agia tiyo nani ngba iraira gene. Gu kura wene abawirikipai tipa Ziazia Kekeapai naʹasada ka sakapai tipa gu iiriwoapai du rogo Ziazia Kekeapai wa agu apai naayengo be ga Mbori ome ya. I nabihe nga agi apai re nasa gupai nga aboro niidi kuti Ziazia Kekeapai. Wa vura duhe nirengo nga gu kura yuguyugupai kinaho nandu sa na iiriwo mangapai, ngbatunga gu du wa abazigizo, agberãngbi, na bakere dogoro, si dunduko naye mbiko bangisapai sa. Si dunduko andunga kuti gu regbo nga ga iiriwo mangapai wai saki yó pai tipaha rogo Ziazia Kekeapai yo ya.

Nikpiapai, kura aboro nape gupai nga gu bambata gberãngbi namangi Ezipeta yo nga ime Nire satihe nikure re, si amangi mbiko zamba sende naturã tihe ku Nire yo. Ono tie, Ziazia Kekeapai nape gupai nga ime nasatihe nikure angianga zamba dogoro ya. Gate 7:14-21 nayugo gupai nga gi iiriwopai amangi ti gu regbo Moize aya fu Arona ko nari Nire na gako ngbondo. Ka si vura du nga gu kurapai kia namangi ki sa ime Nire nikure, gu regbo Arona anari gu di re ti ni angia kina iiriwopai nitihe.

Tipa ka rugutirani berewe naapa gu regbo nga ga iiriwopai, ani makianga gupai namangi ti gu regbo aYisaraere aambeda ka rimo kurogo Ringara Mokido. Gu di nga Yaradene ahi na ki ká na gene beyo. Ziazia Kekeapai nape gupai namangi ni yaa: “Ho agu yo natindi sanduki ada ni Yaradene yo, kpendu agu aboromotumo natindi sanduki zoro ku ime yo, . . . gu ime naye ngbi yo si ki ru ki nidungura tihe tuturũ toni ku rogo baha sa, ku Adama yo.” (Yosua 3:15, 16) Ya mo gipai re amangi nisangbana bazigizo watadu bakere dogoro? Gu pangbanga re apenga ha wo te. Ono gu regbo gupai re amangi ti ni, si adu niʹiiriwopai. Si amangi kina boro ti gu regbo Yekova apehe nga si nika manga ti ni.—Yosua 3:7, 8, 13.

Wa duhe tie were, ya mo iiriwoapai ti ni areme? Ii, Ziazia Kekeapai nape gupai nga si kina ti ni. Nibi gupai si apehe furani, anga gu iiriwoapai re nga kungbo yuguyuguapai gbua te. Ya mo ani rengbe ka ya wee si ima kpakara iiriwoapai nimangi mbiko gupai nga si amanganga na aʹuru dunduko te?

[Gu rukutu kekeapai du bandu kpewaraga yo]