Ya Mo Oni Rengbe ka Ida Kuti Gu Iiriwoapai Du Nikekehe Rogo Ziazia Kekeapai?
KA BORO gumba iiriwo pangbanga furoni, anga gupai ka saroni oni idi kutini nga ní naagumba rengo agumba mbata te? Anga gupai gbua ka saroni oni idi kuti gu pangbanga re nga gu gene ní naagumba agu apangbanga re mbata ngbaha te, ono mbiko gupai nga agu apangbanga ní naagumbaha dunduko ningia rengo. Nirengo, ka si du nga rogo agu agarã susi kusayo dunduko, ní naagumba kina rengo furoni na ní aʹasadanga ka gumba ziree furoni te, oni duadu na wene ndupai beroni tipa ka ida kuti gupai ní agumbaha.
Kina gu bangisapai re du tipa gu iiriwoapai du nikekehe rogo Ziazia Kekeapai. Boro ho dagbarani areme naadu ti unga ho agu apai re aamanga ni te. Ono ani rengbe arengba ka ino singia si naida ani idi kuti agu apangbanga re ka si du nga rengo kina rogoho. Wai gu rengbe ani ka inoho? Bete apai gu du kusende re nga gu nasa gu iiriwoapai du rogo Ziazia Kekeapai nirengo.
I amangi dungu gu iiriwoapai re dagba badungu aboro. Ti kura aregbo, badungu kutu aboro watadu amirioni aboro nabihe. (Gate 14:21-31; 19:16-19) I anaamanganga gu iiriwoapai re nigbuko rogo agu aba aboro adunga rogoho ya te.
Gu iiriwoapai re anaamanga ngba taata gene. Agu aboro naamangaha anaayengo na dungu riko ahe, awe kini kiki kina boro bamboiko kini mangi te. Gu iiriwoapai i nake paha rogo Ziazia Kekeapai, dunguhe nanaamanga gbua mbiko momu watadu aboro nanaasanahe tipaha. (Marako 5:25-29; Ruka 7:11-16) Ti ngbatunga agu aregbo re, gu boro nani mangi gu iiriwopai re arengbanga ka mbakada tiní mbata na riko dungu ahe te.
Agu aboro nanaamanga gu iiriwoapai re adunga na gu sásá nga ga gbia worimo, taarimo, watadu kumuko te. Ono i aamangaha tipa ka ye na taarimo fu Mbori. (Yoane 11:1-4, 15, 40) Agu aboro nani asadi ka gbia kumuko vurube manga iiriwoapai, si anigbere fuyo wa pai.—2 Abakindo 5:15, 16, 20, 25-27; Amokedi 8:18-23.
Gu ngbatunga iiriwoapai i nake paha rogo Ziazia Kekeapai nayugo gupai ayugo nga anga si adu gbua nga gu mangaapai nga ga aboro te. Nikpiapai, Yesu aza baime ti sungburo na ki rugusi bayuge, ko asa ime kurogo imekakue, i arugusi mai ti na na ki sa mai tipa si na, i ahusi aborokaza, na ki zaki bangiri airavurari. Gu dungu ngbatunga iiriwoapai re naabaha nayugo gupai nga ome kinaho nga gu naima susa gu nga ga aboro naadu kugiihe.—1 Abakindo 17:1-7; 18:41-45; Matayo 8:24-27; Ruka 17:11-19; Yoane 2:1-11; 9:1-7.
Agu asogo ndikidi pambori nabi gu iiriwoapai re atinga kangoho te. Ho Yesu azingisi gu bakureako ni nangia Razaro bekpio, asogo Yesu atinga kango gupai nga Razaro aima kpi te. Ka i aru wai ka ti kango kpioko? Ko aima dia auru ku muro yo biama. (Yoane 11:45-48; 12:9-11) Zavura tifuo dungu kama agarã fuo kpio Yesu, agu aboro nakepai tipa agu aNdiko mangaapai naadu tipa aYudo aima gumba pa gu ome mangaapai naadu ti Yesu. Gupai i atikango nani nga pa wari ko agbia gu ome re ni. Teketeke a, ho i ayeni na ga Yesu abawiriki ku ngbangayo barabangiri aYudo, i asananga yó nga “Ya mo oni nimangi iiriwopai” te. Ono i asana yó nga: “Gini tandu mangi oni gi pai na ni re, ni rimo da?”—Amokedi 4:7.
Sidu tie, ya mo oni rengbe ka ida kuti gupai Ziazia Kekeapai agumbaha furani tipa iiriwoapai? Ringbisihe kuti agu apai wisigi ani he re, si ziazia nga gu iiriwoapai i nagumba paha rogo Ziazia Kekeapai, kina boro rengo du. Gu kura nduapai kinaho rengbe ka sa rani ani idi kuti agi apangbanga du rogo Ziazia Kekeapai re. Nikpiapai, ho Ziazia Kekeapai afura ni tipa pangbanga, si nagumba pa gu regbo si amangi ti ni, gu ba si amangi rogoho, na rimo agu aboro naadu rogo gupai re. Zavura agu aboro nawisigopai sirisiri tipa Ziazia Kekeapai ka ino singia rengo du nga agu apai du rogoho, ngbayo ima zera ka bi wai du gu kuru apangbanga du rogo Ziazia Kekeapai niruruhe. Dungu kama agu asangbaanebi du rogo Ziazia Kekeapai digisitihe na agu afutufutuhe dunduko. Kurigure, Ziazia Kekeapai na gu wene arugute rogoho nga gu rengbe ka undo aboro i du na wene pagume dagbayo. Gu rugute re ima undo dungu ngbatunga aboro. Gu rugute Ziazia Kekeapai afuhe fu aboro nibipa gu pagume du dagba aboro, gu kura rugute ho ngba kisusihe te.
Ka si du nga oni ata dunga naa kido kuti Ziazia Kekeapai na kpotoroni yo dunduko te, si angba wa pai ka oni di regbo ka wisigoho berewe sirisiri. Wa oni kaa dia regbo kutini kaa inoho, kinawo a oni ka tona kaa kido kutini. (Yoane 17:17) Oni ka ye ka ino gupai nga oni rengbe arengba ka kido kuti agu apai si agumbaha tipa gu iiriwoapai namangi bakuru kusayo. Ka oni ta ida kindi kuti agu apangbanga re, oni nikadu adu na wene ndupai beroni ka kido kuti agu apai Ziazia Kekeapai agumba gupai nga si nika manga barambeda kumbatayo.
[Gu sura du ti kpewaraga 5]
Asogo Yesu atinga kango gupai nga Razaro aima kpi te