Agu Apai Naasa ga Yesu Raka si du Niwenehe

YA MO Yesu araki wene raka nzunzu? I asonosi ko rogo gu kporo nangia ga airarungo, na rogo gako raka yo, ko aadunga na dungu ahe beko te. Nirengo, ‘ba aadunga beko ka ko api auru he te.’ (Ruka 9:57, 58) Kurigure, i asogoko, ki peziree kutiko, na niyangaraha asogoko ki imiko.

Mo ima rengbe ka berãha nga, ‘Wene raka nga ngbatunga gu raka re te!’ Ono apai kinaho tipa ga Yesu raka si aida ani wisigihe. Ani makianga apai biama tipa gako raka.

1. YESU ADUNA NDUPAI ROGO GAKO RAKA YO NGA KA MANGA GUPAI MBORI AKPINYEMUHE.

“Gi riahe nga manga kina gu pai gu ko akpi nyemu he nakedi re.”—Yoane 4:34.

Rogo gako afugo yo na mangapai, ko anaaberãpa manga gupai Bako akpinyemuhe nga Yekova.a Ko anaagbia bakere ngbarago rogo manga gupai Mbori akpinyemuhe. Ko aringbisihe kuti riahe, a wa duhe rogo gu veresi di ani pai rogoho kuari re. Ani bingo gu regbo ko ape gipai re ti ni.

Yesu ape agi afugo re bara bebere uru. (Yoane 4:6) Ko andu kere nunguro dagba agu ambia nangia ga Somorona rogo gu wiso re, nirengo gomoro aamanga ko amanga. Si du gako abawiriki ayaa ti ni fuko wee: “Bayugupai, mo rí he.” (Yoane 4:31) Rogo ga Yesu karagapai yo, ko ayugu gupai nga manga ga Mbori sunge nanyakasi ko na si adu fuko wa riahe. Ya mo gipai re ayugonga gupai nga ko wagu boro naraki wene raka te?

2. YESU ADUNA BAKERE NYEMU BAKO.

“Mi nakpi nyemu Buba.”—Yoane 14:31.

Yesu aduna wene pagume dagbako na gu Bako du ngbangbaturũ yo. Gu bakere nyemuse Yesu adu nani tipa bako asako ko yugu Bako, Rimoko, gako ringbisapai, na asinoko. Afugo Yesu, gako mangapai, na asinoko, ayugukpia Bako, na si ki sa gupai nga ani bi ndikidi asino Bako. Sidu, ho Firipo asana Yesu ni ki yaa: “Mo yúgu Bamo furani,” ko akaragapai ki yaa: “Gu ni bi re ni bi Buba.”—Yoane 14:8, 9.

Yesu aima kpinyemu bako nibakerehe na si asa gupai nga ko gisangbako dati kpio. (AFiripoio 2:7, 8; 1 Yoane 5:3) Ngbatunga gu nyemuse tipa Mbori re naasa ga Yesu raka si du niwenehe.

3. YESU AKPINYEMU ABORO.

“A nga boro sa du na bakere nyemuse susi gi nga, boro bagi kpioni tipa abadiangbani te.”—Yoane 15:13.

Wa du ani nikpakpa aboro, rurupai adunga tipa gaani raka kumbatayo te. Ziazia Kekeapai nayaa: “Wa gbegberẽpai akuru ku zegino mbiko boro sa, [Adamu] kpio ki du mbiko gbegberẽpai; si du kpio andu andu ti ni sa aboro dũ, bambiko i aingi ainga dũ.” (ARomo 5:12) Ani arengbanga ka bata be mosoro ingapai nga kpio ngba gaani ome te.—ARomo 6:23.

Si nipa ngbarago nga, mbiko ga Yekova nyemuse, ko afu maabangirise furani. Ko ambugene tipa rengberengbe Wiriko ingapai aadunga tiko ya nga Yesu ye ka rungo na ki kpi tipa kafu motumo tumorii ka batasa rani be ingapai na kpio. Mbiko gu nyemuse Yesu adu nani tipa Bako na tipa aboro, ko afu rengberengbe ungako tipa rani. (ARomo 5:6-8) Ngbatunga gu nyemuse zanga gbangbati re asa gako raka si du niwenehe.b

4. YESU AIMA INOHO NGA BAKO IMA KPINYEMUKO NA KI IDI PAKO.

“Wire du re, nyemuko namanga re, ngba ko ti re gbe.”—Matayo 3:17.

Yekova ape agi afugo re ngbangbaturũ yo ti regbo ga Yesu bapatiza. Rogo gi gene re, Yekova ayugu gako nyemuse gbayaga tipa Wiriko nga Yesu na ki idi pako. Si du si airiwonga ti ni ya ka bi gupai Yesu apehe ki yaa: “Buba nakpi nyemu re”! (Yoane 10:17) Pa inoko gupai nga Bako nakpinyemuko na kini idi naako, asa ko ko gbiatiko na akpakarapai na sogote niwingbaduse. Ko akakuti padu ko niruruko dati regbo kpioko. (Yoane 10:18) Pa ino Yesu gupai nga Bako aima kpinyemuko na ki idi pako asa gako raka sidu niwenehe.

Yesu aima raka wene raka. Si tie ziazia nga, ani ima rengba ka wirika dungu apai beko tipa wai ko araki gako raka na si kidu niwenehe. Gu kekepai naye fuo gere nika fura tipa gu bawene rugute Yesu afuhe fu apefuoko tipa wai rengbeyo ka raka.